1. Юмо апостол Петрлан тудын колымыж деч ончыч могай заданийым пуэн?

 ПЕТР Иеговалан шуко ий ӱшанлын служитлен. Тудо Иисус дене пырля таныклен коштын. Тиде апостоллан кӧра еврей огыл еҥ-влак коклаште поро увер шаркалалташ тӱҥалын. Вара тудо вуйлатыше советыште служитлен. А колымыж деч ончыч Петр Иегова деч эше ик заданийым налын. Мемнан эран 62—64 наре ийлаште Юмо тудлан кок серышым возаш кӱштен. Нуно вара Библийыш пуреныт. Кызыт ме нуным Петрын 1-ше да 2-шо серыш семын палена. Апостол ӱшанен: тиде серыш-влак тудын колымыж деч варат христиан-влаклан Юмылан ӱшанле кодаш полшат (2 Пет. 1:12—15).

2. Молан Петрын серышыже-влак христиан-влаклан чот кӱлыныт?

² Петр серышыж-влакым тунам возен, кунам христиан иза-ака-влаклан «тӱрлӧ тергымаште... ойгаҥаш» логалын (1 Пет. 1:6). Погынымаште тыгай еҥ-влак лияш тӱҥалыныт, кудышт шоя туныктымашым шаркаленыт да яжарланаш таратеныт (2 Пет. 2:1, 2, 14). Тыгак ту кече лишемын, кунам римысе армий Иерусалим ден храмжым шалатышаш ыле. Иерусалимыште илыше христиан-влаклан ямде лияш кӱлын (1 Пет. 4:7). Мутат уке, Петрын серышыже-влак иза-ака-влаклан чыла ту нелылыкым чытен лекташ да лийшаш нелылыклан ямдылалташ полшеныт b.

3. Молан Петрын серышыже-влакым шымлаш кӱлеш?

³ Петр шке серышыже-влакым икымше курымысо христиан-влаклан  возен гынат, Иегова нуным шке Мутышкыжо пуртен. Тугеже, нуно мыланнат пайдале лийыт (Рим. 15:4). Кызытсе тӱня яжарланен илаш тарата. Сандене Иеговалан служитлаш куштылго огыл. Тыгак пеш вашке тыгай орлык лиеш, кудыжо Иерусалимым пытарыме деч эше нелырак лиеш. Петрын кок серышыштыже ме кӱлешан ушештарымашым муына. Нуно мыланна Иегован кечыжым вучаш, еҥ-влак деч лӱдмашым сеҥаш да икте-весым шокшын йӧраташ полшат. Тыгак нине ушештарымаш-влаклан кӧра кугурак иза-влак погынымаште иза-ака-влак верч эше сайрак тыршен кертыт.

4. 2 Петрын 3:3, 4 дене келшышын, ӱшанымашнам мо лушкыдемден кертеш?

⁴ Ме тыгай еҥ-влак коклаште илена, кӧ библийысе ончылгоч каласымаш-влаклан огеш ӱшане. Тушман-влак мемнам мыскылат, вет ме уже шуко ий мучашын лишеммыже нерген ойлена. Южышт эсогыл ойлат, пуйто тиде мучаш нигунамат огеш тол. (2 Петрын 3:3, 4 лудын лекса.) Тыгайымак ме пырля пашам ыштыше-влак деч, родо-влак деч але таныклыме годым колын кертына. Нунын ойлымышт ӱшанымашнам лушкыдемден кертеш. Петр умылтарен, тыге ынже лий манын, мом ыштыман.

5. Тиде тӱнян мучашыжым чытен вучаш мыланна мо полшен кертеш? (2 Петрын 3:8, 9).

⁵ Южышт шонен кертыт, пуйто Иегова тиде осал тӱням пытараш ок вашке. Но Петрын мутшо мыланна шарныкта: еҥ-влак дене таҥастарымаште Юмо жапым вес семын онча. (2 Петрын 3:8, 9 лудын лекса.) Тудлан тӱжем ий ик кече гай. Иегова чытымашым ончыкта. Тудо иктынат пытымыжым ынеж уж. Но кунам тудын кечыже толеш, тиде тӱня пытарыме лиеш. Айста кодшо жапым шот дене кучылтына да чыла еҥ-влаклан таныклена.

6. Иегован кечыже нерген шарнаш мыланна мо полшен кертеш? (2 Петрын 3:11, 12).

