1, 2. Весе-влаклан иктаж-мом пуымаш мыланна куаным конда. Молан Иегова тыге ыштен?

 КУНАМ весе-влак мыланна иктаж-мом ыштат, тиде мыланна куаным конда. Но ме пиаланрак улына, кунам шке весе-влаклан иктаж-мом ыштена (Ап. паш. 20:35). Тыге мемнам Иегова ыштен. Тиде ончыкта мо, пуйто мыланна пӧлекым налаш огеш келше? Конешне, келша! Ме куанена, кунам весе-влак мыланна пӧлекым ыштат. Но кунам ме весе-влаклан иктаж-мом пӧлеклена, ме пиаланрак улына. Мемнам тыге ыштымыж дене Юмо мемнан дек йӧратымашым ончыктен. Молан тыге каласаш лиеш?

² Иегован мемнам тыге ыштымылан кӧра ме шкенам шке пиаланракым ыштен кертына. Шукырак куаным налашлан весе-влаклан иктаж-мом ыштыман. Мемнам тыге ыштымыжлан Иеговалан кугу тау! (Пс. 138:14).

3. Молан Иеговам «пиалан Юмо» манме?

³ Библийыште возымо дене келшышын, весе-влак верч тыршымаш пиалым конда. Тиде мыланна умылаш полша, молан Иегова «пиалан Юмо» (1 Тим. 1:11, УТ). Тудо икымше лийын, кӧ весе-влаклан иктаж-мом ышташ тӱҥалын, да тудын деч шукырак нигӧ огеш пу. Апостол Павел каласен: «Тудын дене ме илена, коштына, улына» (Ап. паш. 17:28).  Чынжымак, «чыла поро да тичмаш пӧлек» Иегова деч (Иак. 1:17).

4. Шукырак куаным налаш мыланна мо полша?

⁴ Весе-влак верч тыршымаш тыланда эше шукырак куаным кондыжо манын, кумылда уло мо? Тугеже, уло кумылын пуышо Иегова Юмына деч примерым налза (Еф. 5:1). Тиде статьяште ме ончен лектына, кузе Иегова весе-влак верч тырша. Тыгак ме мутланен налына: порым ыштымынам огыт акле манын чучеш гын, мом ыштыман. Тиде шымлымаш мыланна вийым пуа да порым ыштымаште кидым волташ огыл полша. Тидлан кӧра ме эше пиаланрак лийына.

УЛО КУМЫЛЫН ПУЫМАШТЕ ИЕГОВА ДЕЧ ПРИМЕРЫМ НАЛЗА

5. Иеговалан кӧра мемнан мо уло?

⁵ Теве икмыняр пример, мом Иегова мыланна чаманыде пуа. Иегова мыланна илышлан чыла кӱлешаным пуа. Тиде огеш ончыкто, пуйто ме поян илена. Но Иеговалан кӧра мемнан чыла кӱлешан уло. Мутлан, тудо мыланна кочкышым, вургемым да илыме верым пуа (Пс. 4:9; Матф. 6:31—33; 1 Тим. 6:6—8). Иегова тыге огеш шоно: «Мый чыла тидым пуышаш улам, сандене пуэм». Тугеже, молан тудо чыла тидым ышта?

6. Матфейын 6:25, 26 почеламут-влак мемнам мо́лан туныктат?

⁶ Иегова мемнам чот йӧрата, сандене мыланна чыла кӱлешаным пуа. Шарналтена Иисусын мутшым, кудыжым Матфейын 6:25, 26 почеламут-влакыште возымо (лудын лекса). Кайык-влак нерген ойлымо годым тудо каласен: «Нуно огыт ӱдӧ, огыт тӱред, амбарышкат огыт опто, тендан Пылпомышсо Ачада нуным пукша». Варажым Иисус палемден: «Те нунын деч шергырак огыдал мо?» Могай иктешлымашым ышташ лиеш? Иегова шке служитлышыже-влакым кайык да янлык деч чотрак акла. Тудо кайык-влак верч тырша гын, мемнан верчат тыршаш тӱҥалеш. Иегова йӧратыше Ача, сандене тудо шке йочаж-влакым пукша, йӱкта да чикта (Пс. 144:16; Матф. 6:32).

7. Иегова деч примерым налын, мом ме весе-влаклан ыштен кертына? (Тыгак сӱретым ончыза.)

