“Diara Sut Purkara, Pana Pana [ . . . ] Latwan Kaiki Bas”

“Diara nani sut tnata yua ba pat baila sa. Baha mita, [ . . . ] diara sut purkara, pana pana uplikam ra latwan kaiki bas.” (1 PITA 4:​7, 8.)

 JISAS nu kan las awarka nani, ai disaipelka nani aikuki kaia ba mana tara kan, bamna witin pain nu kan ai disaipelka nani kainara dia takaia kan ba. Witin nani wark tara daukaia brikan, sakuna Jisas ra munan baku witin nani ra sin nina bliki misbara kaiki bangwaia kan (Jan 15:​18-20). Baha tihmika las kau witin nani aikuki kan pyua ra, witin nani ra kli kli kupia kraukan ‘pana pana ai walkara latwan kaiki kaia’ nitka brikaia ba dukyara (Jan 13:​34, 35; 15:​12, 13, 17).

₂ Apastil Pita, witin nani aikuki kan ba dia win ba tanka pain brin. Kaina tanira kau Jerusalem sauhkras kan pyua ra, witin wauhkataya ulban ba ra pana pana latwan kaikaia nitka bri kaia ba dukyara kristian nani ra naku ulbi maisapahkan: “Diara nani sut tnata yua ba pat baila sa. Baha mita, [ . . . ] diara sut purkara, pana pana uplikam ra latwan kaiki bas” (1 Pita 4:​7, 8). Apastil Pita aisanka ba tanka tara brisa ya nani “tnata yua nani ra” iwi ba dukyara (2 Timoti 3:1). Sakuna, ‘latwan kaiki kaia’ ba dia tanka sa ki? Dia muni upla wala nani ra latwan kaikaia sa? Yawan baha latwanka laka ba nahki marikisa ki?

‘Latwan kaiki kaia’ ba dia tanka sa ki?

³ Upla ailal mapara, latwan laka ba wan dara walanka kum ban wina takisa lukisa. Ban sakuna, Pita ba inipis latwanka laka dukyara aisaras kan, sakuna latwan laka kau tara ba dukyara aisi kan. 1 Pita 4:8 ra Latwan laka ulbanka ba grîk bila a–gá–pe ba wina ulbi lakan. Bara baha bila ba lâ kum ra alki brih ai kupia param wal latwan kaiki ba tanka sa. Naha tanka dukyara pliki kaikan ba naku aisisa: “Agápe latwanka laka ra yawan marikisa dia daukaia ba, wan dara walanka kum baman apia sa, wan kupia lukanka kum wankan diara dauki yaba tanka sa”. Kan wan wîna kat latwan kaikaia laka munuhtara iwi ba mita, aitani sa, wan kupia kraukaia Gâd lâka ra wan mariki ba baku upla nani ra latwan kaikaia (Blasi sturka 8:​21; Rom 5:​12).

⁴ Baha tanka ba wiras sa taibi wan munka latwan kaikaia, kan agápe bila ba, swapnikira laka ra latwan kaikaia dukyara aisisa. Bara Pita bila “pana pana wan uplika ra latwan tara kaiki kaia [tanka ba,“wan latwanka laka ba kau ilihwaia”] dukyara aisisa” (1 Pita 4:​8 Traducción del Nuevo Mundo de las Santas Escrituras [con referencias], wahya mina ulbanka sirpi ba kaikaia). a Yawan param kaikisa, latwan laka marikaia sa kaka, wan ta baikanka nit ba. Grîk bila wina “tara” lakan ba dukyara, upla kum lan pali ba naku aisan: “Plaplapra kum pura luaia pliska ba lamara auya taim, ai wakia nani sut karna drabi dauki ba, sîm baku tanka dukyara aisisa”.

