1, 2. Еммаусыш кайыме годым Иисусын кок тунемшыж дене мо лийын?

 МЕМНАН эран 33-шо ий 16-шо нисан кече. Иисусын тунемшыж-влакым ойго ден лӱдмаш авалтеныт. Нунын гыч кокытшо Иерусалим гыч 11 километр наре тораште верланыше Еммаусыш кая. Нунын кумылышт чот волен, вет Иисус Мессий улеш да еврей-влакын илышыштым вашталтышаш манын, нуно ӱшаненыт, а тудо колен. Но нуно огытат пале, могай нуным пӧлек вуча.

² Корнышто тунемше-влак деке палыдыме пӧръеҥ ушна. Нуно тудлан каласкалат, молан нуно шӱлыкаҥше улыт да мо Иисус дене лийын. Пӧръеҥ нуным колыштеш, а варажым тыгайым ойла, мом нуно нигунамат огыт мондо. «Моисей деч да чыла пророк деч тӱҥалын», тудо умылтара, молан Мессий орланышаш да колышаш ыле. Кунам нуно кумытынат Еммаусыш толыт, тунемше-влак умылат: тиде палыдыме пӧръеҥ ылыжше Иисус лийын! Шоналтыза веле, Мессийын илыше улмыжым пален налмеке, мыняр чот нуно куаненыт! (Лук. 24:13—35).

3, 4. Иисусын тунемшыж-влак дене мо лийын да тиде статьяште ме мом лончылен налына? (Апост. пашашт 1:3).

³ Пытартыш 40 кече коклаште Иисус шке тунемшыж-влак дене шуко гана вашлиялтын. (Апост. пашашт 1:1—3 лудын лекса.) Иисус шӱлыкаҥше да лӱдшӧ тунемшыж-влакым пеҥгыдемден.  Тидлан кӧра нуно куанен да лӱдде Юмын Кугыжаныш нерген поро уверым каласкалаш да весе-влаклан Христосын тунемшыже лияш полшаш ямде лийыныт a.

⁴ Иисусын тиде жапыште ыштымыжым шымлен, ме шкаланна пайдам налын кертына. Айста ончен лектына, кузе тиде жапыште тудо: 1) тунемше-влакым пеҥгыдемден, 2) нунылан Возымашым сайрак умылаш полшен да 3) нуным лийшаш заданийлан ямдылен. Ме чыла нине пункт-влакым лончылен налына да пален налына, мо шотышто Иисус мыланна примерым ончыктен.

ВЕСЕ-ВЛАКЫМ ПЕҤГЫДЕМДЫЗА

 5. Молан Иисусын тунемшыж-влакым кумылаҥдаш да пеҥгыдемдаш кӱлын?

⁵ Иисусын тунемшыж-влакым кумылаҥдаш да пеҥгыдемдаш кӱлын. Вет нунын гыч шукышт Иисус почеш каяшлан пӧртыштым, родыштым да пашаштым коденыт (Матф. 19:27). А весыштым ӱшанымашышт верч поктылыныт (Иоан. 9:22). Тунемше-влак илышыштышт нине вашталтышым ышташ да орланаш ямде лийыныт, молан манаш гын, нуно ӱшаненыт: Иисус — сӧрымӧ Мессий (Матф. 16:16). Но Иисусым казнитлыме деч вара нуно ойгыреныт да кумылышт чот волен, вет нуно пален огытыл, мо умбакыже лиеш.

 6. Ылыжмеке, Иисус мом ыштен?

⁶ Иисус шонен огыл, пуйто тунемше-влакын ӱшанышт лушкыдемын. Тудо умылен: нуно йолташыштын колымыжлан кӧра ойгырат. Сандене ылыжме кечынак тудо шке йолташыж-влакым вашкерак лыпландарынеже ыле. Мутлан, ылыжмеке, Иисус шӱгарже воктене шортын шогышо Мария Магдалиналан кончен (Иоан. 20:11, 16). Тыгак тудо Еммаусыш кайыше кок тунемшыж дене мутланен налын. А эше тудо апостол Петр дене вашлиялтын (Лук. 24:34). Ме Иисус деч мо́лан тунемын кертына? Айста ончен лектына, мо лийын, кунам тудо Мария Магдалина дене вашлиялтын.

 7. Иисус Мариян мом ыштымыжым ужын да мом тудлан ыштен? (Иоаннын 20:11—16). (Тыгак сӱретым ончыза.)

