1, 2. а) Иегован служитлышыже-влакын могай кокыте шонымаш-влак лектын кертыт? б) Тиде статьяште ме мом ончен лектына?

 КЕЧ-МОГАЙ ийготан улына гынат, мемнан гыч кажныжын южгунам кокыте шонымаш лектын кертеш a. Мутлан, рвезе нерген шоналтыза, кудыжо шонаш тӱҥалын: «Иегова мыйым акла мо?» Тидлан кӧра тудын тынеш пураш але уке кокыте шонымашат лектын кертеш. Але иза нерген шоналтыза, кудыжо самырык годым карьерым ыштен огыл, вет тудын Иеговалан служитлымаште шукырак ыштымыже шуын. А ындыжым, кунам ешыже окса нелылык дене тӱкнен, тудо шонаш тӱҥалын: «Самырык годым мый чын решенийым луктынам але уке?» А теве илалше-влакын шке нелылыкышт уло. Мутлан, ака вий укелан кӧра шӱлыкаҥеш, вет ындыжым ончычсо семынак тынар шуко ыштен огеш керт. Тендан иктаж-кунам тыгай йодыш-влак лектыныт мо: «Иегова мыйым акла мо? Иегова верч ыштыме „надырем-влак“ кӱлыныт мо? Алят Иеговалан иктаж-могай пайдам конден кертам мо?»

² Нине йодыш-влаклан вашмутым она нал гын, Иеговалан ӱшанымашна лушкыдемын кертеш да ме тудлан служитлымым чарнен кертына. Тиде статьяште ме ончен лектына, кузе Библий мыланна пеҥгыдын ӱшанаш полша: 1) Иегова  мемнам акла, 2) мемнан решенийна-влак чын лийыныт да 3) ме Иеговалан эше пайдале лийын кертына.

КОКЫТЕ ШОНЫМАШЫМ КОРАҤДАШ МО ПОЛША?

 3. Мемнан кокыте шонымаш-влак лектыт гын, мом ыштыман?

³ Кунам кокыте шонымаш-влак лектыт, мыланна Юмын Мутышто каҥашым кычалман. Тидлан кӧра Иеговалан ӱшанымашна да тудын дене кыл кучымашна пеҥгыдемеш да мемнан ӱшаннам нимо огеш лушкыдемде (1 Кор. 16:13).

 4. «Чыла тергыза» манме каҥаш мом ончыкта? (1 Фессалоникысе-влаклан 5:21).

⁴ 1 Фессалоникысе-влаклан 5:21 лудын лекса. Ончалза, Библий мемнам тарата: «Чыла тергыза». Кузе тидым ышташ лиеш? Иктаж-молан ӱшанаш тӱҥалме деч ончыч пален налаш кӱлеш, мом тидын нерген Библийыште возымо. Мутлан, рвезе шонаш тӱҥалын: «Юмо мыйым акла але уке?» Ушышкына иктаж-могай шонымаш пурен гын, тиде эше огеш ончыкто, пуйто тиде шонымаш чын. Сандене рвезылан Библийым почман да пален налман, мом Иегова тудын нерген чынжымак шона.

 5. Кузе ме шкенан йодышналан Иегован вашмутшым муын кертына?

⁵ Библийым лудмо годым ме пуйто Иегован йӱкшым колына. Но иктаж-могай йодыш шотышто Иегован шонымыжым пален налмыда шуэш гын, вийым пыштыман. Библийыште почеламут-влакым муза, кудышт йодышдалан вашмутым пуат. Тидлан публикацийна-влак почеш шымлымашым эртарыза (Прит. 2:3—6). Иеговалан кумалза да тудо тыланда йодышдалан вашмутым муаш полшыжо манын йодса. Варажым те ситуацийдалан келшен толшо библийысе принцип-влакым да пайдале информацийым муын кертыда. Эше Библийыште тыгай Юмын служитлыше-влак нерген лудаш кӱлеш, кудышт тендан гаяк ситуаций дене тӱкненыт.

 6. Кузе вашлиймаш-влак мыланна кокыте шонымашым кораҥдаш полшат?

⁶ Тыгак ме Иегован йӱкшым вашлиймаште колын кертына. Вашлиймашыш эре коштына гын, шкенан йодышналан вашмутым иктаж-могай ойлымаште але иза-ака-влакын вашмутышт гыч пален налын кертына (Прит. 27:17). Ындыжым айста лончылен налына, могай кокыте шонымаш-влак южгунам Юмын служитлышыже-влакын лектыт.

ИЕГОВА МЫЙЫМ АКЛА МО?

 7. Еҥ-влакын южгунам могай йодыш лектеш?

⁷ Тыйын тыгай йодыш иктаж-кунам лектын мо: «Иегова мыйым акла але уке?» Те кӱлдымӧ улыда манын, тыланда чучеш гын, тунам те шонен кертыда, пуйто Сандалыкым Ыштыше дене йолташ лийын ода керт. Очыни, Давид кугыжат тыге шонен. Иегова чынжымак еҥ-влакым акла да нунын верч тырша манын шонымаш Давидым чот ӧрыктарен. Тудо каласен: «Юмо, мо тугай айдеме, вет Тый тудлан Шкендым почынат: але айдемын эргыже мо улеш? Вет Тый тудын нергенат шонет» (Пс. 143:3). Чынжымак мо Иегова кажне айдеме верч тырша?

