БИБЛИЙЫМ возышо-влак южо шомак ден ойсавыртыш-влакым уэш-пачаш возеныт. Кум амалым ончалына, молан нуно тыге ыштеныт.

Кунам возымо лийын. Акрет Израильыште шукыштын законын копийже-влак лийын огытыл. Шукыж годым еҥ-влак законым колыштыныт, кунам священный шатёр ончылно погыненыт, а варажым — храм ончылно (Втор. 31:10—12). Еҥ-влак икмыняр шагат мучко шоген колыштыныт (Неем. 8:2, 3, 7). Тушто, очыни, шуко мешайыше йӱк лийын. Сандене южо шомак-влак уэш-пачаш ушештаралтыныт. Тидлан кӧра израильтян-влаклан Юмын закон ден кӱштымашыже-влакым шарнен кодаш да кучылташ куштылгырак лийын (Лев. 18:4—22; Втор. 5:1).

Кузе возымо лийын. Библийын 10 процент наре — тиде муро-влак, мутлан, Псалом, Песня Соломона да Плач Иеремии. Южгунам муро-влакыште припев лийын. Припев мурын темыжым палемден да колыштшо-влаклан шомакым шарнен кодаш полшен. Мутлан, ончалза, мом 113-шо Псаломышто 17-ше гыч 19-ше почеламут марте возымо: «Израильын пӧртшӧ Юмылан ӱшанен; Тудо нунын полшышыжо да аралышыже. Ааронын пӧртшӧ Юмылан ӱшанен: Тудо нунын полшышыжо да аралышыже. Господь деч лӱдшӧ-шамыч Господьлан ӱшаненыт: Тудо нунын полшышыжо да аралышыже». Нине шомак-влакым ушештарымаш мурышо-влаклан шергакан чыным ушыш да шӱмыш пурташ полшен.

Молан возымо лийын. Южгунам Библийым возышо-влак тӱҥ ойсавыртыш-влакым ушештареныт. Тыге нуно кӱлешан шонымашым палемдынешт ыле. Мутлан, кунам Иегова израильтян-влаклан вӱрым кочкаш огыл каласен, тудо Моисейым тиде кӱштымашым шуко гана ушештараш таратен. Юмо теве мом палемдынеже ыле: капын илышыже — вӱрыштӧ. Вес семынже, вӱр илышым ончыкта (Лев. 17:11, 14). Вараракшым Иерусалимысе апостол ден кугурак иза-влак христиан-влаклан возеныт, Юмым куандарашлан мо деч нунылан кораҥман. Возымышт годым нуно вӱр деч шекланаш кӱлмӧ нерген угыч ушештареныт (Ап. паш. 15:20, 29).

Иегова мемнан деч Священный Возымаш гыч шомакым шоныде угыч да угыч ойлымым нигунамат вучен огыл. Мутлан, тудын Эргыже каласен: «Кумалмыда годым... уэш-пачаш иктымак ида ойло» (Матф. 6:7, УТ). А вара тудо палемден, Юмын эрыкше дене келшышын мо нерген кумалаш лиеш (Матф. 6:9—13). Сандене кумалмына годым иктымак она ойло гынат, ме ик теме нерген угыч да угыч кумалын кертына (Матф. 7:7—11).

Мутат уке, Юмын шке Мутыштыжо южо шомак ден ойсавыртыш-влакым уэш-пачаш ушештараш амал-влак лийыныт. Тиде шуко йӧн-влак гыч иктыже веле, кудыжлан кӧра Кугу Туныктышына мемнам туныкта (Ис. 48:17, 18).