1, 2. Самсонын историйжым ончен лекмаш мыланна могай пайдам конда?

 САМСОН лӱмым колмеке, могай шонымаш ушышкыда пура? Очыни, те чот виян Юмын служитлышыже нерген шарналтеда. Чынжымак тудо тыгаяк лийын. Но икана Самсон уда решенийым луктын, кудыжо тудлан орланымашым конден. Туге гынат Иегова Самсоным шке ӱшанле служитлышыжлан шотлен. Тудын примерже мыланна пайдам кондыжо манын, Юмо тудын историйжым Библийыш возыктен.

² Иегова шке Израиль калыкшылан полшашлан Самсон гоч ӧрыктарыше паша-влакым ыштен. Самсонын колымыж деч вара курым-влак эртымеке, Иегова апостол Павелым Самсонын лӱмжым тыгай еҥ-влак коклаште палемдаш таратен, кудыштын пеҥгыде ӱшанымаш лийын (Евр. 11:32—34). Самсон йӧсӧ годымат Иеговалан ӱшанен. Тиде статьяште ме лончылен налына, мо́лан ме тиде Юмын служитлышыж деч тунемын кертына да кузе тудын примерже мемнам кумылаҥден кертеш.

3. Самсонлан могай заданий пуымо лийын?

³ Самсон шочын, кунам Юмын калыкшым филистим-влак шыгыремденыт (Суд. 13:1). Нунын торжа вуйлатымышт израильтян-влаклан шуко орланымашым конден. Израиль калыкым филистим-влак деч утарашлан Иегова Самсоным ойырен налын (Суд. 13:5). Тиде заданий куштылго лийын  огыл. Тудым шукташлан Самсон Иегован полшымыжлан ӱшанышаш ыле.

4. Кузе Иегова Самсонлан филистим-влак деч утлаш полшен? (Судей 15:14—16).

⁴ Ончен лектына ик случайым, кунам Самсон нелылыкшым Юмылан ӱшанен пуэн да Юмо тудлан полшен. Икана филистим-влак Ле́хиш толыныт (очыни, тиде вер Иудейыште лийын). Нуно Самсоным кучынешт ыле. Иудей-влак филистим-влак деч лӱдыныт, сандене Самсоным тушман-влаклан пуаш шонен пыштеныт. Нуно тудым кок у кандыра дене пидын шынденыт да филистим-влак деке намиен коденыт (Суд. 15:9—13). Но «Самсон ӱмбак Иегован шӱлышыжӧ волен», да тудо кандыра деч утлен. Вара Самсон «шукерте огыл колышо осёлын оҥылашлужым муын, тудым налын да тудын дене 1000... [филистимым] пуштын»! (Судей 15:14—16 лудын лекса.)

5. Самсон осёлын оҥылашлужым кучылтын. Тиде Самсон нерген мом ойла?

⁵ Молан Самсон осёлын оҥылашлужым кучылтын? Чынже денак тиде саргурал пеш оҥайын койын. Мутат уке, Самсон умылен: сеҥымаш саргурал деч огыл, а Иегова деч шоген. Тиде ӱшанле служитлыше кучылтын тудым, мом муын кертын. Самсон тӱрыснек Иегован полшымыжлан ӱшанен, сандене филистим-влакым сеҥен кертын.

6. Иегован пуымо заданийжым шукташ мыланна мо полша?

⁶ Иегован полшымыжлан кӧра ме кеч-могай заданийым шуктен кертына — тыгайымат, кудыжо мыланна шукташ лийдымыла чучеш. Юмо мыланна тыге полшен кертеш, кузе ме она вучо. Пеҥгыдын ӱшаныза: Самсонлан вийым пуышо Иегова тыландат вийым пуа да тудын эрыкшым шукташ полша (Прит. 16:3).

7. Иегован эрыкшым пален налаш кӱлеш манын, могай пример ончыкта?

