1, 2. Юмылан кумалаш йӧным молан пӧлек семын ончыман? Кумалме мут нерген Библийыште мом возымым молан пален налаш кӱлеш?

САНДАЛЫК дене таҥастарымаште мемнан планетна пеш изи. А тудын ӱмбалне илыше еҥже-влак эше изирак улыт. Библийыште возымо дене келшышын, Иеговалан чыла мландысе калык ик изи вӱд чӱчалтыш гай (Псалом 113:23; Исаия 40:15). Туге гынат, Псаломышто 144:18, 19 каласыме: «Тудым сӧрвален ӱжшӧ-шамычлан чылаштлан, чын дене сӧрвален ӱжшӧ-шамычлан чылаштлан Юмо лишыл. Тудын деч лӱдшӧ-шамычын эрыкыштым шукта, кумалмыштымат колеш да нуным утара». Юмо мыланна тудлан кумалаш йӧным пуэн — могай тиде кугу пиал! Шоналтыза гына, Иегова, Сандалыкым ыштыше Юмо, мемнан дене лишыл лийнеже. Тудо мемнан кумалме мутнам колышташ ямде. Юмылан кумалаш йӧн — тиде кугу чап. Юмо тиде йӧным кажне айдемылан пӧлек семын пуэн.

² Но Иегова мемнан кумалме мутнам тунам веле колыштеш, кунам ме тудлан келшышын кумалына. А кузе тудлан келшышын кумалаш? Айста Библийыште возымым пален налына.

3. Молан Иеговалан кумалаш кӱлеш?

³ Иегова мемнан деч тудын дене мутланымынам  вуча. Кушеч ме тидым палена? Филиппысе-влаклан 4:6, 7 лудын лекса. Шоналтыза гына: Сандалыкын Озаже тендан нерген чылажымат палынеже да тудлан шке шижмашда да йӧсылыкда нерген ойлымыдам вуча.

4. Иеговалан чӱчкыдын кумалмаш тудын дене кыл кучымашым кузе пеҥгыдемдаш полша?

⁴ Кумалмаш Иегова дене лишыл йолташ лияш полша. Йолташ-влак икте-весышт дене чӱчкыдын мутланат гын да шке шонымашыштым, шижмашыштым да тургыжланымашыштым икте-весылан почын ойлат гын, нунын коклаште кыл кучымаш пеҥгыдемеш. Иеговалан кумалме годымат тыгакак лийшаш. Библий гоч Иегова мыланна шке шонымашыжым, шижмашыжым да ончыкылык шотышто тудын шонен пыштымашыжым почын палдара. Теат тудлан шке шижмашдам ойлен кертыда. Тунам Иегова дене кыл кучымашда пеҥгыдемаш тӱҥалеш (Иаковын 4:8).

5. Иегова южо кумалме мутым огеш колышт манын, кушеч палена?

⁵ Иегова чыла кумалме мутым колыштеш мо? Уке. Исаия пророкын илыме жапыштыже Иегова израильтян-влаклан каласен: «Те шуко кумалыда гынат, мый ом колышт. Тендан кидда вӱр дене амыргыше» (Исаия 1:15). Мыланна тыгай паша деч кораҥаш кӱлеш, кудым Иегова ужмышудымо, да кудо мемнам тудын деч тораҥден кертеш. Уке гын, тудо мемнан кумалме мутнам колыштмым чарнен кертеш.

6. Кузе кумалме мут ӱшанымаш дене кылдалтын? Ӱшанымашна уло манын, кузе ончыктен кертына?

 ⁶ Юмо мемнан кумалме мутнам колжо манын кумылна уло гын, тудлан ӱшанаш кӱлеш (Маркын 11:24). Апостол Павел умылтарен: «Ӱшанымаш деч посна Юмылан йӧрышӧ от лий. Юмо уло да Тудым кычалше-влаклан суапым пуа манын, Юмо деке толшо ӱшанышаш» (Еврей-влаклан 11:6). «Мый ӱшанем» манын ойлаш гына ок сите, шке ӱшанымашнам паша дене пеҥгыдемдаш кӱлеш. А кузе тидым ышташ? Юмым чыла шотыштат колышташ кӱлеш. (Иаковын 2:26 лудын лекса.)

