1. Ожно илыше Юмын служитлышыже-влак молан кӧра виян лийыныт?

 БИБЛИЙЫШТЕ ме шуко Юмын ӱшанле служитлышыже нерген лудына, кудышт кугу пашам шуктен кертыныт. Но нунын кокла гыч эн виянжат шкенжым вийдымыла шижын. Мутлан, Давид кугыжа южгунам лӱддымӧ лийын, а южо годым тудым лӱдмаш авалтен (Пс. 29:8). Юмын шӱлышыжлан кӧра Самсон моткочак виян лийын гынат, умылен: Юмын полшымыж деч посна тудо виян ок лий да тыглай еҥ-влак гай лиеш (Суд. 14:5, 6; 16:17). Тыгела, нине Юмын ӱшанле служитлышыже-влак Иегован вийжылан кӧра гына виян лийыныт.

2. Молан апостол Павел «кунам мый вийдыме улам, тунам куатан улам» манын каласен? (2 Коринфян-влаклан 12:9, 10).

² Апостол Павелат тудлан Иегован вийже кӱлеш манын умылен. (2 Коринфян-влаклан 12:9, 10 лудын лекса.) Шукыштын гаяк тудын тазалыкше пешыжак сай лийын огыл (Гал. 4:13, 14). Жапын-жапын тудлан чын ышташ куштылго лийын огыл (Рим. 7:18, 19). А южгунам тудо тургыжланен да лӱдын, мо тудын дене лийын кертеш (2 Кор. 1:8, 9). Но тыгай годым Иегова тудлан вийым пуэн. Тидлан кӧра тудо чыла тергымашым чытен кертын.

3. Тиде статьяште могай йодыш-влаклан ме вашмутым налына?

³ Иегова мыланнат вийым пуаш сӧра (1 Пет. 5:10). Но тидлан мыланна тыршаш кӱлеш. Примерым ончалына. Машина кудал кертше манын, энергий кӱлеш, а тиде энергийым двигатель пуа. Но айдемылан машина дене каяшлан  газ педальым темдалаш кӱлеш. Тыгакак Иегова мыланна вийым пуаш ямде улеш. Но тиде вийым налашлан мыланна вийым пыштыман. Мемнан вий лийже манын, Иегова мыланна мом пуэн? Вийым налашлан мом ыштыман? Нине йодыш-влаклан вашмутым пален налашлан ончалына Юмын кум служитлышыжын примержым. Лончылен налына, кузе Иегова Иона пророкым, Иисусын Мария аважым да апостол Павелым пеҥгыдемден. Тыгак ме ужына, кузе Иегова таче шке служитлышыже-влакым пеҥгыдемда.

4. Иегова деч полышым налашлан мыланна мом ыштыман?

⁴ Иегова деч полышым налаш тӱрлӧ йӧн уло. Мутлан, ме тудлан кумалын кертына. Йодмыналан вашеш Иегова мыланна вийым пуэн кертеш (2 Кор. 4:7). Тыгак ме вийым налына, кунам Юмын Мутшым лудына да лудмо нерген шонкалена (Пс. 85:11). Вет «Юмын шомакше... виян» (Евр. 4:12). Юмылан кумалмаш да Библийым лудмаш — лач тиде тыланда тергымашым чытен лекташ, умбакыжат куанаш але йӧсӧ заданийым шукташ полшен кертеш. Ончалына, кузе Иегова Иона пророкым пеҥгыдемден.

5. Молан Иона пророклан вий чотак кӱлын?

⁵ Иона пророклан вий кӱлын. Тудо Иегован пуымо йӧсӧ заданийже деч куржын. Тидлан кӧра тӱтан верч тудо да корабльыште лийше вес еҥ-влак колен кертыныт. А кунам Ионам теҥызыш шуэныт, тудым кугу кол нелын колтен, да тудо колын кӧргышкыжӧ логалын. Тушто пычкемыш да шучко лийын. Иона мом шижын? Шонен мо, пуйто илышыжлан мучаш толын? Иегова тудын деч савырнен манын тургыжланен мо? Ионалан, очыни, чот лӱдмашан лийын.

6. Колын кӧргыштӧ лийме годым Ионам мо пеҥгыдемден? (Иона 2:1, 2, 7).

