1. Шуко колым ӧрыктарышын кучымылан Петрын могай реакцийже лийын?

 ПЕТР йӱдвошт колым кучен, но вапшышкыже ик колат логалын огыл. А Иисус каласен: «Келге верыш кае. Колым кучаш тушан вапш-влакдам шуыза» (Лук. 5:4). Петр шонен, пуйто тиде нимомат огеш пу, туге гынат Иисусын ойлымыжо почеш ыштен. Вапш-влакышт тынар шуко кол дене темыныт, эсогыл кӱрышталташ тӱҥалыныт. Петр ден вес колызо-влак тыгай чудо лиймылан чотак ӧрыныт. Петр каласен: «Господь, мый дечем кораҥ, мый языкан айдеме улам!» (Лук. 5:6—9). Очыни, тудо шкенжым Иисус воктене лияш йӧрдымылан шотлен.

2. Молан мыланна Петрын примержым ончен лекташ кӱлеш?

² «Языкан айдеме улам» манме годым Петр чын ойлен. Кузе Библий ончыкта, тудо южгунам тыгайым ыштен да ойлен, мо верч варажым ӧкынен. Тенданат Петрын гаяк шижмашда лийын мо? Можыч, те уже шуко жап иктаж-могай койыш деч утлаш тыршеда але уда привычке дене кучедалыда. Туге гын, Петрын примерже тендам лыпландарен кертеш. Кузе? Шоналтыза: Иегова Петрын йоҥылышыжо нерген Библийыш огеш возыкто ыле гын, ме тидын нерген пален огына нал ыле. Но Иегова тидым мемнам туныкташлан возыктен (2 Тим. 3:16, 17). Петрын примержым ончен лектын, ме ужына: тудо мемнан гаяк айдеме лийын, тудын уда койыш ден привычкыж-влак да лӱдмашыже лийыныт. Иегова тудын деч идеальный лиймыжым вучен огыл. Мемнан дечат тидым огеш вучо. Йоҥылышым ыштена гынат, Иегован кумылжо почеш тудлан служымаште киднам волтышаш огынал.

3. Молан мыланна кидым волташ огеш кӱл?

 ³ Молан мыланна киднам волташ огеш кӱл? Молан манаш гын, ме иктаж-мом чӱчкыдын ыштена гын, тиде мемнан сайрак да сайрак лекташ тӱҥалеш. Шоналтыза тыгай пример нерген. Уста музыканче лияшлан ятыр ий тыршыман. Тиде жапыште музыкальный ӱзгар дене шоктымо годым музыканче, очыни, шуко йоҥылышым ышта. Но умбакыжат тырша гын, мастарлыкшым саемда. Тудо пеш уста музыканче лиеш гынат, тунамат йоҥылышым ыштен кертеш. Но кидшым тудо огеш волто, умбакыжат саемаш тырша. Тидын семынак кунам мыланна чучеш, пуйто ме иктаж-могай уда койыш але привычке деч утленна, садак жапын-жапын йоҥылышым ыштен кертына. Туге гынат ме умбакыжат саемаш тыршена. Южгунам ме чыланат тыгайым ыштена але ойлена, мо верч вара ӧкынена. Но кидым она волто гын, Иегова мыланна саемаш полша (1 Пет. 5:10). Айста Петрын примержым ончен лектына, кузе тудо кидшым волтен огыл да Иеговалан умбакыжат служитлен. Йоҥылышыжым ончыде, Иисус тудым йӧратымым чарнен огыл. Тиде мемнам Иеговалан умбакыжат служитлаш тарата.

4. Лукан 5:5—10 дене келшышын, Петр шкеж нерген мом каласен да мо шотышто Иисус тудым ӱшандарен?

⁴ Библийыште возымо огыл, молан Петр шкенжым «языкан айдеме» манын да могай язык нерген тудо ойлен. (Лукан 5:5—10 лудын лекса.) Очыни, Петр ончыч ала-могай кугу йоҥылыш-влакым ыштен да шонен, пуйто тудо пешыжак сай айдеме огыл. Иисус тудын шижмашыжым умылен, но тыгак пален: Петр Юмылан ӱшанле кодын кертеш. Сандене тудо тунемшыжлан порын каласен: «Ит лӱд». Иисус Петрлан ӱшанен. Тудын ӱшанымыже Петрын илышыжым вашталтен. Варарак тудо Андрей шольыж дене пырля кол кучымо пашам коденыт да Мессий почеш каеныт. Тидлан Иегова нуным чот суапландарен (Мар. 1:16—18).

