• Иегован свидетельже-влакын кызытсе историйышт кунам тӱҥалын? (1)
• Иегован свидетельже-влакын вашлиймашышт кузе эртаралтыт? (2)
• Окса кучылтмаш кузе петыралтеш? (3)
• Погынымашыште вуйлатымашым кӧ шке ӱмбакыже налеш? (4)
• Могай тӱшкан вашлиймаш кажне ийын эртаралтеш? (5)
• Рӱдо вуйлатымаште да филиал-влакыште могай паша ышталтеш? (6)

¹ Иегован свидетельже-влакын кызытсе историйышт 1870-ше ийлаште тӱҥалын. Ончыч нуно Библий Шымлыше-влак маналтыныт. Но 1931 ийыште Библий Шымлыше-влак библийеш негызлалтше Иегован Свидетельже-влак маналтше лӱмым шкеланышт налыныт (Исайын кнагаже 43:10). Ончычсо изи гына организацийышке кызыт 230 утла эллаште Юмо нерген тыршен каласкалыше, миллион дене Свидетель-влак пурен шогат.

² Иегован Свидетельже-влакын утларак погынымашыштышт арнялан кум вашлиймаш эртаралтеш. Чыла кумылан-влак ӱжмӧ дене кеч-кудышкыжо толын кертыт (Еврей-влак 10:24, 25). Тӱҥжӧ — Библий шымлымаште. Вашлиймаш-влакым тӱҥалыт да пытат кумалмаш мут дене. Утларак вашлиймаште уло чон дене «духовный мурымаш-влак» эртаралтыт (Ефесян-влак 5:18, 19). Тушко пурашлан окса огеш погалт (Матвей 10:8).

³ Утларак погынымашлаже шке вашлиймашыштым Кугыжаныш Залыште эртарат. Шукыжо годым тиде оралте-влак Свидетель кокла гычак кумылаҥше-влакын кидышт дене чоҥымо улыт. Оралте кӧргыштӧ юмоҥа-влак, ырес да моло тугаяк ӱзгар-влак уке улыт. Кӱлешанлыклан кучылтмаш шке кумыл дене пуымо надыр дене петыралтеш. Надырым шке кумыл дене пуаш шонышо-влаклан лӱмын шогалтыме яшлык-влак верланат (2. Коринфян-влак 9:7).

⁴ Кажне погынымашыште старейшина але надзиратель-влак улыт. Нуно погынымашым вуйлатат (1. Тимофей 3:1—7; 5:17). Нунылан служитлымаште полышкалыше-влак полышкалат (1. Тимофей 3:8—10, 12, 13). Нине служитлен шогышо-влак погынымашыште моло христиан-влак деч кӱшнӧ огытыл (2. Коринфян-влак 1:24). Нунын ойыртемалтше титулышт уке (Матвей 23:8—10). Чийме вургемышт нунын молын гаяк. Нунын пашашт огеш тӱлалт. Старейшина-влак шке кумылышт дене погынымашын духовный кӱлешлыкше верч тыршен шогат. Нуно нелылык годым лыпландарен да каҥашым пуэн кертыт (Иаков 5:14—16; 1. Петрын 5:2, 3).

⁵ Тидын деч посна Иегован Свидетельже-влакын кажне ийын тӱшка вашлиймаш, але конгресс-влак лиедат. Тушто шуко погынымаш-влак библийысе туныктен ойлымашлан лӱмын ямдылыме программым пырля колыштыт. Кажне гана конгрессыште у тунемше-влакым тынеш пуртымаш эртаралтеш (Матвей 3:13—17; 28:19, 20).

⁶ Иегован Свидетельже-влакын уло тӱнямбалсе рӱдо озанлыкышт Нью-Йоркышто верлана. Тушто Вуйлатен шогышо каҥашлымаш пашам ышта — тӱнямбалсе погынымаш-влакым эскерен шогышо, илышым шуко палыше старейшина-влакын вуйлатен шогышо чумыргымашышт. Тылеч посна, тӱрлӧ эллаште 100 утла филиал-влак пашам ыштен шогат. Тушто шке кумылын пашам ыштыше-влак библий дене келыштарыме литературым печатлаш да колтылаш полшат. Филиал-влак гыч тӱня мучко тыгак Юмо нерген каласкалымашым вуйлатымаш лектын шога. Лишылрак филиалыш миен толаш молан шонен пышташ огыл?