1. Суксо мом ойла да тудын шомакше мом ончыкта?

 СУКСО тендан дене мутланаш тӱҥалеш ыле гын, те тудым колыштыда ыле мо? Лачак тиде таче лиеда — суксо «чыла калыклан, тукымлан, йылмылан да йыжыҥлан» ойла. Мом тудо ойла? «Юмо деч лӱдса, Тудым чапландарыза... Кавам да мландым, теҥызым да памаш-влакым... [Ыштышылан], сукен, вуйым савыза!» (Почм. 14:6, 7). Иегова — ик чын Юмо, да чыланат тудлан гына служитлышаш улыт. Иеговалан кугу тау, вет тудо мыланна кугу духовный храмыштыже тудлан служитлаш чапым пуэн!

2. Мо тыгай Иегован духовный храмже? (Тыгак « Духовный храм — тиде...» рамкым ончыза.)

² Духовный храм тиде мо тыгай да тудын нерген шукырак ме кушеч пален налын кертына? Духовный храм — тиде тыглай зданий огыл. Тиде Иеговалан келшыше служитлымаш радам, кудыжым Иисус Христосын надыреш негызлыме. Тиде храм нерген апостол Павел Иудейыште илыше еврей христиан-влаклан серышыште возен b.

3, 4. Павел Иудейыште илыше христиан-влак верч молан тургыжланен да кузе тудо нунылан полшен?

³ Павел Иудейыште илыше христиан-влаклан молан серышым возен? Тидлан тудын кок амал лийын кертын. Икымше, тудо нуным кумылаҥдынеже ыле, вет нунын гыч шукышт ончыч иудаизм религийыште лийыныт. А ындыжым, христиан лиймеке, ондакысе религиозный вуйлатыше-влак нуным воштылын кертыныт. Молан? Молан манаш  гын, христиан-влакын храм, жертвенник ден священник-влак лийын огытыл. Тидын верч Христосын тунемшыж-влак шӱлыкаҥ кертыныт да нунын ӱшанымашышт лушкыдем кертын (Евр. 2:1; 3:12, 14). Иктажше иудаизм религийыш пӧртылмӧ нерген шоненат кертын.

⁴ Кокымшо, Павел иза-ака-влакын вниманийыштым теве мо́лан ойырен: нуно Юмын Мутшо гыч келге духовный шинчымашым але у туныктымашым умылашлан вийым пыштен огытыл (Евр. 5:11—14). Ту христиан-влак гыч южышт алят Моисейын закон почеш иленыт докан. Но Павел умылтарен: закон почеш кондымо надыр-влак еҥ-влакым язык деч тӱрыснек утарен кертын огытыл. Лач сандене закон кораҥдыме лийын да тудым ынде шукташ огеш кӱл ыле. Вара Павел шке серышыштыже келге шинчымаш-влакым палемден. Тудо христиан-влаклан сайрак ӱшан нерген шарныктен, кудыжо Иисус Христосын надырешыже негызлалтын, да лач тиде ӱшан еҥ-влакым Юмо дек лишемден кертеш (Евр. 7:18, 19).

5. Еврей-влаклан колтымо серышым лудын, мом мыланна умылаш кӱлеш да молан?

⁵ Павел еврей иза-ака-влаклан умылтарен, молан христиан-влакын Юмылан служитлымашышт еврей-влакын ожнысо служитлымаш деч сайрак. Кузе нуно ончыч Юмылан служитленыт — тиде «мо лийшашын ӱмылжӧ веле» лийын. А кузе нуно кызыт, Христослан ӱшанен, Юмылан служитлаш тӱҥалыныт — тиде реальность (Кол. 2:17). Ӱмыл предметын сынжым гына палдара. Акрет жапыште еврей-влакын служитлымашышт Юмын шонен пыштыме служитлымашын «ӱмылжӧ» веле лийын. Мыланна умылаш кӱлеш, мом Иегова языкнам проститлашлан ыштен. Тидлан кӧра ме тудлан келшышын служитлен кертына. Айста «ӱмылым» (акрет жапыште еврей-влакын служитлымыштым) «реальность» дене (христиан-влакын служитлымышт дене) таҥастарена. Тиде таҥастарымашлан кӧра ме сайрак умылен кертына, мо тыгай духовный храм да могай пайдам тудо мыланна конда.