5. Петр, лӱдмашыжым ончыде, Иисус почеш кайымыжлан кӧра кузе суапландарыме лийын?

⁵ Христосын тунемшыже семын Петр илышыштыже шуко ӧрыктарыше событийым ужын. Тудын шинча ончылно Иисус черле-влакым паремден, еҥ-влакын кӧргышт гыч демон-влакым поктен луктын да эсогыл колышо-влакым ылыжтен (Матф. 8:14—17; Мар. 5:37, 41, 42) b. Тыгак Петр тыгай еҥ-влак коклаште лийын, кӧлан Иисус лийшаш кугыжа семын кончен. Тиде кончымаш Петрын ушыштыжо ӱмыр мучкылан кодын (Мар.  9:1—8; 2 Пет. 1:16—18). Петр Иисусын тунемшыже огеш лий ыле гын, нине чудо-влакым нигунамат огеш уж ыле. Мутат уке, тудо чот куанен, вет тудо лӱдмашыжым да уда шонымашыжым сеҥен кертын да чот суапландарыме лийын!

6. Петрлан уда койыш ден привычкыж-влак деч утлаш куштылго лийын мо? Умылтарыза.

⁶ Петр тынар шуко чудым ужын гынат, тудлан уда койыш ден привычкыж-влак дене садак кучедалаш логалын. Теве икмыняр пример. Кунам Иисус орланышаш да колышашыже нерген ойлен да тыге ончылгоч каласымаш-влак шукталтыт манын каласен, Петр тудлан тореш пелештен (Мар. 8:31—33). Петр да вес апостол-влак шуко гана ӱчашеныт, кӧ нунын кокла гыч кугурак (Мар. 9:33, 34). Иисусым арестоватлыме годым Петр кердым налын да ик айдемын пылышыжым руалын (Иоан. 18:10). Ту йӱдымак тудо шкем лӱдмашыжлан авалташ пуэн да, Иисусым ом пале манын, кум гана каласен, кеч шкеже тудын йолташыже лийын (Мар. 14:66—72). Вара Петр пеш чот шортын (Матф. 26:75).

7. Ылыжмеке, Иисус Петрлан могай йӧным пуэн?

⁷ Иисус шӱлыкаҥше апостолжо деч кораҥын огыл. Тудо пален: Петр тудым ондакысе семынак йӧрата. Йӧратымыжым ончыкташ Иисус тудлан йӧным пуэн. Иисус ылыжмыж деч вара Петр дене вашлиялтын да тудлан каласен: «Мыйын шорыкем-влакым кӱтӧ», — да весыже йодмыжым шукташ ямде лийын (Иоан. 21:15—17). Кунам Иерусалимыште Витлыгече пайрем годым Иисусын тунемшыже-влак святой шӱлыш дене шӱрымӧ лийыныт, нунын коклаште Петрат лийын.

8. Антиохийыште Петр могай йоҥылышым ыштен?

⁸ Шӱрымӧ христиан лиймекат, Петрлан уда койыш ден привычкыж-влак дене кучедалаш логалын. Мемнан эран 36 ийыште тудо ужын, кузе пӱчдымӧ еврей огыл Корнилий святой шӱлыш дене шӱрымӧ лийын. Тиде событий раш ончыктен: Юмо «чыла еҥым ик семын» онча да вес калык гыч еҥ-влак христиан лийын кертыт (Ап. паш. 10:34, 44, 45). Тидын деч вара Петр тыгай еҥ-влак дене пырля кочкаш тӱҥалын, кеч тидым ончыч нигунамат ыштен огыл (Гал. 2:12). Но южо еврей христиан-влак шотленыт, пуйто вес калык гыч еҥ-влак дене кочкаш огеш лий. Кунам тыге шонышо-влак гыч южышт Антиохийыш толыныт, Петр еврей огыл иза-шольыж-влак деч кораҥаш тӱҥалын. Очыни, еврей христиан-влак тудлан ынышт ӧпкеле манын, тудо тыге ыштен. Апостол Павел Петрын сайла кояш тӧчымыжым ужын да тудлан йоҥылыш лиймыже нерген каласен (Гал. 2:13, 14). Но Петр, йоҥылышыжым ончыде, Иеговалан умбакыжат ӱшанлын служитлен. Мо тудлан полшен?

9. Кузе Иоаннын 6:68, 69 почеламут-влак Петрын ӱшанле улмыжым ончыктат?