⁶ Иона шкенжым шкет кодмыла шижын. Мо тудлан вийым пуэн? Кумалмаш. (Иона 2:1, 2, 7 лудын лекса.) Иона Иегова ваштареш каен гынат, пеҥгыдын ӱшанен: Юмо тудын ӧкынымыжым ужеш да сӧрвалымыжлан вашмутым пуа. Тыгак Иона Священный Возымаш гыч лудмо нерген шонкален. Молан тыге каласаш лиеш? Тиде пророкын кумалтыш мутыштыжо, кудыжым Иона книган 2-шо ужаште возымо, Псалом гыч шуко шомак ден ойсавыртыш вашлиялтеш. (Мутлан, Иона 2:2, 5 почеламут-влакым Псалом 68:2; 85:7 дене таҥастарыза.) Тиде ончыкта: Иона нине почеламут-влакым сайын пален. Неле годым нине почеламут-влак нерген шонкален, Иона умылен налын: Иегова тудым огеш кодо да полша. Юмо тудым утарен луктын, да вара Иона Иегован у заданийжым шукташ ямде лийын (Иона 2:10—3:4).

7, 8. Тайвань гыч ик изалан нелылыкым чыташ мо полша?

⁷ Кунам ме тӱрлӧ тергымаш дене тӱкнена, мыланна Ионан примерже полшен кертеш. Мутлан, Тайвань гыч Чжими́н b иза неле чер дене орлана. Тыгак родыжо-влак тудым Иеговалан ӱшанымыжлан кӧра шыгыремдат. Чжиминлан кумалмаш ден шымлымаш вийым пуат. Тудо ойла: «Кунам проблеме-влак темдат, тунам тургыжландарыше шонымаш-влак вуем гыч огыт лек. Тидын верч лыпланаш да шымлымашым сайын эртараш йӧсӧ». Но Чжимин вуйжым ок саке. Тудо манеш: «Ончыч мый Иеговалан  кумалам, вара наушникым чием да организацийнан мурыжо-влакым колыштам. А южгунам муро-влакым колыштын, лыпланымешкем пел йӱкын мурем. Вара веле шымлымашым тӱҥалам».

⁸ Шкевуя шымлымаш годым налме шинчымаш Чжиминлан нелылыкым сеҥаш полша. Теве ик пример. Кунам тудо неле операций деч вара помыжалтын, медсестра тудлан каласен: «Изи гемоглобинлан кӧра капышкыда вӱрым колташ кӱлеш». Операцийым ыштыме деч шукерте огыл Чжимин ик ака нерген лудын, кудыжын тыгаяк операцийже лийын. Саде акан гемоглобинже Чжиминын гемоглобинже дене таҥастарымаште эше изирак лийын. Туге гынат ака вӱрым капышкыже колташ пуэн огыл. Тудо паремын. Тиде случай Чжиминым Юмылан ӱшанле кодаш эше чотрак кумылаҥден.

9. Нелылык вийдам налеш гын, те мом ыштен кертыда? (Тыгак сӱрет-влакым ончыза.)

⁹ Тендан дене тыгай лийын мо, кунам те неле годым чот тургыжланенда да кумалаш тыланда йӧсӧ лийын але кунам Библийым шымлаш вийда лийын огыл? Шарныза: Иегова тендам сайын умыла. Сандене кумалтыш мутда пеш проста лиеш гынат, Иегова мо тыланда кӱлеш, тудым пуа (Еф. 3:20). Капкыл але шӱм-чон корштымашлан кӧра тыланда лудаш да шымлаш йӧсӧ гын, Библий але публикаций аудиовозышым колышт ончалза. Тыгак jw.org сайтыште иктаж-могай мурым колышташ але видеороликым ончалаш лиеш. Те Иеговалан кумалыда гын, а вара, организацийын чыла пуымыжым кучылтын, духовный шотышто шкендам пеҥгыдемдеда гын, Юмылан тендам вияҥдаш йӧным пуэда.

10. Иза-ака-влак мемнам кузе пеҥгыдемден кертыт?

¹⁰ Иегова мемнам иза-ака-влак гоч пеҥгыдемден кертеш. Кунам ме нелылык дене тӱкнена але мыланна йӧсӧ заданийым пуат, нуно мемнам чот кумылаҥден кертыт (Кол. 4:10, 11). Йолташ-влак мыланна поснак ойго годым чотак кӱлыт (Прит. 17:17). Кунам вийна пыта, иза-ака-влак мыланна полшаш да мемнам лыпландараш ямде  улыт, тыгак Иеговалан умбакыжат служитлаш таратат. Айста ончалына, кузе Мария, Иисусын аваже, весе-влак деч полышым налын.

