1. Ме Иисус деч могай пӧлек-влакым налынна?

 ИК АЙДЕМАТ еҥ-влаклан Иисус семын тынар шуко ыштен огыл. Иисус мландыште илымыж годым весе-влаклан полшашлан шкенжын вийжым уло кумылын кучылтын (Лук. 9:12—17). Мемнан верч илышыжым пуымыж дене тудо эн кугу пӧлекым ыштен (Иоан. 15:13). Ылыжмеке, Иисус еҥ-влаклан полшымыжым чарнен огыл. Сӧрымыжӧ почеш тудо Ачажым мыланна святой шӱлышым пуаш йодын. Тиде святой шӱлыш мемнам туныкта да лыпландара (Иоан. 14:16, 17; 16:13). Уло тӱня мучко илыше тунемше-влакым ямдылашлан Иисус мыланна вашлиймаште чыла кӱлешаным пуа (Матф. 28:18—20).

 2. Ефесян-влаклан 4:7, 8, УТ почеламут-влакыште могай пӧлек-влак нерген ойлалтеш?

² Иисус мыланна эше ик пӧлекым пуэн. Апостол Павел возен: каваш кӱзымеке, Иисус «пӧлек семын еҥ-влакым пуэн». (Ефесян-влаклан 4:7, 8, УТ лудын лекса.) Павел умылтарен: нине пӧлек-влак — тиде пӧръеҥ-влак, кудышт погынымаш верч тыршат (Еф. 1:22, 23; 4:11—13). Нунын коклаште служебный полышкалыше-влак, верысе кугурак иза-влак да районым эскерыше иза-влак улыт a. Мутат уке, нуно сулыкан улыт, сандене южгунам йоҥылышым ыштен кертыт (Иак. 3:2). Но Иисус Христос Господьна мыланна полшашлан нуным кучылтеш. Нуно тудын деч пӧлек улыт.

 3. Кузе ме чыланат иза-влаклан погынымашым пеҥгыдемдаш полшен кертына? Примерым кондыза.

³ Иисус нине пӧръеҥ-влаклан погынымашым пеҥгыдемдаш  кӱштен (Еф. 4:12). Но ме чыланат тиде кӱлешан пашаште нунылан полшен кертына. Тидым Вашлиймаш залым чоҥымо дене таҥастараш лиеш. Южышт чоҥымаште тыршат. А весышт нунылан полшат. Мутлан, кочкышым ыштат але кӱлешан материалым кондат. Тидын семынак погынымашым пеҥгыдемдашлан шукырак пашажым служебный полышкалыше-влак, верысе кугурак иза-влак да районым эскерыше иза-влак шуктат. Но ме чыланат нунылан мутна да пашана дене погынымашым пеҥгыдемдаш полшен кертына. Айста ончалына, могай кӱлешан пашам нуно шуктат да кузе ме нуным да Иисусым, кудыжо мыланна нуным пӧлеклен, тауштен кертына.

СЛУЖЕБНЫЙ ПОЛЫШКАЛЫШЕ-ВЛАК ПОГЫНЫМАШТЕ ПОЛШАТ

 4. Икымше курымышто служебный полышкалыше-влак мо дене полшеныт?

⁴ Икымше курымышто южо иза-влак служебный полышкалыше лийыныт (1 Тим. 3:8). Витне, лач нунын нерген Павел возен, кунам полшышо-влак нерген ойлен (1 Кор. 12:28). Очыни, нуно тӱрлӧ сомылым шуктеныт. Тидлан кӧра кугурак иза-влак погынымашым туныктымылан да пеҥгыдемдымылан шукырак вниманийым ойырен кертыныт. Служебный полышкалыше-влак Священный Возымашын копийже-влакым ыштеныт але тиде пашалан кӱлешан материалым налыныт докан.

 5. Таче служебный полышкалыше-влак мо дене полшат?

