1. Иегован шке служитлышыже-влак дек могай отношенийже?

 ИЕГОВА чылажымат ужеш, мо дене тудын служитлышыже-влак тӱкнат. Тудо нунын чыла куан ден ойгыштым пала (Пс. 36:18). Кунам тудо ужеш, кузе ме шӱм-чон корштымашнам ончыде тудлан умбакыжат служитлена, тудо мемнан дене чот кугешна. Тудо мыланна полшаш да мемнам лыпландараш ямде.

 2. Иегова ойгырышо-влаклан мом ышта да тиде полышым кузе налаш?

² Псалом 146:3 почеламутышто возымо дене келшышын, Иегова «ойгырышо шӱман-шамычым паремда да нунын сусыр верыштым пидеш». Тиде мут ончыкта: Иегова ойгырышо-влаклан чот полшынеже. Но тиде полышым кузе налаш? Тыгай пример нерген шоналтыза. Айдеме сусырга гын, тудо опытан врач деке кая. Но паремашлан тиде гына ок сите. Тудлан врачын каласымыже почеш эше ышташ кӱлеш. Могай рецептым Иегова шке Мутыштыжо мыланна пуэн да, чоныштына тыныс лийже манын, мом ыштыман? Тидын нерген ме тиде статьяште пален налына.

ИЕГОВА МЕМНАМ ЧОТ АКЛА МАНЫН ӰШАНДАРА

 3. Молан южышт шкем йӧрдымылан шотлат?

³ Ме тыгай тӱняште илена, кушто йӧратымаш уке. Сандене шукышт шкем нимоланат йӧрдымылан шотлат. Теве мом Хе́лен a ойла: «Мый тыгай ешыште кушкынам, кушто йӧратымаш лийын огыл. Мыйын ачам чот торжа лийын да кажне кечын тудо мыланем ойлен, могай мый йӧрдымӧ улам». Очыни,  теат тыгай обстановкышто кушкында. Тендам эре критиковатленыт але айдемыланат шотлен огытыл. Туге гын, тендам чынжымак йӧратат манын ӱшанаш йӧсӧ лийын кертеш.

 4. Псалом 33:19 почеламут дене келшышын, Иегова мемнам мо шотышто ӱшандара?

⁴ Еҥ-влак тендам огыт йӧрате гынат, палыза: Иегова тендам йӧрата да акла. Тудо «ойгырышо шӱман-шамычлан... лишыл». (Псалом 33:19 лудын лекса.) Шарныза: Юмо тендан шуко сай пашадам да сай койышда-влакым пала. Сандене тудо тендам шкеж дек ӱжын конден (Иоан. 6:44). Тыланда полшашлан тудо эре пеленда, вет те тудлан чот шергакан улыда.

 5. Еҥ-влаклан, кӧм калыкыште йӧрдымылан шотленыт, Иисус могай койыш-влакым ончыктен, да тиде мемнам мо́лан туныкта?

⁵ Иисусын примержым ончен лектын, ме Иегован шижмашыже нерген пален налын кертына. Иисус мландыште служитлымыж годым тыгай еҥ-влак деке поро да чаманыше лийын, кӧм калыкыште йӧрдымылан шотленыт (Матф. 9:9—12). Кунам неле чер дене орланыше ик ӱдырамаш паремашлан тудын вургемжым тӱкалтен, Иисус тудым лыпландарен да ӱшанымашыжлан мокталтен (Мар. 5:25—34). Иисус чыла шотыштат Ачаж деч примерым налын (Иоан. 14:9). Сандене пеҥгыдын ӱшаныза: Иегова тендам акла да чыла тендан сай койышда-влакым, ты шотышто ӱшанымашдам да йӧратымашдам, ужеш.

 6. Те шкем йӧрдымылан шотледа гын, тунам мом ыштен кертыда?

