1—3. Еҥ-влак колымаш нерген могай йодышым пуэдат да религий-влак могай вашмутым пуат?

БИБЛИЙЫШТЕ тыгай сӧрымашым возымо: жап толын шуэш, кунам «колымаш ок лий» (Почмаш 21:4). Тӱлен налмашлан кӧра мемнан курымеш илаш йӧнна уло манын, тиде книган 5-ше ужашыж гыч ме пален налынна. Но кызыт чыла еҥ кола (Экклезиаст 9:5). Сандене тыгай йодыш лектеш: колымаш деч вара айдеме дене мо лиеш?

² Тыгай йодыш чотак тургыжландара нуным, кӧмыт лишыл еҥым йомдареныт. Нуно шонен кертыт: «Ындыжым тудо кушто улеш? Тудо орлана мо? Тудо мыйым ужеш мо? Тудо мыланем полшен кертеш мо? Мый тудым угыч ужам мо?»

³ Тӱрлӧ религий тиде йодыш-влаклан тӱрлӧ вашмутым пуа. Сай айдеме колымаш деч вара кавашке кая, а удаже тамыкыш логалеш манын, иктышт туныктат. Весышт ойлат, пуйто колымаш деч вара айдеме шӱлышыш савырна да колышо-влак дене пырля вес тӱняште умбакыжат илымым шуя. А кумшышт тыге шонат: колымеке, айдемым судитлат, а варажым тудо вес еҥ але янлык семын угыч шочеш.

4. Религий-влакын колымаш нерген туныктымашышт мо шотышто икгай улыт?

⁴ Религий-влакын колымаш нерген туныктымашышт  икте-весе деч ойыртемалтыт. Но чыла нунын туныктымашышт ик шонымаш дене негызлалтыт. Нуно шонат, пуйто колымеке, айдемын чонжо умбакыжат илымым шуя. Но чынже денак туге мо?

5, 6. Колымеке, айдеме дене мо лиеш?

⁵ Колымаш деч вара айдеме дене мо лиймым Иегова пала. Тудо каласен: колымеке, айдеме илымыжым чарна. Колымаш деч вара айдемын шижмашыже, шонымашыже да шарнымашыже ала-кушто вес вере умбакыжат огыт иле *. Тыгеже, колымаш деч вара айдеме ужын, колын але шонен огеш керт.

⁶ Соломон кугыжа возен: «Колышо-влак нимомат огыт пале». Колышо еҥ весе-влакым ни йӧратен, ни ужмышудымо лийын огеш керт. Колымаш деч вара шӱгарыште «ни пашаже, ни шонымашыже, ни шинчымашыже, ни уш-акылже уке». (Экклезиаст 9:5, 6, 10 лудын лекса.) * Псалом 145:4 дене келшышын, айдемын колымыж деч вара тудын «чыла шонымашыже пыта».

7. Иисус Христос колымаш нерген мом ойлен?

⁷ Иисус шке тунемшыж-влаклан Лазарь йолташын колымыжо нерген тыге каласен: «Мемнан Лазарь йолташна мален колтен». Но Лазарь кана манын, Иисус ынеж каласе ыле. Вет вара тудо раш каласен: «Лазарь колен» (Иоаннын 11:11—14). Тыгела Иисус колымашым омо дене таҥастарен. Тудо ойлен огыл, пуйто Лазарь кавашке каен але вес тӱняште колышо-влак дене пырля улеш. Тыгак, Лазарь тамыкыште орлана але вес капым налын угыч шочын манын,  Иисус ойлен огыл. Иисус Лазарьым пич омо дене малыше еҥ дене таҥастарен. Тыгай таҥастарымаш вес библийысе почеламутыштат вашлиялтеш. Мутлан, Иисус Иаирын ӱдыржым ылыжтымыж годым колымашым тыгак омо дене таҥастарен. Тудо каласен: «Тудо колен огыл, мала веле» (Лукан 8:52, 53).

8. Юмын шонен пыштымашыже почеш еҥ-влак колышаш огытыл ыле манын, кушеч ме палена?

⁸ Юмын шонен пыштымашыже почеш Адам ден Ева колышаш улыт ыле мо? Уке! Иегова нуным чер деч посна курымеш илашлан ыштен. Тудо кажне еҥым курымеш илаш кумыланым ыштен (Экклезиаст 3:11). Шоналтыза, ача-ава-влакын, нунын йочашт шоҥгемышт да колышт манын, кумылышт уло мо? Уке. Тыгак Юмынат мемнан шотышто тыгай кумылжо уке. Тудо мемнам курымеш илашлан ыштен гын, тунам молан ме колена?