⁶ Петр мемнам Иегован кечыже нерген шарнаш тарата. (2 Петрын 3:11, 12 лудын лекса.) Кузе ме тидым ыштен кертына? Мыланна кажне кечын у тӱнясе сылне илыш нерген шонкалаш тыршыман. Ушыштыда сӱретлыза, кузе те яндар юж дене шӱледа, пайдале тамле кочкышым кочкыда, ылыжше лишылда-влакым вашлийыда да шуко курым ончыч илыше еҥ-влаклан библийысе ончылгоч каласымаш-влакын шукталтмышт нерген каласкаледа. Тыгай шонкалымаш тыланда полша ту жапым чытен вучаш да, мучаш пешак лишне манын, пеҥгыдын ӱшанаш. Мо мемнам ончыкыжым вуча палена гын, тунам мемнам огыт ондале тыгай еҥ-влак, кӧ Иегован кечыжын толмыжлан огеш ӱшане (2 Пет. 3:17).

7. Еҥ-влак деч лӱдмаш мыланна кузе влиятлен кертеш?

⁷ Ме Иегован кечыже нерген шарнена, сандене весе-влаклан поро уверым ойлена. Но южгунам ме еҥ-влак дене Библий нерген мутланаш лӱдына. Молан? Ме тургыжланен кертына: «А мом мемнан нерген шоналтат? Трук мемнан дене иктаж-мом ыштат». Лач тыге Петр дене лийын. Ту йӱдым, кунам Иисусым судитленыт, Петр тудын тунемше улмыжым шылташ тыршен да эсогыл икмыняр гана Иисус нерген тудым ом пале манын каласен (Матф. 26:69—75). Но Петр лӱдмашыжым сеҥен кертын да, жап эртымеке, возен: «Нунын лӱдыктымышт деч ида лӱд, ида ӧр» (1 Пет. 3:14). Петрын мутшо мемнам ӱшандара: ме еҥ-влак деч лӱдмашым сеҥен кертына.

8. Еҥ-влак деч лӱдмашым сеҥаш мыланна мо полшен кертеш? (1 Петрын 3:15).

 ⁸ Еҥ-влак деч лӱдмашым сеҥаш мыланна мо полшен кертеш? Петр возен: «Христосым Господь семын шӱмыштыда пагалыза». (1 Петрын 3:15, УТ лудын лекса.) Мо тышке пура? Мыланна шонкалаш кӱлеш, могай верым кызыт Христос Иисус, мемнан Господьна да Кугыжана, налеш да могай тудын властьше уло. Поро уверым каласкалаш йӧн лекме годым тургыжланеда гын, Кугыжана нерген шарналтыза. Ушыштыда сӱретлыза, кузе тудо кавасе престолышто миллионло суксо коклаште шинча. Шарныза, тудлан «пылпомышто да мландӱмбалне пӱтынь власть пуалтын» да тудо «тӱня пытымешке... кече еда тендан дене пырля» лиеш (Матф. 28:18—20). Петр ӱшанымашна нерген ойлаш эре ямде лияш мемнам кумылаҥда. Пашаште, школышто але вес вере тендан таныклымыда шуэш мо? Ончылгочак шоналтыза, кунам тыгай йӧн лектын кертеш да мом те каласеда. Лӱддымылык нерген кумалза да пеҥгыдын ӱшаныза: Иегова тыланда кеч-могай лӱдмашым сеҥаш полша (Ап. паш. 4:29).

9. Могай ситуацийыште Петр иза-ака-влак деке йӧратымашым ончыктен огыл? (Тыгак сӱретым ончыза.)

⁹ Петр йӧратымашым ончыкташ тунемын. Тудо шкеже колын, кузе Иисус ойлен:  «Мый тыланда у кӱштымашым пуэм: икте-весыдам йӧратыза. Кузе Мый тендам йӧратенам, теат тугак икте-весыдам йӧратыза» (Иоан. 13:34). Туге гынат варарак Петр еврей огыл иза-ака-влак дене кочмым чарнен. Тудо лӱдын, мом еврей христиан-влак тудын нерген шоналтат. Апостол Павел Петрын ыштымыжым сайла кояш тӧчымылан шотлен (Гал. 2:11—14). Петр Павелын каҥашыжым шотыш налын да вашталтын. Кок серышыштыжат тудо ойлен, мыняр чот кӱлеш иза-ака-влак деке йӧратымашым шижаш гына огыл, а паша дене ончыкташ.

10. Иза-ака-влакым «сайла кояш тӧчыде йӧраташ» мо полша? Умылтарыза (1 Петрын 1:22).