⁶ Те эре але жапын-жапын шкем йӧрдымылан шотледа гын, тунам мом ыштыман? Лудса библийысе почеламут-влакым, кушто Иегова шке йӧратымашыже нерген тыланда палдара. Тудын мутшо-влак нерген шонкалыза (Пс. 93:19) b. Очыни, те ала-могай цельым  шынденда, но тудым шуктен кертын огыдал. Але те весе-влак гаяк шуко ыштен ода керт. Шкендам ида вурсо. Вет Иегова тендан деч утыжым огеш вучо (Пс. 102:13, 14). Тендам игылтыныт, мыскыленыт але те иктаж-могай виешлымаш дене тӱкненда гын, шарныза: тыгай лиймылан те титакан огыдал. Ик айдемат тыгай дене тӱкнышаш огыл! Те огыл, а тыланда корштымашым кондышо айдеме Юмо ончылно вашмутым пуышаш (1 Пет. 3:12). Сандра, кудыжо изинек торжалык дене тӱкнен, ойла: «Мый эре Иеговам йодам шке ӱмбак чын ончаш да сай койышем-влакым ужын мошташ, кудыжым тудо ужеш».

 7. Нелылыкым чытен лекмына Иеговалан служымаште могай пайдам конден кертеш?

⁷ Те шкем тептердымылан шотледа гынат, тиде огеш ончыкто, пуйто Иегова тидымак шона. Тудо тендам ик пашаште пырля тыршаш ӱжын да тыланда поро уверым каласкалаш ӱшанен пуэн (1 Кор. 3:9). Тудо тендан гоч весе-влаклан полшен кертеш. Вет те, очыни, тыгаяк ситуацийыш логалше еҥ-влакым сайрак умылен кертыда. Хелен, кудыжо нерген ончычрак ойлалтын, Иегова деч да погынымаш деч полышым налын да ындыжым шкежат весе-влаклан полшен кертеш. Тудо ойла: «Мый шоненам, пуйто мый дечем нимогай полыш уке. Но Иегова мыланем полшен да ындыжым мый тудын йӧратымашыжым шижам да тудо мыйым весе-влаклан полшымаште кучылтеш». Кызыт Хелен эрелык пионер семын служитла.

ИЕГОВА МЕМНАМ ПРОСТИТЛА МАНЫН ӰШАНДАРА

 8. Исайя 1:18 гыч шомак мемнам мо шотышто ӱшандара?

⁸ Иегован южо служитлышыже-влак тынеш пурымо деч ончыч але вара языкым ыштымылан кӧра чот ойгырат. Но Иегова мемнам чот йӧрата. Тудо эсогыл мемнам язык ден колымаш деч тӱлен налын. Юмо тиде пӧлекым налмынам вуча. Иегова ӱшандара: ме тудын дене кылым тӧрлатена c гын, ондак ыштыме языкнам тудо тӱрыснек проститла. (Исайя 1:18 лудын лекса.) Тудо языкнам монда, но тугодымак, мом ме тудлан ыштена, чыла сайжым шарна. Тидлан Иеговалан кугу тау (Пс. 102:9, 12; Евр. 6:10).

 9. Молан ондак ыштыме йоҥылыш-влак нерген шонымо олмеш лучо кызытсе да ончыкылык илыш нерген шонаш?

⁹ Ондак ыштыме сулык-влак верч ойгыреда гын, тунам нунын нерген ида шоно, а лучо шоналтыза, мом те кызыт да ончыкыжым ыштен кертыда. Лач тыге апостол Павел ыштен. Ончыч тудо христиан-влакым поктен да тидын верч шкенжым шылтален кертын. Но тудо пален: Иегова тудым проститлен (1 Тим. 1:12—15). Павел ондакысе илышыже нерген шонен коштын огыл — ни иудаизмыште кӱкшытыш шумыжо нерген, ни ыштыме йоҥылышыжо-влак нерген (Флп. 3:4—8, 13—15). Тудо уло вийжым служымашлан виктарен да ончыко ӱшан дене ончен. Те Павел гаяк ондакысе илышдам вашталтен ода керт. Но те тачысе илышда дене Иеговам куандарен да чапландарен кертыда. А эше тудын сӧрымӧ ончыкылык илыш нерген шонен кертыда.

10. Те ондак иктаж-кӧлан чон корштымашым конденда гын, тунам мом ыштыман?

¹⁰ Очыни, ондак те иктаж-кӧлан чон корштымашым конденда. Сандене айдеме тидын верч орлана. Тиде тыланда чон корштымашым конда докан. Тунам мом ыштыман? Тиде ситуацийым тӧрлаташлан вийым пыштыза. Мутлан, саде айдеме деч уло шӱм дене проститлымашым йодса (2 Кор. 7:11). Иеговалан  кумалза да тыланда кӧра орланыше айдемым лыпландараш тудым йодса. Юмо тудланат, тыландат чон тынысым пуэн кертеш да тудлан умбакыжат служитлаш полша.

