Matiu 28:19, 20 ra, Jisas smalkan Jehova witniska kum takaia dukiara dîa daukaia nit sa. Naha tikska nani ra marikisa, Jisas disaipilka kum takaia dukiara upla nani ra Jehova dukiara smalkaia sa. Kuna naha daukaia dukiara pas ba diara kum kum daukaia sa, kaisa diara yumhpa kaikaia:

 Numba 1: Baibil smalkanka nani ba lan takaia sa. Jisas ai nina blablikra nani ra adar yan disaipil nani daukaia bara witin dîa smalkan ba bîla walaia (Matiu 28:19, 20). Disaipil bîla ba tânka sa “lan taki uplika kum apia kaka stadi tatakra kum”. Man rayakam ra lilia lâka briaia dukiara Baibil ba Jisas smalkanka nani ra wisa dîa daukaia nit sma (2 Timoti 3:​16, 17). Baibil stadika kum mana luha wal lilia pali mai marikaia sip sa Baibil ba dîa smalkisa (Matiu 10:​7, 8; 1 Tesalonaika 2:​13).

 Numba 2: Dîa lan takram ba rayakam ra alki dauks. Jisas win ai disaipilka nani ba lan takaia ba wal aitani apia sa, kan ai adarka nani sin alki brih daukaia nit sa (Matiu 28:20). Tânka sa Baibil smalkanka nani ba sinskam ra mangki briaia baman apia sa. Ban kra lukankam bara daukankam nani ba chens munaia nit kama (Apastil Nani Sturka 10:42; Epesus 4:​22-​29; Hibru Nani 10:24, 25). Ya nani Jisas smalkanka nani ba ai rayaka ra alki bri dauki ba, ai kupia bukisa Jisas nina blikaia bara baha tâka mita Jehova ra ai rayaka ba yabisa (Matiu 16:24).

 Numba 3: Tahbi daukan lâka briaia (Matiu 28:19). Baibil ra tahbi daukan lâka ba pruan ra wan bikan wal praki kaikan sa (Roman 6:​2-4 wal praki kaiks). Tahbi daukan lâka ba tânka sa wan daukanka almuk nani ba swiaia sa bara daukanka raya nani pakaia. Baha mita tahbi daukan lâka ba upla sut mawanra marikisma, Jisas smalkan baku, man Baibil dîa smalki ba lan takram, rayakam ra alki brih daukram bara Gâd ra kupia dara walanka klin kum makabisma ba (Hibru Nani 9:​14; 1 Pita 3:​21).

 Kangrigisan almukka nani wal aisas. Witin nani man wal aisi laki kaikbia Baibil smalkanka nani pain tânka brisma sapa, bara dîa lan takram ba rayakam ra alki daukisma sapa bara man Jehova ra rayakam yabaia pat pramis munram sapa (Apastil Nani Sturka 20:28; 1 Pita 5:​1-3).

 Âu. Jehova witniska aisa yapti nani ba ai luhpia nani ra pakaia dukiara naha Baibil smalkanka ba alki bri daukisa “Dawan latwan lâka ra witin nani ra smalki paks, lâ kat wapni tauki kaia” (Epesus 6:4). Sakuna witin nani pâwi auya taim, Baibil smalkanka nani ba ai rayaka ra alki bri daukaia bara tahbi daukan lâka sin briaia ba silp wahbi sakaia sa (Roman 12:2). Upla kumi bani ba laki kaikaia sa Jehova ra mayunra yabia apia kaka yabia apia (Roman 14:12; Galesha 6:5).