1, 2. Иегован ӱшанле служитлышыже-влак могай нелылык ден тӱкнен кертыт?

 ИКТАЖ-МОГАЙ ойго илышнам ик татыште тӱрыснек вашталтен кертеш. Мутлан, Луи́с a лӱман изалан неле форман рак диагнозым шынденыт. Врачын каласымыже почеш тудлан икмыняр тылзе веле илаш кодын. Мо́ника да тудын марийже чот тыршен служитленыт. Икана тудо пален налын: кугурак иза семын служитлыше марийже шуко ий языкым шолып ыштен илен. Марлан лекдыме Оли́вия акалан чылажымат кодаш да вес верыш куржаш логалын, вет кундемышт дек чот виян тӱтан мардеж лишемын. Кунам тудо пӧртылын, пӧртшын олмыштыжо тудо кӱ орам веле ужын. Луисын, Моникан да Оливиян илышышт кенеташте тӱрыснек вашталтын. Те илышдам тӱрыснек вашталтыше ойго дене иктаж-кунам тӱкненда мо?

² Иеговалан ӱшанлын служитлена гынат, чыла еҥ-влак гаяк тӱрлӧ нелылык ден тӱкнена да черланен кертына. Тыгак мемнам Юмын калыкшым ужмышудымо еҥ-влак поктен да шыгыремден кертыт. Иегова мемнан тыгай проблеме-влакым огеш кораҥде гынат, мыланна полшаш сӧра (Ис. 41:10). Тудын полшымыж дене ме куанен илен, сай решенийым луктын да эн йӧсӧ ситуацийыштат тудлан ӱшанле кодын кертына. Тиде статьяште ме шымлен лектына ныл йӧным, кузе Иегова мыланна нелылыкыште полша. Тыгак ме ончен лектына, мом мыланна тиде полышым налашлан ышташ кӱлеш.

 ИЕГОВА ТЕНДАМ АРАЛАШ ТӰҤАЛЕШ

3. Ойго ден тӱкнымына годым мом мыланна ышташ йӧсӧ лийын кертеш?

³ Нелылык. Ойго ден тӱкнымына годым мыланна раш шонкалаш да решенийым лукташ йӧсӧ лийын кертеш. Молан? Молан манаш гын, шӱмна чыташ лийдымын коржеш, а ушнам тургыжланымаш авалта. Теве мом шижмашышт нерген кок ака ойла, кудышт нерген ме уже ойленна. Оливия манеш: «Тӱтан деч вара шаланыме пӧртемым ужмеке, мый мом ышташат пален омыл». Моника, кудыжлан марийже ӱшанле лийын огыл, ойла: «Тыгай мый денем лиеш манын, мый нигунамат шонен омыл. Умылтаренат ом керт, мом мый шижынам. Чонем тынар чот корштен, мыйым пуйто кӱзӧ дене шуралтеныт. Кӧргыштем чылажат тодылалтын. Мый пален омыл, кузе шкемым кидыш налаш да умбакыже илаш». Чот ойгырымына годым Иегова мыланна кузе полшаш сӧра?

4. Филиппысе-влаклан 4:6, 7 дене келшышын, Иегова мыланна мом пуаш сӧра?

⁴ Мом Иегова ышта. Тудо мыланна Библийыште манме «Юмын тыныслыкшым» пуаш сӧра. (Филиппысе-влаклан 4:6, 7 лудын лекса.) Тиде тыгай состояний, кунам ушлан да шӱм-чонлан ласка. Тиде тыныс Иегова дене лишыл кыл кучымашлан кӧра лектеш. Тиде «кеч-могай уш деч кӱшнӧ шогышо» тыныслык. Тиде эн сай тыныслык, кудыжо тендан лийын кертеш. Лийын мо тендан тыгай, кунам те шокшын кумалында да тидын деч вара шӱмда лыпланен? Тиде «Юмын тыныслыкше» лийын.

5. Юмын тыныслыкше уш ден шӱмнам кузе арала?

⁵ Тиде почеламут денак келшышын, Юмын тыныслыкше «тендан шӱмдам да шонымыдам... арала». «Аралаш» кусарыме грек мут — тиде военный термин. Тиде мут олам оролышо салтак-влак шотышто кучылталтын. Тиде олан илыше-влак, сайын аралыме улыт манын пален, ласкан маленыт. Тидын семынак, кунам Юмын тыныслыкше уш ден шӱмнам арала, ме нимогай лӱдмашым она шиж (Пс. 4:9). Самуил пророкын Анна аважын случайыштыже гаяк ситуацийна вигак ок вашталт гынат, ме тынысым шижын кертына (1 Сам. 1:16—18). А кунам ме она тургыжлане, мыланна раш шонкалаш да уш-акылан решенийым лукташ куштылгырак.