11. Иона пророкын примерже мемнам мо́лан туныкта? (Сӱретым ончыза.)

¹¹ Ыштыме йоҥылышда гыч тунемза да Иегован ончыктымо корныж дене каяш ямде лийза. Шарналтена Иона пророкым. Юмо тудлан Ниневийыш каяш кӱштен, а тудыжо моло верыш куржын каен. Иегова Ионалан шке йоҥылышыжым умылаш да иктешлымашым ышташ полшен (Иона 1:1—4, 15—17; 2:7—10). Иона йӧрдымӧ пророк улеш манын, Иегова шонен огыл. Юмо тудым эше ик гана Ниневийыш колтен. Ты ганалан пророк вигак Юмын кӱштымыжым шуктен. Иона ыштыме йоҥылышыжо верч ӧкынен гынат, Иегован каласымыже почеш ыштен (Иона 3:1—3).

СВЯТОЙ ШӰЛЫШЫМ ПУЭН, ИЕГОВА МЕМНАМ ЛЫПЛАНДАРА

12. Кузе Иегова мыланна ойгым чытен лекташ полша? (Филиппысе-влаклан 4:6, 7).

¹² Кунам ме илышыштына иктаж-могай ойго дене тӱкнена, Иегова мемнам лыпландарашлан святой шӱлышыжым пуа. Теве мо дене Ро́н ден Кэ́рол тӱкненыт. Нунын 39 ияш эргышт шкем шке пуштын. Нуно ойлат: «Мемнан илышыштына тӱрлӧ ойго лийын. Но тидыже эн неле. Ме чӱчкыдын маленат кертын огынал. Йӱдвошт кумалынна. Ме шижынна, кузе Иегова мыланна тынысым пуэн, кудыжо нерген Филиппысе-влаклан 4:6, 7 почеламут-влакыште возымо» (лудын лекса). Илышыштыда кугу тергымаш дене тӱкнеда гын, шижмашда нерген Иеговалан почын ойлаш ида вожыл. Те шуко да чӱчкыдын кумалыда гынат, тудо тендам колыштмым огеш чарне (Пс. 85:3; 87:2). Иегова деч святой шӱлышым йодса да тудо тыланда святой шӱлышым чынжымак пуа (Лук. 11:9—13).

13. Кузе святой шӱлыш мыланна Иеговалан ӱшанлын служитлаш полша? (Ефесян-влаклан 3:16).

¹³ Те неле тергымаш дене тӱкненда да тендан кызыт вийда уке гын, тунам святой шӱлыш тендам пеҥгыдемден кертеш. Тидлан кӧра те Иеговалан умбакыжат ӱшанлын служитлен кертыда. (Ефесян-влаклан 3:16 лудын лекса.) Теве мо Фло́ран илышыштыже лийын. Тудо марийже дене пырля миссионер семын служитлен. Вара тудо пален налын: марийже вес ӱдырамаш дене мален. Тидын верч нуно ойырленыт. Флора ойла: «Кунам марием тыгай сулыкым ыштен, чонем чот корштен да мый нимо весе нерген шонен кертын омыл. Мыланем чучын, пуйто мый тиде ойгым чытен лектын ом керт. Мый святой шӱлыш нерген кумалынам. Да Иегова мыланем полшен. Тудо чон сусырым паремден». Ындыжым Флора Юмылан эше чотрак ӱшана. Флора пала: тудо Юмо дене кеч-могай тергымашым эртен кертеш. Флора ешара: «Мый Псалом 118:32 почеламутышто возымо дене келшем, кушто возымо: „Мый кӱштыметым уло кумылын шукташ тӱҥалам, вет тый мыланем нуным умылаш полшет“».

14. Святой шӱлышым налашлан мом ыштыман?

¹⁴ Святой шӱлышым йодмо деч вара умбакыже мом ыштыман? Тудым налашлан вийым пыштыза. Вашлиймашыш коштса да таныклыза. Тыгак кажне кечын Библийым лудын, Иегован шонымашыж дене ушдам темыза (Флп. 4:8, 9). Библийыште те тӱрлӧ тергымаш дене тӱкнышӧ еҥ-влакын историйыштым муыда. Ончыза, кузе Иегова нунылан нелылыкым чыташ да тудлан ӱшанле кодаш полшен. Сандра, кудыжын мутшым ме 6-шо абзацыште лудынна, илышыштыже шуко нелылык ден тӱкнен. Тудо ойла: «Мыйым эре Иосифын примерже кумылаҥден. Тудо тергымаш-влаклан да еҥ-влакын несправедливый отношенийыштлан шкем Иегова деч кораҥдаш пуэн огыл» (Тӱҥ. 39:21—23).