⁷ Иегова деч примерым налын, меат йӧратымашым паша дене ончыктен кертына. Погынымаште иктаж-кӧм паледа мо, кӧлан кочкыш але вургем кӱлеш? Иегова тыгай изалан але акалан тендан гоч полшен кертеш. Иегован калыкше теве мо дене ойыртемалтеш: иктаж-могай ойго лекме годым нуно вашке полшаш тыршат. Мутлан,  COVID-19 пандемий годым нуно шке иза-акаж-влаклан кочкыш да вургем дене полшеныт. Тыгак шукышт тӱнямбалысе пашалан уло кумылын окса надырым ыштеныт. Тидлан кӧра уло тӱня мучко эҥгекыш логалше иза-ака-влаклан полыш пуымо лийын. Тыге иза-ака-влак Еврей-влаклан 13:16 почеламут гыч шомакым кучылтыныт: «Порым ыштымым да икте-весылан полшымым ида мондо, тыгай надыр Юмылан келша».

8. Иегован пуымо вийже тыланда могай пайдам конда? (Филиппысе-влаклан 2:13, УТ).

⁸ Иегова вийым пуа. Иегова чот виян, да тудо уло кумылын шке ӱшанле служитлышыж-влаклан вийым пуа. (Филиппысе-влаклан 2:13, УТ лудын лекса.) Алгаштарымаш ваштареш шогаш але неле тергымашым чытен лекташ вийым иктаж-кунам йодында мо? А можыч, те эше ик кечым илен лекташ вий нерген кумалында? Кунам Иегова кумалмыланда вашмутым пуэн, те, очыни, апостол Павелын мутшым шарналтенда: «Мылам вийым пуэн шогышылан кӧра мый чылажымат кертам» (Флп. 4:13, УТ).

9. Шкенан вийнам кучылтын, кузе ме Иегова деч примерым налын кертына? (Тыгак сӱретым ончыза.)

⁹ Иегова дене таҥастарымаште мемнан вийна мучашдыме огыл да ме тудым весе-влаклан пуэн она керт. Но ме шкенан вийнам весе-влаклан иктаж-мом ышташлан кучылтын кертына. Мутлан, илалше але черле иза але акалан полшен кертына. Нунылан кевытыште иктаж-мом налаш кӱлеш гын, тидым ышташ лиеш. Тыгак пӧрт сомылым ыштен але вес семын полшен кертына. Йӧнна уло гын, Вашлиймаш залым эрыктымаште да ончымаште полшаш лиеш. Шкенан вийнам тыге кучылтын, ме Иеговам йӧратыше-влаклан шуко порым ыштена.

10. Кузе ме шкенан мутна дене иктаж-кӧм пеҥгыдемден кертына?

¹⁰ Тыгак шарныза: каласымыда иктаж-кӧм пеҥгыдемден кертеш. Очыни, те вигак шарналтенда, кӧм мокташ лиеш. А можыч иктаж-кӧм лыпландараш кӱлеш? Тыге гын, тиде айдемылан поро шомакым каласыза. Тудын дек унала пураш лиеш. Але тудлан йыҥгыртен, открыткым возен але сообщенийым колтен кертыда. Мом каласаш утыж дене ида тургыжлане. Иктаж-кӧм кумылаҥдашлан чӱчкыдын шӱм гыч лекше икмыняр проста мут гына сита. Очыни, тиде шомаклан кӧра айдемын ӱшанже лектеш да тудо Иеговалан ӱшанле кодашлан эше ик кечым илен кертеш (Прит. 12:25; Еф. 4:29).

11. Иегова шке уш-акылжым кузе кучылтеш?

¹¹ Иегова уш-акылым пуа. Иаков возен: «Тендан кокла гыч иктаж-кудыжын уш-акылже ситышын огыл гын, тек Юмо деч йодеш... вет Юмо чылалан кумылын да  шылталыде пуа» (Иак. 1:5). Тиде почеламут гыч раш коеш: Иегова уш-акылжым огеш шылте. Юмо тудым весе-влаклан уло кумылын пуа. Тудо тидым «шылталыде» ышта. Иегова мемнам тудын деч полышым йодмылан нигунамат огеш вожылтаре да огеш критиковатле. Мӧҥгешла, тудо шкеже мемнам тудын деч каҥашым йодаш тарата (Прит. 2:1—6).

12. Кузе ме весе-влаклан уш-акылан лияш полшен кертына?

