•  ¿Jehova witniska nani ba nahki wahbi sakisa liliaka kum kum nani ba daukbia sapa?

•  Jehova witniska nani ba liliaka kum kum daukras kabia kra sin, ¿ai pamalika nani ra ban latwan kaiki banhwisa ki?

•  ¿Jehova witniska nani ba upla wala nani sin liliaka kum kum daukbia apia dukiara taibi munisa ki?

 Jehova witniska nani ba liliaka yua kulkbia sapa kau wahbi sakras kainara, Baibil dîa wi ba laki kaikisa. Liliaka yua nani kum kum ba Baibil smalkanka nani mapara sa. Baku sa taim Witnis nani ba liliaka yua ba kulkras. Ban sakuna, liliaka yua wala nani dukiara Witnis kumi bani silp wahbi sakisa, bara “Gâd mawan ra bara upla nani mawan ra sin” ai kupia dara walanka pain bri kaia dukiara aman laki kaikisa (Apastil Nani Sturka 24:16).

 Jehova witniska nani ba liliaka kum daukbia sapa wahbi sakras kainara, naha makabi walanka nani laki kaikisa. a

•   ¿Naha liliaka ba Baibil smalkanka ra ai bapanka brisa ki?

   Baibil smalkanka ba: “Witin nani lilapaska ba wina dakwi taki bal taks, Dawan [Jehova] bila; diara tâski ba kangbi banhpara” (2 Korint 6:15-17).

   Spirit lainka ra smalkanka tâski nani, wibia sa kaka, smalkanka Baibil mapara nani wina sait ra kaia dukiara, Jehova witniska nani ba baha sât liliaka nani ba daukras sa. Bara nanara naha nani dukiara aisabia.

   Gâd kuninkira nani wal wilkanka bri liliaka nani. Jisas win: “Man Dawan Gâdkam [Jehova] ra lulam kriki puram suni mayunma, bara witin dukia baman sin daukma” (Matiu 4:10). Naha adarka ba nina bliki, Jehova witniska nani ba krismis liliaka, ista sandi liliaka bara mayo kati pas yua liliaka nani sin dauki banhras, kan naha liliaka nani ba gâd wala nani mayunra ra ai bapanka brisa. Baku sin naha sât liliaka yua nani sin daukras:

  •  Kwanza. Enciclopedia Moderna bukka aisi ba baku, naha liliaka nina ba “swahili bîla kum wina balisa, matunda ya kwanzaa (‘mâ pas nani’)” bara “Aprika ra mâ krikaia liliaka dauki tnatka ba kat” naha liliaka ba sin daukisa. Upla kum kum naha liliaka ba rilidian wal asla apia sa lukisa, sakuna naha tânka dukiara aisi bukka kum ba wisa naha liliaka ba Aprika liliaka kum wal wilkanka brisa. Kan, “gâd nani bara ai damika nani ra tingkika lâka marikaia wisi” mâ pas nani yabisa. Baku sin naha bukka wisa, naha liliaka ba bara Kwanza afroamericana liliaka ba sin tnatka ra daukisa. Wâlsut ba “ai damika nani ra tingkika lâka marikisa blisin nani yabi ba mita” (Encyclopedia of African Religion [Aprika rilidian dukiara tânka mariki bukka tara]).

  •  Medio Otoño Liliaka. Otras culturas, otras formas de vida bukka aisi ba baku, “upla nani ba kati gâdka mairin ra ai prisantka nani yabi kan”. Baku sin, “utla mairka nani ba gâd mairin ra ai lula kriki mayunra yabisa” (Religions of the World​—A Comprehensive Encyclopedia of Beliefs and Practices [Tasba aiska ra rilidianka nani: Diaura kasak luki ba bara nahki praktis muni ba tânka mariki bukka tara]).

  •  Nowruz. “Naha liliaka yua ba patitara piua zoroastrismo rilidianka wina bal takan sa, bara baha yua ba patitara zoroástrico kalindarka ra kau yua tara kulki kan. [...] Kasak luki banhwi kan lî piua spiritka mita yu wan lal kat spiritka Rapithwin ra taibi muni kan, kauhla taimka katka nani ba tasba munhtara dimi yukuwi kaia, bara kli naha spiritka bal dimi kan taim zoroástrica rilidianka ba ai natka kan baku, Nowruz yua ra yu lapta wan lal kat ba ra liliaka kum dauki kan” (Organización de las Naciones Unidas para la Educación, la Ciencia y la Cultura [Unesco]).