⁷ Теократический чоҥымаш проектлаште тыршыше иза-ака-влак Иеговалан ӱшанымыштым ончыктат. Ончыч тыглай годым ме проект-влакым ыштенна да вара нине проект-влак почеш Вашлиймаш зал ден вес зданий-влакым чоҥенна. Но Иегован  организацийжын кушмыжым шотыш налын, вашталтышым ышташ кӱлын. Иза-влак тиде шотышто Юмын эрыкшым пален налаш тыршеныт да у метод-влаклан тунемыныт. Мутлан, ме зданий-влакым налаш да реконструкцийым ышташ тӱҥалынна. Роберт, кудыжо уло тӱня мучко шуко чоҥымаш проектлаште тыршен, ойла: «Ондак у методым кучылташ шукыштлан куштылго лийын огыл, вет ме вес семын пашам ышташ тунемынна. Но иза-влак у методлан тунемаш ямде лийыныт, да раш лийын: Иегова нине вашталтыш-влакым суапландарен». Тиде ик пример веле, кузе Юмо шке эрыкшым шукташлан калыкшым виктара. Жапын-жапын мыланна шке деч йодман: «Иегован шонымыжым пален налаш тыршем мо? Служитлымашем тудлан келшыше лийже манын, вашталтышым ышташ ямде улам мо?»

8. Вӱдым чот йӱмӧ шумыж годым Самсон мом ыштен?

⁸ Очыни, те вес случай-влак нергенат лудында, кунам Самсон ӧрыктарыше пашам ыштен. Мутлан, тудо левым, а варажым Ашкелонышто 30 филистимым шкетын пуштын (Суд. 14:5, 6, 19). Иегован полшымыж деч посна тудо тыгайым ыштен кертын огыл. Самсон тидым умылен манын, кушеч койын? Икана 1000 филистимым сеҥен налме деч вара тудын чотак вӱдым йӱмыжӧ шуын. Но вӱдым кычал муашлан шке вийжылан ӱшаныме олмеш тудо Иегова деч полышым йодын (Суд. 15:18).

9. Иегова Самсонын кумалмыжлан кузе вашештен? (Судей 15:19).

⁹ Иегова Самсонын йодмыжлан ӧрыктарышын вашештен — тудо памашым ыштен. «Самсон вӱдым йӱын, да тудын дек вий пӧртылын». (Судей 15:19 лудын лекса.) Шуко ий эртымеке, кунам Самуил пророк Судей книгам возен, тиде памаш эше лийын докан. Очыни, тиде памаш израильтян-влаклан шарныктен: нуно Иегован полшымыжлан ӱшанаш тӱҥалыт гын, Иегова нунылан полша.

10. Иегова деч полышым налашлан мыланна мом ыштыман? (Тыгак сӱретым ончыза.)

¹⁰ Кеч-могай мемнан моштымашна уло да Иеговалан служитлымаште кеч-могай заданийым шуктена гынат, меат Иегова деч полышым кычалшаш улына. Мыланна ӱҥышӧ лийман да теве мом шотыш налман: Иегован полшымыжлан ӱшанена гын, тунам тудын кеч-могай заданийжым шуктен кертына. Самсон деке тунам гына вий пӧртылын, кунам тудо Юмын пуымо вӱдшым йӱын. Тыгак меат Иегован чыла пуымым кучылтына гын, духовный вийым налына (Матф. 11:28).

11. Иегован полшымыжлан ӱшанымым кузе ончыктен кертына? Примерым кондыза.

¹¹ Алексейын примержым ончен лектына. Тудо Российыште ила да шуко иза гаяк кугу поктылмаш дене тӱкна. Тиде нелылыкым ончыде, духовный шотышто пеҥгыде кодаш тудлан мо полша? Тудын да ватыжын сай духовный привычкышт уло. Алексей ойла: «Мый шкевуя шымлымашым эртараш да кажне кечын Библийым лудаш тыршем. Кажне эрдене ватем дене пырля ме кечылан почеламутым лончылена да Иеговалан кумалына». Тиде мемнам теве мо́лан туныкта: шкаланна огыл, а Иегован полшымыжлан ӱшаныман. Тиде ӱшанымым пеҥгыдемдашлан Библийым шымлаш, кумалаш, вашлиймашыш кошташ да таныклаш кӱлеш. Иегова тудлан служитлаш тыршымынам суапландара. Юмо Самсонлан вийым пуэн — мутат уке, мыланнат вийым пуа.