6. Священный шатёрым кузе кучылтыныт?

⁶ Акрет жапыште еврей-влакын служитлымышт. Священный шатёрым шотыш налын, кудыжым Моисей мемнан эра деч ончыч 1512 ийыште шогалтен, апостол Павел  Иегован духовный храмжым лончылен. («Акрет жапыште еврей-влакын служитлымышт. Христиан-влакын служитлымышт» схемым ончыза.) Израильтян-влак кажне гана ик вер гыч вес верыш куснымышт годым тиде шатёрым пелен налыныт. Иерусалимыште храмым чоҥымешке, тудым 500 ий наре кучылтыныт (Исх. 25:8, 9; Чис. 9:22). Тиде «вашлиймаш шатёр» тыгай вер лийын, кушко израильтян-влак Юмылан служитлаш да тудлан надырым кондаш толыныт (Исх. 29:43—46). Но священный шатёр тыгак ала-мо сайракым ончыктен, мо христиан-влакын ончыкыжым лийшаш ыле.

7. Кунам духовный храм шогалтыме лийын?

⁷ Христиан-влакын служитлымышт. Акрет годсо священный шатёр «пылпомышсын... ӱмылжӧ» лийын. Павелын каласымыже почеш тудо кызытсе улшо Иегован духовный храмжым ончыкта (Евр. 8:5; 9:9). Тугеже, кунам Павел еврей-влаклан серышым возен, духовный храм уже лийын. Тудо мемнан эран 29 ийыште шогалтыме лийын. Ту ийыште Иисус тынеш пурен, святой шӱлыш дене шӱрымӧ лийын да Иегован духовный храмыштыже Кугу Первосвященник семын служитлаш тӱҥалын (Евр. 4:14; Ап. паш. 10:37, 38) c.

8, 9. Израильысе первосвященник-влак Кугу Первосвященник Иисус Христос деч мо дене ойыртемалтыныт? (Еврей-влаклан 7:23—27).

⁸ Акрет жапыште еврей-влакын служитлымышт. Первосвященник Юмо ончылно калыкын представительже лийын. Израильын икымше первосвященникше Аарон лийын. Иегова тудым ту кечын служитлаш шогалтен, кунам служитлымашлан священный шатёрым кучылташ тӱҥалыныт. Но Павелын умылтарымыже почеш служитлымаш ынже чарне манын, священник-влаклан икте-весым алмашташ логалын, вет «колымаш служитлымаште чаракым ыштен» d. (Еврей-влаклан 7:23—27 лудын лекса.) Первосвященник-влак языкан лийыныт, сандене нунылан языкышт верч надырым кондаш кӱлын. Тиде тӱҥ ойыртем лийын, мо дене Иисус, Кугу Первосвященник, ту первосвященник-влак деч ойыртемалтын.

⁹ Христиан-влакын служитлымышт. Иисус Христос, мемнан Первосвященникна, чын шатёрышто служитла. Тиде шатёрым айдеме огыл, а Иегова шогалтен (Евр. 8:1, 2). Павел каласен: «Иисус курым-курым дене ила». Сандене тудын священствыжым иктат огеш алмаште. Апостол тыгак ешарен: Иисус «яндар, языкан-влак деч ойырымо» да израильысе первосвященник-влак дене таҥастарымаште тудлан языкше верч кажне кечын надырым кондаш огеш кӱл. А ындыжым айста ончалына, мо дене акрет жапысе еврей-влакын да тачысе христиан-влакын жертвенник ден надырышт ойыртемалтыт.

10. Еврей-влакын вӱргене жертвенник ӱмбалне кондымо надырышт мом ончыктен?

¹⁰ Акрет жапыште еврей-влакын служитлымышт. Священный шатёр ончылно вӱргене жертвенник шоген. Тудын ӱмбалне Иеговалан вольыкым надыреш конденыт (Исх. 27:1, 2; 40:29). Но нине надыр-влаклан кӧра калык языкше верч тӱрыснек проститлыме лийын кертын огыл (Евр. 10:1—4). Священный шатёрышто кажне кечын надырым конденыт.  Тиде ончыктен: ончыкыжым тыгай надыр кондымо лиеш, кудыжо айдеме тукымым языкше деч тӱрыснек тӱлен налеш.