  •  Shab-e Yalda. Naha liliaka ba mani bilara kau isti tihmia taki yua ra dauki banhwisa bara “Mitra ingni gâdka mayunanka wal wilkanka brisa” (Sufism in the Secret History of Persia [El sufismo en la historia secreta de Persia]). Baku sin lukisa naha liliaka ba roman bara grik yu lapta gâdka nani mayunanka ba wal wilkanka brisa. b

  •  Tingki Yabaia Yua Liliaka. Kwanza liliaka baku, gâd kuninkira nani ra mâ krikanka ba wal kulkanka yabi kan liliaka wina ai bapanka brisa. Piu luan ningkara, “naha daukanka nani ba kristian rilidianka nani ba alki daukan” (A Great and Godly Adventure​—The Pilgrims and the Myth of the First Thanksgiving [Una gran aventura piadosa: Los peregrinos y el mito del primer día de Acción de Gracias]).

   Diara kasak apia nani ra kasak lukaia apia kaka lat ra kasak lukanka wina bapanka saki liliaka nani ba. Baibil ba wisa ani uplika “Gad bara Mení [lat gâdka nani] ra [...] plun bara wain laya sin bri sal” yabi ba Jehova wina“ laihura dakwi takisa” (Aiseya 65:11). Baha mita Jehova witniska nani ba naha liliaka nani daukras sa:

  •  Iván Kupala. “Upla nani kasak lukisa Iván Kupala yua ra, dus nani ba karnika aihka kum yaban takisa. Bara baha karnika wina kupia karna lâka bara yamnika briaia sip sa” (The A to Z of Belarus [Bielorrusia de la A a la Z]). Blasi ra, yu lapta kau let dimi kan deka kulkaia dukiara naha liliaka ba dauki kan. Ban sakuna, buk tara kum ba wisa, “naha liliaka ba upla nani kristian lâka alki brin taim, Jan Tatahbra holi liliaka yua wal asla prakan sa” (Encyclopedia of Contemporary Russian Culture [Enciclopedia de la cultura rusa contemporánea]).

  •  Blasi Mani Raya Liliaka (Chaini uplika nani Mani Raya liliaka apia kaka Corea uplika nani Mani Raya liliaka). “Mani bilara yua sut tilara naha yua nani ra pamali nani bara pana nani kau luki ba sika, mani raya ra diara yamni nani takbia bîla kaikaia baku sin gâd nani bara spirit nani ra kulkanka yabaia” (Mooncakes and Hungry Ghosts​—Festivals of China [Festivales chinos: Pasteles de la luna y fantasmas hambrientos]). Sim ba baku, Corea uplika nani Mani Raya liliaka ba ai almukka nani ra mayunra yabaia sin dingkisa, yaba tânka nani sin daukisa spirit saura nani kangbi sakaia bara mani raya ra diara yamni nani briaia dukiara. Bara mani raya ra dîa takbia sapa kaina kaikisa” (Encyclopedia of New Year’s Holidays Worldwide [Enciclopedia de las celebraciones de Año Nuevo de todo el mundo]).

   Sulka ba pruras smalkanka ra bapanka bri liliaka nani. Baibil ba param pali aisisa sulka ba pruisa (Isikiel 18:4). Baku ba mita, Jehova witniska nani ba sulka sip pruras sa lukanka ra liliaka nani dauki ba kulki banhras, naha nani baku:

  •  Pruan nani Yua (apia kaka Día de Muertos). Tânka mariki bukka tara kum naku win, naha yua ra “upla pain nani pruan sut dukiara kupia kraukisa”. Bara kau pura praki wisa: “Patitara (Yawan piua ra mani 500 wina mani 1500 kat) upla aihkika nani kasak luki banhwi kan, pruan nani pliska wina sulka nani ba baha yua ra param taki kan, pauta klauhi baku isingni nani bal taki puli kan, sukia sukling nani baku sin. Rayakam taim ya witin nani ra saura muni kan nani ra bal taki kan” (New Catholic Encyclopedia [Nueva Enciclopedia Católica]).

