1, 2. а) Могай пӧлекым те эн сайлан шотледа? б) Молан тӱлен налмаш Юмо деч эн кугу пӧлек улеш?

ТЫЛАНДА пӧлеклыме пӧлек-влак гыч кудыжым эн сайлан шотледа? Векат, тыгай пӧлекым, кудыжо шерге ок шого гынат, но илышыштыда пеш кӱлешан улеш. Тыгай пӧлек чот куандара.

² Юмо мыланна шуко пӧлекым пӧлеклен. Но иктыже эн ойыртемалтше лийын, вет тудо чыла айдеме тукымлан чот кӱлеш. Тиде Юмын еҥ-влаклан пуымо эн кугу пӧлекше. Тиде ужашыште пален налына: кузе Иегова шке Эргыжым, Иисус Христосым, мландыш колтен. Тыгак, еҥ-влак курымеш илышт манын, Иисус шке илышыжым тӱлен налмаш семын кузе пуэн ончен лектына. (Матфейын 20:28 лудын лекса.) Чыла тидым Иегова мемнан верч ыштен. Туге тудо мемнам йӧратымынам ончыктен.

3. Еҥ-влак молан колат?

³ Тӱлен налмаш — тиде ак, кудыжым Иегова еҥ-влакым язык ден колымаш деч утарашлан тӱлен (Ефесян-влаклан 1:7). Молан мемнам тӱлен налаш кӱлын? Тидым умылашлан икмыняр тӱжем ий ончыч Эдем садыште мо лиймым айста ончен  лектына. Мемнан кугезына-влак, Адам ден Ева, языкым ыштеныт. Садлан кӧра нуно коленыт. Ындыжым чыла еҥ кола, молан манаш гын язык нунын деке куснен. (9-ше ешартыш статьям ончыза.)

4. Библий гыч Адам нерген мом палена?

⁴ Иегова икымше айдемым, Адамым, языкдымым ыштен, сандене тудын уш ден капше ситыдымаш деч посна лийыныт. Тидлан кӧра тудо нигунамат черланышаш, шоҥгемшаш да колышаш огыл ыле. Иегова Адамлан ача семын лийын, вет тудо Адамым ыштен (Лукан 3:38). Нуно икте-весе дене чӱчкыдын мутланеныт. Мом Юмо тудын деч вучен, Адам раш умылен. Иегова тудлан оҥай заданийым ышташ кӱштен (Тӱҥалтыш 1:28—30; 2:16, 17).

5. Мо шотышто Юмо Адамым «Шкеж гайым» ыштен?

⁵ Юмо Адамым «Шкеж гайым» ыштен (Тӱҥалтыш 1:27). Иегова тудлан шкенжын гаяк койышым пуэн, мутлан: йӧратымашым, уш-акылым, чыным йӧратымым да вийым. Тыгак Иегова Адамлан ойырен налаш эрыкым пуэн. Адам робот семын лийын огыл. Кузе илаш да Юмылан йӧрышӧ лияш але уке, тудо шке ойырен налын кертын. Адам Юмым колыштеш ыле гын, райыште курымеш илен кертеш ыле.

6. Юмым колышташ чарнымеке, Адам мом йомдарен? Айдеме тукымлан тиде могай эҥгекым конден?

⁶ Но Адам Юмым колыштын огыл, сандене кугу акым тӱлен: тудо Иегова ден лишыл кыл кучымашыжым да языкдыме райысе илышыжым йомдарен. Тыге тудым колымаш гына вучен (Тӱҥалтыш  3:17—19). Юмым колыштдымыштлан кӧра, Адам ден Ева курымеш илаш йӧным йомдареныт. Адамлан верч «язык... тӱняшке толын‚ а язык гоч — колымаш‚ да чыла айдемым колымаш авалтен‚ вет чыланат языкым ыштеныт» (Римлян-влаклан 5:12). Языкым ыштен, Адам, вес мут дене, шкенжымат, мемнамат колымашлан да языклан кулыш ужален (Римлян-влаклан 7:14). Тиде куллык гыч утаралтын кертына мо? Кертына.

7, 8. Мо тыгай тӱлен налмаш?

⁷ Мо тыгай тӱлен налмаш? Тӱлен налмаш — тиде иктаж-кӧм куллык гыч утарашлан тӱлымаш але иктаж-могай ӱзгарым пӧртылташлан ситыше акым пуымаш. Тӱлен налмын акше йомдарымын акше дене икгай лийшаш.

⁸ Адамын йомдарымыжым еҥ-влак гыч иктыжат пӧртылтен але тӱлен налын огеш керт. Но Иегова мемнам колымаш ден языкын куллыкшо гыч утараш йӧным муын. Иегова мемнам кузе тӱлен налын да тиде тӱлен налмаш мемнан илышнам кузе вашталтен кертеш? Айста тидын нерген пален налына.

