Шкевуя шымлымашым эртарашлан мемнан чыланнан шуко жапна уке. Тугеже тиде шергакан жапым кузе сайрак кучылташ лиеш? Икымше, ида вашке. Шуко информацийым вашке ончымо олмеш лучо тӱткын шагалрак материалым шымлен лекташ. Тиде шукырак пайдам конда.

Кокымшо, тӱҥжым ойырен налза (Еф. 5:15, 16). Теве икмыняр каҥаш:

• Кажне кечын Библийым лудса (Пс. 1:2). Тӱҥалтышлан те «Илыш ден служымаш» паша тетрадь гыч кажне арнялан Библийым лудмаш графикым кучылтын кертыда.

• Комментарийым пуашлан «Орол башньым» шымлымаш ден арня покшелне вашлиймашлан ямдылалтса (Пс. 21:23).

• Жапда уло гын, jw.org сайтыште лекше шаркалашлан журнал-влакым, видеоролик-влакым да статья-влакым ончыза.

• Шымлашлан темым ойырен налза да шымлымашым эртарыза. Мутлан, те пален налнеда, кузе нелылыкым сеҥаш, очыни, тендан иктаж-могай йодышда уло але Библий гыч иктаж-мом сайрак умылен налмыда шуэш. Шуко сай шонымашым те jw.org сайтыште «Библий негызеш заданий-влак» кыдежыште муын кертыда.