Anira Tasba Uplika Nani Na Impakisa Ki?

Trabil tara bara diara saura daukanka nani taki ba, yu bani sturka baku Tasba aiskara takan sa. Man nu sma baha ba dia muni taki sapa?

LAMAN LAKA APU. Markit nani ra bum mangkan baiwi ba. Kul smasmalkrika bara tuktika nani ra kul watla bila kat bulit wal sabaia lulki ba. Aisika nani dara walras, luhpia nani ra impliki brihwi ba. Kakna pali ra mairin bara dama nani ra dukya impliki ba sin.

RILIDIAN DAUKANKA NANI BA. Serts nani ba war aiklabi daknika nani ra ta baiki bangwisa. Rilidian ta uplika nani mita, upla wala witin ai rilidianka uplika apia nani ra ikisa wisi dahra sakisa. Serts ta uplika nani mita tuktan nani ra rug muni ba yukuki brisa. Upla nani serts ra uba wiria wi ba mita; prias watla nani ba atkisa.

TASBA NA SAUHKISA. Lalah brinkira nani ba mita dus nani ba kau isti klaki dan daukuya. Upla umpira nani taun sirpi ra iwi nani ba mita, dus nani ba klaki dan apu daukuya pauta mukaia dukyara. Li karma nani ra taski dauki ba mita li ba diaia apia ra tawisa. Kampani tara nani wina taski yuika nani lulki ba bara inska alkaia dukyara tnatka raya yus muni ba mita inska miskaia pliska nani ra sauhkisa. Pasa ra taski dauki ba mita, pasa klin wan wînka aubaia sin sip apia sa.

 UPLA NANI BA UMPIRA IWISA. Aprika kuntrika kum kum nani ra upla mana ba mayara pali aibapisa. Wark ta bri uplika kum kum nani uba gridi ba mita ai bisniska nani ba yaban kriwisa, baha mita wark tatakra ailal nani ra wark apu swisa. Wark pakaia dukyara lalah mangki nani ra, ai rayaka aiska apahkanka ba kunin muni implikisa.

PLUN WAUHWANKA NANI. Tasba aiskara, upla 8 handat milian nani baku plun piras yapi bangwisa.

WAR NANI. 1900 ba wina 2000 kat manka bilara war aiklabanka nani ba mita 100 milian nani purkara upla rayaka tikan. Nisan nani bum raya paskanka ailal bri ba mita Tasba ra iwi uplika sut ra aima ailal ra iki tikaia sip sa. Kuntri nani bila kat war aiklabanka taki ba. Sibrin dingki rau muni uplika nani ba, Tasba aiskara pât kum bangwisa.

SIKNIS SAURA NANI. 1918 manka ba wina, siknis kum takan gripe española nina maki kan ba mita Tasba aiskara upla 21 milian nani ra ikan. Sida ba naiwa pyua ra “siknis kum kau saura ba mita upla ailal ra ikisa”. Kiansa bara kupia sikniska pâtka nani ba Tasba aiskara takisa.

Man naha sturka nani taki ba dia tanka bri sapa trai kaiks nu takaia. Bahki takisa ki? Apia kaka tanka wala kum brisa?

 [Wahya 5 Bakska ba]

Rait pali Gâd ba yawan dukyara lukisa ki?

Upla nani Tasba ra diara saura ailal takan kaiki ba mita, sari laka ra iwisa, bara lus tiwanka tara brin nani ba mita sin, makabi walisa baha nani dukyara Gâd ba dia muni diara kum daukras sapa.

Au, Gâd ba yawan dukyara lukisa. Witin ta brin laka kasak ba wankisa bara trabil nani wina ingni wan saki laka ba sin wankisa (Matyu 11:​28-​30; 2 Timoti 3:​16, 17). Bara rau munan laka, prura bara siknis nani ba tnata mangkaia dukyara witin pat ta krikan sa. Baha daukanka nani ba marikisa witin upla nani dukyara luki ba, kuntri kumi dukyara baman apia, ban sakuna nisan, kyamka bara bila aisanka sut dukyara (Wark nani 10:​34, 35).

Dia praiska kat yawan ba Gâd ra lukisa? Man nu sma heven bara Tasba Papaskra ba ya sapa? Ai nina ba dia sapa? Bara nu sma upla nani dukyara diara daukaia lukanka bri ba? Naha makabi walanka nani ansika ba Baibil ra sa, baha ra wan wisa nahki witin rau munan laka, prura bara siknis nani ra tnata mangkai ba dukyara. Yawan dia daukaia sa naha yamnika nani ba briaia dukyara? Yawan nit sa papaskra ra kakaira takaia bara witin dia daukaia luki bara sin. Sakuna witin ra kasak lukras sa kaka, nahki yamnika ba bribia ki? (Jan 3:​16; Hibru nani 11:6.) Baha purkara, aitani sa ai lâka nani ba bila walaia (1 Jan 5:3). Man wilin sma ki baha ba daukaia?

Dia muni naiwa pyua ra Gâd mita naha dukya nani swin taki ba tanka nu takaia dukyara, aitani sa Baibil ra laki kaikanka kum bara naha ulbanka wahya 15 ra diara kum kulkanka tara bri ba tanka briaia.