1, 2. Юмын служитлышыже-влак пиалан улыт манын, молан каласаш лиеш? (Иаковын 1:22—25).

 ИЕГОВА да тудын шергакан Эргыже мемнам пиаланым ужнешт. Псалом 118:2 почеламутышто возымо: «Юмын шомакшым палаш тыршыше-шамыч поро пиалан улыт, нуно уло шӱмышт дене Тудым кычалыт». Иисусат тиде шонымашым пеҥгыдемден: «Юмын шомакым колыштшо да шуктен шогышо-влак поро пиалан улыт!» (Лук. 11:28).

² Иегован калыкше пиалан. Молан? Тидлан шуко амал уло. Мутлан, ме кажне кечын Библийым лудына да пален налмым илышыш пурташ тыршена. (Иаковын 1:22—25 лудын лекса.)

3. Библийысе каҥаш-влакым кучылтмаш илышналан могай пайдам конда?

³ «Шомакым шуктышо» лийына гын, тиде мыланна пайдам конда. Мутлан, тыге ме Иеговам куандарена. А тидыже мыланнат куаным конда (Эккл. 12:13). Тыгак, кунам ме библийысе каҥаш-влакым илышыш пуртена, ешыштына да погынымаш гыч йолташна-влак дене кыл кучымашна эше чотрак пеҥгыдемеш. Тидын дене те келшеда докан. А эше ме шкенам шуко проблеме деч аралена, кудышт Юмын законым колыштдымо-влакын уло. Мемнан шижмашна Давид кугыжан гаяк. Теве мом тудо Иегован закон, кӱштымаш ден решенийже-влак нерген  каласен: «Кӧ нуным шуктен шога, тудо кугу суапым налеш» (Пс. 18:8—12).

4. Молан Библий гыч пален налмым илышыш пурташ южгунам йӧсӧ лийын кертеш?

⁴ Юмын Мутшым лудаш да пален налмым илышыш пурташ южгунам йӧсӧ лийын кертеш, вет мемнан шуко тӱрлӧ паша уло. Но мом мемнан деч Иегова вуча умылен налашлан мыланна Библийым лудмылан да шымлымылан жапым ойырыман. Сандене айста лончылен налына, мо мыланна полша Библийым кажне кечын лудаш, тудын каҥашыже-влак нерген шонкалаш да нуным илышыш пурташ.

ЮМЫН МУТШЫМ ЛУДАШЛАН ЖАПЫМ ОЙЫРЫЗА

5. Шуко жапна могай пашалан кая?

⁵ Иегован служитлышыже-влакын яра жапышт шагал. Христиан семын ме тӱрлӧ пашам шуктена. Мутлан, мемнан да ешнан чыла кӱлешан лийже манын, мемнан гыч шукышт пашам ыштат (1 Тим. 5:8). Тыгак шукышт черле але шоҥго родыштым ончат. А эше мыланна шкенан тазалыкна верч тыршыман. Тидланат жап кӱлеш. Тылеч моло, мемнан погынымаште тӱрлӧ заданий уло. А эн тӱҥ заданий — поро уверым таныклымаш. Чыла тидым шотыш налын, Библийым лудашлан, лудмо нерген шонкалашлан да тудын каҥашыж-влакым илышыш пурташлан жапым кушеч муаш?

6. Кажне кечын Библийым лудаш мо полша? (Тыгак сӱретым ончыза.)

⁶ Филиппысе-влаклан 1:10, УТ дене келшышын, мыланна чыла паша-влак гыч кӱлешанжым эре ойырен налаш тыршыман. Тыгай кӱлешан паша-влак гыч иктыже — Библийым лудмаш. Пиалан айдеме нерген 1-ше Псаломышто возымо: «[Тудо] Юмын законжылан кечывал кечынат, йӱдымат тунемеш» (Пс. 1:1, 2). Нине мут-влак гыч раш коеш: мыланна Библийым лудашлан жапым ойырыман. Кунам Библийым лудаш сайрак? Ме чыланат тӱрлӧ улына, да кажнынан шке вашмутшо лийын кертеш.  Тӱҥжӧ — тидым кажне кечын ышташ. Виктор лӱман иза ойла: «Мыланем эрдене Библийым лудаш келша. Эрдене эр кынелаш ом йӧрате гынат, тиде жапыште нимогай вес шонымаш Библий гыч лудмо нерген шонкалаш ок мешае». А тендан нерген мом каласаш лиеш? Шке деч йодса: «Библийым лудаш мыланем кунам сайрак?»

ЛУДМО НЕРГЕН ШОНКАЛЫЗА

7, 8. Лудмо гыч пайдам налаш мо мыланна мешаен кертеш? Примерым кондыза.

