ШУКО еҥ тиде йодышлан вашмутым налнеже. Библий дене келшышын, Иегова тачат кумалтыш мутым колыштеш. Но Юмо кумалтыш мутым колеш але уке, шукыж годым тиде мемнан деч шога.

Иисусын жапыште религиозный вуйлатыше-влак, калык ончылно кумалын, Юмым пагалышыла кояш тӧченыт. Иисус нуным тидлан вурсен. Нине туныктышо-влаклан Юмын вниманийжым налаш кӱлын, но тидым ыштымышт шуын огыл. Нуно, мӧҥгешла, еҥ-влакын вниманийыштым кычалыныт, сандене, нуно тидымак налыт манын, Иисус каласен (Матфейын 6:5). Саде религиозный вуйлатыше-влак семынак таче шукышт кумалыт тыге, кузе Юмылан огыл, а нунылан келша. Нуно библийысе принцип-влакым шотыш огыт нал, садлан Юмо кумалмыштым огеш кол.

А тендан нерген мом каласаш лиеш? Юмо кумалмыдам колеш мо да вашмутым пуа мо? Юмо могай калык гыч улмыдам да социальный положенийдам огеш ончо. Библийыште возымо дене келшышын, Юмо чыла еҥым ик семын онча. Тушто ойлалтеш: «Тудлан лӱдын кумалше да чын почеш ыштыше еҥ, кеч-могай калык гыч лийже, Юмылан келша» (Апост. пашашт 10:34, 35). А те тыгаяк айдеме улыда мо? Юмым пагаледа да тудым шӱлыкаҥмыда ок шу гын, чынжымак Юмо деч лӱдыда. Те чыла годымат шкендан але иктаж-кӧн огыл, а Юмын ончалтышыжым шотыш налыда гын, чынжымак чын почеш ыштеда. Юмо кумалтыш мутдам колыштшо манын, кумылда уло мо? Библий тыланда тиде шотышто полшен кертеш.

Конешне, шукыштын кумылышт почеш Юмо кумалтыш мутыштлан чудо гоч вашмутым пуышаш. Но Юмо Библий возымо жапыштат чудо-влакым шагал годым ыштен. Южгунам ик чудым ыштыме деч вес чудым ыштыме марте икмыняр шӱдӧ ий эртен. Тыгак Библий палдара: апостол-влакын колымышт деч вара Юмо чудо-влакым ыштымым чарнен (1 Коринфян-влаклан 13:8—10). Кызыт Юмо кумалтыш мутлан вашмутым огеш пу манын, тиде ончыкта мо? Уке! Айста ончен лектына, могай кумалтыш мутлан Юмо вашмутым пуа.

Юмо уш-акылым пуа. Иегова гына чын уш-акылым пуэн кертеш. Тудо уш-акыланым ышта тугай еҥ-влакым, кӧ тудын виктарымашыжым кычалеш да тиде виктарымаш почеш илынеже (Иаковын 1:5).

Юмо шке святой шӱлышыжым да тудын дене кылдалтше суапландарымашым пуа. Святой шӱлыш — тиде Юмын куатле вийже. Святой шӱлыш деч виянрак нимо уке. Тудлан кӧра ме кеч-могай тергымашым чытен кертына. Кунам ме тургыжланена, тудо мыланна чон тынысым пуэн кертеш. Тыгак тудо мыланна чапле койыш-влакым кушташ полшен кертеш (Галат-влаклан 5:22, 23). Еҥ-влак святой шӱлышым йодыт гын, Юмо тудым чаманыде пуа. Тиде шотышто Иисус Христосат шке тунемшыж-влакым ӱшандарен (Лукан 11:13).

Юмо тудым кычалше-влаклан шинчымашым пуа. Уло тӱняште яндар чонан еҥ-влак улыт, кудышт Юмо нерген чыным кычалыт (Апост. пашашт 17:26, 27). Мутлан, нуно пален налнешт, могай Юмын лӱмжӧ, мом тудо мланде да айдеме тукым шотышто шонен пыштен да кузе нуно тудын дек лишемын кертыт (Иаковын 4:8). Иегован Таныкше-влак тыгай еҥ-влакым чӱчкыдын вашлийыт да уло кумылын нине йодышыштлан вашмутым Библий гыч ончыктат.

Можыч, садлан те тиде публикацийым лудыда. Те Юмым кычалыда мо? Очыни, тиде публикаций гоч Юмо кумалмыланда вашмутым пуа.