⁷ Иоаннын 20:11—16 лудын лекса. 16-шо  нисан кечын эрдене эрак икмыняр ӱдырамаш Иисусын шӱгарже дек толын (Лук. 24:1, 10). Тудын капшын уке улмыжым ужмеке, нунын гыч иктыже, Мария Магдалина, тидын нерген Петрлан да Иоаннлан каласкалаш вашкен. Нунышт вигак тидым шке шинчашт дене ончалаш куржыныт, а Мария почешышт каен. Кунам апостол-влак Иисусын капшын уке улмыжым ужыныт, нуно мӧҥгыш пӧртылыныт. А Мария туштак кодын да шортын. Тиде жапыште Иисус тудым ончен шога манын, тудо шоненат огыл. Тудын шинчавӱдшӧ Иисусын шӱмжым тарватен. Сандене тудо Мариялан кончен да тудын дене мутланен налын. Тудын икмыняр проста мутшо Мариям чот лыпландарен. Тыгак Иисус Мариялан кӱлешан заданийым пуэн — ылыжмыже нерген вес тунемшыж-влаклан каласкален пуаш (Иоан. 20:17, 18).

 8. Кузе ме Иисус деч примерым налын кертына?

⁸ Кузе ме Иисус деч примерым налын кертына? Ме иза-акана-влаклан Иеговалан ӱшанле кодаш полшен кертына. Нунын проблемышт мыланна садиктак огыл гын, да ме нунын шижмашыштым умылаш тыршена гын, тиде нуным лыпландарен кертеш. Теве мом Джо́селин каласкала, кудыжын шӱжарже ойган случайлан кӧра колен: «Мый шуко тылзе мучко эре ойгырен коштынам». Ик еш мужыр тудым шкеж дек унала ӱжын. Тиде марий ден вате Джоселинлан шижмашыжым луктын каласаш пуэныт, тудым тӱткын колыштыныт да ойленыт, мыняр чот Иегова тудым акла. Джоселин манеш: «Ту мутланымаш мыйым утарен. Мый пуйто тӱтан теҥызыште вӱдыш пурен каяш тӱҥалынам. Но Иегова мыланем тиде иза ден акам колтен, да нуно мыланем вӱд йымаке каяш пуэн огытыл. Нунын полшымыштлан кӧра Иеговалан угыч служитлаш кумылем лектын». Меат весе-влакым тӱткын колыштына да нунылан шижмашыштым луктын каласаш пуэна гын, тиде нунылан Иеговалан умбакыжат служитлаш вийым пуа (Рим. 12:15).

ВЕСЕ-ВЛАКЛАН ЮМЫН МУТШЫМ САЙРАК УМЫЛАШ ПОЛШЫЗА

 9. Иисусын тунемшыж-влакын могай нелылыкышт лийын, да кузе Иисус нунылан полшен?

⁹ Иисусын тунемшыж-влак Юмын Мутшылан ӱшаненыт да тудын дене келшышын илаш тыршеныт (Иоан. 17:6). Но нуно умылен огытыл, молан Иисусым преступник семын казнитленыт. Тиде ончыктен огыл, пуйто нунын ӱшанымашышт лийын огыл да нуно Иеговам йӧратымым чарненыт. Иисус тидым пален да умылен: нунылан Возымашым сайрак умылаш кӱлын (Лук. 9:44, 45; Иоан. 20:9). Сандене тудо нуным Юмын Мутыштыжо лудмышт нерген шонкалаш туныктен. Ончалза, кузе Иисус тидым ыштен, кунам Еммаусыш кайыме годым кок тунемшыж дене мутланен.

10. Кузе Иисус тунемшыж-влаклан тудо Мессий улеш манын умылаш полшен? (Лукан 24:18—27).

¹⁰ Лукан 24:18—27 лудын лекса. Ончалза, Иисус кӧ улмыжым вигак каласен огыл. Тидын олмеш тудо йодыш-влакым пуэн. Молан? Очыни, тудо тунемшыж-влакын шонымышт нерген каласымыштым вучен. Нуно каласеныт, мо нуным тургыжландарен. Иисус римлян-влак олмеш вуйлаташ тӱҥалеш манын, нуно ӱшаненыт. Нуным тӱткын колышт лекмеке, Иисус, Возымашым кучылтын, нунылан умылаш полшен: тудын ӱмбалне шуко ончылгоч каласымаш шукталтын b. Варажым ту касын Иисус тидым вес тунемшыж-влакланат умылтарен (Лук. 24:33—48). Мо́лан ме тунемына?

11, 12. а) Кузе ме Библий шымлымашым эртарыме годым Иисус деч примерым налына? (Тыгак сӱретым ончыза.) б) Ик иза шымлыше пӧръеҥлан кузе полшен?