 ИЕГОВА МЕМНАМ ИЗА-АКА-ВЛАК ГОЧ ЛЫПЛАНДАРА

15. Кузе Иегова иза-ака-влак гоч мыланна полша да мемнам лыпландара? (Тыгак сӱретым ончыза.)

¹⁵ Кунам мыланна йӧсӧ, иза-ака-влак мыланна полшен да мемнам лыпландарен кертыт (Кол. 4:11). Нунын гоч Иегова мыланна йӧратымашыжым ончыкта. Кузе иза-ака-влак мемнам лыпландарен кертыт? Нуно мемнам тӱткын, умылен да чаманен колыштыт. А южгунам нимом ойлыде воктенна шинчат гын, тидыже уже лыпландара. Нуно мыланна кумылаҥдыше библийысе почеламутым d ончыктен кертыт але мемнан дене пырля кумалын кертыт (Рим. 15:4). Южгунам нунын гыч иктажше мыланна Иегован шонымашыжым ончыкта, да тиде мыланна нелылыкым чыташ полша. А эше иза-ака-влак мыланна, мутлан, вийна уке годым кочкышым ыштен кертыт.

16. Полышым налашлан южгунам мом ыштыман?

¹⁶ Южгунам полышым налашлан тудым йодаш кӱлеш. Иза-ака-влак мемнам йӧратат да мыланна полшынешт (Прит. 17:17). Но нуно, очыни, огыт пале, мом ме шижына да мо мыланна кӱлеш (Прит. 14:10). Чонналан йӧсӧ гын, духовный шотышто кушкын шушо йолташ-влаклан шижмашда нерген почын каласыза. Каласыза нунылан, мо шотышто тыланда полыш кӱлеш. Тыгак ик але кок кугурак иза дене, кудыжлан те ӱшанеда,  мутланен налаш лиеш. Южо ака-влак духовный шотышто кушкын шушо христианке-влак деч полышым йодыт.

17. Могай нелылык-влак лыпландарымашым налаш мешаен кертыт да кузе нуным сеҥаш?

¹⁷ Очыни, тыланда южгунам тынар чот йӧсӧ, икте денат мутланаш вийда уке. А можыч иза-ака-влак тендам тӱрыснек огыт умыло але шоныде каласымышт дене тендам сусыртат (Иак. 3:2). Туге гынат нунын деч ида кораҥ. Нунын гоч Иегова тендам лыпландарен кертеш. Депрессий дене орланыше Гэ́вин лӱман кугурак иза теве мом ойла: «Мыйын шуко гана тыгай лийын, кунам икте денат мутланымем шуын огыл». Но Гэвин иза-ака-влак дене жапым эртараш тырша да тидын деч вара шкенжым сайрак шижеш. Э́ми лӱман ака ойла: «Илышыштем мо лиймылан кӧра мыланем еҥ-влаклан ӱшанаш йӧсӧ. Но мый иза-ака-влакым йӧраташ да нунылан ӱшанаш тунемам, вет мый Иегова деч примерым налнем. Мый палем: тиде тудлан келша. А кунам мый тудым куандарем, шкат куаным налам».

ТЕК ТЕНДАМ ОНЧЫКЫЛЫКЛАН ӰШАН ЛЫПЛАНДАРА

18. Могай ончыкылык илышым Иегова мыланна ямдылен да мом мыланна кызыт ыштыман?

¹⁸ Вашке Иегова мемнам утара чылаж дечат, мо капналан да чонналан корштымашым конда (Почм. 21:3, 4). Тугодым нимогай шарнымаш чонналан корштымашым огеш кондо (Ис. 65:17). Кузе ме ужынна, уже кызытак Иегова мыланна полшашлан шуко вийым пышта. Сандене сусырнам паремдашлан мом тудо темла, чылажымат кучылтса. Эре шарныза: «Тудо тендан верч тырша» (1 Пет. 5:7).