Икымше еш мужырым Иегова a Юмо ушен. Библийыште возымо: «Юмо ӱдырамашым ыштен да пӧръеҥ деке конден». Адам тидлан чот куанен. Тудо каласен: «Теве, лу — мыйын луэм гыч, шыл [кап] — мыйын шылем [капем] гыч» (Тӱҥалтыш 2:22, 23). Тачат Иегова марий ден вате-влакым пиаланым ужнеже.

Мужыраҥме годым каче ден ӱдыр еш илышышт эре сай лиеш манын шонат. Нуно икте-весыштым чот йӧратат гынат, еш илышыште нелылык садиктак лиеш (1 Коринфян-влаклан 7:28). Тиде брошюрышто библийысе принцип-влак улыт. Нуно ешым пиаланым ыштен кертыт (Псалом 18:9—12).

МОМ БИБЛИЙ ОЙЛА. «Марий ватылан вуй улеш» (Ефесян-влаклан 5:23).

Марий шке ватыж верч шыман тыршышаш. Тидым Иегова вуча (1 Петрын 3:7). Юмо ватым марийжылан полшышылан пуэн, марийже ватыжым йӧраташ да пагалаш тӱҥалеш манын шонен пыштен (Тӱҥалтыш 2:18). Ватыжым йӧратыше марий тудын кӱлешлыкшым шке кӱлешлык деч кӱшкырак шында (Ефесян-влаклан 5:25—29).

Юмын шонымыжо почеш вате марийжым пагалышаш да тудлан ешыште шке рольжым шукташ полшышаш (1 Коринфян-влаклан 11:3; Ефесян-влаклан 5:33). Марийжын решений дене ватылан келшаш да тудым шуктымаште полшаш кӱлеш (Колоссян-влаклан 3:18). Тунам тудо марийже да Иегова ончылно сай вате лиеш (1 Петрын 3:1—6).

ПАЙДАЛЕ КАҤАШ-ВЛАК

• Шке пелашет деч йод, мо шотышто тылат эше саемаш лиеш. Вара тӱткын колышт да тудын каласымыжым шотыш нал

• Чытыше лий, вет еш илышым пиаланым ышташлан жап кӱлеш

МОМ БИБЛИЙ ОЙЛА. Пелаш-влаклан икте-весын кӱлешлыкше верч тыршыман (Филиппысе-влаклан 2:3, 4). Тек пелашет тылат шергакан улмыжым шижеш. Шарне: Иегован служитлышыже «чыла дене тыматле» лийшаш (2 Тимофейлан 2:24). «Шоныде ойлымаш керде семын сусырта, а уш-акылан еҥын йылмыже паремда» (Притчи 12:18). Садлан иктаж-мом каласыме деч ончыч шоналтыман. Иегован шӱлышыжӧ тыланет порын да йӧратышын ойлаш полша (Галат-влаклан 5:22, 23; Колоссян-влаклан 4:6).

ПАЙДАЛЕ КАҤАШ-ВЛАК

• Пелашет дене каҥашыме деч ончыч кумал. Пелашетын шонымыжым умылен мошташ да чон тыныслыкым арален кодаш Иегова деч полышым йод

• Кузе да мом каласаш, сайын шонкале

МОМ БИБЛИЙ ОЙЛА. Ешым чоҥымеке, пелаш дене те «ик кап» лийыда (Матфейын 19:5). Туге гынат те кок тӱрлӧ айдеме кодыда да шонымыда ойыртемалт кертыт. Сандене тыланда ик семын шонаш тунемман (Филиппысе-влаклан 2:2). Решений лукмо годым иктылык поснак чот кӱлеш. Библийыште каласыме: «Каҥашым кычалше-влакын шонымышт шукталтеш» (Притчи 20:18). Тӱҥ решенийым пырля лукмо годым библийысе принцип-влакым кучылтса (Притчи 8:32, 33).

ПАЙДАЛЕ КАҤАШ-ВЛАК:

• Пелашетлан шке шоныметым почын ойло, паша шотышто веле огыл, тыгак шке шижмашет нергенат шылтыде каласкале

• Иктаж-могай обязательствым налме деч ончыч икте-весе дене каҥашыза