ABRIL KATI 10, 2015
Russia
Rusia kuntrika wina Jehova witniska kum ba 6,000 euros yabal ra kahwan sakisa, bara kli ai dawanka ra yabisa
SAN PETERSBURGO tawanka (Russia kuntrika ra). Noviembre kati 2014 ra, Jehova witniska kum nina Svetlana Nemchinova ba inbiluk kum bilara, 6,000 euros yabal ra kahwan kan ba sakan (naha ba 6,800 dalas kau pura praiska baku sa). Witin piua wihka lalahka dawanka plikan, bara las kat uplika mihta kat yabaia sip kan. Svetlana Nemchinova dîa daukan ba tilivisan, radiu, bara Internet ra takan.
Vologda tawanka ra Svetlana Nemchinova ba yabal nani klin muni wark takisa. Moscu tawanka kat, naha tawanka wina 450 kilometro nani (280 millas) brisa. Wark taki kan taim inbiluk kum tasba ra kahwan kan ba kaikan. Bara baha bilara lalah tara kum bâra kan. Svetlana bara ai luhpia yumhpa wal utla sirpi kum 12 metros cuadrados nani (129 pies cuadrados) bri ba ra iwisa, ban sakuna witin wisa: “Aima kumi sin lalahka yang duki ra briaia lukras kapri. Isti pali lalahka dawanka ra lukri nahki ai dara wali kan ba; ban kra kasak sari ai dara wali kan”.
Lalahka dawanka pliki sakaia dukiara Svetlana Nemchinova ba lalahka sakan lamara uptis watla kutbanka nani ra wauhtaya manis praki kan. Sakuna upla kumi sin pana ansa munras kan. Inbilukka ra lalahka sakan bankka wauhkataya sin bri kan ba mita, baha bankka ra lalahka ba brih wan. Bank uplika nani ba tânka pliki kaiki nu takan, lalahka dawanka nina ba Pavel Smirnov. Aima manis trai muni, bank uplika nani ba lalahka dawanka ba wal aisaia sip kan, bara maisa pakan Svetlana Nemchinova ba ai lalahka yabal ra sakan ba.
Rusia piriudikuka Premier wi ba, ai ulbanka kum ra naku win: “Svetlana diara tara kum daukan baku lukras sa. Witin ba kristian sa bara yu bani Baibil aisi kaikisa”. Svetlana Nemchinova ba win, Matiu 7:12 dîa wi ba dis alki daukan: “Baku bamna, upla wala nani man nani ra dîa mai daukbia brin mai dauki ba baku, man nani sin dauks”.
Svetlana Nemchinova Pavel Smirnov ra lalahka yaban ningkara lilka kum alkisa.
Pavel Smirnov ba lilka paskaia lan sa, bara pent sâtka raya kum paskan. Naha pentka tânka plikaia dukiara masin raya kum atkaia want kan, baha dukiara lalah apahki kan. Svetlana Nemchinova dîa daukan ba dukiara witin naku win: “Svetlana ra nahki tingki lukisna ba, bîla kum ra sip wiras. Witin dîa daukan ba ra lukuna taim, upla ra kasak lukaia sip sna ba ai marikisa. Diara kau kum wiaia want sna: ‘Gâd kum bâra sa’”.
Maisa papakra nani, kau nu takaia want sma kaka naha numbika nani ra winaia sip sma:
Tasba aiska wina winaia sip sma numbika ba: J. R. Brown, Maisa Pakanka Apiska, tel. +1 718 560 5000
Rusia kuntrika ra winaia sip sma numbika: Yaroslav Sivulskiy, tel. +7 812 702 2691