11. Иисус шкенжым могай жертвенник ӱмбалне надыреш конден? (Еврей-влаклан 10:5—7, 10).

¹¹ Христиан-влакын служитлымышт. Иисус пален, Иегова тудым еҥ-влакым язык деч тӱлен налашлан мландыш колтен (Матф. 20:28). Тынеш пурымо дене Иисус Иегован эрыкшым шукташ ямде улмыжым ончыктен (Иоан. 6:38; Гал. 1:4). Символический жертвенник, кудо ӱмбалне Иисус колен, — тиде Юмын «эрыкше». Юмын эрыкше почеш тудын Эргыже языкдыме илышыжым надыреш кондышаш ыле. Иисус тудлан ӱшаныше кажне еҥым язык деч тӱлен налын. Тидлан тудо шкенжым надырлан ик гана веле пуэн. (Еврей-влаклан 10:5—7, 10 лудын лекса.) А ындыжым айста ончалына, мо священный шатёрын кӧргыштыжӧ лийын.

12. Священный шатёрын кажне пӧлемышкыже кӧ пурен кертын?

¹² Акрет жапыште еврей-влакын служитлымышт. Священный шатёр да варарак Иерусалимыште чоҥымо храм-влак кӧргышт дене икгай лийыныт. Кӧргыштӧ кок пӧлем лийын: Святой вер да Святой дечат святой вер. Нуным пӱрдыш ойырен (Евр. 9:2—5; Исх. 26:31—33). Святой верыште шӧртньӧ светильник, фимиамым йӱлаташлан жертвенник да надыр киндылан ӱстел лийыныт. Заданийым шукташлан тушко «шӱрымӧ священник-влак» гына пурен кертыныт (Чис. 3:3, 7, 10). Святой дечат святой верыште шӧртньӧ сугынь ковчег шоген,  кудыжо Иегован Израиль калык дене пырля лиймыжым ончыктен (Исх. 25:21, 22). Тушко, пӱрдышын вес могырышкыжо, первосвященник гына пурен кертын. Тудо тидым кажне ийын Сулымаш кечын ыштен (Лев. 16:2, 17). Первосвященник, тудын языкше да уло калыкын языкше проститлыме лийышт манын, пеленже вольык вӱрым налын. Тыге кажне ийын эртен. Жап эртымеке, Иегова, святой шӱлышыжым кучылтын, служитлышыж-влаклан умылтарен, мом священный шатёрын нине пӧлем-влак ончыктат (Евр. 9:6—8) e.

13. Святой вер да Святой дечат святой вер мом ончыктат?

¹³ Христиан-влакын служитлымышт. Иисус дене пырля 144000 святой шӱлыш дене шӱрымӧ тунемшыже каваште священник семын служитлаш тӱҥалеш (Почм. 1:6; 14:1). Эше мландыште илымышт годым Юмо нуным святой шӱлышыж дене шӱра да эргылыкеш пурта. Святой вер нунын Юмо дене ойыртемалтше кыл кучымашыштым ончыкта (Рим. 8:15—17). Святой дечат святой вер ончыкта кавам, кушто Иегова ила. Святой вер ден Святой дечат святой верым «пӱрдыш» ойырен. Тудо Иисусын физический капшым ончыкта. Айдеме лиймыж годым тудо кавашке пурен кертын огыл. Еҥ-влак верч капшым надыреш пуымо деч вара Иисус каваш кӱзен да чыла шӱрымӧ христианлан кавасе илышлан корным почын. Кавасе пӧлекым налашлан нуныланат физический капышт деч утлаш кӱлеш (Евр. 10:19, 20; 1 Кор. 15:50). Ылыжмеке, Иисус духовный храмын Святой дечат святой верыш пурен, кушто жап эртымеке шӱрымӧ христиан-влак чыланат тудын дек ушнат.

14. Таче Иеговалан келшыше служитлымаш радам ожнысо деч молан сайрак? (Еврей-влаклан 9:12, 24—26).

