Мужыраҥме годым у еш шочеш. Шке ача-аватым йӧратет да пагалет гынат, пелашет ынде тылат эн тӱҥ айдеме. Родо-влаклан тидым вигак умылаш куштылго огыл лийын кертеш. Но библийысе принцип-влак тылат полшен кертыт иканаште еш кылым пеҥгыдемдаш да родо-влак денат келшаш.

МОМ БИБЛИЙ ОЙЛА. «Шке ачат ден аватым пагале» (Ефесян-влаклан 6:2). Кеч-могай ийготан улат гынат, ача-аватым пагалышаш улат. Тыгак шарныман: пелашетынат шке ача-аваже улыт, да тудланат нунылан жапым ойыраш кӱлеш. «Йӧратымаш ок кӧране», садлан пелашетым ача-аважлан ушкалыман огыл (1 Коринфян-влаклан 13:4; Галат-влаклан 5:26).

ПАЙДАЛЕ КАҤАШ-ВЛАК

• «Ача-аватлан мый нигунамат йӧрышӧ лийын ом керт», але «Ават мый декем эре пижедылеш» — тыгай шомак-влак деч кораҥман

• Ача-аваж деке пелашетын шижмашыжым умылаш тырше

МОМ БИБЛИЙ ОЙЛА. «Пӧръеҥ шке ачаж ден аважым кода да ватыж дене ушна — нуно коктын ик кап да чон лийыт» (Тӱҥалтыш 2:24). Ешан улат гынат, ача-ават тыйын верч кызытат мутым кучат манын шонен кертыт. Сандене нуно южгунам тендан коклаш утыжден пураш тыршат.

Ача-авада тендан паша коклашкыда мыняр марте пурен кертыт, тыланда пырля шоналташ кӱлеш. Варажым нунылан шке решенийда нерген порын каласыза. Тыгодым чон почын да тура ойлыза, но торжа мут деч кораҥаш тыршыза (Притчи 15:1). Ӱҥышӧ, тыматле да чытыше лиймаш родо-влак дене сай кылым кучаш да нунын деке йӧратымашым ончыкташ полша (Ефесян-влаклан 4:2).

ПАЙДАЛЕ КАҤАШ-ВЛАК

• Родыда-влак тендан коклаш утыжден пурат манын шонымашет уло гын, пелашетлан тидын нерген тыматлын каласе

• Родыда-влак дене кузе шкем кучаш тӱҥалыда, пелашет дене мутланен келше