6. Юмын тыныслыкшым шижашлан мом ыштыман? (Тыгак сӱретым ончыза.)

⁶ Мом мыланна ыштыман. Кунам тендам иктаж-мо тургыжландара, оролым ӱжса. Кузе тидым ышташ? Юмын тыныслыкшым шижмешке кумалза (Лук. 11:9; 1 Фес. 5:17). Айста Луис ден А́нэ ватыжын случайыштым шарналтена. Луислан икмыняр тылзе веле илаш кодын пален налмеке, нуно теве  мом ыштеныт. Луис ойла: «Тыгай жапыште эмлымаш да вес шотышто решений-влакым лукташ чот йӧсӧ. Ме эре кумалынна, сандене шӱмыштына тыныс лийын». Уш ден шӱмыштым лыпландараш да уш-акылан решенийым лукташ полшаш Луис ден ватыже Иеговам йодыныт. Нуно ужыныт, кузе Иегова сӧрвалымыштлан вашмутым пуэн. Те чот неле ситуацийыште лийыда гын, эре кумалза. Тунам те Иегован пуымо тыныслыкшым шижыда да тиде тыныс уш ден шӱмдам аралаш тӱҥалеш (Рим. 12:12).

ИЕГОВА ТЫЛАНДА ПЕҤГЫДЫН ШОГАШ ПОЛША

7. Кугу нелылык годым могай шижмашна лийын кертеш?

⁷ Нелылык. Кузе тӱтан мардеж теҥызыште корабльым ик могыр гыч вес могырыш лупша, тыгакак кугу нелылык южгунам мемнамат эмоциональный шотышто тышке-тушко лупшен кертеш. Мемнан тыгай шонымаш ден шижмашна лийын кертыт, могай нигунамат лийын огыл. Луисын колымыж деч вара Анэ акан тӱрлӧ шижмашыже лийын. Тудо ойла: «Эн ончыч мыйын тыгай шижмашем лийын, пуйто чонем пустаҥын. А кунам тиде шижмаш пытен, мый шкемым чаманаш тӱҥалынам. Луисын пеленем уке лиймыжлан мый сыренам». Анэ акалан шкет кодмыла чучын. Тыгак тудым теве мо ойгандарен. Марийжын ыштыме сомылжым ындыжым тудлан ышташ логалын. Южгунам эмоцийже лӱшкалтше теҥыз семын лийын. Кунам мемнам тыгаяк шижмаш авалта, Иегова мыланна кузе полша?

8. Исайя 33:6 дене келшышын, Иегова мемнам мо шотышто ӱшандара?

⁸ Мом Иегова ышта. Тудо мыланна эҥертыш лияш да мемнам пеҥгыдемдаш сӧра. (Исайя 33:6 лудын лекса.) Кунам корабль тӱтаныш логалеш, тудо чот лӱшкалташ тӱҥалеш. Корабль кумык возын ынже кай манын, стабилизатор-влакым кучылтыт. Стабилизатор-влак — тиде корабльын кок могырыштыжо вӱд йымалне верландарыме плавник-влак. Нуно корабльлан чотак лӱшкалташ огыт пу. Тидлан кӧра пассажир-влаклан корабльыште нимогай лӱдыкшӧ уке да путешествий нунылан куаным гына конда. Но тыгай стабилизатор-влак гыч шукышт тунам сайрак ыштат, кунам корабль кая. Тидын семынак, кунам ме неле жапыште ик верыште она шого, вес семынже, Иеговалан умбакыжат ӱшанлын служитлена, тунам тудо мыланна пеҥгыде лияш полша.

9. Кузе шымлашлан ӱзгар-влак мыланна лыпланаш да пеҥгыдын шогаш полшат? (Тыгак сӱретым ончыза.)