¹⁰ Петр икымше курымысо христиан-влакым «иза-шольо-влакым сайла кояш тӧчыде йӧраташ» таратен. (1 Петрын 1:22 лудын лекса.) «Чыным колыштмым» ончыктена гын, вес семынже чыла библийысе туныктымашым илышыш пуртена гын, меат тыге йӧратен кертына. Мутлан, кузе Библийыште каласыме, Юмо «чыла еҥым ик семын» онча (Ап. паш. 10:34, 35). Погынымаште южо еҥ-влакым веле йӧратена гын, «икте-весыдам йӧратыза» Иисусын кӱштымашыжым шуктена манын каласен она керт. Мутат уке, южо иза-акам ме чотрак йӧратен кертына. Иисусат южо тунемшыж дене лишылрак лийын (Иоан. 13:23; 20:2). Но Петр погынымаште чылаштым йӧраташ кӱлмӧ нерген мыланна ушештара. Тунам кажныже шкенжым ик кугу йӧратыше ешыште улмыла шижеш (1 Пет. 2:17).

11. «Яндар шӱм дене» йӧратымаш мом ончыкта?

¹¹ Петр мемнам икте-весым «яндар шӱм дене» але шокшын йӧраташ таратен. Ты контекстыште тиде шомак шӱмнам почаш манмым ончыкта. Тидлан кӧра ме шӱмышкына нунымат пуртен кертына, кӧм йӧраташ куштылго огыл. Мутлан, ик иза але ака мемнам шӱлыкаҥден але сырыктен. Можыч, ме эн ончыч ӱчым шукташ шонен кертына. Петр Иисуслан кӧра пален: ӱчым шуктымаш Иеговалан огеш келше (Иоан. 18:10, 11). Петр возен: «Осаллыклан осал дене, вурседылмылан вурседылме дене ида вашеште. Порым гына тыланыза» (1 Пет. 3:9). Тек шокшо йӧратымаш тендам шӱлыкаҥдыше-влак деке поро да тӱткӧ лияш кумылаҥда.

12. а) Кугу йӧратымаш мемнам мом эше ышташ тарата? б) «Дорожите нашим единством» видеоролик гыч мом кучылтмыда шуэш?

¹² Кузе апостол Петр икымше серышыштыже возен, шокшо йӧратымаш ик-кок языкым гына огыл, а «шуко языкым» проститлаш полшен кертеш (1 Пет. 4:8). Очыни, Петр проститлыме нерген Иисусын шуко ий ончыч пуымо урокшым шарналтен. Тунам Петр, очыни, шонен, пуйто изажым шым гана проститлыме дене кугу порылыкым ончыкта. Но Иисус тудлан, тугеже мыланнат, «шым гана шымле пачаш марте» проститлаш каласен. Вес семынже, кажне гана проститлаш кӱлеш (Матф. 18:21, 22). Тиде каҥашым кучылташ пеш неле манын шонеда гын, киддам ида волто. Ме чыланат языкан улына, сандене мыланна проститлаш южгунам куштылго огыл. Но тыланда изам але акам проститлаш да тудын дене сӧрасашлан уло вийым пыштыман c.

13. «Шорыкем-влакым кӱтӧ» Иисусын кӱштымыжым шукташ кугурак иза-влаклан молан куштылго огыл?

¹³ Мутат уке, Петр нигунамат монден огыл, мом Иисус тудлан ылыжмыж деч вара каласен: «Мыйын шорыкем-влакым кӱтӧ» (Иоан. 21:16). Тый кугурак иза улат гын, палет: тиде кӱштымаш тыланетат каласыме  лийын. Но кугурак иза-влаклан тиде кӱлешан заданийым шукташлан жапым муаш куштылго огыл. Нунылан ешыштын физический, эмоциональный да духовный кӱлешлыкше верч тыршаш кӱлеш. Тыгак кугурак иза-влак тыршен таныклат да вашлиймаш ден конгрессыште пункт дене лекташлан ямдылалтыт. А нунын гыч южышт больнице-влак дене кылым кучышо комитетыште але чоҥымо шотышто верысе пӧлкаште тыршат. Мемнан шергакан кугурак иза-влак чынжымак чот пашаче улыт!

14. Юмын кӱтӱжым кӱташ кугурак иза-влаклан мо полшен кертеш? (1 Петрын 5:1—4).

