1. Библийым шымлаш тӱҥалын, мом те пален налында?

 ШАРНАЛТЫЗА, кузе те Библийым шымлаш тӱҥалында. Юмын лӱмжӧ уло манын, очыни, те ӧрында. Юмо еҥ-влакым тул тамыкыште огеш индыре манын пален налмеке, чондалан куштылго лийын докан. А эше, очыни, тендам тыгай увер лыпландарен: те колышо лишылда-влак дене угыч вашлийыда да нунын дене пырля рай мландыште илаш тӱҥалыда.

2. Библийым шымлымаш тендам мом ышташ таратен? (Ефесян-влаклан 5:1, 2).

² Юмын Мутшым шукырак шымлен, те Иеговам чотрак йӧраташ тӱҥалында. Тиде йӧратымаш тендам пален налмым илышыш пурташ таратен. Те библийысе принцип-влакым кучылташ тунемында да сай решений-влакым лукташ тӱҥалында. Юмым куандарымыда шуын, сандене те шонымаш ден койышдам вашталтенда. Кузе йоча ача-аваж гай лияш тырша, теат кавасе Ачада деч примерым налаш тӱҥалында. (Ефесян-влаклан 5:1, 2 лудын лекса.)

3. Могай йодыш-влакым те шкаланда пуэн кертыда?

³ Шке деч йодса: «Тынеш пурымо деч вара икмыняр жап эртымеке, мый Иеговам эше чотрак йӧраташ тӱҥалынам мо? Иегова деч примерым налаш тыршем манын, шонымаш ден койышем ончыктат мо? Мутлан, иза-ака-влакым эше чотрак йӧраташ тӱҥалынам мо?» «Икымше йӧратымашда» изишак  йӱкшен гын, вуйдам ида саке. Тыгай дене икымше курымысо христиан-влакат тӱкненыт. Но Иисус нунын деч кораҥын огыл. Тендан дечат тудо огеш кораҥ (Почм. 2:4, 7). Тудо пала: Библийым шымлаш тӱҥалме годсо икымше йӧратымашдам те ылыжтен кертыда.

4. Тиде статьяште ме мом лончылен налына?

⁴ Тиде статьяште эн ончыч ме лончылен налына, кузе Иегова ден лишыл-влак деке йӧратымашнам вияҥден кертына. А вара мутланен налына, йӧратымашна вияҥеш гын, тиде мыланна да весе-влаклан могай пайдам конда.

5, 6. а) Могай нелылык ден апостол Павел тӱкнен? б) Иеговалан умбакыжат служитлаш Павеллан мо полшен?

⁵ Апостол Павел Иеговалан куанен служитлен. Но тудын шуко нелылыкшат лийын. Тудлан чӱчкыдын кужу корным эрташ логалын, а ту жапыште путешествий шуко нелылык дене кылдалтын ыле. Тудо ик гана огыл «эҥерыште лӱдыкшыштӧ» да «агыше-влаклан кӧра лӱдыкшыштӧ» лийын. Тыгак тудым икмыняр гана тушман-влак кыреныт (2 Кор. 11:23—27). А южгунам погынымаште тудын полшымыжым акленат огытыл (2 Кор. 10:10; Флп. 4:15).

⁶ Иеговалан умбакыжат служитлаш Павеллан мо полшен? Тудо Возымаш гыч да шке илышыж гыч Иегован могай улмыжым пален налын. Павел ужын: Юмо тудым йӧрата (Рим. 8:38, 39; Еф. 2:4, 5). Тудо шкежат Иеговам чот йӧратен налын. Иза-ака-влаклан полшымыж дене тудо Юмо дек йӧратымыжым ончыктен (Евр. 6:10).

7. Иеговам эше чотрак йӧраташ мыланна мо полша?

⁷ Иегова дек йӧратымашым вияҥдаш мыланна тудын Мутшым келге шымлымаш полша. Библийым лудын, умылаш тыршыза, мом лудмыда Иегова нерген палдара. Шке деч йодса: «Иегова мыйым йӧрата манын, кузе лудмо гыч коеш? Кузе нине библийысе почеламут-влак мыйым Иеговам йӧраташ таратат?»

8. Кузе кумалмаш Юмым эше чотрак йӧраташ полша?

⁸ Тыгак Иеговалан кумалмына годым шижмашна нерген чӱчкыдын ойлена гын, тудым эше чотрак йӧраташ тӱҥалына (Пс. 24:4, 5). А Иегова шке могыржо гыч кумалмыланна вашмутым пуа (1 Иоан. 3:21, 22). Кхан b, Азий гыч ака, ойла: «Библийым шымлен, мый Иеговам пален налынам да тудым йӧратен шынденам. А кунам ужынам, кузе тудо кумалмемлан вашмутым пуа, мый тудым эше чотрак йӧраташ тӱҥалынам да Иеговалан келшышын илаш кумылем лектын».