⁹ Мом мыланна ыштыман. Уда шижмашым сеҥаш мо полша? Умбакыжат кумалза,  вашлиймашыш коштса да таныклыза. Те, можыч, уже ончычсо семынак ыштен ода керт. Но шарныза: Иегова тендан деч тидым огеш вучо. (Лукан 21:1—4 дене таҥастарыза.) Шкевуя шымлымашлан да шонкалымашлан жапым ойырыза. Молан тиде кӱлешан? Иегова мыланна шке организацийже гоч сылне статья ден видеоролик-влакым пуа, кудышт мыланна шӱм-чон тынысым аралаш да пеҥгыде лияш полшат. Кӱлешан темым муашлан шымлымаште тыгай ӱзгар-влакым кучылт кертыда: мутлан, JW Library^® приложенийым, «Индекс публикаций Сторожевой башни» да «Путеводитель по публикациям Свидетелей Иеговы» справочник-влакым. Лач тыге Моника ыштен, кунам тудым уда шижмаш-влак авалтеныт. Мутлан, тудо «шыде» мут почеш шымлымашым эртарен. Але «предательстве» але «ӱшанле лиймаш» мут-влакым кычалмаш строкаш возен, а варажым лыпланымешке лудын. Тудо каласен: «Чӱчкыдын шымлымашым эртараш тӱҥалмем годым мый нервный лийынам. А варажым мый шижынам, пуйто Иегова мыйым шокшын ӧндалын. Лудмем годым мый ужынам: Иегова мыйым сайын пала, чыла шижмашемым умыла да полша». Иегова тыландат «тӱтан» годым, лыпланымешкыда, пеҥгыдын шогаш полша (Пс. 118:143, 144).

ИЕГОВА ТЫЛАНДА ПОЛША

10. Ойгым чытен лекмеке, могай шижмашна лийын кертеш?

¹⁰ Нелылык. Иктаж-могай ойгым чытен лекмеке, ме шкенам физический да эмоциональный шотышто вийдымыла шижын кертына. Ме сусыргышо спортсмен семын улына. Лийын жап, кунам тудо писын куржын кертын, а ындыжым окшаклен гына коштын кертеш. Очыни, кызыт ме ончычсо семынак заданийнам шуктен она керт. Але можыч, ончыч иктаж-мо мыланна куаным конден, а кызыт тидым ышташ мемнан кумылна уке. Мыланна чучын кертеш, пуйто Илья пророкын гай кынелаш вийнат уке, малыме веле шуэш (1 Цар. 19:5—7). Вийна уке годым Иегова мыланна мом ышташ сӧра?

11. Псалом 93:18 дене келшышын, Иегова мыланна кузе эше полша?

¹¹ Мом Иегова ышта. Тудо мыланна полшаш сӧра. (Псалом 93:18 лудын лекса.) Шарналтена сусыргышо спортсмен нерген. Тудлан иктаж-кӧн полшымыж деч посна кошташ йӧсӧ. Мыланнат Иеговалан служымаште умбакыжат тыршашлан весе-влакын полышышт кӱлеш. Тыгай жапыште  йӧратыше Ачана мыланна ойла: «Мый, тыйын Иегова Юмет, тыйын пурла кидетым кучем, Тудо улам, кӧ тылат ойла: „Ит лӱд. Мый тыланет полшем“» (Ис. 41:13). Тидымак Давид кугыжа шижын. Йӧсӧ годым, кунам тушманже-влак тудым поктылыныт, тудо Иеговалан каласен: «Тыйын пурла кидет мыйым арален нале» (Пс. 17:36). Но кузе Иегова полша?

12. Вийдыме улмына годым Иегова мыланна кӧ гоч полшен кертеш?

¹² Чӱчкыдын Иегова мыланна вес еҥ-влак гоч полша. Мутлан, кунам Давид шкенжым вийдымыла шижын, тудын дек Ионафан йолташыже толын да поро мут дене тудым пеҥгыдемден (1 Сам. 23:16, 17). А Ильялан Иегова Елисей гоч полшен (1 Цар. 19:16, 21; 2 Цар. 2:2). Таче Иегова мыланна родына, йолташна але кугурак иза-влак гоч полшен кертеш. Но чот ойгырымына годым мемнан весе-влак деч кораҥмына да шкетын лиймына шуэш. Тыгай кумыл уда огыл. Туге гынат мыланна Иегован полшымыжо кӱлеш. Кузе тудым налаш?

13. Иегова мыланна полшен кертше манын, мом ыштыман? (Тыгак сӱретым ончыза.)