11. Молан Мариялан Иегова деч вий кӱлын?

¹¹ Мариялан Иегован эрыкшым шукташлан тудын деч вий кӱлын. Мария чотак ӧрын, кунам Гавриил суксо гоч пуымо заданий нерген пален налын. Тудо марлан лектын огыл гынат, мӱшкыраҥшаш ыле. Мария нигунамат йочам ончен куштен огыл, а тудлан Мессий лийшаш эргым ончен кушташ кӱлын. Тыгак Иосиф качыжлан умылтараш кӱлеш ыле, молан тудо мӱшкыран улеш, кеч пӧръеҥ дене нигунамат мален огыл (Лук. 1:26—33).

12. Мария кӱлешан вийым кушеч налын? (Лукан 1:39—45).

¹² Тиде кугу да кӱлешан заданийым шукташлан Мария кушеч вийым налын? Тудо весе-влак деч полышым кычалын. Мутлан, тудо заданийже нерген шукырак каласкалаш Гавриилым йодын (Лук. 1:34). Тидын деч вара тудо курыкан кундемысе Иудан олашкыже Елизавета родыж дек каен. Тушко каяш решений сай лийын. Елизавета Мариям мокталтен да святой шӱлыш кумылаҥдыме почеш Мариян шочшаш эргыже нерген ончылгоч каласымашым каласен. (Лукан 1:39—45 лудын лекса.) Иегова шке кидше дене ӧрыктарыше пашам ыштен манын, Мария каласен (Лук. 1:46—51). Иегова Мариям Гавриил да Елизавета гоч пеҥгыдемден.

13. Боливий гыч ик акалан иза-ака-влак кузе полшеныт?

¹³ Мария семын теат Юмын вес служитлышыж-влак деч полышым кычалын кертыда. Тыгай полыш Боливий гыч Дасури́ акалан кӱлын. Кунам ачаже тыгай чер дене черланен, кудыж деч паремаш ок лий, тудо ачаж дене эре больницыште лийын (1 Тим. 5:4). Южгунам тудлан чотак йӧсӧ лийын. Дасури ойла: «Шуко гана мылам чучын, пуйто тидым чыташ вием ок сите». Тудо полышым кычалын мо? Ончыч кычалын огыл. Тудо умылтара: «Проблемым иза-влак ӱмбак сакымем шуын огыл. Мый шоненам: молан мыланем весе-влак кӱлыт, мыйын вет Иегова уло. Но вара умыленам: весе-влак деч кораҥын, мый шкетын проблемым сеҥаш тӧчем» (Прит. 18:1). Дасури икмыняр йолташыжлан возаш да ситуацийже нерген каласкалаш шонен пыштен. Тудо манеш: «Шергакан иза-ака-влак мыйым чотак пеҥгыдемденыт. Нуно больницыш кочкышым конденыт да мыланем Библий гыч лыпландарыше почеламут-влакым ончыктеныт. Могай сай, кунам тый шкетын отыл! Тый Иегован кугу ешыштыже улат, кушто йолташ-влак полшаш, тый денет шорташ да Юмылан умбакыжат служитлаш тыйым кумылаҥдаш ямде улыт».

14. Молан мыланна кугурак иза-влак деч полышым налаш кӱлеш?

¹⁴ Тыгак Иегова мыланна кугурак иза-влак гоч полшен кертеш. Нуно мыланна тудын деч пӧлек семын улыт. Иегова нуным мемнам пеҥгыдемдашлан кучылтеш (Ис. 32:1, 2). Сандене тендам иктаж-мо тургыжландара гын, тидын нерген погынымашда гыч кугурак иза-влак дене мутланен налза. А кунам нуно полышым темлат, тиде полышым уло кумылын налза. Тыге Иегова тыланда виян лияш полша.

15. Христиан-влакын могай сылне ӱшанышт уло?

¹⁵ Библий дене негызлыме ӱшанна мыланна вийым пуа (Рим. 4:3, 18—20). Христиан-влакым пеш сылне ончыкылык вуча.  Нуно курымеш илаш тӱҥалыт: иктышт — рай мландыште, весышт — кавасе Юмын Кугыжаныште. Ӱшан мыланна вийым пуа нелылыкым чыташ, поро уверым таныклаш да погынымаште тӱрлӧ заданийым шукташ (1 Фес. 1:3). Лачак тиде ӱшан — курымеш илаш ӱшан — апостол Павелым пеҥгыдемден.

16. Молан Павеллан Юмо деч вий кӱлын?