⁷ Таче ме шуко информацийым колын да лудын кертына. Но чылажат ушыштына огеш код. Тендан тыгай лийын мо, кунам те иктаж-мом лудында, а вара тидын нерген вашке гына монденда? Чылаштынат тыгай лийын. Чаманаш логалеш, но Библийым лудмо денат тыгай лийын кертеш. Очыни, те кажне кечын икмыняр ужашым лудаш шкаланда цельым шынденда. Пеш сай! Чылаштланат цель-влакым шындаш да нуным шукташ кӱлеш (1 Кор. 9:26). Но Библийым лудмаш мыланна шукырак пайдам кондыжо манын, тудым лудаш гына огеш сите — эше ала-мом ыштыман.

⁸ Шоналтыза тыгай пример нерген. Кушкыл-влак вӱд деч посна кушкын огыт керт. Тидлан йӱр кӱлеш. Но кӱчык жапыште шуко йӱр йӱреш гын, мланде купыш савырнен кертеш. Тыгай годым шуко вӱд кушкыл-влаклан уже нимогай пайдам огеш кондо. Вӱд мландыш шыҥен шужо манын, жап кӱлеш. Тидын семынак Библийым чот шуко да вашкен лудына гын, тунам лудмо нерген шонкален, тудым ушыш пыштен да илышыш пуртен она керт (Иак. 1:24).

9. Библийым чот вашке лудына манын умылена гын, мом ыштыман?

⁹ Тендан тыгай лийын мо, Библийым кидышкыда налын, те тудым вашке гына лудаш тӱҥалыда? Тыге гын, мом ыштыман? Писылыкдам иземдыза. Шарныза, тендан цельда иктаж-могай ужашым лудын лекташ гына огыл, но тыгак лудын лекме нерген шонкалаш. Но шонкалымаш  тендам лӱдыктышаш огыл. Чынжымак тидым ышташ йӧсӧ огыл. Чарныза да лудын лекме нерген шоналтыза. Шонкалаш лудмо годым але лудмо деч вара лиеш. Очыни, те лудмо нерген шонкалашлан шымлымашдам шуйынеда. Але те, шымлымаш жапым тыгайымак коден, шагалрак почеламутым лудын кертыда. «Мый шуко лудаш ом тырше, ик ужашым лудын кертам, — ойла Виктор. — Мый Библийым эрдене лудам, сандене кече мучко лудмо нерген шонкален кертам». Кеч-могай йӧным ойыреда гынат, тӱҥжӧ — тыгай писылык дене лудаш, кудыжо тыланда лудмо нерген шонкалаш полша (Пс. 118:97; « Шонкалашлан йодыш-влак» рамкым ончыза).

10. Библийыште лудмым илышыш пурташ мо полша? Примерым кондыза (1 Фессалоникысе-влаклан 5:17, 18).

¹⁰ Кеч-кунам те Библийым лудыда да кеч-мыняр жапым тидлан ойыреда, лудмыда годым шоналтыза, кузе те лудмым илышыш пуртен кертыда. Шке деч йодса: «Кузе тиде информаций мыланем кызыт але ончыкыжым полша?» Мутлан, те 1 Фессалоникысе-влаклан 5:17, 18 почеламут-влакым лудыда (лудын лекса). Те чарнеда да шонеда: «Мыняр чот чӱчкыдын мый кумалам, да кумалтыш мутем-влак шӱм гыч лекше улыт мо?» Варажым те шонкаледа, мом тыланда Иегова ыштен, да, мутлан, иктаж-могай кум пӧлеклан тудлан таум ойледа. Шоналтыза, икмыняр минут шонкалымаш жапыште те Иегован каласымыжым колында гына огыл, а тудым илышыш пуртенда. А кажне кечын тыге ыштеда гын, тиде тыланда шуко пайдам конда. Те Иегован служитлыше семын саемын кертыда. Но тыланда шуко вашталтышым ышташ кӱлеш манын ужында гын, мом ыштыман?

ШУКТАШ ЛИЙШЕ ЦЕЛЬ-ВЛАКЫМ ШЫНДЫЗА

11. Молан южгунам кидда волен кертеш? Примерым кондыза.