⁹ Петр ӱшанле лийын. Тудо Иисус почеш каен да нимоланат тудым чараш пуэн огыл. Мутлан, тудын ӱшанле лиймыже раш койын, кунам Иисус тыгайым каласен, мом тунемшыже-влак умылен огытыл. (Иоаннын 6:68, 69 лудын лекса.) Умылтарымашым вучыде, шукышт Иисус почеш кайымыштым чарненыт. Но Петр тыге ыштен огыл, тудо сайын умылен: «курымашлык илышын шомакше» Иисус дене гына.

10. Иисус Петрлан ӱшанымыжым кузе ончыктен? (Тыгак сӱретым ончыза.)

¹⁰ Петр шуко йоҥылышым ыштен гынат, Иисус тудын деч савырнен огыл. Ончен лектына, Иисусын колымыж деч икмыняр шагат ончыч мо лийын. Иисус пален: Петр ден вес апостол-влак тудым коден каят. Туге гынат тудо ӱшанен: варарак Петр ӱшанымыжым пеҥгыдемда да умбакыжат Иеговалан ӱшанлын служитлаш тӱҥалеш (Лук. 22:31, 32). Иисус  умылен: «Шӱлыш чулым, капше вийдыме» (Мар. 14:38, У Сугынь, 1986). Сандене кунам Петр Иисусым ом пале манын каласен, Иисус апостолжылан ӱшанымым чарнен огыл. Ылыжмеке, Иисус Петр дене вашлиялтын, кунам весыже, очыни, шкетын лийын (Мар. 16:7; Лук. 24:34; 1 Кор. 15:5). Мутат уке, апостолым тиде пеш чот кумылаҥден, вет тудо ыштымыжлан чот чаманен!

11. Иегова Петрым огеш кодо манын, Иисус Петрлан умылаш кузе полшен?

¹¹ Иисус Петрлан умылаш полшен: Иегова тудым нигунамат огеш кодо. Ылыжмеке, Иисус чудым ыштен: Петр ден вес апостол-влак шуко колым кучен кертыныт (Иоан. 21:4—6). Тиде чудо, мутат уке, Петрым ӱшандарен: тудын материальный кӱлешлыкше верч тыршаш Иеговалан йӧсӧ огыл. Апостол, очыни, Иисусын мутшым шарналтен: айдеме Юмын Кугыжанышыжым икымше верыш шында гын, Иегова тудлан чыла кӱлешаным пуа (Матф. 6:33). Сандене Петр кол кучымо пашалан огыл, а служымашлан илышым пуэн. Мемнан эран 33 ийын Витлыгече пайрем кечын тудо лӱддымын ойлымаш дене лектын. Тидлан кӧра тӱжем дене еҥ тынеш пурен (Ап. паш. 2:14, 37—41). Тидын деч вара Самарий еҥ-влаклан да еврей огыл еҥ-влаклан тудо Христосын тунемшыже лияш полшен (Ап. паш. 8:14—17; 10:44—48). Тыгела, Иегова тӱрлӧ-тӱрлӧ еҥ-влакым погынымашыш кондашлан Петрым кучылтын.

12. Уда койыш але привычке дене кучедалше-влаклан Петрын примерже кузе полшен кертеш?

¹² Южгунам Иеговалан ӱшанлын служитлаш мыланна йӧсӧ лийын кертеш — поснак кунам уда койышна угыч да угыч лектеш. Южгунам чучын кертеш, пуйто апостол Петрын нелылыкше дене таҥастарымаште мемнан нелылыкна кугурак улеш. Но чылажымат чытен лекташ Иегова мыланна вийым пуэн кертеш (Пс. 93:17—19). Мутлан, ик иза Иегован Таныкше лийме деч ончыч шуко ий гомосексуалист лийын. Тудо илышыжым тӱрыснек вашталтен да Библий почеш илаш тӱҥалын. Туге гынат жапын-жапын тудлан уда шонымашыж дене кучедалаш логалын. Кидым волташ огыл тудлан мо полшен? Тудо ойла: «Мыланем Иегова полшен. Мый умылен налынам: тудын святой шӱлышыжлан кӧра чын илыш корно дене каен кертам... ...Иегова мыланем тудын служитлышыже лияш йӧным пуэн да, мыйын ситыдымашым ончыде, эре мыланем полша».

13. Апост. пашашт 4:13, 29, 31 дене келшышын, мо шотышто ме Петр деч примерым налын кертына? (Тыгак сӱретым ончыза.)