  •  Ching Ming Liliaka bara Isingni Sanglangkira nani Liliaka. Naha liliaka nani wâl sut ba ai almukka nani ra mayunaia dukiara daukisa. Buk kum tânka tara mariki ba naku wisa, Ching Ming Liliaka piua ra, “plun piaia bara diaia yabisa, bara lalah wahia nani sin angkisa, pruan nani ba plun bla banhwi kabia apia dukiara bara lalah aitani bri banhwi kabia dukiara” (Celebrating Life Customs Around the World​—From Baby Showers to Funerals [Costumbres de todo el mundo para celebrar la vida: desde baby showers hasta funerales]). Baha sim bukka bila wisa, Isingni sanglangkira nani liliaka dauki nani ba kasak luki banhwisa “baha katka aiska, kau pali ba kati tilwan piua ra upla raya nani wihki pruan nani wal kau asla taki banhwisa tihmia wala nani ba wal. Baha mita aman kaiki banhwisa pruan nani ra kupia swapni daukaia bara ai almukka nani ra mayunaia dukiara”.

  •  Chuseok. Tânka mariki bukka kum wisa, naha Corea uplika nani liliaka dauki piua ra “pruan nani sulka ra plun bara wain yabisa”. Naha wal marikisa “sulka ba pruan ningkara ban raya sa kasak luki banhwisa” (The Korean Tradition of Religion, Society, and Ethics [La tradición coreana de la religión, la sociedad y la ética]).

   Liliaka nani sukia lâka wal asla ba. Baibil ba wisa: “Man nani wina kumi sin [...] dahra pliki saki warkka sin daukpara, kainara dîa takaia ba aisi wipara, sukia warkka sin daukpara, yabaki kaiki uplika wal, dahra saki aisi uplika, bara yapi kaiki piritka uplika wal sin tânkam pliki kaikpara, pruan nani piritka aikuki sin apia. Naha dukia dauki uplika nani ra Dawan mita saura kaikisa” (Kli Smalkanka 18:10-12). Slilma nani tânka aisi kaikaia baku, sukia lâka nani sâtka sut wina sait ra kaia dukiara, Jehova witniska nani ba Halloween Liliaka ba daukras, bara naha liliaka wala nani sin daukras:

  •  Cingalés uplika nani Mani Raya Liliaka bara Tamil uplika nani Mani Raya Liliaka. “Naha liliaka ra yabakaia lâka nani dauki ba [...] Slilma nani tânka laki kaiki piua kum kum wahbi sakisa, wark kum kum daukaia dukiara” (Encyclopedia of Sri Lanka [Enciclopedia de Sri Lanka]).

  •  Songkran. Tânka mariki bukka tara kum ba bila naha Asia liliaka nina ba “sánscrita bîla ba tânka sa ‘nikwaia’ apia kaka ‘chens munaia’”. Naha liliaka ba “yabisa yu lapta ba ai yabalka ra aimakbia constelación zodiacal de Aries ra” (Food, Feasts, and Faith​—An Encyclopedia of Food Culture in World Religions [Comida, fiestas y fe: Enciclopedia de cultura gastronómica en las religiones del mundo]).

   Moses Lâka ra bapanka bri liliaka yua nani, kuna Jisas sakripais yaban ba mita danh kulkaia nit apia ba. Baibil ba wisa: “Kraist sika Moses Lâka tnata alkanka ba” (Roman 10:4 LRW 1974). Naiwa kristian nani ba patitara Israel nisanka ra yaban Moses Lâka ba kulkras, kuna baha smalkanka nani ba ban yamnika brisa. Ban sakuna, liliaka yua nani ba danh kulkras, kau pali naika Misaya balaia dukia kan ba, kan kristian nani ba kasak lukisa witin ba pat balan. Baibil ba wisa: “Naha diara nani sut na lika Kraist balaia kan ba tukinka apia sa, bamna rait pali ba lika Kraist sika” (Kolosi 2:17 LRW 1974). Baku sin, liliaka yua kum kum ba Baibil mapara daukanka nani bri ba mita, Jehova witniska nani ba naha liliaka yua nani kulkras:

  •  Janucá. Naha liliaka ba Jerusalem ra Ju nani tempelka Gâd mihta ra kli mangkan yua ba kupia kraukaia dukiara kan. Ban sakuna, Baibil wisa Jisas ra Prîs Wihta baku wahbi sakan kan bara “witin prîs warkka dauki tintka watla ba lika kau pain bara kau kasak aihwa sa; baha ba upla nani mita paskras sa, tânka ba lika, naha tasba dukia apia sa” (Hibru Nani 9:11). Kristian nani ba lukisa, Jerusalem tempelka watlika ra spirit lainka ra baha tempelka ba mangkan sa.