7. а) Кумалме годым молан ӱҥышылыкым да пагалымашым ончыктыман? б) Кумалме мутна шӱм гыч лектеш манын, мо ончыкта?

⁷ Юмылан кумалме годым тыматле лийман да пагалымашым ончыктыман. Вет кугыжам але президентым ме чот пагалена. А Иегова — Чылакертше Юмо, сандене тудым эше чотрак пагалыман да тудын дене мутланыме годым ӱҥышылыкым  ончыктыман (Тӱҥалтыш 17:1; Псалом 137:6). Тыгак мо дене чон почын мутланаш кӱлеш, мемнан кумалме мутна шӱм гыч лекшаш. Кумалме годым уэш-пачаш иктымак ойлаш огеш кӱл (Матфейын 6:7, 8, УТ).

8. Юмо деч иктаж-мом йодына гын, шке могырна гыч мом ыштышаш улына?

⁸ Юмо деч иктаж-мом йодына гын, шкежат тиде шотышто тыршышаш улына. Мутлан, ме Иегова деч илыш кӱлешлык шотышто полышым йодына гын, тудо мемнан олмеш чылажымат ышташ тӱҥалеш манын шонаш огеш кӱл. Мыланна кеч-могай пашаш пижаш да тудым тыршен ышташ ямде лийман (Матфейын 6:11; 2 Фессалоникысе-влаклан 3:10). Але ме иктаж-могай алгаштарымашым сеҥашлан Иегова деч вийым йодына гын, тунам кумалме мут дене келшышын, языкым ышташ таратыше ситуаций деч кораҥаш кӱлеш (Колоссян-влаклан 3:5). Айста ынде кумалме мут нерген икмыняр йодышлан вашмутым ончен лектына.

9. Кумалаш кӧлан кӱлеш? Иоаннын 14:6 дене келшышын, кӧн гоч кумалман?

⁹ Кӧлан кумалаш кӱлеш? Иисус Христос шке тунемшыж-влакым «пылпомышто улшо мемнан Ачаналан» кумалаш туныктен (Матфейын 6:9). Тыгак тудо каласен: «Мый корно, чын да илыш улам. Мыйын гоч огыл гын, Ача деке иктат миен огеш керт» (Иоаннын 14:6). Сандене кумалаш Иеговалан гына кӱлеш да Иисус Христос гоч. Иисус Христос гоч кумалме мом ончыкта? Ме Иегован шонен  пыштымаштыже Иисусын ойыртемалтше рольжым умылена манын, тиде ончыкта. Иисус мемнам язык ден колымаш деч утараш мландыш толын (Иоаннын 3:16; Римлян-влаклан 5:12). А эше Иегова тудым первосвященник да судья лияш шогалтен (Иоаннын 5:22; Еврей-влаклан 6:20).

10. Юмылан кузе кумалаш кӱлеш?

¹⁰ Кузе кумалаш кӱлеш? Кумалме годым шинчаш, йол ӱмбалне шогаш але сукен шинчаш кӱлеш манын, Иегова огеш кӱштӧ. Кумалме годым кеч-могай позым налаш лиеш, но тудо Юмым пагалымым ончыктышаш (1 Летопись 17:16; Неемия 8:6; Даниил 6:10; Маркын 11:25). Иеговалан эн тӱҥжӧ — мемнан кап кучымо положенийна огыл, а шӱмыштына мо улмыжо. Кумалаш лиеш кеч-могай верыште да кеч-могай жапыште. Йӱкын она кумал гынат, Иегова мемнам колеш (Неемия 2:1—6).

11. Мо нерген кумалаш лиеш?