¹¹ Кунам те Библийым лудыда да умыледа, мыняр шуко вашталтышым тыланда ыштыман, тендан кидда волен кертеш. Мутлан, таче те Библийыште еҥ-влакым ойыркалаш огеш йӧрӧ манын лудыда (Иак. 2:1—8). Тидым лудмеке, те ужыда: весе-влак дене шкем кузе кучымо шотышто тыланда саемаш кӱлеш. Тидлан кӧра те вашталташ решенийым луктыда. Тиде пеш сай цель! Кокымшо кечын те ойлымым эскераш кӱлмӧ нерген лудыда (Иак. 3:1—12). Те келшеда: южгунам мутда поро огыл. Тидымат тӧрлаташ шонеда. А кумшо кечын библийысе ужаш тендам тӱня дене йолташ лийме деч шекландара  (Иак. 4:4—12). Тиде шотыштат те умыледа: тыланда ойырен мошташ кӱлеш, мом ончаш, мом колышташ да мом лудаш. Нылымше кечын, кунам те ужыда, мыняр шуко вашталтышым тыланда ыштыман, тендан вуйда аҥырга.

12. Библийым лудын, тыланда шуко вашталтышым ышташ кӱлеш манын ужыда гын, молан шӱлыкаҥаш огеш кӱл? (Тыгак сноскым ончыза.)

¹² Тыланда шуко вашталтышым ышташ кӱлеш гын, ида шӱлыкаҥ. Мӧҥгешла, тендам мокташ лиеш, вет Библийым лудын, те ужаш тыршеда, мом тыланда вашталтыман a. Тугеже тендан сай шӱмда, те ӱҥышӧ айдеме да шке дене честный улыда. Тыгак шарныза: «у айдемыш» вӱдылалташлан жап кӱлеш да вийым пыштыман (Кол. 3:10). Умбакыжат Юмын Мутшо гыч каҥаш-влакым илышыш пурташ тыланда мо полша?

13. Кузе пален налмым илышыш пурташ лиеш? (Тыгак сӱретым ончыза.)

¹³ Пален налме гыч чылажымат иканаште кучылташ тыршаш огеш кӱл. Шкаланда пешак шуко цельым ида шынде (Прит. 11:2). Теве мом ышташ лиеш: спискым ыштыза, мом вашталтымыда шуэш, да вара ик-кок пунктым ойырен налза, а кодшыжым варалан кодыза. Мо гыч тӱҥалаш лиеш?

14. Могай цель-влак гыч тӱҥалаш лиеш?

¹⁴ Эн проста цель гыч тӱҥалаш лиеш. Але тыгай вашталтыш шотышто тыршыза, кудыжым тыланда поснак ыштыман. Цельым ойырен, публикацийна-влак почеш шымлымашым эртарыза. Мутлан, тыланда полшен кертыт «Индекс публикаций Сторожевой башни» але «Путеводитель  по публикациям Свидетелей Иеговы». Цельда нерген кумалза да Иегова тыланда «ышташ кумылымат, вийымат» пуыжо манын йодса (Флп. 2:13, УТ). Варажым пален налмым илышыште кучылтса. Икымше цельым шуктымаште сай лектышым ужмеке, тендан, очыни, вес цельыш куснаш кумылда лиеш. Те иктаж-мом вашталтенда але иктаж-могай христиан койышым куштенда гын, тиде тендам вес вашталтыш-влакымат ышташ тарата, да нуным ышташ тыланда уже куштылгырак лиеш докан.

ЮМЫН МУТШО ПОЧЕШ ИЛЫЗА

15. Иегован служитлышыже-влак шуко еҥ деч, кудышт Библийым лудыт, мо дене ойыртемалтыт? (1 Фессалоникысе-влаклан 2:13).

¹⁵ Южо еҥ-влак Библийым шуко гана лудмо дене кугешнат. Но тудын туныктымыжлан нуно ӱшанат мо? Тудын каҥашыже-влакым кучылтыт мо да вашталтыт мо? Уке. Шукышт библийысе каҥаш-влак почеш огыт ыште. Но Иегован служитлышыже-влакын Юмын Мутшо деке отношенийышт йӧршынак весе. Икымше курымысо христиан-влак семын ме Библийым «тудо чынжымак могай, тугайым... Юмын... шомакше семын» ушешна коденна. Ме библийысе каҥаш-влакым кучылташлан уло вийым пыштена. (1 Фессалоникысе-влаклан 2:13 лудын лекса.)

16. Юмын Мутшо почеш илаш мыланна мо полша?

¹⁶ Чынак, Юмын Мутшым лудаш да кучылташ южгунам куштылго огыл. Можыч, мыланна лудашлан жапым муаш йӧсӧ. Але ме Библийым чот вашке лудына да смыслже нерген она шонкале. Але мыняр шуко вашталтышым ышташ кӱлеш манын умылымеке, кидна вола. Тӱрлӧ нелылык дене тӱкнена гынат, Иеговалан кӧра чылажымат сеҥен кертына. Айста тудын деч полышым налына, мом колмынам она мондо да Юмын Мутшо почеш илена. Мыняр шукырак Библийым лудына да тудын каҥашыже-влакым кучылтына, тынар пиаланрак лийына (Иак. 1:25).