 ¹³ Кузе ме ужынна, еҥ-влак деч лӱдмашлан кӧра Петр икмыняр кугу йоҥылышым ыштен. Но кумалмаш тудлан лӱдмашым сеҥаш полшен. (Апост. пашашт 4:13, 29, 31 лудын лекса.) Меат лӱдмашнам сеҥен кертына. Теве мо лийын Хорст лӱман самырык иза дене, кудыжо Германийыште нацизм жапыште илен. Школышто икмыняр гана чот темдымылан кӧра тудо «Хайль Гитлер!» манын. Тидлан ача-аваже тудым вурсен огытыл, а тудын дене пырля кумалыныт да эргыштлан лӱддымылыкым пуаш Иеговам йодыныт. Ача-аван полшымыштлан кӧра да Иеговалан ӱшанымыжлан кӧра Хорст Юмылан ӱшанле кодын кертын. Варажым тудо каласен: «Иегова мыйым нигунамат коден огыл» c.

14. Йӧратыше кугурак иза-влак кидым волтышо-влаклан кузе полшен кертыт?

¹⁴ Иегова ден Иисус мемнам нигунамат огыт кодо. «Тиде айдемым ом пале», — Иисус нерген каласымеке, Петрлан кӱлешан решенийым лукташ кӱлын: кидым волташ але Христос почеш умбакыже каяш. Петрын ӱшанымашыже ынже лушкыдем манын, Иисус Иеговалан кумалын. Тиде кумалме нерген Иисус Петрлан каласен да, Петр весе-влакым варажым пеҥгыдемден кертеш манын, тудым ӱшандарен (Лук. 22:31, 32). Очыни, кажне гана Иисусын тиде мутшым шарналтымыж годым Петр кумылаҥын. Меат тыгай ситуацийыште лийына гын, Иегова мыланна йӧратыше кугурак иза-влак гоч полшен кертеш. Нуно мыланна Юмылан ӱшанле кодаш полшат (Еф. 4:8, 11). Шуко ий Иеговалан служитлыше Пол лач тыгай кугурак иза лияш тырша. Тудо шӱлыкаҥше-влакым шарналташ тарата, кузе Иегова нуным шкеж дек ӱжын конден, а вара ӱшандара: Иегова нуным  ӱшанлын йӧрата да нигунамат огеш кодо. Пол ойла: «Мый кидым волтышо шуко иза-акам ужынам, кудышт Иегован полшымыжлан кӧра тудлан умбакыжат служитлен кертыныт».

15. Апостол Петрын да Хорст Хеншель изан примерышт Матфейын 6:33 почеламутышто возымын чын улмыжым кузе пеҥгыдемдат?

¹⁵ Иегова Петрын да вес апостол-влакын материальный кӱлешлыкыштым ситарен. Ме служымашым икымше верыш шындена гын, Юмо мемнанат кӱлешлыкнам ситара (Матф. 6:33). Угыч Хорст нерген шарналтена. Кокымшо тӱнямбалысе сар деч вара тудо пионер семын служитлынеже ыле. Но тудо чот нужна лийын да тургыжланен: «Пионер лиям гын, илышлан окса лиеш мо?» Хорст мом ыштен? Тудо терген налаш шонен пыштен, Иегова тудын верч тыршаш тӱҥалеш але уке. Районым эскерыше изан толмыж годым тудо уло арням служымаште эртарен. Арня мучаште Хорстым пӧлек вучен. Районым эскерыше иза тудлан конвертым пуэн, но каласен огыл, кӧ деч конверт лийын. Конвертыште лийше оксалан кӧра Хорст икмыняр тылзе пионер семын служитлен кертын. Тиде пӧлек гоч тудо ужын: Иегова тудын верчын тыршаш тӱҥалеш. Тиде ситуаций деч вара Хорст Юмын Кугыжанышын пашажым илышыштыже эре икымше верыш шынден (Мал. 3:10).

16. Молан мыланна Петр нерген да тудын серыш-влакыште мом возымо нерген шукырак пален налаш кӱлеш?

¹⁶ Ала-кунам Петр Иисусым тудын деч кораҥаш йодын. Но Иисус йодмыжо почеш ыштен огыл. Петр тидлан чотак куанен! Христос умбакыжат Петрым ӱшанле апостол лияш да христиан-влаклан сай примерым ончыкташ туныктен. Тудын туныктымыж гыч меат шкаланна шуко урокым налына. Нунын гыч южыштым да моло пайдале каҥаш-влакым Петрын кок серыштыже муын кертына. Нине серыш-влак икымше курымысо христиан-влаклан возымо лийыныт, а варажым Библийыш пуреныт. Вес статьяште ме нине серыш-влак гыч икмыняр каҥашым ончен лектына да ужына, мо дене нуно мыланна кызыт пайдале лийын кертыт.