1. Вашке Иисус мом ышташ тӱҥалеш?

 МЕ ОЙЫРТЕМАЛТШЕ жапыште илена! Вашке Иисус мландыште илыше кажне еҥым судитлаш тӱҥалеш. Тудо тунемшыж-влаклан судшо деч ончыч да тиде тӱнян пытымыж деч ончыч мо лийшаш нерген каласкален (Матф. 24:3). Иисусын ончылгоч каласымыже Матфейын 24-ше да 25-ше, Маркын 13-шо да Лукан 21-ше ужаш-влакыште возымо.

2. Мом ме тиде статьяште лончылен налына да могай цель дене?

² Иисус мемнам шекландарашлан да мыланна ямдылалташ полшашлан кум туштен каласымашым кучылтын. Тиде шорык ден каза-влак нерген, ушан да шонен моштыдымо ӱдыр-влак нерген да талант-влак нерген туштен каласымаш-влак. Нине туштен каласымаш-влаклан кӧра ме ужына: Иисус айдемым тудын пашаже-влакым шотыш налын судитлаш тӱҥалеш. Айста нине туштен каласымаш-влакым ончалына да ужына, мо́лан ме тунемын кертына. Эн ончыч шорык ден каза-влак нерген мутланен налына.

ШОРЫК-ВЛАК ДА КАЗА-ВЛАК

3. Кунам Иисус еҥ-влакым судитлаш тӱҥалеш?

³ Шорык-влак да каза-влак нерген туштен ойлымо годым Иисус каласен, еҥ-влакым судитлымыж годым  мом ончаш тӱҥалеш. Тудын пунчалже еҥ-влакын поро уверлан реакцийышт деч шогаш тӱҥалеш. А эше Иисус шотыш налеш: нуно тудын шӱрымӧ тунемшыж-влаклан полшеныт але уке (Матф. 25:31—46). Тиде суд Армагеддон тӱҥалме деч ончыч кугу орлык годым лиеш (Матф. 24:21). Кузе кӱтӱчӧ шорык-влакым каза-влак деч ойыра, тыге Иисус шӱрымӧ тунемшыж-влаклан ӱшанлын полшышо-влакым ойыра тыгай еҥ-влак деч, кӧ шӱрымӧ-влаклан огеш полшо.

4. Иисус еҥ-влакым справедливость почеш судитлаш тӱҥалеш манын, молан ме пеҥгыдын ӱшанена? (Исайя 11:3, 4). (Тыгак журнал комышто сӱретым ончыза.)

⁴ Библий гыч ме пален налынна: Иегова шкеже Иисусым судьялан шогалтен. Сандене Иисус справедливость почеш судитлаш тӱҥалеш. (Исайя 11:3, 4 лудын лекса.) Уже кызыт Иисус эскера, мом еҥ-влак ойлат, ыштат, мо нерген нуно шонат, могай нунын шӱрымӧ-влак деке отношенийышт (Матф. 12:36, 37; 25:40). Суд годым Иисус раш палаш тӱҥалеш, кӧ шӱрымӧ-влаклан полшен a. Нунылан полшаш йӧн-влак гыч иктыже — тиде таныклыме пашаште нунын дене пырля тыршаш. Тыге ыштыше-влак чын ыштышылан шотлалтыт, да нунын мландыште курымеш илаш йӧнышт лиеш (Матф. 25:46; Почм. 7:16, 17). Могай чапле суап! Нуно кугу орлык годым да тудын деч вара Юмылан ӱшанле лийыт гын, лӱмышт «илыш книгаште» кодеш (Почм. 20:15).

5. Шорык ден каза-влак нерген туштен каласымаш гыч мо́лан тунемаш лиеш, да кӧлан тиде пайдале?

⁵ Ӱшанле лийза. Шорык ден каза-влак нерген Иисусын туштен ойлымыж гыч эн ончыч мландыште илаш шонышо еҥ-влак тунемыт. Кузе нуно ӱшанымашыштым ончыктен кертыт? Христосын шӱрымӧ тунемшыж-влаклан таныклаш полшымо дене да ӱшанле да ушан тарзын кӱштымыжым шуктымо дене (Матф. 24:45). Но каваште илаш ӱшаныше христиан-влакат тиде туштен каласымашын шекландарымыже почеш ыштышаш улыт. Молан? Молан манаш гын, Иисус тӱткын эскера, мом нуно ойлат, ыштат да шонат. Нуныланат ӱшанле лийман. Лачак нунылан Иисус кок туштен ойлымашым каласен. Нуным ме Матфейын 25-ше ужаште муына. Нунын гыч иктыже — ушан да шонен моштыдымо ӱдыр-влак нерген туштен каласымаш. Айста тиде туштен ойлымашым лончылен налына.