⁵ Baha mita, upla kum kum ra baman latwan kaikaia apia sa, apia kaka yawan mapara ani nani kau isi ba baman daukaia apia sa. Bankra yawan mapara karna kra kabia sin, kristian latwanka laka ba taibi wan munisa wan kupia ba “kwaki” kau latwan kaiki kaia dukyara (2 Korint 6:​11-13). Param sa, yawan naha sat latwanka laka bri kaia sa kaka pakaia sa, sîm bal papulra kum kau pain puli kaia dukyara kau lan taki ba baku sa. Dia muni pana pana naha sat latwanka laka bri kaia ba aitani sa? Daukaia dukyara tnatka yuhmpa wan marikisa.

 Dia muni yawan pana pana latwan kaiki kaia sa?

⁶ Pas ba. “Kan latwan laka ba Gâd wina sa” (1 Jan 4:7). Naha daukanka painkira na Jehova wina aula, bara witin pas latwan wan kaikan. Apastil Jan ba naku aisisa: “Gâd yawan dukyara ai latwanka laka ba param marikan, witin ai Luhpia kumi pali brikan ba naha Tasba ra blikan bamna, bara baku mika Kraist ba mita yawan sut raya kaia laka bri kabia ba mata” (1 Jan 4:9). Gâd ba ‘ai Luhpia blikan’ upla baku iwi, smalki warkka ba tnata alki, dus kum ra prubia. Naha nani sut ba “yawan raya kaia laka” ba bribia dukyara daukan. Gâd naku pain daukan ba dukyara pana yawan dia daukaia sa ki? Jan ba naku ansika wankisa: “Gâd mita baku latwan wan kaikan kaka, yawan sin pana pana wan walkara latwan kaikaia sa” (1 Jan 4:​11). Jan ulbras kan: “Gâd mita baku man ra latwan mai kaikan ba mita”, ban sakuna: “Gâd mita baku latwan wan kaikan ba mita” ulban. Param sa, Gâd mita wan panika kristian wala nani ra latwan kaikisa kaka, yawan mita sin latwan kaiki bangwaia sa.

⁷ Walka ba. Yamni sa naha pyua nani ra pana pana latwan kaiki kaia ba, baku lika wan muihka nani nit bara yawan sip kabia ta baiki bangwaia, kan nanara “diara nani sut tnata yua ba pat baila sa” (1 Pita 4:7). Kan yawan “pyua karna nani ra” iwi bangwisa (2 Timoti 3:1). Tasba pâtka nani mita trabil wan muni ba, wan mapara buanka nani taki ba, prari, Tasba nikbanka nani bara diara wala nahamuna satka nani taki ba mita sin, yawan kau asla laka ra iwi kaia sa. Latwan laka ba mita asla wan prakbia bara wan kupia buki wan munbia “pana pana” main wan kaiki kaia dukyara (1 Korint 12:​25, 26).

⁸ Yuhmpika ba. Aitani sa wan walkara latwan kaiki kaia, baku lika yawan “Debil ra sans” yabia apia wan traika kaikaia (Epesus 4:​27). Setan ba aihwakisa wan panika nani (saurka, swapnika bara mistikka nani ba) wan mina prukanka walpaia ra lakaia. Upla kum sinskas sturka aisan ba mita apia kaka rispik laka kat daukras ba mita wan munka kli kangrigishan ra waia apia sa ki? (Sins laka 12:18.) Apia! Yawan wan muihka nani ra latwan kaikisa kaka baha mita wan ta baikaia sip sa kupia kumi laka ra Gâd dukya ba, “sut kumi baku” warkka dauki kaia (Sipanaia 3:9).

Nahki wan latwanka laka ba wala nani ra marikaia ba

⁹ Latwan laka ba wan watla bilara pas marikaia sa. Jisas bila, rait pali ai nina bliki uplika nani ba, pana pana latwan kaiki bangwi bara kakaira taki bangwbia win (Jan 13:​34, 35). Naha latwanka laka na kangrigishan bilara baman dauki kaia apia sa, ban sakuna utla bilara sin dauki kaia sa: ai maîa wal bara ai luhpia nani aikuki sin. Wan pamalika ra latwan kaikisa wan dara walaia baman apia sa; ban sakuna dauki marikaia sa.