9. Тимофей иза-ака-влак деке йӧратымашыжым вияҥден манын, кушеч койын?

⁹ Павел, христиан лияш тӱҥалме деч вара икмыняр ий эртымеке, Тимофей лӱман сай рвезе дене палыме лийын. Тимофей Иеговам да еҥ-влакым йӧратен. Павел филиппысе-влаклан тудын нерген каласен: «Тудын семын уло чон дене тендан верч тыршыше мыйын нигӧ весе уке» (Флп. 2:20). Тиде почеламутышто Павел Тимофейым сылнын ойлымыжлан але сай организатор лиймыжлан огеш мокто. Тимофейын иза-ака-влак деке йӧратымашыже Павелын чонжым тарватен. Мутат уке, иза-ака-влак Тимофейын кажне толмыжым чот вученыт (1 Кор. 4:17).

10. Анна ден марийже иза-ака-влак деке йӧратымашыштым кузе ончыктеныт?

¹⁰ Меат иза-ака-влаклан полшаш йӧным  кычалына (Евр. 13:16). Теве Аннан примерже, кудыжо нерген ончычсо статьяште ойлалтын. Кугу тӱтан мардеж деч вара тудо марийже дене погынымашыж гыч ик еш деке каен. Тиде ешын пӧрт леведышышт сӱмырлен волен, сандене нунын ик ару вургемыштат кодын огыл. Анна каласкала: «Ме нунын вургемыштым налынна, мушкынна, утюжитленна да нунылан намиен пуэнна. Тидым ышташ мыланна йӧсӧ лийын огыл. Но тидлан кӧра ме лишыл йолташ лийынна да але марте йолташ улына». Тыге Анна ден марийже йӧратымашыштым паша дене ончыктеныт (1 Иоан. 3:17, 18).

11. а) Мом еҥ-влак шижыт, кунам ме нунылан йӧратымашнам ончыктена? б) Притчи 19:17 дене келшышын, мом Иегова шижеш, кунам ме йӧратымашнам ончыктена?

¹¹ Кунам ме еҥ-влаклан йӧратымашым ончыктена да нунын дене поро улына, нуно Иегова семын лияш тыршымынам ужыт. Мемнан порылыкна нунын шӱмыштым тарватен кертеш, кеч ме тидым, очыни, паленат она нал. Кхан ака, кудыжо нерген ме уже ойленна, тудлан полшышо-влак нерген шарналтен ойла: «Мый шергакан ака-влаклан таум каласынем. Нуно мыйым пырля служитлаш налыныт, ме пырля кочкынна, а вара нуно мыйым мӧҥгышкем намиен кодат ыле. Ындыжым мый умылем, мыняр вийым нуно тидлан пыштеныт. Чыла тидым нуно йӧратымаш дене ыштеныт». Конешне, чылаштат поро пашаналан таум огыт каласе. Теве мом Кхан тудлан полшышо-влак нерген ойла: «Эх, нунын кызыт кушто илымыштым палем ыле гын, порылыкыштлан таум ыштем ыле! Но Иегова вет пала, кушто нуно илат. Сандене кумалмем годым мый Иеговам мыйын олмеш нунылан порым ышташ йодам». Кхан чын каласен. Иегова чынжымак кеч-могай порылыкнам, эсогыл эн изижымат, ужеш. Иза-ака-влаклан ыштыме  порылыкнам Иегова шке парымжылан шотла, кудыжым тудо мыланна пӧртылтынеже. (Притчи 19:17 лудын лекса.)

12. Кузе иза-влак погынымаш деке йӧратымашым ончыктен кертыт? (Тыгак сӱретым ончыза.)

¹² Иза улат гын, кузе тый иза-ака-влак деке йӧратымашетым ончыктен да нунылан полшен кертат? Икана Джо́рдан лӱман самырык иза кугурак изалан погынымаште шукырак ышташ кумылжо нерген каласен. Джорданын мо сайын лектеш, тидлан кугурак иза тудым мокталтен, а вара тудлан икмыняр каҥашым пуэн. Мутлан, Вашлиймаш залыш ончычрак толаш да весе-влакым саламлаш, вашлиймаште комментарийым пуаш, шке группыж дене чӱчкыдынрак таныклаш да шонкалаш, кузе тудо весе-влаклан полшен кертеш. Джордан нине каҥаш-влак почеш ыштен. Тудо шукылан тунемын, но тӱҥжӧ — тудо иза-ака-влакым эше чотрак йӧратен налын. Джордан теве мом умылен: иза служебный полышкалыше лийме деч ончычак весе-влаклан полшышаш, а назначенийым налмеке, тиде пашам умбакыжат шуйышаш (1 Тим. 3:8—10, 13).

13. Кузе йӧратымаш Кристиан изалан угыч кугурак иза лияш полшен?