¹⁴ Апостол Петр кугурак иза-влаклан каласен: «Юмын тыланда ӱшанен пуымо кӱтӱжым кӱтыза». (1 Петрын 5:1—4 лудын лекса.) Шергакан кугурак иза, ме палена: тый иза-ака-влакым йӧратет да тыйын нунын верч тыршымет шуэш. Но южгунам тылат чучын кертеш, пуйто шуко паша верч але нойымо верч тый заданиетым шуктен от керт. Мом тунам ыштен кертат? Иеговалан тургыжланымет нерген каласкале. Петр возен: «Кӧ служитла гын, Юмын пуымо вий дене служитлыже» (1 Пет. 4:11). Проблеме-влак, кудышт дене иза-ака-влак тӱкнат, очыни, у тӱняште гына кораҥдыме лийыт. Но шарне: «Тӱҥ Кӱтӱчӧ», Иисус Христос, нунылан тыгайым ыштен кертеш, мом тый ыштен от керт. Ала-мом тудо уже кызыт ышта, ала-можым — ончыкыжым. Юмо кугурак иза-влак деч теве мом гына йодеш: иза-ака-влакым йӧраташ, нунын верч тыршаш да нунылан пример лияш.

15. Ик кугурак иза погынымаш верч тыршымыжым кузе ончыкта? (Тыгак сӱретым ончыза.)

¹⁵ Шуко ий кугурак иза семын служитлыше Уи́льям умыла, мыняр чот иза-ака-влак верч тыршаш кӱлеш. Кунам COVID-19 пандемий тӱҥалын, тудо да вес кугурак иза-влак арняш ик гана таныклымаш группышт гыч кажне иза да акалан йыҥгырташ але возаш шонен пыштеныт. Тудо умылтара, молан нуно тыгай решенийым луктыныт: «Шуко иза-ака-влак мӧҥгыштӧ шонымашышт дене шкетын кодыныт да илышыштышт сайым ужаш чарнен кертыныт». Кунам изан але акан нелылыкше лектеш, Уильям нуным тӱткын колыштеш да палаш тырша, мо нунылан кӱлеш да кузе нунылан полшаш лиеш. Вара тудо нунылан келшен толшо информацийым  кычалеш — тиде шукыж годым сайтна гыч видеоролик-влак. Уильям манеш: «Кӱтымӧ паша кызыт чотак кӱлешан. Ме еҥ-влакым Иегова дене палымым ышташлан шуко вийым пыштена. Но тыгак Иегован шорыкшо верч тыршаш да нунылан чыныште кодаш полшашлан тынарак вийым пыштыман».

16. Петрын кок серышыж гыч мо́лан тунемына?

¹⁶ Петрын кок серышыж гыч ме икмыняр урокым гына ончен лекна. Очыни, те шкаланда палемдышда, мо шотышто саеммыда шуэш. Мутлан, у тӱнясе илыш нерген чӱчкыдынрак шонкалымыда шуэш мо? А можыч те пашаште, школышто але вес вере таныклаш цельым шынденда? Иза-ака-влакым чот йӧратымыдам кузе эше ончыктен кертыда? Кугурак иза-влак, Иегован шорыкшо-влакым умбакыжат уло кумылын да тыршен кӱташ ямде улыда мо? Шкендан дене честный лийза да ужаш тыршыза, мом тыланда саемдаш кӱлеш. Иктаж-мом тӧрлаташ кӱлеш манын ужында гын, киддам ида волто. Мемнан поро Господьна тыланда саемаш полша (1 Пет. 2:3). Петр мемнам ӱшандара: «Юмо... тендам тӧрлата, чоткыдемда, вияҥда да пеҥгыдемда» (1 Пет. 5:10).

17. Киднам она волто да Иеговалан мемнам туныкташ пуэна гын, могай суапым налына?

¹⁷ Ала-кунам Петр Юмын Эргыж воктене лияшлан шкенжым йӧрдымылан шотлен (Лук. 5:8). Но Иегован да Иисусын полшымыштлан кӧра тудо кидшым волтен огыл да Христос почеш умбакыжат каен. Тидлан кӧра Петрлан «Господьна да Утарышына Иисус Христосын курымашлык Кугыжанышкыже» пураш чап пуымо лийын (2 Пет. 1:11). Петр семын киддам ода волто да Иеговалан тендам туныкташ пуэда гын, теат суаплан курымашлык илышым налыда. «Те ӱшанымашын саскажым, чондан утаралтмыжым, налыда» (1 Пет. 1:9).