NUEVA YORK (Estados Unidos). 2017 ra Universidad Míchigan ba wina Aspital Infantil C. S. Mott upla nani ra makabi walan, tuktan nani wîna aiska yamnika dukiara, Stech kuntrika ra aisa yapti nani lukisa, ai luhpia nani trabilka tara skul watla ra bri ba sika, skul tuktika wala nani saura munisa taim.

Stech kuntrika ra Upla Wîna Tara Main Kaikaia Dukiara Wark Taki Apiska ba ai Internet pliska stopbullying.gov ra, dîa muni upla manis baha dukiara uba lukisa sapa tânka marikisa. Stech kuntrika ra stadika kum takan ba ra 30% skul tuktika nani ba baha trabilka brisa.

David Semonian Nueva York kuntrika wina Jehova witniska apiska ra daknika wina aisan: “Tuktan trabilka tara skul watla ra bri ba sika tuktan wala nani mita saura muni ba. Tuktan nani skul watla ra tuktan wala nani mita saura muni taim, bara trabil manis pamali bilara bri ba dukiara luki, Baibil wina nahki yamnika sakaia sip ba sir munisa. Tânka kum baku tasba aiska ra pamali milian nani ba, mani 5 luan ra paskan lilkika Aiklabraskira sip sma trabilkam ba pura luaia wina yamnika sakan”.

Naha lilkika 4 minit baku bri ba, Jehova witniska nani Internet pliska jw.org ra kaikaia sip sa, bara 280 bîla aisanka nani ra bîla lakan sa, baha tilara sain bîla 30 nani sin brisa.

Colombia tawanka Universidad CES ra, tuktan bara wauhma tiara nani sinska yamni kaia dukiara stadi taki Natalia Cárdenas Zuluaga ba naku wisa: “Aiklabraskira sip sma trabilkam ba pura luaia lilkika ra dîa smalki ba uba laik kaikri, kan kuntriki ra sam taim, aisa yapti nani ba ai luhpia nani ra smalkisa, ‘ai trabilka nani pura luaia dukiara aiklabaia nit sa.’ Naha lilkika ra dîa smalki ba, skul watla ra trabil bri tuktika nani ra hilp munbia lukisna. Baku sin, skul watla ra tuktan nani trabilka dukiara, tânka kum klir marikisa: ya kabia sin wala nani wal sât wala sa kaka, tuktan wala nani mita saura munaia sip sa. Tuktan nani naha ai tânka briaia ba âuyapah lâka yabisa bara hilp munisa wala nani wal sât wala ba kaiki, saura ai dara walaia apia dukiara”.

Corea del Sur kuntrika Universidad Sungkyunkwan wina smasmalkra Jun Sung Hong ba, naku wisa: “Ulbi daukan lilkika kum ba mita, upla kaikaia kupia bukisa. Kau pali, skul watla ra trabil bri tuktika nani mapara yuskira sa. Tuktan nani ra luki paskan ba mita, witin nani lilkika ra dîa kaikan ba ai kupia kraukaia kau isi sa”.

Tasba aiska ra skul watla ra tuktan nani trabilka dukiara wark taki asla takanka wina, smasmalkra Shelley Hymel ba naku aisan: “Naha lilkika ra tuktan nani ra dîa smalki ba yamni sa, baku sin, dîa stadi taki aulna ba wal asla sa. Aisa yapti, maestru, apia kaka upla wala nani ba, skul watla ra taki trabilka dukiara tuktan bara wauhma tiara nani wal aisabia taim, naha lilkika ba hilpka tara kum kabia”.

David Semonian ba naku aisi tnata prakisa: “Tuktan nani skul watla ra trabil bri ba dukiara yawan uba lukisa, bara naha lilkika ra dîa smalki ba, witin nani ra hilp munbia bîla kaikisa. Lilkika ra smalki ba baku, tuktan nani ba ai trabilka dukiara kasak luki uplika kum wal aisaia sa, kau pali ai aisa yapti nani wal, apia kaka skul smasmalkra nani wal. Baku sip kabia, hilpka nit ba briaia. Tuktan kumi sin, skul watla trabilka mapara yakan buaia apia sa”.

Maisa papakra nani, kau nu takaia want sma kaka naha numbika ra winaia sip sma:

David Semonian, Maisa Pakanka Apiska, +1-845-524-3000