Alemania kuntrika bara nazi karnika mununhtara kan kuntrika nani ra, Jehova witniska nani ba 35,000 baku iwi banhwi kan. Holocausto piua ra baha wina 1,500 Jehova witniska nani ba prui banhwan. Tila wina kum kum nahki prui tiwan sapa tânka ba nu âpu sa. Ban tânka pliki kaiki ba ra, an prui banhwan numbika ba bara nahki prui banhwan ba sip sa chens takaia.

•  ¿Nahki prui banhwan?

•  ¿Dîa muni nina bliki rau sauhkan?

•  ¿Anira prui banhwan?

•  Silak watla ra ikan Jehova witniska nani sturka

•   Silak watla ra ikan. Alemania kuntrika bara nazi karnika mununhtara kan kuntrika nani ra, Jehova witniska nani 400 ra silak watla ra ikan. Aihkika ba lâka daukan pruaia, bara nana dakban. Wala nani ra lâ daukraskira pistal wal sabi ikan, apia kaka pami ikan.

•   Silak watla ra rayaka karna brin. Jehova witniska nani 1,000 kau pura nazi silakka watla nani ra pruan. Taibi munan prubia ba kat wark karna daukaia, apia kaka rau munan, plun bla, kauhla, siknis kum kum tâka mita prui banhwan, bara daktar luaia swiras kan ba mita sin prui banhwan. Wala nani ba Tasba Aiska Sekan Warka Tara danh takan taim, silak watla wina pri sakan, kuna rau sauhkan kan ba mita prui banhwan.

•   Tnatka wala nani. Jehova witniska kum kum ra rum kum ra mangki, puisin kiawalbia yan. Daktar nani ba witin nani ra puisin wal sabi iki kan.

 Jehova witniska nani ra nina bliki rau sauhkan, kan witin nani Baibil dîa wi ba kat alki dauki kan ba mita. Nazi nani diara kum kum Baibil lâka mapara ba daukbia taibi muni kan taim, witin nani apia win, bara wahbi sakan “Gâd bîla ba kau walaia [sa] upla nani ra lika apia” (Apastil Nani Sturka 5:​29). Kaisa kaikaia witin nani tnatka wâl ra baha daukanka marikan ba.

1.   Pulitik bisniska nani tilara dimras kan. Naiwa piua ra Jehova witniska nani tasba aiska ra dauki ba baku, nazi karnika mununhtara iwi kan Jehova witniska nani sin, pulitik bisniska nani tilara dimras kan (Jan 18:36). Baha mita witin nani naha dukia nani ba dauki banhras kan:

   •   War aiklabanka nani tilara dimaia, bara tnatka wala nani ra sin tâ baikaia (Aiseya 2:4; Matiu 26:52).

   •   Iliksan nani yua ra but munaia, apia kaka nazi asla takanka nani ra dimaia (Jan 17:16).

   •   Hitler bara ai plakinka ra mayunra yabaia (Matiu 23:10; 1 Korint 10:14).

2.   Baibil smalkanka nani ba brih alki daukan. Baibil smalkanka nani brih alki daukaia adar yabras kan, kuna Jehova witniska nani ba naha dukia nani ban dauki kan:

   •   Gâd ra mayunaia dukiara asla aidrubaia (Hibru Nani 10:24, 25).

   •   Baibil wina upla ra smalkaia, bara ulbi sakanka nani upla mihta ra kahbaia (Matiu 28:19, 20).

   •   Ai walka nani ra kupia pihni lâka bara latwan lâka marikaia, baku sin Ju nani ra (Mark 12:31).

   •   Ai kasakka lukan lâka swibia pramis taki wauhkataya kum ra ai nina ulbi mangkaia apia (Mark 12:30).

 Maestro kum Robert Gerwarth ba Jehova witniska nani dukiara naku win: “Nazi karnika mununhtara kan kuntrika nani ra, witin nani ra baman ai kasakka lukan lâka tâwan nina bliki rau sauhkan sa”. a Silak watla ra uplika wala nani kan ba Jehova witniska nani daukanka ba kaiki tara kulkan. Jehova witniska nani ra kaiki, silak watla ra Austria wina waitnika kum ba naku win: “Witin nani ba war aiklabanka ra waras. Upla ra ikaia watlika ra witin nani ra ikbia kau pain sa lukisa”.

•   Alba baku wark karna daukaia taibi muni pliska nani ra. Jehova witniska nani aihkika ba, alba baku wark karna daukaia taibi muni pliska nani ra prui banhwan. Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück bara Sachsenhausen ra baha pliska nani bâra kan. Sachsenhausen ra baman Jehova witniska nani 200 pruan sa.

•   Silak watla nani ra: Jehova witniska kum kum ra silak watla bilara rau muni ikan. Wala nani ba makabi walanka nani dauki kan piua ra uba rau munan ba tâka pruan.

•   Ikaia pliska nani ra. Berlin-Plötzensee, Brandeburgo bara Halle/Saale silakka watla nani ra Jehova witniska nani manis ra ikan. Baku sin ulbanka kum kum wisa, plis 70 nani bâra kan Jehova witniska nani ra ikan ba.

•  Nina: Helene Gotthold

   Ikan pliska: Plötzensee (Berlin) tawanka

   Helene ba marit kan bara luhpa wâl bri kan, bara aima ailal witin ra alkan. 1937 manka ra witin ra taibi makabi wali kan piua ra, uba rau munan ba mita ai bibika lus tiwan. Diciembre kati yua 8, 1944 manka ra, Plötzensee (Berlin) tawanka silakka watla ra nana dakbi ikan

•  Nina: Gerhard Liebold

   Ikan pliska: Brandeburgo tawanka

   Mayo kati yua 6, 1943 manka ra Gerhard nana dakbi ikan, witin mani 20 bri kan. Mani wâl luan ra, sim silakka watla ra ai aisika ra sin nana dakbi ikan kan. Gerhard ba ai pamalika bara marit takai kan mairka ra, las wauhkataya ra naha bîla nani ulban: “Gâd karnika âpu kan kata, yang naha yabalka painkira bâk sip wapras kaia kapri”.

•  Nina: Rudolf Auschner

   Ikan pliska: Halle/Saale tawanka

   Septiembre kati yua 22, 1944 manka ra Rudolph nana dakbi ikan, witin mani 17 bri kan. Witin las wauhkataya ra ai yaptika ra ulbi win: “Muihni lakri manis naha yabalka bâk wapan, bara yang sin baku daukamni”.