Bila Walan Bara Swakwi Taki Bangwan

JISAS KRAIST mita, Ju uplika nani Jerusalem tempelka paskan ba kat ai kupia mangki bri kan nani ra, kaina manas win, baha iwanka tnatka ba sauhki tikan kabia dukyara. Ahkia yua pali takbia ba wiras kan, sakuna baha takras kainara sain nani takbia ba dukyara param win. Baha mita trabil pliska wina plapaia dukyara ai disaipelka nani ra aihwaki bangwi kabia win.

Jisas bui kaina manas win: “Ani pyua Jerusalem taunka ba suldawa nani mita kutbi bri kabia bara, damra wali bas sauhki tikan kaia ba baila sa”. Baku sin witin kli naku win: “Diara taski ban swin tiwi ba dukyara; man nani naha na plis hulikira ra balan sa kaikma bara  [ . . . ] Judia wina upla nani ba il nani ra plapaia sa”. Baha mita Jisas bui ai disaipelka nani ra win, swakwi takaia sa kaka, minitka ra plapi bangwaia sa. Bara diara sakaia dukyara ai watla ra kli dimbia apia win (Luk 21:​20, 21; Matyu 24:​15, 16).

Mapara buanka wihka brikan ba tnata mangkaia dukyara, 66 Y.P. (Yawan Pyua) manka ra, Cestio Galo ba Roman suldawika nani ba ta brih Jerusalem mapara wan, bara witin nani dimi, tempel ba kat sin kutbi brin. Baha mita taun bilara turbanka tara takan. Ya nani aihwaki kan ba, ai tanka bri bangwan sauhki tikanka ba pat balan kan. Sakuna, witin nani plapi bangwaia sip munan ki? Cestio Galo ba maisapahkras ai suldawika nani ba saki brihwan, bara Ju aiklaklabrika daknika nani mita, witin nani ra nina bliki bangwata. Baha pyua ra sika, Jerusalem bara Judia wina laiura plapaia awarka kan!

Roman suldawika nani ba mani kum luan bilara, Vespasiano bara ai luhpia waitna Tito karnika munuhtara kli bal, kuntri aiska bilara war aiklabi bangwan. 70 Y.P. manka ta krikan pyua ra, Roman uplika nani ba, Jerusalem tnaya kir ra dus tatwa wal sabi kutbi laki bri kan, baha mita taun uplika nani ba plapi swakwaia sip apia kan (Luk 19:​43, 44). Taun bilara, dakni aipaswanka sat sat bara kan ba pana pana aiklabi prui tiwan. Taka wala nani ba Roman nani mita iki tikan bara wala nani ra alba baku brihwan. Taun bara tempel ba sauhki tikan. Josefo, pas handat manka bilara, Ju uplika nani sturka aiulbra kan ba bila, baha pyua ra upla nani milian kum pura pât wauhwi prui bangwan, bara baha wina aima kumira sin tempelka ba paski bangwras kan.

 Kristian nani ba, 70 Y.P. manka ra, Jerusalem ra bangwi kan kata, witin nani ra sin iki tikaia kan apia kaka alba baku brihwaia kan taun uplika wala nani ra daukan ba baku. Sakuna baku takras kan, kan baha pyua ra sturi aiulbra nani bara kan ba bila, ya nani Jisas win kan ba kat walan ba, Jordan awalka lama tanira il nani bara kan ba ra plapi bangwan wisa. Sakuna tilara kum kum nani ba Pela, Perea Tasbaia kum ba ra takaski bangwan. Bara witin nani aima kumira sin kli Judia ra taui waras kan. Jisas maisapahkan ba ra bila walan ba mita ai rayaka swakwi taki bangwan.

Man maisapahkanka kasak kulkanka bri nani wina bali ba wali daukisma ki?

Maisapahkanka aihkika nani ba rait takras pyua ra, upla nani mita sut ba kunin baku kaikisa. Ban sakuna, maisapahkanka yabi ba wali daukaia ba, wan rayaka ba prura wina swaki sakaia sip sa.

Tanka kum ba 1975 ra Saini kuntrika ra Tasba nikbaisa wisi maisapahkanka kum daukan. Taun ta uplika nani dia daukaia kan ba dauki bangwan, bara upla nani bila wali daukan ba mita ailal ai rayaka swaki sakan.

Lih wainhka kati 1991 ra, Filipinas kuntrika ra upla nani Pinatubo ilka tnayara iwi kan nani ba kaiki bangwan ilka ba wina nahki kiasma bara yahmpus ailal lulki kan ba. Ilka ba ra kati wal aihwaki kaikan ningkara Philippine Institute of Volcanology and Seismology ba bila trabil bara kabia win, baha mita upla ailal ra plis wala ra laki bangwan. Titan li kati 15 ra, bin tara kum baiwan walan, baha ningkara ilka ba yahmpus ailal pasa purara lulkan uli wan bara Tasba purara sin yahmpus ailal kauhwan. Upla nani bila walan ba mita ai rayaka swakwi taki bangwan.

Baibil ba Tasba ra upla iwanka nani na, tnata aimakai ba dukyara sin wan maisapahkisa. Yawan baha tnata yua nani ra iwi bangwi ba mita bara tnata aimakai ba kau lamara balan kaikisa mita sin. Man aihwakisma ki? Pât pliska ba wina laiura kaia tambaikisma ki? Yawan pât nani pyua ra iwi ba mita, walkam nani ra maisapahkisma ki, ai dara walbia dukyara?

[Wahia 20 lilkika ba]

Upla ailal nani, Pinatubo ilka baiwi yahmpus lulkan ba wina swakwi takan, maisapahkan kan ba bila wali

[Wahia 21 lilkika ba]

Jisas win ba bila walan kristianka nani ba 70 Y.P. (Yawan Pyua) manka ra Jerusalem ra sauhkan ba wina swakwi taki bangwan