12. Могай уда решенийым Самсон луктын, да Далила дене кыл кучымыжо мо дене ойыртемалтын?

¹² Самсон мемнан гаяк сулыкан айдеме лийын. Сандене южгунам йоҥылыш решений-влакым луктын. Ик тыгай решений кугу ойгым конден. Самсон уже икмыняр жап судья семын служитлен, кунам Сорек лап верыште илыше Далила лӱман ӱдырамашым йӧратен налын (Суд. 16:4). Тидын деч ончыч Самсон филистим ӱдырамашым марлан налнеже ыле. Но тунам тудо Юмын кумылжо дене келшышын ыштен, вет Юмо филистим-влаклан ӱчым ышташ шонен. Вараракшым филистим Газа олаште Самсон яжар ӱдырамашын пӧртыштыжӧ малаш кодын. Ту йӱдым Юмо Самсонлан вийым пуэн, да тудыжо ола капкам нумал наҥгаен. Тыге ола аралтыш деч посна кодын (Суд. 14:1—4; 16:1—3). Но Далила, очыни, израильтян ӱдырамаш лийын. Сандене тудын дене мужыраҥмаш филистим-влак дене кучедалмаште нигузеат полшен кертын огыл. Ты ганалан Самсон Иегован кумылжым огыл, а шке кумылжым шуктен.

13. Далилалан ӱшанымыжлан кӧра Самсон дене мо лийын?

¹³ Филистим-влак Самсоным кучынешт ыле. Садлан Далила нунылан полшыжо манын, филистим-влак тудлан шуко оксам пуэныт. Очыни, Самсон Далилам чот йӧратен, сандене вигак умылен огыл, мом Далила ыштынеже ыле. Далила Самсонын чонышкыжо витен да эре йодыштын, кушеч тудын тынар шуко вийже. Самсон чытен кертын огыл да чылажымат тудлан почын каласен. Чаманаш логалеш, йоҥылышым ыштымыжлан кӧра Самсон жаплан вийым да Иегова деч суапландарымашым йомдарен (Суд. 16:16—20).

14. Самсонын Далилалан ӱшанымыже кушко конден?

 ¹⁴ Иеговалан огыл, а Далилалан ӱшанымаш Самсонлан кугу ойгым конден. Филистим-влак тудым кученыт да шинчажым шуралтен шӱтеныт. Самсоным Газа олаште казаматыш шынденыт. Ончыч лач тиде олан капкажым тудо луктын да нумал наҥгаен. Тудым кулыш савыреныт да шурным йоҥышташ шынденыт. Вара филистим-влак Дагон юмыштлан кугу надырым кондашлан пайремыш погыненыт. Нуно ӱшаненыт, пуйто лач тудо Самсоным нунын кидышкышт пуэн. Самсоным мыскылаш шонен, тудым казамат гыч конденыт (Суд. 16:21—25).

15. Самсон, Иегован полшымыжлан угыч ӱшана манын, кузе ончыктен? (Судей 16:28—30). (Журнал комышто сӱретым ончыза.)

¹⁵ Самсон йоҥылышым ыштен, но кидшым волтен огыл. Тудо ондакысе семынак Юмын пуымо заданийжым шукташ кумылаҥдыме лийын. (Судей 16:28—30 лудын лекса.) Сандене тудо Иеговам йодын: «Филистим-влаклан ӱчым шукташ мылам пу». Чын Юмо Самсонын кумалмыжлан вашмутым пуэн да тудлан ойыртемалтше вийым пӧртылтен. Лектышыже тыгай лийын: ты ганалан Самсон ондакысе деч шукырак филистимым пуштын.