9. Тӱлен налмаш семын мо лийын кертын?

⁹ Адамын йомдарыме языкдыме илышыжым мемнан кокла гыч нигӧат тӱлен налын але мӧҥгеш пӧртылтен огеш керт. Молан? Вет ме чыланат языкан улына (Псалом 48:8, 9). Адам языкдыме илышыжым йомдарен, сандене тыгаяк гына илыш тӱлен налмаш семын лийын кертын. Теве молан  Иисус «Шкенжым пуэн», вет тудын илышыже Адамын гаяк языкдыме лийын (1 Тимофейлан 2:6).

10. Мемнам тӱлен налашлан Иегова мом ыштен?

¹⁰ Мемнам тӱлен налашлан Иегова мом ыштен? Иегова Иисусым, эн икымше ыштыме Эргыжым, мландыш колтен (1 Иоаннын 4:9, 10). Иисус Ачажым да кавасе пӧртшым коден каяш ямде лийын (Филиппысе-влаклан 2:7). Иегова Иисусын илышыжым кава гыч мландыш кусарен, да тудо языкдыме айдеме семын шочын (Лукан 1:35).

11. Чыла еҥым иктаж-кӧ тӱлен налын кертын мо?

¹¹ Адам Юмым колыштын огыл, сандене чыла еҥ курымеш илышт манын, йӧным йомдарен. Адамын тукымжым колымаш деч иктаж-кӧ утарен кертын мо? Кертын. (Римлян-влаклан 5:19 лудын лекса.) Тидым Иисус Христос ыштен — мемнам тӱлен налашлан шке языкдыме илышыжым пуэн (1 Коринфян-влаклан 15:45). Тидлан кӧра Адамын чыла тукымжо колымаш деч утарыме лийын кертеш (1 Коринфян-влаклан 15:21, 22).

12. Иисус Христослан тынар орлыкым чыташ молан кӱлын?

¹² Иисуслан колымыж деч ончыч мом чыташ логалын Библийыште ойлалтеш: тудым сола дене чот кыреныт да орландарен колаш меҥгеш пудален сакеныт (Иоаннын 19:1, 30; Апост. пашашт 10:39). Иисуслан тынар орлыкым чыташ молан кӱлын? Молан манаш гын Сатана каласен, пуйто ик еҥат тергымаште Юмылан ӱшанле огеш код. Но Иисус шке илышыж ден ончыктен: языкдыме айдеме пеш неле тергымаш ден тӱкна гынат, Юмылан ӱшанле кодын кертеш. Шоналтыза гына, Иисусын  ӱшанле кодмыжлан Иегова мыняр чот куанен! (Притчи 27:11; 15-ше ешартыш статьям ончыза).

13. Чыла еҥ кузе тӱлен налме лийын?

¹³ Чыла еҥ кузе тӱлен налме лийын? Мемнан эран 33-шо ийыште нисан тылзын * 14-ше кечынже Иисусым пуштыныт (Еврей-влаклан 10:10). Пудален сакыме деч кумшо кечын Иегова Иисусым ылыжтен да тудлан айдеме огыл, а шӱлыш капым пуэн. Но Иисус мландыште языкдыме еҥ семын илаш праважым йомдарен огыл. Вара кавашке Юмо дек пӧртылмеке, Иисус Юмылан тиде правам тӱлен налмаш семын пуэн (Еврей-влаклан 9:24). Юмо тиде правам Адамын тукымжылан пуэн. Тыге, язык ден колымаш деч утаралташ мемнан йӧнна лектын. (Римлян-влаклан 3:23, 24 лудын лекса.)

14, 15. Языкна кудалтыме лийже манын, мом ыштыман?

¹⁴ Тӱлен налмаш Юмо деч эн шергакан пӧлек улеш манын пален налынна. Айста ончен налына кузе тиде пӧлек кызыт гына огыл, ончыкыжымат илышнам вашталтен кертеш.

¹⁵ Языкнам кудалтымаш. Келшеда, очыни, чыла шотыштат чын ышташ неле. Ме эре йоҥылышым ыштен шогена: иктаж-могай удам ойлен але ыштен кертына (Колоссян-влаклан 1:13, 14). Языкна кудалтыме лийже манын, мом ыштыман? Чын огыл ыштымылан ӧкынышаш да Иегова деч языкнам кудалтымым ӱҥышын йодшаш улына. Тыге  ыштена гын, языкна кудалтыме лиеш. Тидлан пеҥгыдын ӱшанен кертына (1 Иоаннын 1:8, 9).

16. Совестьна ару лийже манын, мом ыштыман?