¹² А кузе ме, Иегова деч примерым налын, весе-влаклан уш-акылан лияш полшен кертына? (Пс. 31:8). Мом ме пален налынна, тидлан весе-влакым туныкташ лиеш. Мутлан, ме чӱчкыдын у уверзе-влаклан ончыктена, кузе таныклыман. Кугурак иза-влак чытымаш дене служебный полышкалыше-влакым да вес тынеш пурышо иза-влакым погынымаште тӱрлӧ заданийым шукташ туныктат. А кӧн мемнан организацийнан зданий-влакым чоҥымаште да ончымаште опытшо уло, весе-влакымат тидым ышташ туныктат.

13. Кузе ме, весе-влакым туныктен, Иегова деч примерым налын кертына?

¹³ Весе-влакым туныктен, ме Иегова деч примерым налнена. Иегова шке уш-акылжым огеш шылте. Тидын семынак мыланна шкенан шинчымашнам да опытнам шылташ огеш кӱл. Туныктымо айдеме мемнан олмеш заданийнам шукташ тӱҥалеш манын, ме она лӱд да она шоно: «Мыйым нигӧ туныктен огыл. Тек нунат чылажлан шке тунемыт». Тыге шонаш чын огыл. Иегован служитлышыже-влак, шинчымашыштым кучылтын, весе-влакым уло кумылын туныктат да тиде шотышто чылажымат ышташ ямде улыт (1 Фес. 2:8). Ӱшанен кодына, кӧм ме туныктена, нуно варажым моло-влакымат «туныктен кертыт» (2 Тим. 2:1, 2). Весе-влаклан уш-акылан лияш уло кумылын полшена гын, тиде мыланнат, весе-влакланат уш-акыланрак да пиаланрак лияш полша.

КУНАМ ЧУЧЕШ, ПУЙТО ПОРЫЛЫКНАМ ОГЫТ АКЛЕ

14. Шукыштын могай реакцийышт, кунам весе-влак нунылан иктаж-мом ыштат?

¹⁴ Кунам ме весе-влаклан иктаж-мом ыштена, поснак иза-акана-влаклан, чӱчкыдын нуно мемнам тидлан тауштат. Мутлан, нуно мыланна открыткым пӧлеклат але иктаж-кузе вес семын таум ыштат (Кол. 3:15). Келшеда докан, мыланна чот келша, кунам мемнам тауштат.

15. Мыланна таум ыштен огытыл гынат, мо нерген шарныман?

¹⁵ Тыгаят лийын кертеш, кунам мыланна таум огыт ыште. Мутлан, весе-влаклан иктаж-мом ышташлан те шкендан жапдам, вийдам да оксадам пуэнда. Но нуно тидым акленат огытыл. Тыгай годым куаным йомдараш огыл да еҥ-влаклан сыраш огыл мо полша? Тиде статьян тӱҥ почеламутшым шарналтыза — Апост. пашашт 20:35. Мемнан пиална еҥ-влакын реакцийышт деч огеш шого. Весе-влак мыланна таум огыт ыште манын, мыланна чучеш гынат, ме умбакыжат уло кумылын пуаш шкаланна цельым шынден кертына. Айста ончен лектына, мо мыланна тиде шотышто полшен кертеш.

16. Умбакыжат весе-влаклан иктаж-мом куанен ышташ мыланна мо полша?

¹⁶ Иегова деч примерым налза. Тудо чыла еҥ-влак верч тырша да огеш ончо: аклат нуно тидым але уке (Матф. 5:43—48). Иегован сӧрымыж дене келшышын, ме, нимом «мӧҥгеш налаш шоныде», порым ыштена гын, мемнам «кугу суап» вуча (Лук. 6:35). Еҥ-влак мемнам кеч тауштат, кеч уке, Иегова садак мемнам поро пашам ыштымылан суапландара (Прит. 19:17). «Вет куанен пуышым Юмо йӧрата» (2 Кор. 9:7).

17. Могай принцип мыланна весе-влаклан порым ышташ полша? (Лукан 14:12—14).

 ¹⁷ Тыгак принцип нерген шарнаш кӱлеш, кудыжым Лукан 14:12—14 почеламут-влакыште возымо (лудын лекса). Мутат уке, ме унала ӱжын да уло кумылын иктаж-мом пуэн кертына тыгай-влаклан, кӧ вашеш мыланна тидым ыштен кертеш. Тыште нимогай удаже уке. Но шке деч йодаш лиеш: «Вашеш поро ыштымым чӱчкыдын вучем мо?» Тунам Иисусын каласымыже почеш ышташ тыршыза. Тыгай-влакым унала ӱжын кертына, кӧн мемнам унала ӱжаш йӧнышт уке. Тунам, Иегова деч примерым налына манын пален, пиалан лийына. Тиде принципак куаным йомдараш огыл полша, кунам мыланна таум огыт ыште.

