Jehova witniska nani kasak trai munisa wan pamalika bara wan lama uplika pamalika ba asla lâka ra iwbia. Gâd mita pamali ra paskan, baha mita pamali baku asla lâka ra iwaia lâka ba tara kulki banhwisa (Blasi Sturka 2:​21-​24; Epesus 3:​14, 15). Gâd ai bîla Baibil bâk smalkanka nani wankisa, naha nani ba tasba aiska uplika nani ra hilp munisa marit lâka liliakira kum bribia, bara asla lâka ra iwbia dukiara.

 Pas ba trai muni banhwisna Baibil smalkanka nani ba wan rayaka ra alki daukaia, naha smalkanka nani ba hilp wan munisa maya mairin apia kaka maya waitna pain kum kaia, bara aisa yapti warkka ba pain daukaia (Sins Lâka 31:10-​31; Epesus 5:⁠22–​6:4; 1 Timoti 5:8). Baku sin pamali bilara upla kum rilidian wala bri kabia kra sin, Baibil hilp munisa pamali aslika lâka bri ba kau karna daukaia (1 Pita 3:​1, 2). Tânka kum baku kaisa kaikaia ai maritka Jehova witniska takan ningkara upla kum kum ba dîa aisi ba:

•   “Marit taki banhri wina pas 6 manka bila ra uba unsabi banhwi kapri, bara danh sip apia baku wan dara wali kan. Kuna mayi mairin Ivete Jehova witniska takan taim, kau latwankira takan, bara wihka bîla kaikan lâka kau mariki kan. Witin baku chens takan ba mita wan maritka lâka swaki sakan.” (Clauir, Brasil kuntrika wina)

•   “Mayi waitna Chansa, Jehova witniska nani wal Baibil stadi takaia tâ krikan taim, yang mapara buri, kan luki kapri witin nani ba pamali lâka ba sauhki kan. Kuna kakaira taki wari ba ra kaikri raitka pali ba Baibil ba wan maritka lâka ra yamni munisa.” (Agness, Zambia kuntrika wina)

 Baku sin, King lâka sturka smalkaia warkka bâk, wan lama uplika nani ra hilp munisa kaikaia nahki Baibil ba pamali bilara naha tnatka nani ra hilp munaia sip ba:

•   Maya waitna apia kaka maya mairin pain kum pliki sakaia

•   Marit taki pas manka ra trabil nani nahki pura luaia

•   Ai mula yapti bara ai dapna wal nahki asla lâka ra iwaia

•   Lalah nahki pain yus munaia

•   Unsaban lâka ba swiaia

•   Wan walka ra padin munaia lan takaia

•   Luhpa nani ra wapni lâka ra smalkaia

 Wel raitka pali ba sam taim takaia sip sa, 1998 manka ra Sofres kampanika ba naha tânka dukiara laki kaiki naku maisa pakan, marit 20 wina kumi ba, tila wina kum ai rilidianka chens muni Jehova witniska takan ba tâka trabil tara nani brin.

 Jisas ba win ai nina blablikra nani ba, ai pamalika bilara sam taim trabil bribia (Matiu 10:32-​36). Patitara piua ra sturka nani dukiara tânka laki kakaira Will Durant ba naku aisan, Roman kingka nani piua ra wi kan “kristian takaia lâka ba pamali nani aslika lâka ba sauhki kan” a bara naiwa piua ra sin sam taim, Jehova witniska nani mapara baku aisisa. Kuna, ¿rait pali Jehova witniska nani ba naha sât trabilka nani bukisa ki?

 Jehova witniska nani pamali aslika lâka sauhkisa tânka ba dukiara, Eurup Kuntrika ra Upla Raitka Dukiara Wark Taki Lâ Watla Tara ba naku aisan: Aima aihkika ra pamali bilara witnis apia nani ba blahwanka nani bukisa, kan witin nani ba “ai uplika wahbi sakan rilidianka ba pain kaikras ba mita alki bribia want apia sa, bara ai uplika ai raitka bri ba sin rispik munaia want apia sa”. Lâ Watla Tara ba naku sin aisan: “Naha sât trabilka ba pamali ailal brisa tila wina kum ai rilidianka chens munisa taim; baha mita Jehova witniska nani ra baman baku takras”. b Kuna naha sât trabilka nani tilara iwi kabia kra sin, Jehova witniska nani ba karna trai muni banhwisna naha Baibil smalkanka ba alki daukaia: “Upla kumi ra sin saurka tâwan pana saura munpara. [...] Man nani sin trai kaiks, sip sma ba kat, upla sut wal kupia kumi lâka ra iwi kaia” (Roman 12:17, 18).

 Jehova witniska nani ba marit takaia dukiara naha Baibil smalkanka ba alki daukisa: Marit wal takbia uplika ba “lalukra kaia” nit sa, wibia sa kaka, yawan wal sim kasakka lukan lâka bri uplika wal baman marit takaia sip sa (1 Korint 7:​39). Naha Gâd smalkanka ba alki daukisa taim yamnika ailal brisa. Tânka kum baku, 2010 manka ra Journal of Marriage and Family ulbi sakanka ra pîska kum ra naku aisan: “marit kum, sim rilidianka bara kasakka lukan lâka sim sat brisa taim” lilia lâka bara asla lâka ra iwisa. c

 Ban sakuna, Jehova witniska nani ba aima kumi ra sin upla nani ra wiras, ai maya Jehova witniska apia sa kaka, ai maritka wina dakwi takaia. Baibil ba naku smalkisa: “Wan muihni kum ai maya mairin kum brisa, bara mairka ba lalukra apia sa, sakuna ai kupia kumi luki waitna ba wal ban brih iwi kaia lukisa kaka, wan muihnika ba mairka ba ra swiaia apia sa” (1 Korint 7:​12, 13). Naha Baibil smalkanka ba Jehova witniska nani sin alki daukisa.