“Bila Wali Bangwras Kan”

MAISAPAHKANKA nani ba pulan dukya baku kaikaia ba sauhki tikan laka ra wan brihwaia sip sa.

1974 ra, Australia kuntrika ra Darwin taunka ba ridi taki kan liliaka kum brih bangwaia, sakuna prari kum aula ba dukyara maisapahkanka kum daukan. Ban sakuna taunka ba ra pat 30 mani brikan trabil kumi sin takras. Dia muni naha prarika na rait takaia kan? Upla aihkika ba pât apu kabia luki kan, sakuna pasa tara kum krawi watla bahna bara tnaya nani batakan kat ai dara wali bangwan. Yua wala titan kaikan taim, taunka ba sut sauhkan kan.

Yahbra kati 1985 ra, Armero (Colombia ra) taunka lamara, il kum baiwan pyua ra, ais nani bahna ra kan ba slilwi yakawi drapapa laya taki, upla 20.000 nani ra pura biki ikan. Maisapahkras kan takan ki? Apia! Ilka tatatwi kan ba, upla nani pat kati ailal takan kaiki kan, sakuna aihkika ba, baha wal pat lan taki bangwan kan. Baha dukyara taun ta uplika nani ra kaina manas maisapahkan kan, sakuna ta uplika nani mita, taun uplika nani ra maisapahkras kan. Baha watlika ra, radiu bara prias watla nanikku upla nani ra maisanihki kan. Baha tihmika ra bin tara wal baiwan walan. Man baha ra katma, dukyam nani ba swisi si plapaia kapram ki? Trabilka ba takras kainara upla nani wiria baman bila wali bangwan kata.

Tasba dukyara stadi takan uplika nani ba, ani pliska kat Tasba nikbanka takaiba dukyara rait wan wisa, sakuna witin nani dia awarka ra takbia ba, nu apu bangwisa. 1999 ra, Tasba nikbanka nani mita 20.000 upla nani Tasba aiskara ikan, witin nani ailal ba, aima kumira sin luki bangwras kan baku takbia ba dukyara.

Gâd wina bui maisapahkanka nani bali ba ra man nahki kaikisma ki?

Baibil ba kaina manas wan wisa, tnata yua ra dia nani takbia ba dukyara, “Noa yua nani ra” lukbia wan kupia kraukisa. “Baha yua nani ra, lisamra tara ba kainara”, upla nani ba dia luki ba kat dauki bangwi kan, bankra rau munan laka nani ailal pawan kan bara luki bangwi kan. Gâd mita ai  napakanka Noakku upla nani ra maisapahkan, ban sakuna “witin nani ai dara walras kan, lisamra tara ba bal sut brihwan ba kat” (Matyu 24:​37-39). Man bara katma, bila walaia kapram ki? Naiwa pyua ra bila walisma ki?

Man dia daukaia kapram Sadam taunka, Ebraham tubanka Lat iwi kan ba pyua ra iwi kapram kata? Taunka tani ba paradais kum baku kan, pawanka nani sin manas bara kan. Bara Lat pyua ra upla nani ba lukraskira iwi kan; “plun pî kan, diara dî kan, diara pana, pana atki kan, insla mangki kan, ai watla nani sin maki kan”. Sakuna taunka uplika nani ba watauikira pali kan. Witin nani saura dauki kan bara, Lat mita saura kulkan ba, man sin baku kulkaia kapram ki? Gâd mita taunka ba sauhki tikaisa win bara, man bila walaia kapram ki? Lat ba puli aisisa lukaia kapram ki, ai dapnika nani lukan ba baku? Lat maîa plapi kan pyua ra ai nina ra taui kaikan ba baku, man ninam ra taui kaikaia kapram ki? Bankra wala nani ba Gâd maisapahkanka ba pulan baku kaikan, sakuna Lat Sadam wina takan pyua ra “pauta sulpur wal kasbrika pura wina auhwan, bara sut kat iki tikan” (Luk 17:​28, 29).

Naiwa pyua ra, upla aihkika ba bila wali bangwras sa. Sakuna pyu luan ra takan nani tanka ba Gâd Bila ra ulbi mangkan sa wan maisapahkanka kum baku yawan AIHWAKI BANGWI KABIA dukyara.

[Wahya 22 bakska ba]

Rait pali Tasba aiskara lisamra tara kum takan ki?

Mapara aisasara nani ailal ba bila, baku takras wisa, sakuna Baibil bila rait takan wisa.

Jisas Kraist pali sin naha dukyara kasak aisan, witin heven wina naha takan ba kaiki kan.

[Wahya 23 bakska ba]

Rait pali Sadam Gomora wal ra sauhki tikan ki?

Pyu luan taunka sturka dukya nani stadi taki ba ra baku marikisa.

Luan sturka ulban nani sat sat ra, naha takan ba dukyara aisisa.

Jisas Kraist bui baha sturka rait baku kulkan, bara Baibil bukka 14 ra baha takan ba dukyara aisisa.