¹³ Ончыч тый служебный полышкалыше але кугурак иза семын служитленат гын, Иегова йӧратымашетым да поро пашатым садак шарна (1 Кор. 15:58). Тыгак тудо ужеш, кузе тый умбакыже йӧратымашетым ончыктет. Кри́стиан лӱман иза кугурак иза семын служитлаш чарнымыжлан чот ойганен. Тудо ойла: «Мый Иеговалан умбакыжат служитлаш да мом кертам, чылажымат ышташ шонен пыштенам, кеч почётан пашам ыштем, кеч уке». Жап эртымеке, тудым угыч кугурак изалан шогалтеныт. Кристиан ойла: «Ончыч мый изишак тургыжланенам, но вара шоналтенам: Иегова мыланем угыч кугурак  иза семын служитлаш йӧным пуэн гын, тиде пашам шуктен кертам, вет мый тудым да иза-ака-влакым йӧратем».

14. Грузий гыч акан мутшо тендам мо́лан туныкта?

¹⁴ Иегован служитлышыже-влак тыгак лишыл-влак деке йӧратымашым ончыктат (Матф. 22:37—39). Мутлан, Грузий гыч Елена ойла: «Ончыч таныклаш мыйым Иегова деке йӧратымаш гына таратен. Но кунам мый кавасе Ачам чотрак йӧратен налынам, тунам еҥ-влакымат чотрак йӧраташ тӱҥалынам. Мый шонаш тыршенам, могай проблеме дене нуно тӱкнат да могай теме-влак шӱмыштым тарватен кертыт. Тидын нерген шукырак шонымылан кӧра нунылан полшаш кугу кумылем лектын» (Рим. 10:13—15).

15, 16. Сӱретым ончыза. Весе-влак деке йӧратымашым ончыктышо-влакым могай суап вуча?

¹⁵ Кунам ме иза-ака-влак деке йӧратымашым ончыктена, тиде нунылан гына огыл пайдам конда. COVID-19 пандемий годым Пао́ло ден ватыже шуко илалше акам таныклымаште электронный устройствым кучылташ туныктеныт. Мутлан, ик акалан планшетым кучылташ ончыч йӧсӧ лийын, но нунын полшымышт дене тудо планшетым кучылташ тунемын. Тидлан кӧра тудо Шарнымаш касыш шке родыжо-влакым ӱжын кертын. Нунын гыч 60 еҥ Шарнымаш касыш видеосвязь гоч ушнен. Паоло ден ватыжын тыршымышт саде акаланат, родыжо-влакланат пайдам конден. Вара ту ака Паоло  изалан возен: «Мемнам, илалше-влакым, туныктымыланда кугу тау. Мый нигунамат ом мондо, мыняр шуко порым мыланна Иегова ыштен да теат, шергакан-влак, ыштенда!»

¹⁶ Паоло шкаланже кӱлешан урокым налын. Тудо умылен: эн тӱҥжӧ — шинчымаш ден моштымаш огыл, а йӧратымаш. Тудо ойла: «Ончыч мый районым эскерыше иза семын служитленам. Шонем, иза-ака-влак ойлымаш-влакемым уже монденыт, но мый палем: нунылан ыштыме поро пашамым нуно кызытат шарнат».

17. Йӧратымашым ончыктена гын, кӧлан эше тиде пайдам конда?

¹⁷ Кунам весе-влак деке йӧратымашым ончыктена, ме шкеат пайдам налына. У Зеландий гыч Джо́натан иза тидым шкат ужын. Икана тудо шуматкечын шкетын таныклыше пионер изам ужын. Джонатан вес арня гыч кажне шуматкечын тиде иза дене пырля таныклаш шонен пыштен. Тудо шоненат огыл, могай пайдам поро пашаже шкаланжат конда. Тудо ойла: «Тунам таныклаш мыланем пешыжак келшен огыл. Но кунам мый колынам, кузе тиде пионер туныкта, да ужынам, могай пайдам тудын служымашыже конда, таныклымаш мыланем куаным кондаш тӱҥалын. Тыгак мый сай йолташым муынам. Тудо мыланем духовно кушкаш, служитлымашым йӧратен налаш да Иегова дек лишылрак лияш полшен».

18. Иегова мемнан деч мом вуча?

¹⁸ Иегова тудын деке да весе-влак деке йӧратымашнам вияҥдымым ужнеже. Кузе ме пален налынна, Библийым лудаш, лудмо нерген шонкалаш да чӱчкыдын кумалаш тӱҥалына гын, Иеговам чотрак йӧратен налына. Тыгак иза-акана-влак деке йӧратымашна тунам кушкеш, кунам нунылан полшаш тыршена. Тидлан кӧра ме Иегова деке да духовный ешна деке чотрак лишемына да нунын дене курымеш йолташ лийына!