18. Весе-влак тауштыдымо улыт манын шонаш огыл мо полша?

¹⁸ Весе-влак тауштыдымо улыт манын ида шоно (1 Кор. 13:7). Мемнам тауштен огытыл гын, шке деч йодаш лиеш: «Тиде айдеме чынжымак тауштыдымо але тудо тау мутым каласаш гына монден?» Очыни, вес амал-влакат улыт, молан тудо таум ыштен огыл. Южышт тауштышо улыт, но кузе тидым ончыкташ огыт пале. Нунылан полышым налаш йӧсӧ лийын кертеш, вет нуно полышым налаш огыл, а шке тудым пуаш тунемыныт. Но ме иза-акана-влакым чынжымак йӧратена гын, тунам нунын нерген удан шонаш она тӱҥал да умбакыжат нунылан иктаж-мом уло кумылын пуэна (Еф. 4:2).

19, 20. Весе-влаклан иктаж-мом ыштен, куаным йомдараш огыл мыланна мо эше полша? (Тыгак сӱретым ончыза.)

¹⁹ Чытыше лийза. Икана Соломон кугыжа возен: «Киндетым вӱд дене колто, вет шуко кече эртымеке, тый тудым угыч муат» (Эккл. 11:1). Тиде почеламут гыч ме ужына: тауштымаш мутым колашлан, очыни, шуко жап вучаш логалеш. Теве кузе тидым ик аканан илыш случайже ончыкта.

²⁰ Шуко ий ончыч районым эскерыше изан ватыже ик акалан, кудыжо шукерте огыл тынеш пурен, открыткым возен да тудым Иеговалан ӱшанле кодаш таратен. Кандаш ий наре эртымеке, тудо саде ака деч серышым налын.  Ака тыге тӱҥалын: «Очыни, тый отат пале, мыняр чот тый мыланем нине ийлаште полшенат». Умбакыже тушто возымо лийын: «Тыйын шомакет шӱмемым чот ырыктен. Но эн чотракше мыйым почеламут пеҥгыдемден a. Мый тудым нигунамат монден омыл». Икмыняр йӧсылыкым палемден, ака возен: «Южгунам мыйын чылажымат кудалтымем шуын да Иеговалан служитлымым чарнаш кумылем лийын. Но кажне гана мый библийысе почеламутым шарналтенам, кудыжым тый мыланем возенат, да тиде мыланем Иеговалан ӱшанле кодаш вийым пуэн». Мучаште тудо палемден: «Чыла тиде кандаш ий мучко тыйын открыткет ден почеламут деч моло нимат мыланем тынар шуко вийым пуэн огыл». Шоналтыза веле, «шуко кече эртымеке», тыгай серышым налын, районым эскерыше изан ватыже мыняр чот пиалан лийын. Очыни, меат поро пашам ыштымылан тау мутым вигак огыл, а икмыняр жап эртымеке веле колына.

21. Уло кумылын пуымаш шотышто молан Иегова деч примерым налнеда?

²¹ Кузе статьян тӱҥалтыште палемдыме лийын, Иегова мемнам ойыртемалтше моштымаш дене ыштен: мыланна весе-влак деч иктаж-мом налаш келша гынат, ме шукырак пиалым шижына, кунам весе-влаклан пуэна. Мыланна шергакан иза-акана-влаклан иктаж-мом ышташ чот келша, да, кунам нуно мемнам тауштат, тиде мыланна куаным конда. Но тауштымаш мутым кеч колына, кеч уке, ме куаным она йомдаре, вет чын ыштена. Нигунамат ида мондо: те весе-влаклан шуко пуэн кертыда гынат, «Иегова... [тыланда] путырак шуко пуэн кертеш» (2 Лет. 25:9). Уло кумылын пуымаш шотышто Иегова дене иктат таҥастаралтын огеш керт! А Иегова деч суапым налаш — тиде илышыште эн сай пӧлек. Айста умбакыжат уло кумылын пуымаш шотышто кавасе Ачана деч примерым налына!