ШЫМЛЫШАШ СТАТЬЯ 31
«Пеҥгыдын, чоткыдын шогыза»
«Йӧратыме иза-шольым-влак, пеҥгыдын, чоткыдын шогыза» (1 КОР. 15:58).
122 МУРО Пеҥгыдын, чоткыдын шогыза!
МОМ ШЫМЛЕН ЛЕКТЫНА a
1, 2. Мо шотышто христиан пеш кӱкшӧ зданий семын лийын кертеш? (1 Коринфян-влаклан 15:58).
1978 ИЙЫН Токиошто 60 этажан зданийым чоҥен шынденыт. Ту верыште чӱчкыдын мланде чытырналтмаш-влак лиедат. Сандене еҥ-влак шоненыт, кузе вара тыгай кӱкшӧ зданий мланде чытырналтым чыта. Но инженер-влак тыгай конструкцийым шонен луктыныт, кудыжо зданийлан мланде чытырналтме годым пеҥгыдын шогаш, но тугодымак лывырге лияш полша. Христиан-влакат тиде кӱкшӧ зданий семын улыт. Мо шотышто?
2 Христианлан пеҥгыдын шогаш, но ту жапыштак лывырге лияш кӱлеш. Иегован закон ден нормыж-влакым шуктымаште тудлан чоткыдо лийман. (1 Коринфян-влаклан 15:58 лудын лекса.) Тудо эре «мут колыштшо» лияш тырша. Но тыгак кунам йӧн уло але кунам тиде кӱлеш, тудлан шонен моштышо, але лывырге, лийман (Иак. 3:17). Тиде кок койыш коклаште покшелым мушо христиан утыжден пеҥгыде але утыжден лывырге огеш лий. Тиде статьяште ме эн ончыч ончен лектына, кузе пеҥгыде лийын кертына. Вара ме Сатанан вич метод нерген пален налына. Нине метод-влакым кучылтын, Сатана Иегован могырышто пеҥгыдын шогаш кумылнам лушкыдемдаш тырша. Тыгак лончылен налына, кузе ме Сатаналан ваштареш шоген кертына.
КУЗЕ МЕ ПЕҤГЫДЫЛЫКНАМ ОНЧЫКТЕН КЕРТЫНА?
3. Апост. пашашт 15:28, 29 почеламут-влакыште Иегован могай законжо-влакым возымо?
3 Иегова шке калыкшылан эре раш закон-влакым пуэн (Ис. 33:22). Мутлан, икымше курымысо вуйлатыше совет палемден, мо шотышто христиан-влаклан пеҥгыдылыкым ончыкташ кӱлеш: 1) идол-влаклан огыл, а Иеговалан веле кумалмаш, 2) вӱрын святой улмыжо нерген Иегован законжым пагалымаш, 3) библийысе нравственный нормо-влакым шуктымаш. (Апост. пашашт 15:28, 29, УТ лудын лекса.) Кузе христиан-влак тиде шотышто пеҥгыде лийын кертыт?
4. Иеговалан ӱшанле улмынам кузе ончыктен кертына? (Почмаш 4:11).
4 Ме нимогай идол-влаклан она кумал, Иеговалан веле служитлена. Юмын йодмыжо почеш израильтян-влак тудлан гына ӱшанле лийшаш улыт ыле (Втор. 5:6—10). Тыгак Иисус Диаволын алгаштарымыж годым раш каласен: «Господь Юметлан... веле служитле» (Матф. 4:8—10). Сандене ме идол-влаклан она кумал. Тыгак ме еҥ-влакым — мутлан, религиозный вуйлатыше-влакым, политик-влакым, спортсмен-влакым але артист-влакым — кумирлан але юмылан она шотло. Ме чылажымат Ыштыше Иеговалан гына кумалына. (Почмаш 4:11 лудын лекса.)
5. Молан ме илыш ден вӱрын святой улмышт нерген Иегован законжым шуктена?