¹⁴ Ме ужынна, могай служитлымаш радамым Иегова таче йӧрышылан шотла. Тудо Иисусын тӱлен налме надыр ден священствыж дене негызлалтын. Тиде служитлымаш радам ожнысо деч шуко пачаш сайрак. Израильыште первосвященник еҥ-влакын ыштыме шатёрын Святой дечат святой верыш вольык вӱр дене пурен. А Иисус Юмын ончылно шогалашлан эн святой верыш — «пылпомышкак» — пурен. «Языкым пытарашлан» тушто тудо сулыкдымо айдеме семын илаш праважым Юмылан пуэн. (Еврей-влаклан 9:12, 24—26 лудын лекса.) Иисусын надыржылан кӧра еҥ-влакын сулыкышт проститлалтеш. Кузе ме умбакыже пален налына, кеч каваште, кеч мландыште илаш ӱшанена, ме чыланат Иеговалан духовный храмыштыже служитлен кертына.

15. Священный шатёрын кудывечыштыже кӧ служитлен?

¹⁵ Акрет жапыште еврей-влакын служитлымышт. Священный шатёр йыр кудывече лийын — лӱмын ойырымо вер, кушто священник-влак пашаштым шуктеныт. Тушто йӱлалтен пуымо надырлан кугу вӱргене жертвенник шоген, а эше вӱд дене темыме вӱргене чан лийын. Тиде вӱд дене священник-влак служымашым тӱҥалме деч ончыч мушкылтыныт (Исх. 30:17—20; 40:6—8). Варарак чоҥымо храм-влакыште тыгак тӱжвал кудывече лийын, кушко Юмылан служитлашлан вес еҥ-влакат толын кертыныт.

16. Духовный храмын кӧргӧ да тӱжвал кудывечыште кӧ служитла?

¹⁶ Христиан-влакын служитлымышт. Иисус дене пырля каваште священник семын служитлаш тӱҥалме деч ончыч мландыште  илыше шӱрымӧ христиан-влак духовный храмын кӧргӧ кудывечыштыже ӱшанлын служитлат. Вӱд дене темыме кугу чан нунылан да чыла христиан-влаклан шарныкта, мыняр чот духовный да нравственный шотышто ару кодаш кӱлеш. А Христосын шӱрымӧ изаж-влаклан полшышо «моткоч шуко калык» нерген мом каласаш лиеш? Юмылан нуно кушто служитлат? Апостол Иоанн престол ончылно шогымыштым ужын. Престол ончылно вер — тиде духовный храмын тӱжвал кудывече, кушто нуно Юмылан «йӱдшӧ-кечыже служитлат» (Почм. 7:9, 13—15). Иеговалан кугу тау, вет тудо мыланна тудын кугу духовный храмыштыже служитлаш йӧным пуэн!

17. Ме Иеговалан могай надырым конден кертына?

¹⁷ Таче христиан-влакат Иеговалан надырым конден кертыт. Жапыштым, вийыштым да материальный погыштым Юмын Кугыжанышын пашажлан пуымо дене тидым ыштен кертыт. Апостол Павелын возымыж дене келшышын, ме «Юмылан моктымаш надырым, вес семынже, Тудын лӱмжым чапландарыше йылмын саскажым, чарныде конден шогышаш улына» (Евр. 13:15). Иеговалан эн сайжым пуэн, тудлан служитлаш йӧным аклена манын ончыктена.

18. Мо нерген мыланна нигунамат мондаш огеш кӱл? (Еврей-влаклан 10:22—25).

¹⁸ Еврей-влаклан 10:22—25 лудын лекса. Еврей-влаклан колтымо серышын мучаштыже апостол Павел палемден, мом ме Иеговалан служитлымаште эре ыштышаш улына. Мыланна кумалаш, таныклаш, вашлиймашыш кошташ да икте-весым кумылаҥдаш кӱлеш. Иегован «кечын лишеммыжым» ужын, ме «тидым эшеат утларак ыштышаш улына». Почмаш книган мучаштыже Иегован суксын ойлымыжым кок гана палемдыме. Тудо каласен: «Сукен, вуетым Юмылан саве!» (Почм. 19:10; 22:9). Суксын тиде шомакым кок гана ушештарымыже ончыкта, мыняр чот тиде шомакым колышташ кӱлеш. Айста Иегован кугу духовный храмже нерген келге шинчымашым нигунамат она мондо да Юмылан служитлаш чапле йӧным аклаш тӱҥалына!