 8. Иегова мом ужеш? (1 Самуила 16:6, 7, 10—12).

⁸ Библий гыч ме пален налына: Иегова чылаштымат акла, тыгай еҥ-влакымат, кӧм весе-влак кӱлдымылан шотлат. Мутлан, икана тудо Самуилым Иессей деке колтен. Иессейын кандаш эргыже лийын. Юмо нунын гыч иктыжым Израильын кугыжалан шӱраш кӱштен. Иессей чыла эргыжым шкеж дек ӱжын. Давид лӱман эн изи эргыжым b  гына ӱжын огыл. Но лач тудым Иегова ойырен налын. (1 Самуила 16:6, 7, 10—12 лудын лекса.) Иегова ужын, могай чынжымак Давид лийын. Тудо пален: тиде рвезе тудым чот йӧрата.

 9. Иегова тыйым сайын пала манын, кушеч коеш? (Тыгак сӱретым ончыза.)

⁹ Иегова тыйым акла. Тудо кузе тидым ончыкта? Тудо лач тыйын ситуацийлан келшен толшо каҥашым пуа (Пс. 31:8). Тиде теве мом ончыкта: Юмо сайын пала, мо тыланет кӱлеш (Пс. 138:1). Иегован каҥашыже-влакым кучылтын да ужын, кузе нуно тыланет полшат, тый умылен налат: тый Иеговалан садиктак отыл (1 Лет. 28:9; Ап. паш. 17:26, 27). Юмо тудлан служитлаш да тудым колышташ тыйын тыршыметым ужеш. Тудо сай койышет-влакым акла да тый денет йолташ лийнеже (Иер. 17:10). Тый тудын йолташыже лияш келшет гын, тудо чот куана (1 Иоан. 4:19).

МЫЙ ЧЫН РЕШЕНИЙЫМ ЛУКТЫНАМ МО?

10. Эртыше жапым шарналтен, могай кокыте шонымаш-влак лектын кертыт?

¹⁰ Южо христиан-влак эртыше жапым шарналтен, кокыте шонаш тӱҥалыт, нуно чын решенийым луктыныт але уке. Очыни, Иеговалан шукырак служитлашлан нуно бизнесым але шуко оксан пашам коденыт. Ындыжым, шуко ий эртымеке, нуно ужыт: карьерым ойырен налше еҥ-влак поян да тургыжланыде илат. Сандене ушышкышт тыгай кокыте шонымаш пурен кертеш: «Иеговалан служитлыме верч тыгай решений-влакым лукташ чын лийын мо? Але кызыт шукырак окса лийже манын, тунам шукырак пашам ышташ кӱлын?»

11. Молан кӧра 72-шо Псаломын авторжын кумылжо волен?

¹¹ Тенданат тыгай шонымаш-влак лектыт гын, тыланда 72-шо Псаломым ончен лекташ пайдале лиеш. Тудын авторжо тыгаяк  ситуацийыште лийын. Тудо ужын: вес еҥ-влак Юмылан огыт служитле гынат, таза улыт, поян илат да нунын нимогай проблемышт уке (Пс. 72:3—5, 12). Нунын сай илышыштым ужын, тудо шонаш тӱҥалын, пуйто Иеговалан служитлаш тыршымыже арам веле. Тыгай шӱлыкаҥдыше шонымаш-влаклан кӧра тудо кажне кечын орланен (Пс. 72:13, 14). Тыгай шижмашым сеҥаш тудлан мо полшен?

12. Псаломым мурышылан уда шижмашым сеҥаш мо полшен? (Псалом 72:16—18).

¹² Псалом 72:16—18 лудын лекса. Псаломым мурышо Иегован святой пӧртышкыжӧ пурен. Тушто, тымык верыште, Юмын служитлыше-влак коклаште, тудо чылажымат чын шинчаончалтыш дене ончалын кертын. Тудо ужын: кызыт еҥ-влак сайын илат гынат, нунын ончыкылыкышт уке. Тудо умылен налын: илышыштыже Иеговалан служитлымым икымше верыш шындыме дене тудо чын решенийым луктын. Тиде шонымаш тудым лыпландарен. Тидлан кӧра тудын Иеговалан умбакыжат ӱшанлын служитлаш вийже лектын (Пс. 72:23—28).

13. Илышыштыда лукмо решений-влак шотышто кокыте шонымашда уло гын, мом ыштыман? (Тыгак сӱретым ончыза.)