⁵ А таче служебный полышкалыше-влак мом ыштат? Нунын пашашт тыланда могай пайдам конда? Нуно чот шуко заданийым шуктат (1 Пет. 4:10). Нуно погынымашын бухгалтерий пашам шуктат, таныклымаш участок-влаклан вуйын шогат, литературым заказыватлат, аудио- ден видеооборудований ыштыже манын тыршат, распорядитель семын служитлат да Вашлиймаш залым обслуживатлаш полшат. Чыла тидлан кӧра вашлиймаш-влак да таныклымаш паша сайын эртат (1 Кор. 14:40). Эше южо служебный полышкалыше-влак арня покшелне вашлиймаште пункт-влак дене лектыт. Тыгак публичный ойлымаш-влак дене выступатлат. Чӱчкыдын нине иза-влакым таныклымаш пашалан ответственный изалан полшаш йодыт. А южгунам кугурак иза-влак служебный полышкалыше-влакым иктаж-кӧм кумылаҥдаш пеленышт налыт.

 6. Каласыза, молан те чот тыршыше служебный полышкалыше-влакнам акледа.

⁶ Айста пален налына, мом служебный полышкалыше-влак нерген иза-ака-влак ойлат. «Кугу тау нунылан! Вашлиймаш-влак пеш сайын эртат. Нунын тыршымыштлан кӧра мый мурен, вашмутым пуэн, ойлымаш-влакым колыштын да сӱрет ден видеом ончен кертам. — Боливий гыч Бе́берли b лӱман ака манеш. — Тыгак нуно безопасностьна нерген тыршат да вашлиймашыш видеоконференций гоч ушнаш йӧн лийже манын ыштат. А вашлиймаш деч вара нуно окса надырым шотлат, литературым пуат да уло кумылын эрыктымаште тыршат. Нине иза-влакым кузе от йӧрате?» Колумбий гыч Ле́сли лӱман ака, кудыжын марийже кугурак иза семын служитла, манеш: «Погынымаште тынар шуко паша! Йӧра нунын гыч южыжым служебный полышкалыше-влак ыштат. Уке гын, мый мариемым йӧршынак ом уж ыле. Мый нине иза-влаклан кугу таум ойлем, вет нуно чот тыршат да полшаш эре ямде улыт!» Теат нине ака-влакын мутышт дене келшеда докан (1 Тим. 3:13).

 7. Служебный полышкалыше-влакын пашаштлан тауштымынам кузе ончыкташ лиеш? (Тыгак сӱретым ончыза.)

⁷ Библий мемнам кумылаҥда: «Тауштен моштышо лийза» (Кол. 3:15). Ме служебный полышкалыше-влаклан тауштышо улына гынат, мыланна тидын нерген нунылан каласаш кӱлеш. Теве мом Финляндийыште служышо Кши́штоф лӱман кугурак иза ышта: «Мый эре иктаж-мо́лан — нунын пашаштлан але иктаж-могай  шонымашлан, кудыжо мыйым кумылаҥден — таушташ тыршем. Мый открыткым але сообщенийым возем да келшен толшо библийысе почеламутым ешарем». А Паска́ль ден Жаэ́ль, кудышт У Каледонийыште илат, теве мом ыштат: «Пытартыш жапыште ме служебный полышкалыше-влак нерген шуко кумалына. Иеговам нунын верч тауштена да тудо нунылан полшыжо манын йодына». Иегова тыгай кумалтыш мут-влаклан вашмутым пуа, да тиде уло погынымашлан пайдам конда (2 Кор. 1:11).

ПОГЫНЫМАШТЕ КУГУРАК ИЗА-ВЛАК «ТЕНДАН КОКЛАШТЕ ПАШАМ ЫШТЫШЕ» УЛЫТ

 8. Икымше курымышто кугурак иза-влакын пашам тыршен шуктымышт кушеч койын? (1 Фессалоникысе-влаклан 5:12, 13).