¹⁰ Man nahki maîam ra latwan kaikisma ki? Maîa waitna ba ai maîa mairin ra rait pali latwan kaiki pyua ra, kulkanka yabisa saitra kabia bara upla nani tilara kabia sin, ai aisanka bara ai daukanka nani bakku marikisa. Bara witin ra kasak kulki, ai dara walanka nani bara lukanka nani ba sin rispik munisa (1 Pita 3:7). Ai maîa mairin yamnika ba taura mangkisa witin ai yamnika ba watlikara. Ai maîa mairin dara walanka, ai wîna tara nitka nani bara spirit nitka bri pyua ra yabaia dukyara dia sip ba kat daukisa (Epesus 5:​25, 28). Maîa mairin ba rait pali ai maîa waitna ra latwan kaikisa kaka “kulkaia” sa, bankra witin dia nit ba kat daukras kabia sin (Epesus 5:​22, 33). Baha purkara, ai maîa waitna ra ta baikisa bara bauikira laka ra diara nani ba dauki kaia sa, diara nani yabaia sip apia dukya ba makabras; baha watlikara ai  pamalika ba kau spirit warkka ba dauki kabia dukyara wal asla wark takisa (Blasi sturka 2:​18; Matyu 6:​33).

¹¹ Bara aisa, yapti nani, man nanika dia lukisma? Nahki luhpiam nani ra latwan kaikaia sip sma? Tnatka kum ra daukaia sip sma ba witin nani ra main kaikaia dukyara, wark karna takaia wilin kaia (1 Timoti 5:8). Ban sakuna luhpa nani ba plun, kwala bara utla kum want ba purkara diara wala kum nit bangwisa. Yawan witin nani ba Gâd kasakkira ra latwan kaiki dukya daukbia want sa kaka spirit brinka dukyara lan daukaia sa (Sins laka 22:6). Wibia sa kaka, pamalika ba Baibil stadi takanka ba, smalki taukaia ba bara kristian aidrubanka nani ba dauki kaia sa (Kli smalkan 6:​4-7). Kan pyu karna nani ra iwi ba mita naha nani ban dauki kaia ba sakripais takaia nit sa, wan luhpia nani spiritka brinka dukyara, yawan luki wan ta baiki ba latwan kaiki bangwi ba tanka marikanka kum sa. Ai luhpia nani yamnika dukyara luki ba baku dauki mariki bangwisa (Jan 17:3).

¹² Aitani sa aisa, yapti nani ba ai luhpia nani dara walanka nani ba yabi latwan laka marikaia. Tuktan nani ba kupia swapnikira sa baha mita witin nani ra latwan laka bri ba marikaia sa. Witin nani ra want ba wi latwan kaiki ba marikaia sa, kan baku daukma ba wal witin nani ra latwan kaiki kulkanka yabisma ba ai dara walbia. Kupiam paramkira ni kulkanka yabaia sma, baku witin nani nu taki bangwbia, man nani, aisika bui, witin nani nahki trai muni dauki bara kaiki kulkanka yabisma ba. Luhpiam nani ra latwan laka wal wapnika mangks, kan witin nani ra wapnika mangkisma pyua ra marikisma witin nani painka dukyara lukisma ba (Epesus 6:4). Naha latwanka laka marikisma ba mita sip daukisa pamali kum asla bara lilia iwi naha tnata pyua nani ra traika kaikanka nani balbia bara bapi buaia dukyara kau pain ridi kaia.