УШАН ДА ШОНЕН МОШТЫДЫМО ӰДЫР-ВЛАК

6. Молан вич ӱдырым ушан манме? (Матфейын 25:6—10).

⁶ Иисус качым вашлияш лекше лу ӱдыр нерген туштен каласымашым ойлен пуэн (Матф. 25:1—4). Нуно чыланат каче дене пырля сӱан пайремыш логалаш шоненыт. Иисус нунын гыч визытшым ушан манын, а вес визытшым — шонен моштыдымо. Ушан ӱдыр-влак сайын ямдылалтыныт да шекланыше лийыныт. Нуно мыняр кӱлын, тынар жап качым вучаш ямде лийыныт. Тудо вараш кодеш да пич йӱдым толеш гын, нуно пеленышт лампым да атешышт ӱйжымат налыныт. (Матфейын 25:6—10 лудын лекса.) Кунам каче толын, ушан ӱдыр-влак тудын дене пырля сӱан пайремыш пуреныт. Тидын семынак шӱрымӧ христиан-влаклан Христосын толмыжо марте шекланыше да ӱшанле кодман. Тунам нуно суапым налыт  да кавасе Кугыжаныште Иисус каче дек ушнат (Почм. 7:1—3) b. А вич шонен моштыдымо ӱдыр дене мо лийын?

7. Вич шонен моштыдымо ӱдыр дене мо лийын да молан?

⁷ Ушан ӱдыр-влак дене таҥастарымаште шонен моштыдымо-влак качын толмыжлан ямде лийын огытыл. Нунын лампышт йӧраш тӱҥалын, а туллан йӱлаш полшышо ӱй пеленышт лийынжат огыл. Кунам каче толеш манмым колыныт, нуно ӱйым налаш каеныт, но тудын толмыж деч ончыч пӧртыл шуын огытыл. «Ямде лийше-влак тудын дене пырля сӱан пайремыш пуреныт, почешышт омсам петыреныт» (Матф. 25:10). Кунам шонен моштыдымо ӱдыр-влак тушко пураш шоненыт, каче нунылан тендам ом пале манын каласен (Матф. 25:11, 12). Нине ӱдыр-влак сайын ямдылалтын огытыл да садлан мыняр кӱлын, тынар жап качым вучен кертын огытыл. Шӱрымӧ-влак тышеч могай урокым налын кертыт?

8, 9. Ӱдыр-влак нерген туштен каласымаш шӱрымӧ-влакым мо́лан туныкта? (Тыгак сӱретым ончыза.)

⁸ Ямде лийза. Шӱрымӧ-влак нерген ойлымо годым Иисус кок группо нерген ойлен огыл, кӧ кугу орлык годым тудын толмыжлан ямде лиеш да кӧ ямде огеш лий. Тудо умылтарен: шӱрымӧ-влак мучаш марте ӱшанле огыт код гын, мо нунын дене лиеш. Тунам нуно суапым огыт нал (Иоан. 14:3, 4). Тиде шонымаш шекландара. Шӱрымӧ-влакат, мландыште илаш ӱшаныше еҥ-влакат ӱдыр-влак нерген туштен каласымашын шижтарымыжым колыштшаш улыт. Мемнан гыч кажныже мучаш марте шекланыше кодаш да пеҥгыдын шогаш ямде лийшаш (Матф. 24:13).

⁹ Ӱдыр-влак нерген туштен каласымаш дене Иисус палдарен, мыняр чот ямде да шекланыше лийман. А талант-влак нерген туштен каласымаште тудо чот тыршыше лияш кӱлмӧ нерген каласынеже ыле.

 ТАЛАНТ-ВЛАК

10. Молан кок тарзе ӱшанле манме лийын? (Матфейын 25:19—23).

