Jehova witniska nani ba gabamint bara kuntri tukinka nani ra rispik munisa, upla wala plakin ra lakula yabi ba, kuntrika ra kasak kaia swer taki ba, apia kaka kuntri lawanka aiwani ba sin saura kaikras.

 Ban sakuna, Jehova witniska nani ba baha sât liliaka nani tilara dimi tâ baikras, kan kasak lukisa baha dukia nani ba Baibil dîa wi ba mapara sa. Baha mita, yang nani Jehova witniska nani ba wala nani dîa kasak luki ba rispik muni ba baku, wala nani sim rispik lâka wan marikbia bîla kaiki banhwisna.

Naha ulbanka ra makabi walanka yumhpa ra ansa munbia:

•  ¿Naha tânka dukiara Baibil ba dîa wisa?

•  ¿Tâ baikbia dukiara gabamint nani lâka mangkisa kaka yawan dîa daukisa?

•  ¿Jehova witniska nani ba gabamint mapara upla nani bubia dukiara, apia kaka pulitik bisniska nani tilara dimaia want ba mita kuntri liliaka nani tâ baikras sa ki?

 Naha dukiara yang nani dîa wahbi saki banhri ba Baibil smalkanka wâl ra aibapanka brisa:

•   Gâd baman mayunra lâka briaia aitani sa. Baibil ba wisa: “Man Dawan Gâdkam [Jehova] ra puram suni mayuns, bara witin dukia baman dauks” (Luk 4:8). Kuntri plakinka ra kasak kaia aisanka dauki ba, bara kuntri lawanka nani ra aima manis ra aisisa, diara wala nani purkara kuntri ra kasak lâka bara kulkanka lâka yabia, baku sin pramis munisa ai dukia dadaukra kaia. Baha mita, yang nani Jehova witniska nani ba naha sât liliaka nani ra tâ baikras sa.

   Baku sin yang nani Jehova witniska nani ba luki banhwisna plakin ra lakula yabaia ba mayunra sâtka kum sa, aidul nani ra mayunra yabi ba baku sa. Bara baha ba Baibil smalkanka nani tilara apia sa, kau ni wisa baha daukaia saura sa (1 Korint 10:14). Baku sin naha dukiara tânka pliki kakaira nani ba wisa, plakin nani ba raitka pali ba rilidian tukinka nani sa. Tânka pliki kakaira kum, nina Carlton Hayes ba naku ulban: “Kuntri plakinka ra lakula yabisa taim, rilidian tukinka kum ra mayunra yabi ba baku sa”. a Tânka pliki kakaira Daniel Mannix ba pas kristianka nani dukiara aisi naku ulban: “Pas kristianka nani ba [Rom] kingka ra sakripais nani dauki yabaia lâka alki daukras kan, naiwa piua ra plakin ra lakula yabaia ba wal sim dukia sa”. b

  Jehova witniska nani ba kuntri plakinka bara tukinka nani ra lakula yabras, ban sakuna tnatka kumi ra sin rispik apia lâka ba marikras, sauhki sin tikras.

•   Gâd upla mawan bâk saki kulkras (Apastil Nani Sturka 10:34, 35). Baibil Gâd dukiara wisa: “waitna kumi wina baman witin bui nisan nani sut paskan” (Apastil Nani Sturka 17:26). Baha mita, yang nani Jehova witniska nani ba luki banhwisna nisan apia kaka kiamka sât wala bri ba tâka, upla kum ra saura munaia apia kaka bahki kulkaia ba pain apia sa. Yang nani upla sut ra rispik muni banhwisna, ani wina kabia sin bara dîa sât iwanka tnatka bri kabia kra sin (1 Pita 2:17).

 Yang nani Jehova witniska nani ba gabamint mapara apia sa, kau ni upla nani lâ nani alki daukbia dukiara Gâd naha tasba ra gabamint nani bâra kabia swin ba kasak lukisa (Roman 13:1-7). Baku sin nu banhwisna, yang nani kristian baku gabamint lâka nani ba alki daukaia sa (Luk 20:25).

 Kuna ¿gabamint lâka kum Gâd dîa smalki ba mapara sa kaka? Wel sam taim, baha lâka chens munbia dukiara gabamint ra makabanka kum dingkaia sip sa. c Kuna sip apia sa taim, Jehova witniska nani ba rispik lâka marikisa, kuna wahbi sakisa “Gâd bîla ba kau walaia [...] upla nani ra lika apia” (Apastil Nani Sturka 5:29).

 Apia. Yang nani Jehova witniska nani ba pulitik bara gabamint bisniska nani tilara dimras. Baibil smalkanka nani alki dauki ba mita kuntri ra kasak kaia swer takras, plakin ra lakula yabras, bara kuntri lawanka aiwanras. Gabamint mapara bûi ba mita lika apia sa.