  •  Rosh Hashaná. Ju kalindarka ra mani bilara pas yua ba. Patitara, naha liliaka ra Gâd ra sakripais kau pain nani yabi kan (Kulki Kaikanka 29:1-6). Ban sakuna, Jisas Kraist ba Misaya baku, “sakripais daukaia ba bara diara mana luha yaia lâka ba, kli daukan kabia apia” ra lakan (Daniel 9:26, 27). Baha mita, baha sakripaiska nani ba Gâd mapara danh kulkanka âpu sa.

•   ¿Rilidian sâtka manis asla taki liliaka dauki ba yawan tâ baikisa ki?

   Baibil smalkanka ba: “¿Nahki lalukra kum sip lukras uplika kum wal asla kabia ki? Bara diara kum mapa ra sin sip apia sa Gâd tempelka ba aidul nani wal prakaia” (2 Korint 6:15-17).

   Jehova witniska nani ba upla sut wal pain kaia trai munisa, bara wala nani kasak luki ba sin rispik munisa. Ban sakuna, rilidian sâtka manis asla taki liliaka dauki ba tilara dimi tâ baikras. Tila wina kum kum kaikbia.

   Rilidian bilara kulkanka tara bri uplika kum apia kaka yua kum rilidian sât sât bri uplika nani aikuki mayunaia lâka nani ba. Patitara piua ra, Gâd ai nisanka ra idan nani dimi kan tasbaya ra dimbia brih wan taim, ai napakanka nani ra win: “Witin nani wal [...] bara ai gâdka nani wal sin, kupia kumi takaia wisi aisi lâ daukpara. [...] Ai gâdka ra kra wih puram suni mayunma kaka, baha ba man nani kauhankam kabia tiwaia lâka ra” (Impakan Sturka 23:32, 33). Baku ba mita, Jehova witniska nani ba naha sât liliaka nani ra tâ baikras sa:

  •  Loi Krathong. Naha Tailandia uplika nani liliaka na, “upla nani ba dus wahia nani wal baskit lupia nani paskisa. Bahara kiandil dusa nani bapisa, baha ningkara lî purara mangkisa. Upla nani ba kasak lukisa naha ‘duri lupia’ nani ba diara saura wan munaia dukia nani sut brih wisa. Baku ba ra, Buda awala un ra ai mina taiban ba witin nani mapara holi sa, bara naha liliaka ra ai kupia krauki banhwisa” (Encyclopedia of Buddhism [Enciclopedia del budismo]).

  •  Kuntri Aiska ra Kupia Lakaia Yua. Naha liliaka dukiara Papúa Nueva Guinea piriudikuka nina The National ra gabamint ra kulkanka tara kum ba naku aisan, “naha liliaka ra dimi uplika nani ba kristian kasakka lukan lâka ba alki bri banhwisa”. Baku sin naku aisan, naha liliaka ba “kuntrika bilara kristian lâka ba tâ baikbia kupia bukisa”.

  •  Vesak. Naha ba Buda uplika nani mapara liliaka kau tara sa. “Naha liliaka ra Buda aisubanka yua ba, param marikan yua ba bara gâd kum ra takan yua ba ai kupia krauki banhwisa” (Diccionario de religiones comparadas).

   Baibil wina bapanka briras rilidian tnatka nani wal dauki liliaka nani ba. Rilidian tâ uplika nani ra Jisas mita win: “Baku man nani bui Gâd lâka ba bahki kulkram, man nani lâmka nani nina blikaia dukiara”. Baku sin witin nani ra win, ai mayunra nani ba bahki sa “upla lâka atia sa bamna” (Matiu 15:6, 9). Jehova witniska nani ba naha smalkanka nani kasak kulkisa, baha mita naha liliaka nani daukras:

  •  Epifanía (Timkat apia kaka Los Reyes Magos). Naha liliaka ba slilma tânka aisi kaiki nani Jisas ra wih kaikan piua, apia kaka Jisas ra tahbi daukan yua ba kupia kraukaia dukiara daukisa. Buk tara kum wisa, naha liliaka ba “dus nani tangnika baiwi piua ra, lî bara awala nani gâdka nani mayunaia dukiara idan nani liliaka dauki kan ba, kristian lâka wal asla prakan” (The Christmas Encyclopedia [Enciclopedia de la Navidad]). Naha liliaka wal wilkanka bri Etiopía liliaka Timkat ba, “ai uplika nani ba kasak kulkisa” (Encyclopedia of Society and Culture in the Ancient World [Enciclopedia de sociedades y culturas del mundo antiguo]).