5 Ме илыш ден вӱрын святой улмышт нерген Иегован законжым шуктена. Молан? Вӱр илышым, Юмо деч шергакан пӧлекым, ончыкта (Лев. 17:14). Кунам Иегова еҥ-влаклан шылым кочкаш лиеш манын каласен, тудо нунылан вӱрым кочкаш чарен (Тӱҥ. 9:4). Израильтян-влаклан Моисейын законым пуымо годым Юмо тиде кӱштымашым ушештарен (Лев. 17:10). Тыгак тудо икымше курымысо вуйлатыше советым чыла христианлан вӱр деч шекланаш кӱштымашым пуаш таратен (Ап. паш. 15:28, 29, УТ). Мыланна эмлымаш шотышто решенийым лукташ кӱлеш гын, тиде кӱштымашым шуктымаште ме пеҥгыде улына b.
6. Иегован нравственный нормыжо-влак почеш илашлан ме мом ыштена?
6 Ме Иегован нравственный нормыж-влакым шуктымаште пеҥгыде улына (Евр. 13:4). Апостол Павел уда кумылнам пытараш, вес семынже, вийым пыштен, тудын деч утлаш мемнам тарата. Мо яжарланымашке конден кертеш, тыгайым она ончо да она ыште (Иов 31:1; Кол. 3:5). Иктаж-мом удам ышташ алгаштарымаш дене тӱкнена гын, ме кеч-могай шонымаш але ыштымаш деч, кудышт мемнам Юмо деч кораҥден кертыт, вигак утлена.
7. Мом ышташ кумылна лийшаш да молан?
7 Иегова мемнан деч тудым «уло шӱм дене» колыштмынам вуча (Рим. 6:17). Могай законжо-влакым шукташ, а могайжым уке, ме ойырен огына керт. Но мыланна эре шарнаш кӱлеш: тудын чыла кӱштымашыже мыланна пайдам гына конда (Ис. 48:17, 18; 1 Кор. 6:9, 10). Иеговам куандарашлан ме уло вийым пыштена да псаломым возышын гаяк кумылым ончыктена: «Законетым эре, мучаш марте, колышташ мый пеҥгыдын шонен пыштенам» (Пс. 118:112). Но Сатана пеҥгыдын шогаш кумылнам лушкыдемдаш чотак тырша. Могай метод-влакым тудо кучылтеш?
КУЗЕ САТАНА ПЕҤГЫДЫН ШОГАШ КУМЫЛНАМ ЛУШКЫДЕМДАШ ТЫРША?
8. Пеҥгыдын шогаш кумылнам лушкыдемдашлан кузе Сатана поктылмашым кучылтеш?
8 Поктылмаш. Пеҥгыдын шогаш кумылнам лушкыдемдашлан Диавол мемнам физический да эмоциональный шотышто темда. Тудо мемнам «нелаш» тырша, вес семынже Иегова деч мемнам кораҥдынеже (1 Пет. 5:8). Икымше курымышто христиан-влакын чын ышташ кугу кумылышт лийын. Сандене нуным лӱдыктеныт, кыреныт да пуштыныт (Ап. паш. 5:27, 28, 40; 7:54—60). Сатана кызытат поктылмашым кучылтеш. Мутлан, Российыште да вес эл-влакыште иза-акана-влакым чот поктылыт. Чынжымак чыла Юмын служитлышыже-влак тӱрлӧ поктылмаш дене тӱкнат.
9. Молан мыланна койдымо темдымашлан ямде лияш кӱлеш? Примерым кондыза.
9 Койдымо темдымаш. Поктылмаш деч посна Сатана мемнам койдымын темда (Еф. 6:11). Теве Ро́бертын примерже, кудыжлан пеш неле операций кӱлын. Больницыште тудо врач-влаклан каласен: «Кеч-могай ситуацийыште вӱрым капыш колтымо дене ом келше». Хирург тудын решенийжым шотыш налын. Но операций вашеш кастене, кунам Робертын родыжо-влак уже каеныт, палатышкыже анестезиолог пурен. Тудо Робертлан каласен: «Врач-влак вӱрым кучылташ огыт шоно, но операций годым кеч-моат лийын кертеш, сандене вӱрым ямдылен пыштена». Очыни, тиде врач шонен, пуйто, шкетын кодмеке, Роберт решенийжым вашталта. Но Роберт пеҥгыдын шоген — кеч-могай неле ситуацийыште вӱрым капыш колтымо дене ок келше.