¹⁶ Молан Павеллан Юмо деч вий кӱлын? Коринфян-влаклан колтымо серышыштыже тудо шкенжым шун ате дене таҥастарен, кудыжым куштылгын шалаташ лиеш. Апостолын ойлымыжо почеш тудым шыгыремденыт, поктылыныт, тудо мом ышташат пален огыл. Тыгаят лийын, кунам тудо чуч гына колен огыл (2 Кор. 4:8—10). Тидын нерген Павел кумшо миссионер путешествий годым возен. Но тудо паленат огыл, могай нелылык тудым ончыкыжым вуча: тудын ӱмбак калык кержалтеш, тудым арестоватлат, тудо корабльын шаланымыжым чыта да казаматыш шындыме лиеш.

17. Нелылыкым чыташ Павеллан мо полшен? (2 Коринфян-влаклан 4:16—18).

¹⁷ Павел ӱшанже нерген шарнен, сандене нелылыкым чыташ тудын вийже лийын. (2 Коринфян-влаклан 4:16—18 лудын лекса.) Кузе тудо коринфян-влаклан возен, капшын лунчыргымым ончыде, тудо вуйжым ок саке. Апостол ончыко ончен. Тудо каваште курымеш илаш ӱшанжым аклен да тиде ӱшан верч кеч-могай орланымашым чыташ ямде лийын. Ӱшан нерген шонкалымаш Павеллан вийым пуэн.

18. Кузе ӱшан Тихомирлан да тудын ешыжлан вийым пуа?

¹⁸ Болгарий гыч Тихомир изам ончыкылыклан ӱшан пеҥгыдемда. Икмыняр ий ончыч тудын Здра́вко шольыжо аварийыш логалын колен. Тихомир чот ойгырен. Тиде шӱм-чон корштымашым сеҥашлан тудо, ватыже да эргыже ылыжмаш нерген шукырак шонкалаш тӱҥалыныт. Тихомир ойла: «Мутлан, ме шонкалена, кузе Здравко шольым вашлияш тӱҥалына, могай тамле  кочкышым тудлан ыштена, пӧртылмыжым пайремлашлан кӧм ӱжына да мом тудлан пытартыш кече-влак нерген каласкален пуэна». Кузе Тихомир ойла, нуно ӱшанлан кӧра вуйыштым огыт саке да чытен вучат тыгай жапым, кунам Иегова тудын шольыжым ылыжта.

19. Кузе ончыкылыклан ӱшаннам пеҥгыдемдаш лиеш? (Тыгак сӱретым ончыза.)

¹⁹ Ончыкылыклан ӱшаннам кузе пеҥгыдемдаш лиеш? Мландыште курымеш илаш шонеда гын, райысе илыш нерген Библийыште лудса да тидын нерген шонкалыза (Ис. 25:8; 32:16—18). Шоналтыза, пуйто те тушто улыда. Кӧм те ужыда? Мом колыда? Мом шижыда? Мемнан публикаций-влакыште райым ончыктышо сӱрет-влаклан вниманийым ойырыза. Музыкальный видеоролик-влакым ончыза, мутлан, «Мы ждём новый мир», «Этот день очень близко» але «Шоналте, могай сай жап лиеш!». Чыла тиде райысе илыш нерген шонкалаш полша. Ӱшанна нерген эре шарнена гын, мыланна чучаш тӱҥалеш, пуйто кеч-могай нелылыкна «кӱчык да куштылго» (2 Кор. 4:17). Тыланда виян лияшлан Иегова тиде ӱшаным пуэн.

20. Вийым налашлан мом ыштыман?

²⁰ Шкендам вийдымыла шижыда гын, вуйдам ида саке. Мутат уке, Иегова тендам пеҥгыдемда (Пс. 107:14). Те тудын деч вийым тӱрлӧ семын налын кертыда. Тидлан тудо чылажымат пуэн. Сандене йӧсӧ заданийым шукташ, нелылыкым чытен лекташ але куаным йомдараш огыл манын, тыланда мом ышташ кӱлеш? Иеговалан кумалза да, шымлымашым эртарен, тудын деч полышым кычалза. Иза-ака-влакын полшымышт деч ида кораҥ. У тӱня нерген шонкалашлан эре жапым ойырыза, тушто шкендам ужаш тыршыза. Тыге Юмын «чапшын чыла вийже да куатше тендам пеҥгыдемда, тунам те эре чыла чытыше да куаныше лийыда» (Кол. 1:11).