9. Иегова Адам ден Евалан саскам кочкаш огыл кӱштымашым молан пуэн да тудым шукташ йӧсӧ лийын мо?

⁹ Иегова Адам ден Евам Эдем садыш илаш пуртен да Адамлан кӱштен каласен: «Тый садысе чыла пушеҥге гыч саскам кочкын кертат. Но поро ден осалым палдарыше пушеҥге гыч ит коч. Тиде пушеҥге гыч кочкат гын, тудо кечынак колет» (Тӱҥалтыш 2:9, 16, 17). Тиде кӱштымашым пуэн, Иегова теве мом ончыктен: чынжымак мо поро, а мо осал улеш палдарашлан тудын гына праваже уло. Тудын мутшым колышташ йӧсӧ лийын огыл. Адам ден Ева Иеговам колыштыт ыле гын, тыгела тудын вуйлатымашыжым пагалат да чыла ыштымыжым аклат манын, ончыктат ыле.

10, 11. а) Сатана Адам ден Евалан могай шоям ойлен? б) Адам ден Евам титакдымылан шотлаш молан нимогай амал лийын огыл?

 ¹⁰ Чаманаш логалеш, но Адам ден Ева Иеговам колыштын огытыл. Сатана Ева деч йодын: «Рай садыште улшо ик пушеҥге гычат ида коч манын, Юмо чынак каласен мо?» Ева вашештен: «Пушеҥгыла гыч мыланна саскам кочкаш лиеш. Тыланда колаш огыл манын, лач сад покшелне шогышо пушеҥге гыч гына саскам ида коч, тудын деке ида тӱкнӧ манын Юмо каласен» (Тӱҥалтыш 3:1—3).

¹¹ Сатана умбакыже каласен: «Уке, те огыда коло. Но Юмо пала: кунам те тиде пушеҥге гыч саскам кочкыда, тудо кечын тендан шинчада почылтеш, да те поро ден осалым ойырен мошташ тӱҥалыда, юмо гаяк лийыда» (Тӱҥалтыш 3:4—6). Мо поро, а мо осал улеш Ева шке ойырен налын кертеш манын, Сатана тудым ӱшандараш тыршен. Тугодым Сатана ӱдырамашым ондален да, Юмым огеш колышт гынат, огеш коло манын каласен. Ева саскам кӱрлын налын да кочкын, а вара марийжыланат пуэн, да тудат кочкын. Адам ден Ева тиде пушеҥгын саскажым кочкаш ок лий манын паленыт. Туге гынат кочкыныт. Тыге ыштен, Адам ден Ева йӧратыше Ачаштым огыт пагале манын ончыктеныт. Юмын кӱштымашыже раш да шукташ йӧсӧ огыл лийын гынат, нуно лӱмын колыштын огытыл. Нуным титакдымылан шотлаш нимогай амал лийын огыл!

12. Адам ден Еван колыштдымым ужын, Иегова мом шижын?

¹² Кугезе коча-кована Юмым пагален огытыл. Юмым тиде чот шӱлыкаҥден! Йочада тендам колыштмым чарнат гын да лӱмын ваштарешда шогалыт  гын, могай тендан шижмашда лектеш? Мутат уке, шӱм-чонланда неле лиеш.

13. Иегова Адамлан «пуракышкак савырнет» манмыж дене мом каласынеже ыле?

¹³ Колыштдымылан кӧра Адам ден Ева курымеш илаш йӧным йомдареныт. Иегова Адамлан каласен: «Вет тый мланде пурак улат да пуракышкак савырнет». (Тӱҥалтыш 3:19 лудын лекса.) Тиде мут теве мом ончыктен: Адам угыч пуракыш савырна, пуйто тудо нигунам лийынат огыл (Тӱҥалтыш 2:7). Тыгеракын, языкым ыштымыж дене Адам колен да илымым чарнен.

14. Еҥ-влак молан колат?

¹⁴ Адам ден Ева Юмым колыштыт ыле гын, кызыт мартеат илат ыле. Но нуно Юмым колыштын огытыл. Нуно языкым ыштеныт да вара коленыт. Языкым тыгай чер дене таҥастараш лиеш, кудыжо тукым гыч тукымыш кусна. Тиде чер семын Адам ден Еван языкышт мемнан декат куснен. Сандене чыла еҥ языкан шочеш да тидлан кӧра кола (Римлян-влаклан 5:12). Но Юмын шонен пыштымашыже тыгай лийын огыл. Юмо еҥ-влаклан колымашым нигунамат шонен огыл. Сандене колымашым Библийыште «тушман» манме (1 Коринфян-влаклан 15:26).