⁸ Икымше курымышто кугурак иза-влак иза-ака-влак верч чот тыршеныт (1 Фессалоникысе-влаклан 5:12, 13 лудын лекса; 1 Тим. 5:17). Пырля нуно уло погынымаш дене кылдалтше решений-влакым луктыныт. Эше нуно вашлиймаш-влакым эртареныт да иза-ака-влакым йӧратен туныктеныт. Тыге нуным духовный эҥгек деч араленыт (1 Фес. 2:11, 12; 2 Тим. 4:2). Конешне, нине пӧръеҥ-влак шке ешышт нерген монден огытыл. Нуно ешыштышт гыч кажныжлан Иегова дене лишыл кыл кучымашым аралаш полшеныт да нунын материальный кӱлешлыкыштым ситареныт (1 Тим. 3:2, 4; Тит. 1:6—9).

 9. Кугурак иза-влакын могай заданийышт-влак улыт?

⁹ Тачат кугурак иза-влак шуко тыршат. Нуно поро уверым таныклат (2 Тим. 4:5). Нуно погынымашын территорийыштыже таныклымашым организоватлат. Мемнам таныклаш да тунемше-влакым ямдылаш туныктат да шкешт таныклыме шотышто сай примерым ончыктат. Тыгак кугурак иза-влак — чаманыше да чылаштым ик семын ончышо судья-влак. Кунам христиан кугу сулыкым ышта, нуно тудлан Иегова дене кыл кучымашыжым тӧрлаташ полшат. Тунамак погынымаш ару кодшо манын, нуно тыршат (1 Кор. 5:12, 13; Гал. 6:1). Но эн тӱҥжӧ — кугурак иза-влакым ме кӱтӱчӧ семын палена (1 Пет. 5:1—3). Нуно библейский ойлымаш-влак дене лектыт, погынымаште кажныж дене сайрак палыме лияш тыршат да иза-ака-влак дене вашлиялтын, нуным кумылаҥдат. А эше южо кугурак иза-влак Вашлиймаш зал-влакым чоҥат да обслуживатлат, конгресс-влакым организоватлаш полшат да больнице-влак дене кылым кучышо комитет-влакыште да черле-влак деке коштмо группышто служитлат. Кугурак иза-влак мемнан верч чот шуко тыршат!

10. Каласыза, молан те чот тыршыше кугурак изана-влакым акледа.

¹⁰ Иегован ончылгоч каласымыж дене келшышын, йӧратыше кӱтӱчӧ-влаклан кӧра тудын шорыкшо-влак лӱдаш да чытыраш огыт тӱҥал (Иер. 23:4). Финляндий гыч Йоха́нна тидым шке илышыштыже ужын. Теве мо лийын, кунам тудын аваже чот черланен: «Мый шкеже весе-влаклан шижмашем нерген каласкалаш ом йӧрате. Но кунам мый мутланаш ямде лийынам, ик кугурак иза, кудыжым мый пешыжак сайын пален омыл, мыйым тӱткын колыштын. Тудо мый денем пырля кумалын да Иегова мыйым йӧрата манын ӱшандарен. Мый ом шарне, мом тудо каласен. Но мый шарнем, кузе шӱмемлан ласка лие. Мый пеҥгыдын ӱшанем: тиде Иегова мыланем тудым эн кӱлеш жапыштыже колтен». А кузе тендан погынымаш гыч кугурак иза-влак тыланда полшеныт?

11. Кугурак иза-влаклан тауштымынам кузе ончыкташ лиеш? (Тыгак сӱретым ончыза.)

¹¹ Иегован кумылжо почеш ме кугурак иза-влакым ыштен шогымо пашаштлан тауштышаш улына (1 Фес. 5:12, 13). Финляндийыште илыше Хенрие́тта ойла: «Кугурак иза-влак полшаш эре ямде улыт. Но тиде огеш ончыкто, пуйто весе-влак дене таҥастарымаште нунын жап ден вийышт шукырак але пуйто нунын нелылыкышт уке. Южгунам мый нунылан ойлем: „Тый пеш сай кугурак иза улат!“». Турций гыч  Сера́ манеш: «Кугурак иза-влакым кумылаҥдаш кӱлеш. Тидлан кӧра нуно умбакыжат служитлен кертыт. Сандене нунылан открыткым возаш, нуным пырля кочкаш але пырля таныклаш каяш ӱжаш лиеш». Уло мо тыгай кугурак иза, кудыжын пашажым тый поснак аклет? Тидын нерген тудлан каласе але иктаж-кузе вес семын тудлан таум ыште (1 Кор. 16:18).