¹³ Мом мыланна ыштыман. Весе-влак деч кораҥаш кумылым сеҥаш тыршыза. Кунам весе-влак деч кораҥына, ме шке нерген да проблемына нерген гына шонена. Тидлан кӧра уда решенийым луктын кертына (Прит. 18:1). Поснак ойгырымына годым, мутат уке, мыланна кӱлеш шкетын кодаш. Но ме шуко жап нигӧ денат кылым она кучо гын да она мутлане гын, ме шкенан деч Иеговам кораҥдена да тудлан мыланна полшаш она пу. Сандене йӧсӧ лиеш гынат, ешдан, йолташда-влакын да кугурак иза-влакын полшымыштлан тореш ида лий. Шарныза: чӱчкыдын Иегова мыланна лач нунын гоч полша (Прит. 17:17; Ис. 32:1, 2).

ИЕГОВА ТЕНДАМ ЛЫПЛАНДАРА

14. Молан кӧра лӱдмашна лектын кертеш?

¹⁴ Нелылык. Южгунам мыланна лӱдмашан лийын кертеш. Библийыште Юмын ӱшанле служитлышыже-влакын мутыштым возымо. Нунат лӱдыныт, мутлан, кунам нуным тушманышт-влак поктылыныт (Пс. 17:5; 54:2, 6). Мемнамат шыгыремден кертыт, мутлан, школышто, пашаште, ешыште але правительстве-влак. Але мемнан колымашке конден кертше черым муыныт. Тыгай жапыште ме полышым вучышо изи йоча гай улына. Тыгай годым Иегова кузе полша?

15. Псалом 93:19 дене келшышын, Иегова мыланна мом ышташ сӧра?

 ¹⁵ Мом Иегова ышта. Тудо мемнам лыпландара. (Псалом 93:19 лудын лекса.) Шоналтыза ик изи ӱдыр нерген, кудыжо кӱдырчылан кӧра чот лӱдын да мален огеш керт. Сандене ачаже ӱдыржӧ дек толеш, тудым кидышкыже налеш да мален колтымешкыже ӧндалын шинча. Кӱдырчан йӱр эше пытен огыл гынат, ӱдыр ача воктенже нимо дечат огеш лӱд. Кунам ме лӱдына, мыланнат кавасе Ачана кӱлеш. Саде изи ӱдыр семынак мемнанат Ачанан кидыштыже лыпланымешкына лиймына шуэш. Иегова деч лыпландарымашым налашлан мыланна мом ыштыман?

16. Иегова деч лыпландарымашым налашлан мом ме ыштен кертына? (Тыгак сӱретым ончыза.)

¹⁶ Мом мыланна ыштыман. Иегова дене пырля жапым эртарыза, эре тудлан кумалза да тудын Мутшым лудса (Пс. 76:2, 13—15). Тыгай привычкыда уло гын, очыни, стрессовый ситуацийыште те вигак кавасе Ачана деч полышым йодыда. Иеговалан чыла тургыжланымаш ден лӱдмашда нерген каласкалыза, а вара колыштса, мом тудо тыланда Библий гоч ойла. Тыге те тудын лыпландарымыжым шижыда (Пс. 118:28). Очыни, Библий гыч тендан йӧратыме почеламут-влак але книга-влак лийыт, кудышт тыланда лӱдмыда годым полшен кертыт. Южыштлан Иов, Псалом, Притчи, тыгак Матфейын 6-шо ужаш гыч Иисусын мутшо полшат. Кунам те Иеговалан кумалыда да тудын Мутшым лудыда, те тудлан тендам лыпландараш йӧным пуэда.

17. Мо шотышто ме пеҥгыдын ӱшанен кертына?

¹⁷ Илышыштына эн неле жапыштат Иегова пеленна лиеш. Тудо мемнам нигунамат огеш кодо (Пс. 22:4; 93:14). Иегова мемнам аралаш, мыланна пеҥгыдын шогаш полшаш, вес тӱрлӧ полышым пуаш да лыпландараш сӧра. Исайя 26:3 почеламутышто Иегова нерген ойлалтеш: «Полшыметлан тӱрыснек ӱшаныше еҥ-влакым тый аралаш тӱҥалат. Тый нунылан мучашдыме тынысым пуэт, вет нуно тыланет ӱшанат». Сандене Иегован полшымыжлан ӱшаныза. Кунам тудо полшашлан тыланда кидшым шуя, полшымыжым ида кораҥде. Юмо дене пырля те эн неле жапымат чытен лектын кертыда.