КАЖНЕ арнян да оҥайын Библийым шкевуя шымлаш тыланда куштылго мо? Чылаштланат тидым ышташ южгунам йӧсӧ лийын кертеш. Но шоналтыза тыгай нерген, мом ме чӱчкыдын ыштена. Мутлан, мушкылтына. Мушкылташлан жапым ойыраш да вийым пышташ кӱлеш. Но тидын деч вара могай сай да каплан куштылго! Библий шымлымашым свежаҥдыше душ дене таҥастараш лиеш (Еф. 5:26). Лончылен налына икмыняр каҥашым, кудышт тыланда Библийым кажне арнян да оҥайын шымлаш полшен кертыт.

• Палемдыза, кунам те шымлаш тӱҥалыда. Библийым шкевуя шымлымаш тӱҥ паша-влакыш пура да тидым кажне христиан ыштышаш (Флп. 1:10). Шымлашлан кече ден жапым палемдыза. Тидым кагазеш возыза да шинчалан коймо верыш сакыза, мутлан холодильникыш. Але телефонышто шкаланда шарныктымашым шындыза.

• Тыланда келшен толшо жапым да шымлымаш методым ойырен налза. Иктыштлан шуко жап шымлаш келша, а весышт шагал шымлат гынат, тидым чӱчкыдын ыштат. Те сайрак паледа, мо лач тыланда келшен толеш. Сандене шымлымашдам шкаланда келыштарыза. Но шымлашлан палемдыме жап шуын гын, а шымлаш кумылда уке, мом ышташ? Тунам 10 минут веле шымлем манын шкаланда каласыза. Те 10 минут шымледа гынат, шукылан тунемыда. А тидын деч вара тендан, очыни, эше шукырак шымлаш кумылда лектеш (Флп. 2:13, УТ).

• Ончычак шоналтыза, мом те шымлаш тӱҥалыда. Шымлыме годым темым ойыраш тӱҥалыда гын, те, очыни, «жапым пайдалын» ода кучылт (Еф. 5:16). Могай статьям але темым шымлымыда шуэш, тидым спискыш возыза. Мутлан, тендан иктаж-могай йодышда лектын гын, тудым вигак возен шындыза. А шымлымыда годым эше иктаж-мом шымлаш кумылда лектеш гын, тиде темым спискышкыда пуртен кертыда.

• Лывырге лийза. Библийым кажне арнян шымлыман. Тиде эн тӱҥжӧ. А шымлымашын кечыжым, жапшым, мыняр шуйнымыжым да темыжым кӱлеш гын, вашталташ лиеш.

Ме Библийым кажне арнян шымлена гын, шуко суапландарымашым налына. Ме Иегова дене лишылрак лийына, уш-акылан решений-влакым лукташ тунемына да духовный шотышто пеҥгыде лийына (Иис. Н. 1:8).