¹¹ Мо нерген кумалаш лиеш? Чыла нерген, мо Юмын эрыкшылан тореш огеш шого. Библийыште ойлалтеш: «Тудын эрыкше почеш кунам ме иктаж-мом йодына, Юмо мемнам колеш» (1 Иоаннын 5:14). Юмо деч шкаланна иктаж-мом йодаш лиеш мо? Лиеш. Иегова мемнан деч тудлан йолташ семын чыла нерген каласкалымынам вуча. Кумалме годым шке шонымашна ден шижмашнам почын ойлаш вожылаш огеш кӱл (Псалом 61:9). Чын ышташ манын, Юмо деч святой шӱлышым йодын кертына (Лукан 11:13). Сай решенийым лукташлан уш-акылым йодаш лиеш, а йӧсылыкым сеҥашлан — вийым  (Иаковын 1:5). Тыгак сулыкнам кудалтыме нерген Иеговам йодаш кӱлеш (Ефесян-влаклан 1:3, 7). А эше весе-влак верч кумалман, мутлан, ешна але погынымаш гыч иза-ака-влак верч (Апост. пашашт 12:5; Колоссян-влаклан 4:12).

12. Эн ончыч мо нерген кумалшаш улына?

¹² Мо нерген эн ончыч кумалшаш улына? Тудын нерген, мо Иегова дене кылдалтеш, да тудын эрыкше шукталтме нерген. Иегова мыланна шуко порым ышта, сандене тудым уло кумылын таушташ кӱлеш (1 Летопись 29:10—13). Мландыште илымыж годым Иисус шке тунемшыж-влакым лач тидын нерген кумалаш туныктен коден. (Матфейын 6:9—13 лудын лекса.) Тудо теве мо нерген кумалаш кӱштен: эн ончыч Юмын лӱмжӧ мокталтме нерген, вара Юмын Кугыжанышыже толмо да Иегован эрыкше мланде мучко шукталтме нерген. Тидын деч вара шке кӱлешлыкна нерген Юмылан каласен кертына. Ме Иегова да тудын эрыкше нерген эн ончыч кумалына гын, Иегова дене кыл кучымашым эн кӱлешанлан шотлена манын ончыктена.

13. Кумалме мутын кужытшо могай лийшаш?

¹³ Кумалме мутын кужытшо могай лийшаш? Библийыште тидын нерген возымо огыл. Кумалме мутын кужытшо ситуаций деч шога. Мутлан, кочкыш деч ончыч кумалме мутна кӱчык лийын кертеш. А Иеговам иктаж-молан тауштена але шке тургыжланымашна нерген каласкалена гын, кумалме мутна кужурак лийын кертеш (1 Самуила 1:12, 15). Иисус илыме жапыште южо еҥ весе-влакым ӧрыктарашлан лӱмын кужун кумалын. Но ме тыгай  еҥ семын ыштышаш огынал (Лукан 20:46, 47). Тыгай кумалме мут Иеговам ӧрыктарен кертеш манын шонаш огеш кӱл. Юмо шӱм гыч лекше кумалме мутым акла.

14. Мыняр чот чӱчкыдын кумалман да молан?

¹⁴ Мыняр чот чӱчкыдын кумалман? Иегова мемнам тудын дене эре мутланаш тарата. Библийыште возымо: «Чарныде кумалза», «Эре кумалза»  (Матфейын 26:41; Римлян-влаклан 12:12; 1 Фессалоникысе-влаклан 5:17). Молан? Молан манаш гын Иегова мемнам колышташ эре ямде. Ме тудын йӧратымыжлан да поро улмыжлан кажне кечын тудым тауштен кертына. Тудо мемнам чын илаш туныктыжо, мыланна полшыжо да вийым пуыжо манын, йодын кертына. Иеговалан кумалаш йӧным чынжымак аклена гын, тудын дене мутланаш жапым эре муына.

15. Кумалме мутын мучашыштыже «аминь» мутым молан ойлыман?