¹⁰ Талант-влак нерген туштен каласымаш гыч айдеме вес элыш кайымыж деч ончыч шкеж дек кум тарзыжым ӱжын да кажныжлан талант-влакым, кугу оксам, пуэн (Матф. 25:14—18). Кок ӱшанле тарзыже пашам тыршен ыштеныт да оксам уш-акыл дене кучылтыныт. Пӧртылмӧ деч вара оза ужын: нуно ӱшанен пуымо оксам кок пачаш шукемденыт. Тудо нуным мокталтен да кажныжлан каласен: «Озатын куан пайремышкыже тол». (Матфейын 25:19—23 лудын лекса.) А кумшо тарзе дене мо лийын? Кузе тудо оксам кучылтын?

11. Йолагай тарзе дене мо лийын да молан?

¹¹ Ик талантым налше тарзе йолагай лийын улмаш. Озажын оксажым уш-акыл дене кучылтмо олмеш тудо оксам мландыш урен шынден. Кунам озаже пӧртылын тиде тарзе талантшым тудлан пӧртылтен. Тиде тарзе уда шонымашан айдеме лийын. Тудо озаж деч проститлымашым йодаш шоненат огыл да тудым «пеҥгыдын йодшо айдеме» манын. Озалан тиде тарзе чотак келшен огыл. Тудо тарзе деч талантым налаш да тудым поктен колташ кӱштен (Матф. 25:24, 26—30).

12. Кок ӱшанле тарзе кӧм ончыкта?

¹² Кок ӱшанле тарзе ӱшанле шӱрымӧ христиан-влакым ончыкта. Оза, Иисус, нуным тудын дене пырля куанаш ӱжеш: нуно кавасе суапыштым — икымше ылыжмашым — налыт (Матф. 25:21, 23; Почм. 20:5б). А теве йолагай тарзын примерже шӱрымӧ-влакым шекландара.

13, 14. Талант-влак нерген туштен каласымаште шӱрымӧ-влаклан могай урокым возымо? (Тыгак сӱретым ончыза.)

¹³ Чот тыршыше лийза. Ӱдыр-влак нергенат, талант-влак нергенат туштен каласымаште Иисус ойлен огыл, пуйто шӱрымӧ-влак йолагайыш савырнат. Тудо умылтарен: нуно чот тыршымым чарнат гын, тунам ӱжмӧ да ойырен налме кодаш йӧрышӧ уже огыт лий да кавасе Кугыжанышыш пурен огыт керт (2 Пет. 1:10).

 ¹⁴ Ӱдыр-влак да талант-влак нерген Иисусын туштен каласымаш-влак ончыктат: чыла шӱрымӧ-влак тудын толмыжлан ямде лийшаш улыт да шекланыше да чот тыршыше кодшаш улыт. Но тидым гына огыл Иисус нунын деч вуча. Матфейын 24:40, 41 почеламут-влакыште эше ик шижтарымашым возымо.

КӦ «НАЛАЛТЕШ»?

15, 16. Шӱрымӧ христиан-влак шекланыше лийшаш улыт манын, кузе Матфейын 24:40, 41 почеламут-влак палдарат?

¹⁵ Тиде кум туштен каласымашым ойлымо деч ончыч Иисус умылтарен, кушеч шӱрымӧ христианын Юмылан йӧрышӧ улмыжо коеш. Иисус пасушто ыштыше кок пӧръеҥ да кидвакш дене йоҥыштышо кок ӱдырамаш нерген каласкален. Пӧръеҥ-влакат, ӱдырамаш-влакат ик пашам шуктеныт манын койын гынат, Иисус каласен: «Иктыже налалтеш, весыже кодеш». (Матфейын 24:40, 41 лудын лекса.) Варажым тудо тунемшыж-влакым таратен: «Шекланен шогыза, Господьдан толмо жапшым те огыда пале вет» (Матф. 24:42). Тиде мут-влак шӱрымӧ-влаклан каласыме улыт мо? Очыни, нунылан. Молан манаш гын, Иисус ӱдыр-влак нерген туштен каласымашымат икгайрак мут дене кошартен (Матф. 25:13). Кӧ чынже денак святой шӱлыш дене шӱрымӧ да кӧ мучаш марте ӱшанле кодеш, нуным веле Иисус кавасе Кугыжанышыш налеш (Иоан. 14:3).