15. Колымаш нерген чыным палаш молан кӱлеш?

¹⁵ Колымаш нерген чыным палена гын, тӱрлӧ шоя туныктымаш деч утлен кертына. Колышо-влакын ниможат огеш коршто да нуно нимомат огыт шиж манын, Библий туныкта. Ме нунын дене мутланен она керт, нунат мемнан дене мутланен огыт керт. Ме нунылан полшен она керт, нунат мыланна полшен огыт керт. Нуно мыланна зиянымат ыштен огыт керт, сандене нунын деч лӱдаш огеш кӱл. Туге гынат, шуко религий весылан туныкта. Нуно ойлат, пуйто колымеке, айдемын илышыже ок пыте. Тыгак, мутлан, священниклан оксам тӱлен, колышылан полшаш лиеш манын, нуно ойлат. Но колымаш нерген чыным палена гын, ондалалтме она лий.

16. Тӱрлӧ религийыште колышо-влак нерген могай шоям ойлат?

¹⁶ Колышо-влак умбакыжат илат манын, Сатана мемнам ӱшандараш тырша. Тидлан тудо шоя религийым кучылтеш. Мутлан, южо религийыште тыге ойлат: «Колымаш деч вара айдемын чонжо умбакыжат ила». А тендан религийыштыда колышо-влак нерген тидымак але Библийыште возымо семын ойлат? Шарныза: Сатана, еҥ-влакым Иегова деч кораҥдаш манын, шоям кучылтеш.

17. Тул тамыкыште еҥ-влакын орланымышт нерген туныктымаш Иеговам молан шӱктара?

¹⁷ Колышо-влак нерген шуко религийын туныктымашышт чот лӱдыктат. Мутлан, нуно туныктат, пуйто уда еҥ-влак колымаш деч вара тул тамыкыште курымеш орланат. Тиде шоя туныктымаш Иеговам шӱктара. Тудо еҥ-влакым нигунамат тыге огеш орландаре! (1 Иоаннын 4:8 лудын лекса.) Иктаж-могай  айдеме шке йочажым наказатлаш манын, тудын кидшым тулыш чыкен куча гын, тудын нерген те мом шонеда? Те тудым торжа да осал еҥлан шотледа. Тыгай айдеме дене кылым кучаш кумылда огеш лий. Сатана Юмо нерген лач тыгай шонымынам вуча. Юмо торжа улеш манын шонен, тудын йолташыже лияш кумылна нигунамат огеш лий.

18. Колышо-влак деч молан лӱдаш огеш кӱл?

¹⁸ Вес религий-влак туныктат, пуйто колымаш деч вара еҥ шӱлышыш савырна да вес тӱняште ила. Сандене колышо-влакым, пуйто пагалаш да шыдештараш огыл тыршаш кӱлеш, вет нуно арален але эҥгекым ыштен кертыт манын, нуно туныктат. Чаманаш логалеш, но тиде шоялан шуко еҥ ӱшана. Нуно колышо-влаклан чот йӧраш тыршат да эсогыл Юмылан кумалме семын кумалыт. Но кызыт ме палена: колышо-влак нимом огыт шиж. Садлан нуным сырыкташ лиеш манын лӱдаш огеш кӱл. Ме Иеговалан веле кумалшаш да йӧрышӧ лийшаш улына, вет тудо гына чын Юмо да чылажымат Ыштыше (Почмаш 4:11).

19. Колымаш нерген чыным палымаш могай пайдам конда?

¹⁹ Колымаш нерген чыным палена гын, шоя религийын шоя туныктымашыжлан огына ӱшане. Тыгак, ончыкылыкна шотышто Иегован сӧрымашыжым утларак аклаш тӱҥалына.

20. Вес ужашыште мо нерген пален налына?

²⁰ Шуко ий ончыч Иов лӱман Юмын служитлышыже йодын: «Айдеме кола гын, угыч илен кертеш мо?» (Иов 14:14). Чынжымак колышо-влак угыч илен кертыт мо? Тидын нерген Библийыште мом возымо тендам чот ӧрыктарен кертеш. Вес ужашыште тиде йодышлан вашмутым пален налын кертыда.