¹⁶ Ару совесть. Йоҥылышым ыштымына годым совестьна мемнам титаклаш тӱҥалеш. Ме шкенам титаканлан да эсогыл тӧрлаташ лийдыме айдемылан шотлен кертына. Но кидым волташ огеш кӱл. Языкнам кудалташ Иеговам сӧрвален йодына гын, теве мо шотышто пеҥгыдын ӱшанен кертына: тудо мемнам колеш да языкнам кудалта (Еврей-влаклан 9:13, 14). Йӧсылыкна, вийдымылыкна да йоҥылыш ыштымына нерген почын ойлымынам Иегова вуча (Еврей-влаклан 4:14—16). Тыге ыштен, Юмо дене лишыл кыл кучымынам она йомдаре.

17. Христосын надыржылан кӧра могай суапландарымашым налаш лиеш?

¹⁷ Курымашлык илышлан ӱшан. «Языкын акше — колымаш‚ а Юмын поро пӧлекше — Господьна Иисус Христос пелен налме курымашлык илыш» (Римлян-влаклан 6:23). Христосын надырже эре таза лияш да курымеш илаш йӧным пуа (Почмаш 21:3, 4). Нине суапландарымашым налашлан мом ышташ кӱлеш?

18. Иегова мемнам йӧрата манын, кушеч палена?

¹⁸ Иктаж-кӧ тыланда мотор пӧлекым пуа гын, тендан могай шижмашда лектеш? Тӱлен налмаш мыланна пуымо Юмын эн кугу пӧлекше. Тидлан ме Иеговалан таум ыштышаш улына. Иоаннын 3:16 почеламутышто возымо: «Юмо тӱням туге йӧратен,  Ик Шкет Эргыжымат пуэн». Иегова мемнам чот йӧрата, сандене шке йӧратыме Эргыжым, Иисус Христосым пуэн. Иисусат мемнам йӧрата, вет тудо мемнан верч колаш ямде лийын (Иоаннын 15:13). Мутат уке, язык ден колымаш деч тӱлен налын, Иегова ден Иисус мемнам йӧратымыштым ончыктеныт (Галат-влаклан 2:20).

19, 20. а) Иегован йолташыже кузе лияш? б) Христосын надыржылан ӱшанымашнам кузе ончыктен кертына?

¹⁹ Иегован йӧратымашыже мемнам тудын йолташыже лияш кумылаҥда. Но иктаж-кӧм сайын палыде, тудын дене йолташ лияш ок лий. Теве молан Иоаннын 17:3 почеламутышто Иегова нерген шинчымашым налаш кӱлмӧ нерген возымо. Кузе тидым ышташ? Умбакыжат Библийым шымлыза. Тунам Иеговам йӧратымашда шукемеш да тудым куандараш кумылда лектеш. Жап эртымеке, тудын йолташыже лийыда (1 Иоаннын 5:3).

²⁰ Иисус Христосын надыржылан ӱшаныза. Библийыште ойлалтеш: «Кӧ Эргылан ӱшана, тудын курымашлык илышыже уло» (Иоаннын 3:36). Иисус Христослан ӱшанымашнам кузе ончыктен кертына? Тудын туныктымыжо почеш илымына дене (Иоаннын 13:15). Иисуслан ӱшанена манын ойлаш гына ок сите. Ӱшанымашнам паша дене ончыктыман. Иаковын 2:26 почеламутышто каласыме: «Паша деч посна ӱшанымашат колышо».

21, 22. а) Христосын колымыжым шарнымаш касым кажне ийын палемдаш молан кӱлеш? б) 6-шо да 7-ше ужашлаште мом лончылымо лиеш?

²¹ Христосын колымыжым шарнымаш касым  палемдаш толза. Иисус шке колымо кечыжым шарнаш кӱштен. Кажне ийын тиде кечын ме Шарнымаш касым але, вес мут дене, «Господьын кас кочкышыжым» палемдена (1 Коринфян-влаклан 11:20; Матфейын 26:26—28). Иисус шке языкдыме илышыжым мемнан верч пуэн. Еҥ-влак тидым шарнышт манын, тудын кумылжо лийын. Тудо каласен: «Мыйым шарнен, тыге ыштыза». (Лукан 22:19 лудын лекса.) Шарнымаш касыш миен, тӱлен налмашым аклымынам ончыктена да Иегова ден Иисус Христосын мемнам йӧратымыштлан таум ыштена. (16-шо ешартыш статьям ончыза.)

²² Мутат уке, тӱлен налмаш — еҥ-влаклан ыштыме эн кугу пӧлек (2 Коринфян-влаклан 9:14, 15). Тудо колышо-влакланат пайдам конда. Кузе тиде лийын кертеш 6-шо да 7-ше ужашлаште пален налына.