Yawan Jehova witniska nani ba aisubanka yua liliaka daukras, kan kasak lukisa Gâd baha yamni kaikras. Naha dukiara Baibil ba param pali lika aisaras, kuna dîa muni Gâd naha liliaka nani yamni kaikras ba yawan tânka bribia dukiara, hilpka kum kum nani wankisa. Yawan tânka walhwal laki kaikbia, bara Baibil smalkanka nani wal naha tânka nani nahki wilkanka bri ba sin.

1.   Aisubanka yua liliaka nani ba rilidian kuninkira nani wal wilkanka brisa. Bîla tânka mariki bukka tara kum wisa, naha liliaka nani ra “spirit saura nani ba baha yua aisubi takan uplika ra saura munaia dukiara tnatka nani plikisa”, baha mita “ai uplika nani wal asla kaia bara ai rayaka dukiara bîla yamni nani briaia ba baha yua ra, spirit saura nani wina kaina kahbisa” (Funk & Wagnalls Standard Dictionary of Folklore, Mythology, and Legend). Buk wala ra sin wisa luan piua ra slilma nani tânka wal sukia lâka dauki kan nani ba aisubi taki kan uplika nani yua bara nina ulbi bri kan, kan wi kan naha ba nit sa horóscopo paskaia dukiara”. Bara naha bukka ba naku sin wisa: “Upla nani manis lukisa aisubanka yua liliaka ra uplika ba kiandil nani daskbia ningkara dîa brin dauki nani sut ba briaia sip kabia” (The Lore of Birthdays).

    Ban sakuna Baibil param aisisa, yapi kaiki naika dîa takaia dahra aisi uplika, sukia lâka, bara yabaki kaiki nani ba apia kaka, “ani uplika naha sât dukia nani dauki ba” Gâd ba yamni kaikras (Kli Smalkanka 18:14; Galesha 5:​19-​21). Baha mita patitara piua ra Gâd ba Babilon tawanka ra sauhki tikan, kan witin nani slilma nani tânka pliki sukia nani lâka dauki kan (Aiseya 47:11-​15). Jehova witniska nani ba naha tasba liliaka nani dukiara tânka plikaia ba uya kulkanka yabras, kuna sukia lâka dukiara Baibil dîa klir smalki ba yawan sip sait ra swiras.

2.   Patitara piua ra kristianka nani ba aisubanka liliaka daukras kan. Naha tasba tânka dukiara aisi bukka tara kum ba wisa “pas kristianka nani luki kan aisuban yua liliaka ba idan lâka” apia kaka rilidian kuninkira nani wina bal takan (The World Book Encyclopedia). Baibil marikisa apastil nani bara Jisas tasba ra kan taim smalkan uplika nani ba, kristian lâka kat iwaia bapanka pali mangki swin, bara yawan baha nina blikaia sa (2 Tesalonaika 3:6).

3.   Kristian nani ra, yua kum kulkbia blikan. Naha ba aisubanka yua kum apia sa, Jisas pruanka yua sa (Luk 22:17-​20). Naha ba diara aihka kum apia sa, kan Baibil wisa “kau yamni sa prura yua ba wihki, aisubi taki yua ba wal” (Smasmalkra 7:1). Jisas ba tasba ra balan taim, Gâd mawan ra nina pain kum brin. Baha mita witin pruan yua ba aisubi takan yua ba wal kau tânka tara brisa (Hibru Nani 1:4).

4.   Baibil ra Gâd uplika aisubi takan yua liliaka daukan sturka ba kumi sin takras. Âiulbra nani Baibil ra naha sât sturka ulbi mangkras kan tânka apia sa. Kan Baibil ra aisubanka yua liliaka daukan uplika wâl dukiara aisisa, sakuna naha uplika nani ba Gâd napakanka nani apia kan. Bara Baibil ba naha liliaka wâl dukiara pain aisaras (Blasi Sturka 40:20-​22; Mark 6:​21-​29).

 Aisa yapti latwankira nani baku, Jehova witniska nani ba ai luhpia nani ra latwan kaikisa. Baha mita mani bilara yua sât sât ra prisant nani yabisa bara asla taki lilia kaia dukiara diara sât sât nani daukisa. Gâd daukanka nani nina blikaia trai munisa, witin ai napakanka nani ra ani piua kabia sin diara yamni nani yabisa (Matiu 7:​11). Baha mita Jehova witniska luhpia nani ba ai rayaka wina diara yamni ai mihta dakbi ba baku ai dara walras. Bara naha ulbanka ra witin nani aisanka ba naha marikisa:

•   “Yawan bîla kaikras piua ra prisant kum briaia ba kau lilia wan sakisa.” (Tammy, 12 mani bri ba.)

•   “Aisubi takri yua ra papiki bara mamiki ba prisant nani aikras, kuna yu wala nani ra aikisa. Bara bîla kaikras baha brisna taim kau lilia ai daukisa.” (Gregory, 11 mani bri ba.)

•   “Tuktan wala nani ba kik pi si aiwanaia baman sa. Kuna baha liliaka nani ba yang laik apia sna, waitla ra liliaka dauki nani ba lika kau pain sa.” (Eric, 6 mani bri ba.)