¹¹ Кузе ме Иисус деч примерым налын кертына? Кунам те Библий шымлымашым эртареда, тыгай йодыш-влакым пуыза, кудышт тыланда ужаш полшат, мо нерген айдеме шона да мо тудым тургыжландара (Прит. 20:5). Вара  тудлан ончыктыза, кузе Библийыште тыгай почеламут-влакым муаш, кудышт тудын ситуацийжылан келшен толыт. Ямде решенийым каласымыда шуэш гынат, тидым ида ыште. Лучо айдемылан нине почеламут-влак нерген шонкалаш полшыза — кузе тудо нуным илышыш пуртен кертеш. Ончалына Га́на гыч Но́рти лӱман изан случайжым.

¹² 16 ияш годым Норти Библийым шымлаш тӱҥалын. Вашке ешыже тудлан Библийым шымлаш тӱрлӧ семын мешаяш тӱҥалын. Но Нортим тиде чарен огыл. Мо тудлан полшен? Тудо шарналтен, кузе тудын дене Библийым шымлыше иза тудын дене Матфейын 10-шо ужашым лончылен налын. Чын христиан-влакым поктылаш тӱҥалыт манын, тушто возымо. «Кунам нине мут-влак ӱмбалнем шукталташ тӱҥалыныт, — ойла Норти, — мый чыным муынам манын умылен налынам». Тыгак иза тудлан Матфейын 10:16 почеламутым ончыктен, кушто тӱткӧ лияш кӱлмӧ нерген ойлалтеш. Вара нуно мутланен налыныт, кузе тиде почеламут Нортилан шке ӱшанымашыжым ешыжлан пагален умылтараш полшен кертеш. Тынеш пурымо деч вара Норти пионер семын служитлаш шонен пыштен. Но ачаже университетыш тунемаш пурымыжым вучен. Иза Нортилан каласен огыл мом ышташ. Тидын олмеш иза тудлан йодыш-влакым пуэн да тудлан библийысе принцип-влак нерген шонкалаш да чын решенийым лукташ полшен. Норти мом ойырен налын? Тудо пионер семын служитлаш тӱҥалын. Тидлан ачаже тудым мӧҥгыж гыч поктен луктын. Норти тудын дене мо лийме нерген мом шона? Теве мом тудо ойла: «Мый чын решенийым луктынам манын, пеҥгыдын ӱшанем». Айста меат жапнам она чамане да еҥ-влакым библийысе принцип-влакым кучылташ туныктена. Тунам нуно христиан корнышто пеҥгыдын шогаш тӱҥалыт (Еф. 3:16—19).

ИЗА-ВЛАКЛАН «ПӦЛЕК СЕМЫН» ЛИЯШ ПОЛШЫЗА

13. Таныклымаш паша умбакыжат шуйныжо манын, Иисус мом ыштен? (Ефесян-влаклан 4:8, УТ).

¹³ Мландыште илымыж годым Иисус Ачажын чыла кӱштымыжым шуктен (Иоан. 17:4). Но Иисус шонен огыл: «Сайын ыштынет гын, шке ыште». Кум ият пеле служымаш жапыште тудо тунемшыж-влакым туныктен. Тудо нунылан ончыктен, кузе таныклаш, кузе сай туныктышо лияш да кузе Иегован шорыкшо-влак верч тыршаш. Иисусын кавашке кайымекыже, нине пӧръеҥ-влак таныклымаш да туныктымаш пашаште шке ӱмбак виктарымашым налыныт. Нунын гыч южышт, очыни, тунам  30 ияшат лийын огытыл. (Ефесян-влаклан 4:8, УТ лудын лекса.) Нине пӧръеҥ-влак Иисус дене пырля тыршеныт да тудлан ӱшанле лийыныт. Но каваш кайыме деч ончыч Иисус нуным эше шукырак туныктен да нунылан «пӧлек семын» лияш полшен. Кузе тудо нуным туныктен? (Ефесян-влаклан 4:8, УТ почеламутлан комментарийым «Тунемме Библийыште» ончыза, англ.)

14. Иисус мландыште пытартыш 40 кече коклаште шке тунемшыж-влакым мо́лан туныктен? (Тыгак сӱретым ончыза.)

¹⁴ Кунам кӱлын, Иисус шке тунемшыж-влаклан каҥашым туран, но порын пуэн. Мутлан, южышт тудын ылыжмыжлан ӱшанен огытыл. Иисус тидлан вниманийжым ойырен да нунылан кокыте шонымаш деч утлаш полшен (Лук. 24:25—27; Иоан. 20:27). Тыгак тудо тунемшыж-влаклан шарныктен, мо илышыштышт эн тӱҥ лийшаш: шукырак оксам ыштыме олмеш нунылан кузе сай кӱтӱчӧ лияш шонаш кӱлын (Иоан. 21:15). Тыгак тудо нунылан шарныктен: нуно шке заданийыштым весе-влакын заданийышт дене таҥастарышаш огытыл (Иоан. 21:20—22). А эше тудо Юмын Кугыжаныш нерген йоҥылыш шонымашыштым тӧрлатен да нунылан таныклымаш пашаште уло вийым пышташ полшен (Ап. паш. 1:6—8). Кугурак иза-влакым тиде мо́лан туныкта?