10. Еҥ-влакын шонымашышт мо дене лӱдыкшӧ? (1 Коринфян-влаклан 3:19, 20).
10 Еҥ-влакын шонымашышт. Тиде тӱнясе еҥ-влак семын ышташ тӱҥалына гын, жап эртымеке, Иеговам да тудын нормыжо-влакым монден кертына. (1 Коринфян-влаклан 3:19, 20 лудын лекса.) «Тиде тӱнян уш-акылже» еҥ-влакым Юмын шонымыжым шотыш налде илаш тарата. Пергамыште да Фиатирыште южо христиан-влак яжарланыше да идол-влаклан кумалше еҥ-влак семын шонаш тӱҥалыныт. Иисус тиде кок погынымашлан тура каҥашым пуэн, вет нуно яжарланымашым удалан шотлен огытыл (Почм. 2:14, 20). Тачат мыланна еҥ-влакын уда шонымышт дене эре тӱкнаш логалеш. Родына да палымына-влак мемнам таратен кертыт Юмын законжо-влакым шотыш налде илаш. Нуно ойлен кертыт, пуйто библийысе нормо-влак уже тоштемыныт да шке кумылет почеш илымаште нимогай уда уке.
11. Пеҥгыдын шогашлан мом ыштышаш огынал?
11 Южгунам ме шонен кертына, пуйто Иегован южо кӱштымашыже-влак раш огытыл, тунам мемнан шке шонымо почеш ыштыме шуын кертеш (1 Кор. 4:6). Тыге Иисусын илыме жапыштыже религиозный вуйлатыше-влак ыштеныт. Нуно Юмын законышкыжо шонен лукмо правилыштым ешареныт да тыге проста калыкын илышыжым нелемденыт (Матф. 23:4). Иегова мыланна шке Мутшо да организацийже гоч раш кӱштымаш-влакым пуа. Тугеже, шке деч иктаж-мом весым ешарыман огыл (Прит. 3:5—7). Сандене ме Библийыште возымо почеш ыштена да йодыш-влак шотышто, кушто еҥ-влакын ойырен налаш эрыкышт уло, правилым она ыште.
12. Кузе Сатана ондалаш тырша?
12 Ондалымаш. Сатана еҥ-влакым ондалаш да тӱрлӧ тӱшкалан шелаш тырша (Кол. 2:8). Икымше курымышто тудо мом кучылтын? Икымше, айдеме туныктымашеш негызлалтше философийым. Кокымшо, иудей туныктымаш-влакым, кудышт Возымаш дене негызлалтме лийын огытыл. Кумшо, шонымашым, пуйто христиан-влак Моисейын законым шуктышаш улыт. Тыгай шонкалымаш-влак шоя лийыныт, вет нуно еҥ-влакым Иегова деч, чын уш-акылым Пуышо деч, кораҥденыт. Таче Сатана СМИ да социальный сеть-влак гоч шоям да политический пропагандым шаркала. COVID-19 пандемий годым ме тидым сайын ужынна c. Шоя информацийым колыштшо-влак шуко тургыжланеныт, а Юмын организацийжын кӱштымашым колыштшо Иегован Таныкше-влак утыждене тургыжланен огытыл (Матф. 24:45).
13. Шуко вниманийым налше паша-влак мо дене лӱдыкшӧ лийын кертыт?
13 Шуко вниманийым налше паша-влак. Мыланна эре шарнаш кӱлеш, илышыштына мо эн тӱҥ (Флп. 1:9, 10). Южо паша-влак шуко жап ден вийнам налын кертыт, кудыжым ме пайдале пашалан пуэн кертына ыле. Тыглай паша-влак, мутлан, кочмо-йӱмӧ, канымаш да пашам ыштымаш, илышыштына икымше верыште лийыт гын, тӱҥ паша деч мемнам кораҥден кертыт (Лук. 21:34, 35). Тыгак ме кажне кечын протест-влак да политический ӱчашымаш-влак нерген моткоч шуко уверым колына. Шарныза, тиде мыланна вапш семын лийын кертеш, вет ме лӱмын але шоныде иктаж-кӧн могырышкыжо шогалын кертына. Сатана чыла нине метод-влакым ик цель дене кучылтеш — чын ышташ кумылнам лушкыдемдаш. Айста ончен лектына, кузе ме Сатаналан ваштареш шоген кертына да кузе тиде шотышто пеҥгыде лийын кертына.