РАЙОНЫМ ЭСКЕРЫШЕ ИЗА-ВЛАК ПОГЫНЫМАШ-ВЛАКЫМ ПЕҤГЫДЕМДАТ

12. Кӧ гоч Иисус икымше курымышто погынымаш-влакым пеҥгыдемден? (1 Фессалоникысе-влаклан 2:7, 8).

¹² Христос Иисус погынымашлан служебный полышкалыше-влакым да кугурак иза-влакым гына огыл, тыгак ик погынымаш гыч вес погынымашыш коштшо служитлыше-влакым пуэн. Молан? Погынымаш-влакым пеҥгыдемдаш цель денак (Ап. паш. 15:40, 41). Иисусын виктарымыже почеш Иерусалимысе кугурак иза-влак Павелым, Варнавам да моло пӧръеҥ-влакым тӱрлӧ погынымашым пеҥгыдемдаш колтеныт (Ап. паш. 11:22). Весе-влакым туныкташ да кумылаҥдашлан нине пӧръеҥ-влак простан илаш да лӱдыкшӧ ситуаций дене тӱкнаш ямде лийыныт. (1 Фессалоникысе-влаклан 2:7, 8 лудын лекса.)

13. Районым эскерыше иза-влак могай пашам шуктат?

¹³ Районым эскерыше иза-влакланат шуко пашам ышташ логалеш. Нунын гыч южышт погынымаш-влакыш миен шуашлан шӱдӧ дене километрым эртат. Кажне арнян районым эскерыше иза икмыняр ойлымаш дене лектеш. Тудо посна иза-ака-влак дене вашлиялтын, нуным кумылаҥда. Пионер-влак дене да кугурак иза-влак дене вашлиймашым, тыгак таныклымашлан кӱчык вашлиймаш-влакым эртара. Районысо да регионысо конгресс-влакым организоватла да тушто ойлымаш-влак дене лектеш. Районым эскерыше иза пионер-влаклан школышто туныкта, районысо пионер-влак дене  специальный вашлиймашым организоватла да филиалын вес кӱштымаш-влакым шукта. Нине паша-влак гыч южыштым жапым шуйкалыде ыштыман.

14. Каласыза, молан те чот тыршыше районым эскерыше изана-влакым акледа.

¹⁴ Районым эскерыше иза-влакын пашашт погынымашлан могай пайдам конда? Теве мом Турций гыч ик иза ойла: «Кажне толмышт деч вара иза-ака-влаклан эше шукырак полшаш кумылем лектеш. Мемнан дек районым эскерыше тӱрлӧ иза толын, да мыланем нигунам чучын огыл, пуйто нунын пеш шуко пашашт да нунын мый денем мутланаш жапышт уке». А теве мом уже палыме Йоханна ойла. Икана тудо районым эскерыше иза дене таныклен. Нуно еҥ-влакым пӧртыштышт вашлийын огытыл гынат, ту служымаш ушешыже кодын. Тудо каласкала: «Мый ту кечым нигунам ом мондо. Кок акамат вес верыш кусненыт, да мыланем нунын деч посна йокрок лийын. Районым эскерыше иза мыйым кумылаҥден да умылаш полшен: очыни, кызыт ме ешна да йолташна-влак дене пырля эре лийын она керт, но у тӱняште нунын дене жапым эртараш шукырак йӧн лиеш». Мемнан гыч шукыштынат, очыни, тыгай случай-влак лийыныт, кунам районым эскерыше иза мыланна полшен (Ап. паш. 20:37—21:1).

