MAYO KATI 23, 2018
Italy
Universidad Padua ra tala yus munras aparitka nani dukiara aidrubanka tara daukan ba
ROMA tawanka (Italia kuntrika). Noviembre kati yua 24 praidi, 2017 manka ra, daktar bara lâ tânka kakaira nani ba Universidad Padua ra asla aidruban, naha universidadka ba Italia kuntrika ra universidad almuk nani tila wina kum sa. Naha aidrubanka lalka ba “Ai wîna tara ra tala mangkbia want apia nani dukiara ¿daktar nani tnatka wala yus munaia sip sa ki? Blood Save 2017”. Naha aidrubanka ba Italia kuntrika ra upla wîna tara yamnika dukiara wark taki asla takanka, bara upla wîna tara tânka kakaira nani asla takanka 25 wina tâ baikanka ba brin.
Daktar Luca P. Weltert
Patitara wina aparit tara dauki kan taim, upla wîna tara ra tala mangkaia ba, ai rayaka swaki sakaia dukiara nit pali kan luki kan. Naha aidrubanka tara ra aisasara manis ba baha lukanka mapara aisan. Roma European Aspitalka wina upla kupia aparit muni daktarka Luca Weltert ba win: “Yawan kaikan sa wîna tara ra tala mangkaia ba upla ra saura munisa, bara aima ailal ra nit apia sa”.
Naha aidrubanka ra tâ baikan daktar Weltert bara daktar wala nani ba, upla ra aparit muni pat mani ailal brisa, bara tânka nani sin plikan ba mita las kat kaikan, upla wîna tara ra tala dingkisa taim, ai sikniska wina rawaia karna munisa, aspital ra kau de ailal kaia nit kan, bara siknis wala nani sin alki kan. a
“Yawan kaikan sa wîna tara ra tala mangkaia ba upla ra saura munisa bara aima ailal ra nit apia sa” (Roma European Aspitalka wina, upla kupia aparit muni daktarka Luca Weltert).
Upla wîna tara ra tala dingkaia tânka nani plikan, bara tala yus muni aparitka nani uba mana ba mita, Tasba Aiska ra Upla Wîna Tara Yamnika dukiara Wark Taki Asla Takanka (OMS) ba 2010 manka ra maisa pakan, upla kum ra aparit munras kainara, ai wîna tara ra tala mangkaia apia dukiara program kum paskaia ba tânka tara brisa. Wibia sa kaka, naha programka ra upla wîna tara kaina kahbaia bara ai aparitka wina kau isti rawbia dukiara, tala yus munraskira tnatka wala nani pliki sakaia, daktar nani laki kaikaia sa. OMS asla takanka ba, Nisan nani Asla Takanka ra kuntri nani 193 ba naha programika alki daukbia kupia bukan.
Smasmalkra Stefania Vaglio
Roma tawanka Universidad Sant’Andrea Aspitalka wina, tala yus muni aparitka smasmalkra Stefania Vaglio ba wîna tara ra tala mangkaia dukiara upla nani dîa luki ba laki kaikan, bara win: pas taim upla kum ra aparit munras kainara, daktar nani ba laki kaikaia kan aspital ra prisant yaban talia bâra kan sapa. Sakuna nanara “baha tnatka chens takan sa. Kan daktar nani ba aparit bribia uplika talia yus munaia kau trai munisa”. Aparit kum daukisa taim pas luki ba “uplika yamnika ra, [...] baha mita kasak karna trai munisa uplika talia ba tikbia apia dukiara”. Baku sin smasmalkra Vaglio ba naku win, talia tikaia apia dukiara daktar nani dîa dauki ba “raitka pali ba uplika rawbia dukiara kau hilp munisa”.
Verona Universidad Aspitalka wina, upla wîna tara aparit muni daktarka Tommaso Campagnaro ba, upla wîna tara ra tala mangkras taim dîa sât yamnika nani bâra ba dukiara param aisan. 1990 manka wina biara aparitka tara brin uplika nani dahra, daktar nani dîa ulbi swin ba aman laki kaiki, witin dîa tânka brin dukiara naku aisan: “Tala yus munraskira aparit takan uplika nani ba, tala ai wîna tara ra mangkan uplika nani ba wal kau isti rawan bara kau wiria prui kan”.
“Tala yus munraskira aparit takan uplika nani ba, tala ai wîna tara ra mangkan uplika nani ba wal kau isti rawan bara kau wiria prui kan” (Verona Universidad Aspitalka wina, upla wîna tara aparit muni daktarka Tommaso Campagnaro).
Smasmalkra Anna Aprile
Aparit nani ra tala yus munaia watlika ra tnatka wala nani bâra ba tânka marikan ba mita, daktar Campagnaro bara aisasara wala nani ba, upla sut mawanra Jehova witniska nani ra ai tingkika lâka marikan. Universidad Padua wina aspital nani ra upla wîna tara raitka dukiara wark taki Anna Aprile ba naku aisan: “Yawan Jehova witniska nani ra tingki lukisa, kan witin nani tânka marikisa dîa muni upla nani ai wîna tara ra tala mangkbia apia wiaia sip ba. Baku sin hilp wan munan sa naha tânka dukiara aman lukaia bara trai munaia upla wîna tara ra tala yus munaia apia”.
“Yawan Jehova witniska nani ra tingki lukisa, kan witin nani tânka marikisa dîa muni upla nani ai wîna tara ra tala mangkbia apia wiaia sip ba” (Universidad Padua wina Aspital nani ra upla wîna tara raitka dukiara wark taki Anna Aprile).
Aisasara nani tilara, anestesia mangki daktarka, upla kupia daktarka, mairin wina tara tânka kaiki daktarka, tala tânka kaiki daktarka, bara upla dusa daktarka nani bâra kan. Witin sut ba sim lukanka bri kan: aspital nani ra tala yus munraskira, aparit daukaia yamnika nani kau taki ba ra, daktar nani, lâ tânka kakaira nani bara upla sut sin, tala yus munras aparit sâtka nani daukaia apia kaka briaia wilin kaia sa.
Universidad Padua Morgagni aidrubanka watla ra asla aidruban nani ba aisanka nani walisa.
Daktar Weltert ba naku sin win: “Upla wîna tara ra, wakia tara kum baiwan aparitka ba, aparit nani tila wina naha ba kau karna sa. [...] Naha aparitka ba tala yus munras daukaia sip sa kaka, aparit sâtka wala nani sin tala yus munras daukaia sip sa”.
a Tânka kum baku naha aidrubanka ra, Australia kuntrika ra dîa stadi takan ba tânka dukiara aisan, naha tânka ba Transfusion wauhkataya wina sakan sa, naha wauhkataya ra wîna tara ra tala mangkaia dukiara daktar nani ba tânka nani aisisa. Mani 6 bilkara wîna tara ra tala mangkaia watlika ra tnatka wala nani yus munaia programka ba, aspital tara 4 nani ra upla 605.046 nani wal yus munan sa, bara kaikan, baha aspitalka nani ra talia wina paskan saika nani ba 41% ra yus munanka iwan sa. Baha sim piua ra aspitalka ra prui kan nani ba 28% mâyara iwan sa. Baku sin upla nani aspital ra kaia kan piua ba 15%, aspital ra siknis alkaia 21%, bara kupia bara lal mabiarka pruki sikniska nani ba 31% mâyara iwan sa. Aspital nani ra naha programka yus munaia ba upla manis mapara ai sikniska wina rawaia hilp munisa, baku sin tala wal paski pilska nani kau wiria yus munisa, bara lalah sin wiria tikisa.