  •  Meri Heven ra Uli Wan Liliaka ba. Jisas yaptika Meri ai wîna tara aiska heven ra uli wan lukanka ba naha liliaka bapanka sa. Rilidian nani praki kaiki tânka aisi bukka kum ba naha lukanka dukiara wisa, “400 mani nani piua ra naha liliaka lukanka bal takan” bara “Testament Raya ra aima kumi sin naha lukanka dukiara aisaras sa”.

  •  Meri Kwihra Tiwan Yua Liliaka ba. Kiatalic bukka tara kum ba Meri kwihra tiwan yua liliaka dukiara naku aisisa: “Naha liliaka bapanka ba yawan Baibil wina dairik sip sakras, bara smalkanka ba klir pali tânka marikaia sip apia sa”. Baha mita, rilidian smalkanka kum sa.

  •  Cuaresma. Universal ilustrada europeo-americana bukka tara kum wi ba baku, naha liliaka dauki piua ra upla nani ba pasin ra ai saurka dahra sakisa bara plun piras. Baibil las bukka ulbi danh takan wina 200 mani luan ningkara, wibia kaka “325 manka wina” naha liliaka daukaia tâ krikan. Naha liliaka pas yua, Miércoles de Ceniza dukiara sim bukka ba naku wisa: “1091 manka ra Benevento ra Urbano II mita adar yaban, baha yua ra lalukra nani sut ba daukanka tnatka kum baku yamhpus mangkbia”.

  •  Meskel. Naha Etiopía liliaka ra Vera Cruz —wibia sa kaka, dus prihni Jisas ra saban ba— kaina kir ra pauta angki dans pulisa” (Encyclopedia of Society and Culture in the Medieval World [Enciclopedia de las sociedades y culturas en el mundo medieval]). Ban sakuna, Jehova witniska nani ba Gâd mayunaia dukiara dus prihni yus munras sa.

•   ¿Upla kum, asla takanka kum, apia kaka kuntri tukinka kum ra mayunanka yabi liliaka kum sa ki?

   Baibil smalkanka ba: “Dawan [Jehova] naku aisisa: ‘Saura pali kabia baha uplika ra ai kupia wina tnaya ai laki ba, ai lukanka ba upla nani ra kasak luki ba, witin nani wina hilp briaia pliki ba’” (Jirimaya 17:5).

   Jehova witniska nani ba upla wala nani ra lukisa, bara witin nani dukiara ai pura sunisa. Sakuna naha sât liliaka yua nani ra tâ baikras:

   Gabamint tâ bri uplika kum apia kaka kulkanka tara bri uplika kum ra mayuni liliaka ba. Wan yamnika ra luki, Baibil ba naku wisa: “Man nani upla ra kasak lukpara, upla ba praprura sa. Rayaka ba wan wingka puhbra kumi baman sa” (Aiseya 2:22). Baha mita Jehova witniska nani ba naha sât liliaka daukras. Tânka kum wibia kaka, king kum apia kaka kwin kum aisuban yua liliaka ba daukras sa.

   Kuntri plakinka wal wilkanka bri liliaka nani ba. Jehova witniska nani ba Kuntri Plakinka Yua ba kulkras. ¿Dîa muni kulkras? Kan Baibil ba wisa: “Aidul nani wal prawaia apia” (1 Jan 5:21 LRW 1986). Upla kum kum lukisa plakin ba aidul kum apia sa, bara mayunaia dukia sin apia sa. Sakuna sturi tânka kakaira kum nina Carlton Hayes ba “naiwa piua ra kuntri bilara liliaka nani dauki ba” dukiara aisi naku win: “Kuntri plakinka ba mayunra lâka yabaia dukiara tukinka kau tara kum sa.