¹⁵ Кумалме мутын мучашыштыже молан «аминь» мутым ойлат? «Аминь» мут «чын» але «тыге лийже» манмым ончыкта. Кумалме мутын мучашыштыже «аминь» ойлен, ме шӱм гыч лекше ойлымынам  пеҥгыдемдена (Псалом 40:14). Иктаж-кӧ кумалме мутым еҥ тӱшка ончылно каласа гын, тунам мемнан «аминь» мутна тудын каласымыж дене келшымынам ончыкта. «Аминь» мутым йӱкын але йӱкым лукде каласаш лиеш (1 Летопись 16:36; 1 Коринфян-влаклан 14:16).

16. Иегова кумалме мутналан вашмутым пуа манын, молан каласаш лиеш?

¹⁶ Иегова мемнан кумалме мутналан вашмутым пуа манын, молан каласаш лиеш? Молан манаш гын Юмо кумалме мутнам колыштеш манын, Библийыште возымо (Псалом 64:3, У Сугынь, 1986). Иегова миллионло еҥын шӱм гыч лекше кумалме мутшым колеш да вашмутым пуа.

17. Иегова кумалме мутлан кузе вашмутым пуа? Примерым кондыза.

¹⁷ Иегова кумалме мутлан тӱрлӧ семын вашмутым пуа, мутлан, суксо-влак але шке служитлышыже-влак гоч (Еврей-влаклан 1:13, 14). Тидым шуко случай ончыкта. Мутлан, кунам айдеме Библийым умылашлан Юмылан кумалын, тунамак тудын деке Иегован Таныкше-влак толыныт. Тиде теве мом пеҥгыдемда: суксо-влак поро уверым уло мланде мучко шаркалымаште чот тыршат. (Почмаш 14:6 лудын лекса.) А эше Иегова мыланна полшаш иза-ака-влакым кумылаҥден кертеш да тыге кумалме мутлан вашмутым пуа (Притчи 12:25; Иаковын 2:16).

18. Иегова кумалме мутлан кузе эше вашмутым пуа?

¹⁸ Иегова кумалме мутлан кузе эше вашмутым  пуа? Мыланна иктаж-могай нелылыкым сеҥашлан полыш але вий кӱлеш гын, Иегова святой шӱлышыжым пуэн кертеш (2 Коринфян-влаклан 4:7). Тыгак Иегова мыланна вашмутым южгунам шке Мутшо гоч пуа. Мутлан, Библийым лудмына годым решенийым лукташ полшышо уш-акылан каҥашым муын кертына. Але вашлиймаш годым Иегова иктаж-кӧм мыланна кӱлешан вашмутым пуаш таратен кертеш. А эше кугурак иза-влак Библий гыч пайдале каҥашым ончыктен кертыт (Галат-влаклан 6:1).

19. Иегова кумалме мутлан вашмутым огеш пу манын чучеш гын, мо нерген шарныман?

¹⁹ Жапын-жапын ме шижын кертына, пуйто Иегова кумалме мутлан вашмутым огеш пу. Но шарныза: мо мыланна кӱлеш, кунам да кузе сайрак вашмутым пуаш Иегова пала. Южгунам ик гана огыл, а шуко гана кумалман. Тыге ыштена гын, йодмына мыланна чот кӱлешан манын, Иегова ужеш. Кунам ме Иегова деч вашмутым чарныде йодына, пеҥгыде ӱшанымашнам ончыктена (Лукан 11:5—10). Южгунам Иегован вашмутшо вучымо вашмут деч ойыртемалтын кертеш. Мутлан, ме иктаж-могай нелылыкым кораҥдаш Иеговам йодына. Но тиде нелылыкым кораҥдыме олмеш Иегова мыланна тудым сеҥаш вийым пуа. (2 Коринфян-влаклан 4:7 лудын лекса.)

20. Молан Иеговалан чӱчкыдын кумалаш кӱлеш?

²⁰ Юмылан кумалаш йӧн — тиде чынжымак кугу пӧлек! Ӱшаныза: Иегова тендам колеш (Псалом 144:18). Иеговалан чӱчкыдын кумалына гын, тудын дене кыл кучымашна пеҥгыдемеш.