Yawan Jehova witniska baku pulitik bisniska tilara dimras, kan Baibil smalkanka nani ra wan bapanka brisa. Yang nani pulitik daknika mapara buras sa, pulitik daknika uplika nani dukiara but munras, gabamint ra wark kum briaia dukiara iliksan nani tâ baikras sa bara gabamint ba tawan ra chens nani daukbia dukiara tilara ra sin dimras. Pulitik bisniska tilara dimaia apia ba dukiara Baibil smalkanka kum kum ra wan lukanka ba bapi brisa. Baha smalkanka nani tilara sa:

•   Yawan Jisas ra nina blikaia sa, witin ba pulitik bisniska tilara dimras kan (Jan 6:​15). Jisas ba ai nina blablikra nani ra win: witin nani ba “naha tasba wina” kaia apia sa, baha mita pulitik daknika kum ra sin tâ baikaia apia sa (Jan 17:14, 16; 18:36; Mark 12:13-​17).

•   Gâd kingka lâka ra wan kasakka lâka yabaia sa, naha gabamintka dukiara Jisas ba naku aisan: “Naha king lâka sturka yamni na tasba aiska ra smalkan kabia” (Matiu 24:14). Naha kingka lâka ra tâ baiki ba mita yang nani pulitik daknika kumi sin tilara dimras sa, wan kuntrika bilara kabia kra sin. Kau ni Gâd kingka lâka aimakaia sa dukiara upla nani ra smalkaia warkka ba alki brih daukisa (2 Korint 5:​20; Epesus 6:​20).

•   Pulitik bisniska tilara dimaia apia lâka ba pri lâka wankisa, iwanka natka sât sât bri uplika nani ra wih smalkaia dukiara. Yawan dîa aisi ba bara dîa dauki ba wal marikaia trai munisa, yawan Gâd kingka lâka ra baman kasak luki ba, bara naha kingka lâka baman naha tasba aiska trabilka nani ba wapnika ra mangkbia (Lawana Nani 56:11).

•   Yawan pulitik bisniska tilara dimbia kaka, tasba aiska ra wan aslika lâka bri ba ra ambuk munaia sip sa (Kolosi 3:​14; 1 Pita 2:​17). Kan naha tâka mita pulitik bisniska tilara dimi rilidianka nani ba asla lâka ra iwras sa (1 Korint 1:​10).

 Gabamint nani ra rispik lâka mariki banhwisna. Pulitik bisniska tilara dimras kabia kra sin, Gabamint lâka nani ra rispik muni banhwisna. Baha mita Roman 13:1 smalkanka ba alki brih dauki banhwisna, baha Baibil tikska ra wisa: “Upla sut ba wan tasba wihtka nani ra bawan kaia sa”. Naha smalkanka yawan alki brih dauki ba mita lal mana aibapi banhwisna, gabamint dîa wi ba yawan alki daukisa, bara tawan yamnika ra luki gabamint diara kum wahbi sakisa kaka yawan alki brih daukisa. Aima kumi ra sin yang nani gabamint mapara buras . Yawan naha Baibil smalkanka ba alki brih daukisa “Tâ bri nani bara wihta nani sin sut” ba dukiara wan pura sunaia sa, kau pali wan pura sunaia sa smalkaia warkka daukaia prika lâka bri ba wan mihta dakbia apia ba dukiara (1 Timoti 2:​1, 2).

 Upla nani pulitik bisniska nani tilara dimbia sapa silp wahbi sakaia sa, bara dîa wahbi saki ba yang nani rispik muni banhwisna. Tânka kum baku iliksan dauki piuara yang nani mapara buras bara upla nani wih but munaia wisa taim yang nani ai kaina prakras sa.

 ¿Yawan pulitik bisniska tilara dimaia apia lukanka bri ba raya sa ki? Apia pali. Apastil nani bara pas kristianka nani ba sin naha lukanka bri kan. Naha lukanka dukiara buk kum ba naku aisisa: “Gabamint ra kulkanka yabaia ba pas kristianka nani ba lâ kum baku kaiki kan, ban sakuna witin nani ba pulitik bisniska tilara dimras kan” (Beyond Good Intentions—A Biblical View of Politics [Lukanka pain nani brisa talia kabia kra sin. Pulitik dukiara Baibil lukanka ba]). Baku sin patitara piuara Baibil tânka laki kakaira kum ba nina Orígenes ba win: “Pas kristianka nani ba gabamint bilara wark kum briaia ba saura pali kaiki kan”.

 ¿Yawan pulitik bisniska tilara dimaia apia lukanka bri ba upla nani ra saura munisa ki? Apia pali. Gabamint ba ai sringka briaia apia sa, kan yang nani Jehova witniska nani ba kupia kumi pliki uplika nani banhwisna. Kaisa tânka kum laki kaikaia: Ucrania kuntrika ra Ciencias skulka tara kum ba, Jehova witniska nani pulitik bisniska tilara dimaia apia lukanka bri ba dukiara naku aisan: “Ban kra upla manis ba naha lukanka ba pain kaikras sa, bara naha tâka mita sin nazi gabamintka ba Jehova witniska manis ra silak watla ra mani ailal dingkan”. Baku sin skul tara ba ai ulbanka ra naku aisan: “Rusia kuntrika ba Jehova witniska nani ra nina bliki rau sauhki kan piua ra sin witin nani ba lâ nani rispik muni kan, wark tatakra painkira banhwi kan, nasla bara kampani nani warkka dauki kan piua ra, witin nani ba kasak lâka ra ai warkka dauki banhwi kan, baku sin aima kumi ra sin witin nani ba gabamint mapara buras kan”. Ulbanka ba naku aisi tnata prakan: “Jehova witniska nani ba dîa luki ba bara dîa dauki ba wal aima kumi ra sin kuntri ra bara upla nani ra sin saura munras sa”.