Ме, Иегован Таныкше-влак, Иисус Христосын туныктымыжо почеш илаш да апостолжо-влак семын христиан лияш тыршена. Тиде статьяште тӱҥ туныктымашна нерген возымо.

1.   Юмо. Ме ик чын да Чылакертше, чылажымат Ыштыше, Иегова лӱманЮмылан кумалына (Псалом 83:18, УТ; Почмаш 4:11). Тудо — Авраамын, Моисейын да Иисус Христосын Юмыжо (Исход 3:6; 32:11; Иоаннын 20:17).

2.   Библий. Ме ӱшанена: Библий — тиде Юмо деч книга, кудыжым Юмо айдеме тукымлан пуэн (Иоаннын 17:17; 2 Тимофейлан 3:16). Чыла туныктымашна Библийын 66 книгаж дене негызлыме. Нине книга Тошто да У Сугыньыш пурат. Тӱрлӧ религийым шымлыше профессор, Джейсон Дейвид Бедун, Иегован Таныкше-влак нерген возен: «Нуно шке туныктымыштым да ыштыме пашаштым Библиеш негызлат, да тушто нунылан келшыше информацийым гына огыт кычал» *.

    Ме уло Библийлан ӱшанена. Но Библийым умылаш тыршымына годым теве мом шотыш налына: тудын южо ужашыже символический йылме дене возымо да нуным вик умылаш огеш кӱл (Почмаш 1:1).

3.   Иисус Христос. Ме Иисус Христосын примерже да туныктымыжо почеш илена. Ме тудым мемнан Утарыше да Юмын Эргыже семын пагалена (Матфейын 20:28; Апост. пашашт 5:31). Сандене ме христиан улына (Апост. пашашт 11:26). Но Библий гыч ме теве мом пален налына: Иисус Чылакертше Юмо огыл да Троице нерген туныктымаш Священный Возымаш дене негызлыме огыл (Иоаннын 14:28).

4.   Юмын Кугыжаныш. Тиде христианын кӧргӧ шижмашыже огыл, а каваште улшо чын правительстве. Тиде Кугыжаныш айдеме правительствым алмашта да мланде шотышто Юмын шонен пыштымашыжым шукта (Даниил 2:44; Матфейын 6:9, 10). Юмын Кугыжанышыже чыла тидым чот вашке ышта, вет библийысе ончылгоч каласымаш дене келшышын, ме «пытартыш кечылаште» илена (2 Тимофейлан 3:1—5; Матфейын 24:3—14).

    Иисус Христос — Юмын кавасе Кугыжаныштыже Кугыжа. Тудо 1914-ше ийыште вуйлаташ тӱҥалын (Почмаш 11:15).

5.   Утарымаш. Язык ден колымаш деч утарымаш Иисус Христосын надыржылан кӧра лийын кертеш (Матфейын 20:28; Апост. пашашт 4:12). Христосын надырже мыланна пайдам кондыжо манын, мыланна Христослан ӱшанаш, илышнам вашталташ да тынеш пураш кӱлеш (Матфейын 28:19, 20; Иоаннын 3:16; Апост. пашашт 3:19, 20). Айдемын ӱшанымашыже илыше але уке, пашаж гыч ужаш лиеш (Иаковын 2:24, 26). Но утарымашым сулен налаш ок лий, тудым Юмын порылыкшылан кӧра гына налаш лиеш (Галат-влаклан 2:16, 21).

6.   Кава. Иегова Юмо, Иисус Христос да Юмылан ӱшанле суксо-влак каваште илат (Псалом 102:19—21; Апост. пашашт 7:55) *. Тыгак, кавасе илышлан кугу огыл группо, 144 000 еҥ гына ылыжтыме лиеш. Нуно Юмын Кугыжаныште Иисус Христос дене пырля вуйлаташ тӱҥалыт (Даниил 7:27; 2 Тимофейлан 2:12; Почмаш 5:9, 10; 14:1, 3).

7.   Мланде. Юмо мландым еҥ-влаклан курымеш илаш ыштен (Псалом 103:5; 113:24; Экклезиаст 1:4). Юмо тудым колыштшо еҥ-влаклан сай тазалыкым да рай мландыште курымеш илышым пӧлекла (Псалом 36:11, 34).

8.   Осал ден орланымаш. Кунам суксо-влак гыч иктыже Юмо ваштареш шогалын, тӱняшке осал ден орланымаш пуреныт (Иоаннын 8:44). Тиде суксо Юмо ваштареш шогалмыж деч вара Сатана Диавол манын лӱмдалташ тӱҥалын. Сатана икымше еҥ-влакым, Адам ден Евам, тудын могырышкыжо шогалаш таратен. Тиде уло айдеме тукымлан кугу ойгым конден (Тӱҥалтыш 3:1—6; Римлян-влаклан 5:12). Сатана дене нӧлтымӧ ӱчашымаш йодышлан вашмут пуымо лийже манын, Юмо осал ден орланымашым кызыт огеш кораҥде, но нунылан эре лияш огеш пу.

9.   Колымаш. Колымеке, айдеме илымыжым чарна (Псалом 145:4; Экклезиаст 9:5, 10). Юмо еҥ-влакым тул тамыкыште огеш орландаре.