15. а) Кузе ме районым эскерыше иза-влаклан нунын пашаштым аклымынам ончыктен кертына? (3 Иоаннын 5—8). (Тыгак сӱретым ончыза.) б) Молан ме служебный полышкалыше-влакын да кугурак иза-влакын ватыштым аклена да кузе ме нунылан тауштымынам ончыктен кертына? (« Нунын ватышт нерген ида мондо» рамкым ончыза.)

¹⁵ Апостол Иоанн ик погынымаш гыч вес погынымашыш коштшо служитлыше-влакым шке дек пурташ Гайым таратен да тудлан каласен: «Нунылан корныш ямдылалташ Юмылан келшышын полшет гын, тый поро пашам ыштет». (3 Иоаннын 5—8 лудын лекса.) А ме тидым кузе ыштен кертына? Мутлан, районым эскерыше изам пырля кочкаш ӱжаш лиеш. Тыгак тудын эртарыме таныклымашлан кӱчык вашлиймашыш  толаш лиеш. 6-шо абзацыште палемдыме Лесли теве мом эше ышта. Тудо ойла: «Мый нунын верч кумалам да Иегова нунылан чыла кӱлешаным пуыжо манын йодам. Эше ме марием дене нунылан серыш-влакым возена да ойлена, мыняр чот нунын ыштымыштым аклена». Шарныза: районым эскерыше иза-влак мемнан гай еҥ-влак улыт. Нуно черланат, ала-мо верч тургыжланат, южгунамже нунын кумылышт вола. Очыни, поро мутда але изи пӧлекда кумалмыштлан вашмут лиеш! (Прит. 12:25).

МЫЛАННА СЛУЖЕБНЫЙ ПОЛЫШКАЛЫШЕ-ВЛАК ДА КУГУРАК ИЗА-ВЛАК ЧОТАК КӰЛЫТ

16. Притчи 3:27 дене келшышын, иза-влак шкаланышт могай йодыш-влакым пуэн кертыт?

¹⁶ Уло тӱня мучко иза-влак кӱлыт, кудышт погынымаш верч тыршаш тӱҥалыт. Тый тынеш пурышо иза улат гын, полшен кертат мо? (Притчи 3:27 лудын лекса.) Служебный полышкалыше лияш шкаланет цельым шынденат мо? А служебный полышкалыше улат гын, кугурак иза лияш тыршет мо? c Кугыжанышын увертарышыж-влаклан школышто тунемашлан илышыштет иктаж-мом вашталтен кертат мо? Тыгай тунеммаш тыйым заданий-влаклан сайрак ямдыла, кудыштым Иисус тыланет ончыкыжым ӱшанен пуэн кертеш. Тый чыла тидым ыштен от сеҥе манын, шонет гын, Иеговалан кумал. Кеч-могай тыланет ӱшанен пуымо пашам шуктен керташлан Иегова деч святой шӱлышым йод (Лук. 11:13; Ап. паш. 20:28).

17. Христос Иисус азапланыше Кугыжа улеш манын, кушеч коеш?

¹⁷ Иисус тӱня пытымешке кече еда тунемшыж-влак дене пырля лиеш манын сӧрен (Матф. 28:20). Тудо шке мутшым шукта. Тидым служебный полышкалыше-влакын да кугурак иза-влакын улмышт пеҥгыдемда. Ме йӧратыше, уло кумылын пуышо да чаманыше Кугыжалан кугу таум ойлена, вет тудо мыланна нине пӧръеҥ-влакым нуно мемнан верч тыршышт манын пуэн! Тек нуно палат, мыняр чот ме нунын тыршымыштым аклена. Сандене айста тидын нерген нунылан ойлена але иктаж-кузе вес семын тауштымынам ончыктена. Уло моктымашым Иеговалан пуаш ида мондо, вет лач тудын деч «чыла поро да тичмаш пӧлек» (Иак. 1:17).