16. Самсонын йоҥылышыжо мемнам мо́лан туныктен кертеш?

¹⁶ Самсонлан йоҥылышым ыштымыжлан кугу акым тӱлаш логалын гынат, тудын Иегован эрыкшым умбакыжат шуктымыжо шуын. Меат йоҥылышым ыштена, мемнам тӧрлаташ кӱлеш але почётан обязанностьым йомдарена гын, мыланна кидым волтыман огыл. Шарныза: Юмына мемнам проститлаш ямде (Пс. 102:8—10). Йоҥылышым ыштенна гынат, Иегова мыланна Самсонлан гаяк тудын эрыкшым шукташлан вийым пуэн кертеш.

17, 18. Молан Майклын случайже тендам кумылаҥда? (Тыгак сӱретым ончыза.)

¹⁷ Майкл лӱман самырык изан случайжым ончен лектына. Тудо Иеговалан тыршен служитлен: погынымаште служебный полышкалыше да эрелык пионер лийын. Чаманаш логалеш, ик йоҥылышым ыштымыжлан Майкл погынымаште обязанность-влакым йомдарен. Тудо ойла: «Тидын деч ончыч мый уло вийым служитлымаште пыштенам. А йоҥылышым ыштымеке, мыланем чучаш тӱҥалын, пуйто ындыжым мый служитлымаште  нимом ыштен ом керт. Конешне, Иегова мый дечем савырнен манын шонен омыл. Но ушышкем тыгай шонымаш пурен, пуйто ондакысе семынак Юмо дене лишыл йолташ лийын ом керт да тудлан тыршен служитлен ом сеҥе».

¹⁸ Майкл кидшым волтен огыл. Тудо ойла: «Иегова дене угыч лишыл йолташ лияшлан мый уло вийым пыштенам. Мый эре тудлан каласкаленам, мо шӱмыштем лийын, тудын Мутшым шымленам да лудмо нерген шонкаленам». Жап эртымеке, Майкл погынымаште угыч сай репутацийым налын. Таче тудо кугурак иза да эрелык пионер семын служитла. Тудо манеш: «Мыланем поснак кугурак иза-влак чот полшеныт да кумылаҥденыт. Тиде мыланем умылаш полшен: Иегова мыйым алят йӧрата. Мый погынымаште угыч ару совесть дене тыршен кертам. Тиде случай мыйым туныктен: Иегова проститла кажныжым, кӧ чынжымак ӧкына». Ме пеҥгыдын ӱшанен кертына: йоҥылышым ыштенна гынат, но шкенам тӧрлаташлан уло вийым пыштена да Юмын полшымыжлан ӱшанена гын, Юмо мемнам кучылташ да суапландараш тӱҥалеш (Пс. 85:5; Прит. 28:13).

19. Самсонын историйже тендам мо шотышто кумылаҥден?

¹⁹ Тиде статьяште ме Самсонын илышыж гыч икмыняр событийым ончен лекна. Тудо языкан айдеме лийын да Далилалан ӱшанымыжлан кӧра кугу йоҥылышым ыштен. Но тудо Иеговалан служитлымым чарнен огыл. Юмат тудын деч савырнен огыл. Юмо тудлан эше ик кугу пашам шукташ йӧным пуэн. Иегова Самсоным пеҥгыде ӱшанымашан айдемылан шотлен. Тудо Самсонын лӱмжым Еврей-влаклан серышын 11 ужаште палдарыме Юмын ӱшанле служитлышыже-влак коклаш пуртен. Могай сай служитлаш йӧратыше кавасе Ачаналан, кудыжо мыланна йӧсӧ жапыште вийым пуаш эре ямде! Сандене айста Самсон гаяк Иеговам йодына: «Пожалуйста, мыйын нерген шарналте да... мыйым пеҥгыдемде» (Суд. 16:28).