    Ылыжмаш гоч Юмо миллиардле еҥым илышыш пӧртылта (Апост. пашашт 24:15). Ылыжмаш деч вара нуно, кӧ Юмын туныктымыжлан ваштареш шогалеш, пытарыме лийыт. Тыгай еҥ-влакын угыч ылыжаш ӱшанышт огеш лий (Почмаш 20:14, 15).

10.   Еш. Ме мужыраҥмашлан пуымо Юмын нормыжо-влакым кучылтына. Мужыраҥмаш — тиде ик пӧръеҥ ден ик ӱдырамашын ушемышт. Ойырлаш яжарланымаш амал дене веле лиеш (Матфейын 19:4—9). Уш-акылан библийысе каҥаш-влакым илышыш пуртен, еш-влак пиалан лийын кертыт манын, ме ӱшанена (Ефесян-влаклан 5:22—6:1).

11.   Мемнан кумалмашна. Кумалмаште ме ыресым да сӱрет-влакым она кучылт (Второзаконие 4:15—19; 1 Иоаннын 5:21). Юмылан кумалмашыш теве мо пура:

    •   Юмылан кумалме мут (Филиппысе-влаклан 4:6).

    •   Библийым лудмаш да шымлымаш (Псалом 1:1—3).

    •   Библийыште лудмо нерген шонкалымаш (Псалом 76:13).

    •   Вашлиймаш-влак. Тушто ме Юмылан пырля кумалына, Библийым шымлена, мурена, шке ӱшанымашна нерген ойлена да икте-весынам кумылаҥдена (Колоссян-влаклан 3:16; Еврей-влаклан 10:23—25).

    •   «Кугыжанышын... Поро Увержым» каласкалымаш (Матфейын 24:14).

    •   Полышым кычалше-влаклан полшымаш (Иаковын 2:14—17).

    •   Тӱнямбалысе библийысе просветительный пашаште кучылтмо Вашлиймаш зал ден вес зданий-влакым чоҥымаш, ончымаш да ачалымаш (Псалом 126:1).

    •   Пӱртӱс деч толшо эҥгекыш логалше-влаклан полшымаш (Апост. пашашт 11:27—30).

12.   Мемнан организацийна. Мемнан погынымашна-влак уло. Кажныжым кугурак иза-влакын советышт виктара. Но кугурак иза-влак погынымаште кӱшыл верым налде служитлат да тиде шуктымо пашалан нимогай пашадарым огыт нал (Матфейын 10:8; 23:8). Ме пашадар гыч луымшо ужашым она тӱлӧ да вашлиймаште еҥ деч оксам она йод (2 Коринфян-влаклан 9:7). Чыла мемнан пашана шке кумыл дене пуымо надыр окса дене ышталтеш. Кӧ мыняр оксам пышта иктат огеш пале.

    Уло тӱня мучко Иегован Таныкше-влакын пашаштым Вуйлатыше совет виктара. Тиде кугу огыл группыш чын корнышто пеҥгыдын шогышо христиан-влак пурат. Нуно тӱнямбалысе тӱҥ виктемыште шке пашаштым шуктат (Матфейын 24:45).

13.   Иктылыкна. Уло тӱня мучко илыше Иегован Таныкше-влакын туныктымашышт икгай (1 Коринфян-влаклан 1:10). Мемнан коклаште социальный, этнический, расовый да классовый шеледымаш ынже лий манын, ме уло вийым пыштена (Апост. пашашт 10:34, 35; Иаковын 2:4). Но иктылыкна огеш ончыкто, пуйто ме чыла шотыштат икгай лийшаш улына. Кажне Иегован Таныкше Библий почеш туныктымо совестьше дене келшышын решений-влакым луктеш (Римлян-влаклан 14:1—4; Еврей-влаклан 5:14).

14.   Шкем кучымашна. Чыла пашаштына ме шкаланна пайдам кычалде йӧратымашым ончыктена (Иоаннын 13:34, 35). Ме Юмылан йӧрдымӧ паша деч, ты шотыштак вӱрым чын огыл кучылтмаш ден вӱрым капыш колтымаш деч, кораҥына (Апост. пашашт 15:28, 29; Галат-влаклан 5:19—21). Ме тыныслыкыш шуаш тыршена да сарыш она кошт (Матфейын 5:9; Исаия 2:4). Ме илыме элнан правительствым пагалена да законжо-влакым, Юмын законжо ваштареш ышташ огыт тарате гын, шуктена (Матфейын 22:21; Апост. пашашт 5:29).

15.   Весе-влак дене кыл кучымашна. Иисус кӱштен: «Лишылетымат шкендым йӧратыме семынак йӧрате». Тыгак христиан-влак «тӱня деч огытыл» манын, тудо каласен (Матфейын 22:39; Иоаннын 17:16). Сандене ме чылалан порым ышташ тыршена, но политике шотышто нейтральный кодына да вес религий-влак дене кылым она кучо (Галат-влаклан 6:10; 2 Коринфян-влаклан 6:14). Туге гынат, политике да религий шотышто весе-влакын ончалтышыштым пагалена (Римлян-влаклан 14:12).

 Иегован Таныкше-влакын туныктымашышт нерген йодышда-влак кодыныт гын, шукырак информацийым мемнан сайтыштына муын кертыда, тыгак филиална-влак гыч иктышкыже але тендан кундемыштыда улшо Вашлиймаш залыш толын, вашмутым налаш лиеш. А эше тендан кундемыштыда илыше Иегован Таныкше-влак гыч иктыже тендан йодышланда вашмутым пуэн кертеш.