ПЕҤГЫДЫН ШОГАШ МЫЛАННА МО ПОЛШЕН КЕРТЕШ?
Пеҥгыдын шогашлан Юмылан ӱшанле лияш сӧрымаш да тынеш пурымаш нерген шонкалыза, Юмын Мутшым шымлыза да шымлыме нерген шонкалыза, Иеговалан ӱшанле лияш кумылдам вияҥдыза да тудлан ӱшаныза (14—18 абзацым ончыза.)
14. Иегован могырыштыжо пеҥгыдын шогаш мо полшен кертеш?
14 Юмылан ӱшанле лияш сӧрымаш ден тынеш пурымашда нерген шонкалыза. Иегован могырышкыжо шогалаш тендан кумылда лектын. Сандене те нине ошкыл-влакым ыштенда. Шарналтыза, те чыным муында манын умылаш тыланда мо полшен. Те Иегова нерген чын шинчымашым налында да кавасе Ачадам йӧраташ да пагалаш тӱҥалында. Тендан ӱшанымашда кушкын, да те сулыкым ыштымыланда ӧкыненда. Шӱмда тендам удам ыштыме деч кораҥаш да Юмын эрыкше почеш илаш таратен. Юмо тендам проститлен манын умылымеке, чонланда куштылго лийын (Пс. 31:1, 2). Те вашлиймашыш кошташ да пален налме чын шинчымашым весе-влаклан каласкалаш тӱҥалында. Вара те Юмылан ӱшанле лияш сӧрымашым пуэнда да тынеш пуренда. Ындыжым те илышыш наҥгайыше корно дене каеда да тиде корнышто кодашлан уло вийым пыштеда (Матф. 7:13, 14).
15. Шымлымаш да шонкалымаш могай пайдам кондат?
15 Юмын Мутшым шымлыза да шымлыме нерген шонкалыза. Кузе пушеҥге келге вожлан кӧра пеҥгыдын шога, туге меат Иеговалан чот ӱшанена гын, пеҥгыдын шоген кертына. Кушмыж годым пушеҥге утыр-утыр келгын вожлана. Кунам ме шымлена да шонкалена, тунам ӱшанымашна пеҥгыдемеш да ме сайрак ужына: Юмын ончыктымо корныжо — эн сай корно (Кол. 2:6, 7). Шоналтыза, кузе Иегова ожно шке служитлышыже-влакым арален да кузе нунылан Юмын кӱштымаш ден каҥашыж-влак полшеныт. Мутлан, Иезекиильлан кончымаш пуымо лийын. Тиде кончымаште суксо храмым тыршен висен. Пророк тидым тӱткын ончен. Кончымаш тудым пеҥгыдемден. Меат тиде кончымаш гыч шуко пайдам налын кертына. Тудо мемнам ару кумалмаш шотышто Иегован нормыжо почеш илаш туныкта (Иез. 40:1—4; 43:10—12) d. Мыланнат Юмын Мутшым келгын шымлаш да шымлыме нерген шонкалашлан жапым ойыраш кӱлеш.
16. Кузе Робертым ӱшанле шӱмжӧ арален? (Псалом 111:7, 8а).
16 Иеговалан ӱшанле лияш кумылым вияҥдыза. Давид кугыжа Иеговам эре йӧраташ шонен пыштен, тудо мурен: «Мыйын шӱмем тыланет ӱшанле, о Юмем» (Пс. 56:8). Ме Иеговалан тӱрыснек ӱшанаш тӱҥалына гын, мемнанат ӱшанле шӱмна лиеш. (Псалом 111:7, 8а лудын лекса.) Ончалына, кузе ондак палемдыме Робертлан ӱшанле шӱмжӧ полшен. Кузе ме шарнена, анестезиолог тудлан каласен: «Операций годым кеч-моат лийын кертеш, сандене вӱрым ямдылен пыштена». Роберт тудлан вигак каласен: «Вӱрым капыш колташ кеч изи вероятность уло гын, мый тиде больницыште ом код». Жап эртымеке, Роберт шарналтен каласен: «Вес семын ышташ мый шоненат омыл, шӱмемат чытырналтын огыл».