¹⁶ Шекланыше лийза. Иктаж-могай шӱрымӧ христиан духовный шотышто шекланымыжым чарна гын, тудо ойырен налме-влак коклаште огеш лий, кӧм суксо-влак погат (Матф. 24:31). Но Иисусын шекландарымыжым мландыште курымеш илаш ӱшаныше-влакланат колыштман — нуныланат шекланыше да ӱшанле лийман.

17. Таче Иегова иктаж-кӧм святой шӱлыш дене шӱра гын, молан мыланна тиде шотышто тургыжланаш огеш кӱл?

¹⁷ Ме Иеговам сайын палена да решенийже-влаклан ӱшанена. Тудо мемнан жапыште ӱшанле христиан-влак кокла гыч иктаж-кӧм святой шӱлыш дене шӱра гын, мыланна тиде шотышто тургыжланаш огеш кӱл c. Шарналтена, мом Иисус виноград аҥаште ик шагат веле тыршыше-влак нерген каласен (Матф. 20:1—16). Нуно тынарак оксам налыныт, мынярым кечыгут ыштыше-влак налыныт. Тидын семынак шӱрымӧ христиан-влак кеч-кунам ойырен налме лийыныт гынат, ӱшанле кодыт гын, кавасе суапым налыт.

ШИЖТАРЫМАШЫМ КОЛЫШТСА

18, 19. Нине туштен каласымаш-влак гыч ме мо́лан тунемынна?

¹⁸ Мом ме лончылен налынна? Эн ончыч шорык-влак да каза-влак нерген туштен каласымашым лончыленна. Тудо ончыкта: мландыште курымеш илаш ӱшаныше-влак Иеговалан ӱшанле кодшаш улыт — кызытат, кугу орлык годымат. Кунам Иисус мландыште илыше-влакым судитлаш тӱҥалеш, тудо Юмылан ӱшанле еҥ-влакым чын ыштышылан — курымашлык илышым налаш йӧрышылан — шотлаш тӱҥалеш (Матф. 25:46).

¹⁹ Тыгак ме Иисусын кок туштен каласымашыжым лончыленна, кудышт шӱрымӧ христиан-влакым шекландарат. Лу ӱдыр нерген туштен каласымаште визытше уш-акылан лийын. Нуно ямдылалтыныт да,  мыняр кӱлын, тынар жап качым вучаш ямде лийыныт. Шонен моштыдымо ӱдыр-влак тыгай лийын огытыл. Сандене каче нуным сӱан пайремыш пуртен огыл. Меат мыняр кӱлеш, тынар жап вучаш ямде лийшаш улына. Вет ме она пале, кунам Иисус тиде тӱнялан мучашым пышта. Эше ме талант-влак нерген туштен каласымашым шарналтенна да кок тыршыше тарзын примерыштым лончыленна. Нуно озаштын кӱштымыжым вийым пыштен шуктеныт да моктымо лийыныт. А йолагай тарзыжым оза йӧрдымылан шотлен да нимо деч посна коден. Тиде мемнам мо́лан туныкта? Мыланна Иегован заданийже-влакым мучаш марте чот тыршен шуктыман. Тыгак ме шӱрымӧ-влаклан шекланыше лияш кӱлмӧ нерген мутланенна. Нуно ӱшанле огыт код гын, Иисус нуным кавашке огеш нал да нуно суапыштым огыт нал. Нуно пеш вучат жапым, кунам Иисус дене пырля лияшлан каваш погымо лийыт. Армагеддон деч вара Пачан сӱанже лиеш. Иисус каче лиеш, а ылыжше шӱрымӧ христиан-влак оръеҥже лийыт (2 Фес. 2:1; Почм. 19:9).

20. Шекландарымыжым колыштшо-влаклан Иегова мом ышта?

²⁰ Вашке Иисус еҥ-влакым судитлаш тӱҥалеш, но мыланна лӱдаш огеш кӱл. Ӱшанле кодына гын, йӧратыше кавасе Ачана мыланна кӱдыратле вийым пуа да ме Иисус ончылно шогалын кертына (2 Кор. 4:7; Лук. 21:36). Кеч-кушто, каваште але мландыште, илаш ӱшанена гынат, мыланна Иисусын туштен каласымашыж-влак гыч шижтарымашым колыштман. Тыге ме Ачанам куандарена. Иегова пеш поро да, кажнынан лӱмжӧ илыш книгаште возымо лийже манын, тудын кумылжо уло (Дан. 12:1; Почм. 3:5).