¹³ Псаломым мурышо семын теат шӱлыкаҥдыше шонымаш-влакым кораҥден кертыда. Илышыштыда мо сай уло, чылажат нерген, ты шотыштак Иегован суапландарымашыже нерген, шоналтыза. Шарныза: Иеговалан служитлыдыме еҥ-влак тудын полыш деч посна илат. Нунын гыч шукыштлан эн тӱҥжӧ — тиде сай паша да сай илыш. Вет нуно ончыкылык деч нимо сайым огыт вучо. Нунын дене таҥастарымаште мемнан уже кызыт Иегова деч шуко сай пӧлек уло. А ончыкыжым тудо эше шукырак пуаш сӧра  (Пс. 144:16). Тыгак теве мо нерген шоналтыза: вес решенийым луктыда ыле гын, могай тендан таче илышда лиеш ыле, тӱрыснек пален ода керт. Но теве мом ме раш палена: решений-влакым лукташ мемнам Юмым да лишыл-влакым йӧратымаш тарата гын, ме чынжымак пиалан лийына.

КЫЗЫТАТ ИЕГОВАЛАН ПАЙДАЛЕ ЛИЙЫН КЕРТАМ МО?

14. Южо христиан-влакын могай нелылыкышт уло да нунын могай йодыш лектын кертеш?

¹⁴ Илалше улмылан, начар тазалыклан але инвалидностьлан кӧра южо Иегован служитлышыже-влак ончычсо семын шуко тыршен огыт керт. Нуно шонен кертыт, пуйто ындыжым Иегова нуным огеш акле, да нунын йодыш лектын кертеш: «Мый Иеговалан пайдале лийын кертам мо?»

15. 70-ше Псаломын авторжо мом пален?

¹⁵ 70-ше Псаломын авторжын вийже шагал лийын, да тудо тидын нерген тургыжланен. Тудо кумалын: «Вием пыташ тӱҥалмекат, мыйым ит кодо!» (Пс. 70:9, 18). Но Псаломым мурышо пален: Юмылан ӱшанле кодеш гын, Юмо тудлан полшымым ок чарне. Тачат Иегова вашталтын огыл. Тудо огеш ончо, мыняр мемнан вийна уло. Тудлан тӱҥжӧ — кузе ме тудым кучылтына (Пс. 36:23—25).

16. Илалше-влак Иеговалан да весе-влаклан мом ыштен кертыт? (Псалом 91:13—16).

¹⁶ Шергакан илалше иза-ака-влак! Шке ӱмбакыда Иегован ончалтыш дене ончаш тыршыза. Шарныза: Иегова тыланда тудлан умбакыжат ӱшанлын служитлаш полша, кеч тендан шуко физический вийда уке. (Псалом 91:13—16 лудын лекса.) Мом те ыштен ода керт манын, шонымо олмеш, мом те ыштен кертыда манын шоныза. Мутлан, Иеговалан умбакыжат ӱшанлын служитлымыда иза-ака-влакым чот кумылаҥда. Тыгак те нунылан шке вниманийдам ойырен, нуным  пеҥгыдемден кертыда. Каласкалыза нунылан, кузе Иегова тыланда шуко ий мучко полшен да могай библийысе сӧрымаш-влакым те ончыкыжым чот вучеда. Тыгак ида мондо: весе-влак верч кумалмыда нунылан пайдам конда (1 Пет. 3:12). Кеч-могай ситуацийыште улына гынат, мемнан гыч кажныже Иеговалан да весе-влаклан иктаж-мом ыштен кертеш.

17. Молан шкенам весе-влак дене таҥастараш огеш кӱл?

¹⁷ Иеговалан чот шагал пуэда манын тыланда чучеш гын, ида шӱлыкаҥ. Тудо чыла ыштымыдам акла. Очыни, те шкендам весе-влак дене таҥастараш тӱҥалын кертыда. Но тыге ида ыште. Вет Иегова тендам нигӧ дене огеш таҥастаре (Гал. 6:4). Шоналтыза: Мария Иисуслан шерге пушан ӱйым пӧлеклен (Иоан. 12:3—5). А йорло тулык вате храмыште кок лепта оксам веле надыреш пыштен (Лук. 21:1—4). Но Иисус тиде кок ӱдырамашым таҥастарен огыл. Тудо Мариянат, йорло тулык ватынат пеҥгыде ӱшанымашыжым ужын. Иегова шке служитлышыже-влак ӱмбак тыгак онча. Сандене Иеговалан шагал ыштеда манын, тыланда чучеш гынат, но тыршаш тендам йӧратымаш да ӱшанымаш тарата гын, Иегова тидым чот акла.

18. Кокыте шонымаш-влакым кораҥдаш мыланна мо полша? (Тыгак « Иегован мутшо-влак кокыте шонымаш-влакым кораҥдаш полшат» рамкым ончыза.)

¹⁸ Мемнан чылаштынат жапын-жапын кокыте шонымаш-влак лектын кертыт. Кузе ме ужынна, Библийлан кӧра ме нуным сеҥен кертына. Тушто шкендан йодышда-влаклан вашмутым кычалза. Тунам кокыте шонымо олмеш те пеҥгыдын ӱшанаш тӱҥалыда: те Иеговалан садиктак огыдал. Тыгак тудын верч ыштыме «надырдам» тудо акла да тендам суапландара. Эше шарныза: Иегова чыла ӱшанле служитлышыже-влакым йӧрата да нунын верч тырша.