   Upla holi kum ra mayunra yabi liliaka nani ba. Gâd ra kasak luki waitnika kum apastil Pita ra ai lula krikan taim, ¿witin dîa daukan? Baibil ba naku wisa: “Pita mita alki buki, win:—Minam ra bus, yang na upla, sin man wal baku” (Apastil Nani Sturka 10:25, 26). Pita bara apastil wala nani sin, witin nani ra mayunra yabaia aima kumi ra sin swiras kan. Baha mita, Jehova witniska nani ba upla kum ra holi kulki liliaka nani tilara dimras sa. Naha liliaka nani tilara sa:

  •  Holi nani Sut Yua. Kristian lâka dukiara tânka mariki bukka tara kum wisa, “holi nani sut ra kulkanka yabaia dukiara” naha liliaka ba daukisa. Baku sin wisa: “Naha kupia kraukanka dukiara tânka nani aman laki kaikisa taim, bapanka pali ba sip sakras sa”.

  •  Guadalupe ra Mairin Holi Param Takan Liliaka. Naha liliaka ba “México kuntrika kaina kahbi mairka” ra mayunra yabisa, bara upla nani ba kasak lukisa baha mairka ba Meri, Jisas yaptika. Bara wisa, 1531 ra insla dadaukra kum ra ban wina param takan. (Enciclopedia Guadalupana).

  •  Upla nani ai Uplika Holi ra Mayuni Yua Liliaka ba. Tânka nani mariki bukka tara kum wi ba baku, “ya uplika ai luhpia ra tahbi daukan ningkara upla holi kum nina mangkisa kaka, witin ra mayunra yabaia liliaka daukisa”. Baku sin wisa, “naha yua ba kristian baku kasak rispik munaia sa” (Celebrating Life Customs Around the World​—From Baby Showers to Funerals [Costumbres de todo el mundo para celebrar la vida: desde baby showers hasta funerales]).

   Tasba bisniska nani apia kaka pulitik lâka wal wilkanka bri liliaka nani ba. Baibil ba wisa: “Kanra yamni sa, Dawan [Jehova] ra man kasak lukaia, upla ra kasak lukaia ba watlika ra” (Lawana Nani 118:8, 9). Jehova witniska nani ba upla nani mita naha tasba trabilka nani wapnika mangkaia sip sa lukras, baha mita naha tasba bisniska nani apia kaka pulitik lâka ra tâ baiki liliaka nani tilara dimras. Naha liliaka nani tilara sa, Wahma Tiara nani Yua ba apia kaka Mairin nani Yua ba. Baku sin, Pri Takan Yua Liliaka apia kaka naha liliaka sâtka wala nani sin kulkras. Kau ni, Gâd Kingka lâka mita naha tasba trabilka nani sut wapnika mangkbia kasak lukisa, kiamka wala nani ra misbara kaikaia lâka bara kasak apia lâka baku (Roman 2:11; 8:21).

•   ¿Liliaka sâtka kum ba kiamka daknika kum, apia kaka kuntri kum ba wala nani ba wal kau purara sa lukanka ba tâ baikisa ki?

   Baibil smalkanka ba: “Gâd mapa ra upla sâtka kumi upla sât wala ba wal aihka apia sa, sakuna witin pain kulkisa ani nisanka witin ra sibrin luki bara diara pain sin dauki ba” (Apastil Nani Sturka 10:34, 35).

   Jehova witniska nani ba iwi kuntrika nani latwan kaikisa, sakuna kiamka daknika kum apia kaka kuntri kum wala ba wal kau purara sa lukanka tâ baiki liliaka nani tilara dimras sa.

   War daknika nani ra mayunra yabi liliaka nani ba. Jisas ba kupia kumi lâka blikan, baha mita ai disaipilka nani ra win: “Waihlam nani ra latwan kaiki bas bara rau mai sauhki nani dukiara sin puram suns” (Matiu 5:44). Baha mita Jehova witniska nani ba suldawa nani ra mayuni liliaka nani tilara dimras. Naha liliaka nani tilara sa:

  •  Anzac Yua ba. Bîla nani tânka mariki bukka kum ba wisa “Anzac bîla ba tânka sa Australia bara Nueva Zelanda aiklaklabra daknika nani nina sa” bara “piua lui ba ra, Anzac yua ba aiklaklabra pruan nani ra kupia kraukaia yua kum takan sa” (Historical Dictionary of Australia [Diccionario histórico de Australia]).

  •  Aiklaklabra nani War wina Tawi Balan Yua ba (Kupia Kraukaia Yua, Kupia Kraukaia Sandika bara War ra Pruan Nani Kupia Kraukaia Yua). Wan piua dukiara aisi bukka tara kum ba wisa naha nani yua ra “war ra pruan apia kaka tawi balan suldawa nani dukiara” liliaka nani daukisa.