15, 16. а) Мо шотышто кугурак иза-влак Иисус деч примерым налын кертыт? б) Кузе Патриклан ик каҥаш полшен?

¹⁵ Кузе кугурак иза-влак Иисус деч примерым налын кертыт? Нуно иза-влакым, пеш самырык-влакымат, погынымаште шукырак тыршаш да тӱрлӧ заданий-влакым шукташ туныктышаш улыт c. Нине пӧръеҥ-влак умылат: иза-влаклан шукылан тунемаш логалеш. Кугурак иза-влак нунылан йӧратымаш дене каҥаш-влакым пуышаш улыт. Тидлан кӧра весышт ӱҥышӧ, ӱшанле да весе-влаклан полшаш ямде лийыт (1 Тим. 3:1, УТ; 2 Тим. 2:2; 1 Пет. 5:5).

¹⁶ Ончалына, кузе ик каҥаш Па́трик лӱман изан илышыжым вашталтен. Самырыкрак лиймыж годым тудо чӱчкыдын торжан мутланен да весе-влак ден, ака-влак денат, шкем торжан кучен. Ик опытан кугурак иза тудлан тиде шотышто поро, но тура каҥашым пуэн. «Иза  ончыктен, мо шотышто мыланем саемаш кӱлеш. Тиде пеш сай, — ойла Патрик. — Мый ужынам: вес иза-влаклан тӱрлӧ заданийым пуат, а мыланем огыт пу. Тидлан кӧра мыйын кумылем волен. Ту каҥаш мыланем умылаш полшен: погынымаште почётан назначенийым налмылан огыл, а ӱҥышӧ лияш да иза-ака-влак дек шукырак йӧратымашым ончыкташ тыршымылан вийым пыштыман». Тидлан кӧра Патрик 23 ияш годым кугурак иза семын служитлаш тӱҥалын (Прит. 27:9).

17. Иисус тунемшыж-влаклан ӱшана манын, кузе ончыктен?

¹⁷ Иисус тунемшыж-влаклан таныклаш гына огыл, тыгак туныкташ заданийым пуэн. (Матфейын 28:20, УТ почеламут гыч «уча их» шомаклан комментарийым «Тунемме Библийыште» ончыза.) Очыни, нуно шоненыт, пуйто заданийым шукташлан нунын шинчымаш ден опытышт огеш сите. Но Иисус пален: нуно заданийым шуктен кертыт. Сандене тудо каласен: «Кузе Ача Мыйым колтен, Мыят тендам тугак колтем» (Иоан. 20:21).

18. Кузе кугурак иза-влак Иисус деч примерым налын кертыт?

¹⁸ Кузе кугурак иза-влак Иисус деч примерым налын кертыт? Уш-акылан кугурак иза-влак весе-влакым туныктат да нунылан тӱрлӧ заданийым ӱшанен пуат (Флп. 2:19—22). Мутлан, нуно самырык-влакым Вашлиймаш залым эрыктымаште да ончымаште полшаш йодын кертыт. Кугурак иза-влак вес иза-влаклан заданийым пуат, тиде заданийым шукташ нуным туныктат да варажым заданийым шуктымаште кажне ошкылыштым огыт эскере. Тыге нуно иза-влаклан ӱшанымыштым ончыктат. Мэ́тью лӱман у кугурак иза опытан кугурак иза-влаклан таум ышта, вет нуно тудым погынымаште тӱрлӧ пашам шукташ туныктеныт да тудо заданий-влакым сайын шукта манын ӱшаненыт. Тудо ойла: «Кунам мый йоҥылыш ыштенам, иза-влак мыланем умылаш полшеныт, мо́лан мый нине йоҥылыш-влак гыч тунемын кертам да мыланем саемаш полшеныт» d.

19. Тиде статья тендам мом ышташ таратен?

¹⁹ Мландыште лиймыж годым пытартыш 40 кече коклаште Иисус мом ыштен? Тудо тунемшыж-влакым пеҥгыдемден, туныктен да лийшаш пашалан ямдылен. Айста тиде шотышто тудын деч примерым налына (1 Пет. 2:21). Ме Иисусын полшымыжлан ӱшанен кертына, вет тудо сӧрен: «Тӱня пытымешке, Мый кече еда тендан дене пырля лиям» (Матф. 28:20).