Пеҥгыде духовный негызым пыштенна гын, тунам кеч-могай нелылык годым пеҥгыдын шоген кертына (17 абзацым ончыза.)
17. Робертын историйже мемнам мо́лан туныкта? (Тыгак сӱретым ончыза.)
17 Роберт пеҥгыде лийын, молан манаш гын, больницыш вочмо деч ончыч эше ала-кунамак решенийым луктын. Ончыч тудын Иеговам куандараш кумылжо лектын. Вара тудо келгын шымлен налын, мом Библийыште да Библий негызеш возымо литературышто илыш ден вӱрын святой улмышт нерген ойлалтеш. Тыгак тудо ӱшанымашыжым пеҥгыдемден: Иегова мемнан деч иктаж-мом йодеш гын, тиде мыланна пайдам гына конда. Кеч-могай нелылык дене тӱкнена гынат, мемнанат шӱмна ӱшанле лийын кертеш.
Варак да тудын сарзыже-влак Сисаран войскажым поктат. (18 абзацым ончыза.)
18. Кузе Варакын примерже мемнам Иеговалан ӱшанаш туныкта? (Журнал комышто сӱретым ончыза.)
18 Иеговалан ӱшаныза. Айста ончен лектына, кузе Иегован кӱштымашыж-влаклан ӱшанымаш Варак лӱман судьялан сеҥымашке шуаш полшен. Иегова Вараклан Ханаан войскам вуйлатыше Сисара ваштареш лекташ кӱштен, а вет израильтян-влакын авыртышат, умдыжат лийын огыл. Сисаранже сайын ямдылыме войскаже лийын (Суд. 5:8). Девора лӱман пророк ӱдырамаш Вараклан Сисара да тудын 900 орваже ваштареш лап верыш лекташ каласен. Лап верыште орва-влак деч посна тушманым сеҥаш йӧсӧ лийын. Туге гынат Варак Иеговам колыштын. Кунам тудын сарзыже-влак Фавор курык гыч воленыт, Иегова тушман-влак ӱмбак кугу йӱрым колтен. Сисаран орваже-влак лавыраш пижыныт, да Юмо Вараклан сеҥымашым пуэн (Суд. 4:1—7, 10, 13—16). Ме Иеговалан да организацийже гоч пуымо кӱштымашыж-влаклан ӱшанена гын, тунам Иегова мыланнат сеҥымашым пуа (Втор. 31:6).
ПЕҤГЫДЕ ЛИЙЗА
19. Молан тендан Иегован могырыштыжо пеҥгыдын шогымыда шуэш?
19 Тиде тӱняште илен, мыланна чын корнышто пеҥгыдын шогашлан эре вийым пыштыман (1 Тим. 6:11, 12; 2 Пет. 3:17). Тек поктылмаш, койдымо темдымаш, еҥ-влакын шонкалымашышт, ондалымаш да шуко вниманийым налше паша-влак мемнам ынышт чаре (Еф. 4:14). Айста пеҥгыдын шогена, Иеговалан ӱшанле лийына да тудын кӱштымашыж-влакым эре колыштына. Но тыгак мыланна лывырге лийман. Вес статьяште ме тиде шотышто Иегова ден Иисусын примерыштым ончен лектына.
129 МУРО Мы будем стойкими
a Адам ден Еван илыме жапышт гыч тӱҥалын, Сатана еҥ-влакым ӱшандараш тырша, пуйто нуно шке решатлен кертыт, мом ышташ чын, а мом уке. Тудо мемнамат шонаш тарата, пуйто ме шке решатлен кертына: Иегован законжо-влакым да Юмын организацийжын кӱштымыжым шукташ але уке. Тиде статья мемнам тарата Иегован шонымыжым шотыш налаш да тудын могырыштыжо пеҥгыдын шогаш.
b Вӱр шотышто Юмын шонымыжо нерген шукырак информацийым «Курымеш куанен илыза!» книган 39 урокышто муаш лиеш.
c jw.org сайтыште «Защитите себя от дезинформации!» статьям ончыза.
d Шукырак информацийым «Чистое поклонение Иегове восстановлено!» книган 13 да 14 ужаш-влакыште муаш лиеш.