   Kuntri kum ra diara tara kum takan apia kaka kuntri wala karnika wina pri takan yua kulki liliaka nani ba. Jisas ai disaipilka nani ra win: “Yang naha tasba wina apia sna ba baku, baha nani [...] ba sin naha tasba wina apia sa” (Jan 17:16). Jehova witniska nani ba ai kuntrika dukiara diara manis lan takaia wilin sa, kuna naha sât liliaka nani ra tâ baikras sa:

  •  Australia Kuntrika Yua ba. Tânka mariki buk tara kum ba naha liliaka dukiara wisa, “1788 ra Inglan suldawa nani ba ai plakinka mangki marikan, Australia ba ai karnika mununhtara kan ba. Bara baha yua dukiara naha liliaka ba daukisa” (Worldmark Encyclopedia of Cultures and Daily Life [Enciclopedia Worldmark de las culturas y la vida diaria]).

  •  Guy Fawkes Yua ba. “1605 ra Guy Fawkes ba katolik uplika nani aikuki, bum nani wal king Jacobo I ra ikaia trai munan. Baha yua ba kuntri aiska ra kupia kraukaia dukiara naha liliaka ba daukisa”. (A Dictionary of English Folklore [Diccionario de folclore inglés]).

  •  Kuntri Wala Karnika wina Pri Takan Yua ba. Kuntri wala karnika wina pri takan yua ba kulkaia dukiara, kuntri kum kum nani ba naha liliaka daukisa.

•   ¿Bla lâka, rug lâka apia kaka daukanka tâski wala nani mariki liliaka kum sa ki?

   Baibil smalkanka ba: “Kan piua nani ailal luan ra idan nani dîa daukan ba, sim dukia man nani dauki kapram, baku bamna saura daukaia laik taki ba ra iwi kapram, brinka saura nani ra, bla lâka ra bara pata pira binka nani ra, diranka kum ailal pali, bara aidul tâski nani ra sakahkram” (1 Pita 4:3).

   Naha smalkanka ra kulki ba mita, Jehova witniska nani ba bla lâka bara daukanka tâski nani mariki liliaka nani ra tâ baikras. Jehova witniska nani ba ai pânika nani wal taim luaia ba yamni kaikisa. Kum kum ba rum diaia wahbi sakisa, pitka lui lika diras. Naha Baibil smalkanka bîla walaia karna trai munisa: “Baku bamna, pi banhwisma sapa, di banhwisma sapa, dîa dîa daukisma sapa, sut ba Gâd prana dukiara dauki bas” (1 Korint 10:31).

   Baha mita, Jehova witniska nani ba Baibil yamni kaikras daukanka nani ra tâ baiki liliaka sâtka nani ra dimras. Naha nani tilara sa Ju nani liliaka Purim ba. 500 mani nani yawan piua nina ra Ju nani ra swaki sakan ba kupia kraukaia dukiara naha liliaka dauki kan, sakuna nanara daukanka tâski nani mariki liliaka tara kum sa. Ju nani dukiara aisi bukka tara kum ba wisa, naha liliaka tâ baiki uplika nani ba “sinska tiwbia kat rum di sa, waitna mairin baku kwala dimisa, bara bin tara nani daukisa”.

 Âu. Baibil ba smalkisa wan pamalika nani diaura kasak luki kabia sin, sut ra latwan lâka bara rispik lâka marikaia sa (1 Pita 3:1, 2, 7). Upla kum Jehova witniska takisa taim liliaka kum kum tilara dimras ba tâwan, sam taim ai pamalika nani ba ai kupia sauhkaia, sari ai dara walaia, apia kaka mapara buaia sip sa. Baha mita Jehova witniska nani ba trai munisa, ai pamalika nani ra latwan kaiki ba marikaia, dîa muni liliaka kum kum ra dimras ba tnatka pain nani wal tânka marikaia, bara piua wala nani ra witin nani aikuki taim luaia.

 Apia. Jehova witniska nani ba kasak lukisa upla kumi bani ba dîa daukaia ba silp wahbi sakaia sa (Jasua 24:15). Upla sut ra rispik munisa, diaura kasak lukbia bara dîa sât rilidianka bri kabia kra sin (1 Pita 2:17).