¹³ Latwan laka ba mita wan ta baikisa wala nani saurka ba ban swih tikaia. Wan kupia krauki kap Pita mita ai wauhkataya aisi kaiki uplika nani ra “pana pana latwan kaiki kabia” win pyua ra, dia muni daukaia ba dukyara tanka sin win: “Kan latwan laka ba mita saurka ailal ban swih tikisa bamna” (1 Pita 4:8). Saurka nani ‘swih tikaia’ ba, saura dauki ba yukukaia tanka apia sa, naha ba kangrigishan ta bri nani ra wiaia sa wapni mangkaia dukyara (Libait laka 5:1; Sins laka 29:24). Saura dadaukra nani ra swirka kli kli saura dauki, pâtkas nani dara walanka insauhkaia ba Baibil lâka mapara wi purkara, latwan laka luha tanka marikisa (1 Korint 5:​9-13).

¹⁴ Wan panika nani saurka bara mistik aihkika nani ba sirpi sa. Kan yawan sut ba, wan aisanka bara wan daukanka nani wal aima kum kum ra mistik taki wala nani ra kupia sauhki mina prukanka yabisa, baku ba mita yawan isti pali ki, wala nani swapnika ba param ra sakaia sa? (Jems 3:2.) Baku daukbia sa kaka kangrigishan bilara tuskanka nani brih balbia (Epesus 4:​1-3). Yawan latwan laka ba alki bribia kaka, wan panika saurka kum dukyara upla sut ra ‘dara kwahkbia’ apia (Lawana 50:20). Sîm simint bara pint wal utla tnaya kutbanka kum saura kan wal praki bri ba baku, latwan laka ba wala nani saurka praki brisa (Sins laka 17:9).

¹⁵ Latwan laka ba mita wan tukbia nit uplika nani ra help munaia. Kan tnata yua nani ra iwi ba mita pyu nani na kau saura takisa, bankra pyu kum kum ra, wan muihka lalukra nani ba diara nani nitka brih bangwi kabia (1 Jan 3:​17, 18). Tanka kum ba, kangrigishan bilara upla kum ai warkka lus tiwan apia kaka lalah trabilka tara brisa bara sa ki? Baku sa kaka, bankra yawan dia nani yabaia sip ba wal help munaia sa (Sins laka 3:​27, 28; Jems 2:​14-17). Pyarka almuk kum watla paskaia nitka brisa ki? Baku sa kaka aitani sa paski help munaia (Jems 1:​27).

¹⁶ Sakuna wan lamara iwi uplika nani ra baman latwan kaikaia apia sa. Yawan yu kum kum ra walisa Gâd napakanka nani kuntri wala ra nani ba, pasa tara, Tasba nik banka apia kaka taun bilara upla nani mita pât nani buki ba trabilka wauhwanka nani brisa. Bankra witin nani isti pali plun, kwala bara diara wala nani nitka bri kabia. Dia sat nisanka apia kaka kyamka kabia sin yawan ‘wan muihni nani ra latwan kaikisa’ (1 Pita 2:​17). Baku tnatka ra, patitara kangrigishanka nani baku, yawan sin wilin bangwisa upla wala nani ra ta baikaia dukyara upla asla paskanka nani dauki bara (Wark nani 11:​27-30; Rom 15:26). Yawan baku wan latwanka laka ba mariki pyua ra aikuki asla iwi ba kau karna daukisa naha pyua nani ra (Kolosi 3:​14).

¹⁷ Latwan laka ba mita wan tukbisa Gâd Kingka Laka sturka yamni ba upla wala nani ra smalkaia. Yawan Jisas daukanka ra lukaia sa. Dia muni witin smalki lan dauki kan? Witin upla kwara tara ba kaikan bara, uba umpira pali bangwi kan spirit brinka mapara bara, witin “sari pali lukan” (Mark 6:​34). Serts ta uplika kuninkira nani ba mita, witin nani ra spirit tanka rait ba smalki, bila kaikanka laka kasak ba yabaia watlikara, witin nani ra kunin muni main kaikras kan. Baha mita, witin ai kupia ra latwan luki umpira kaiki bangwan mita Jisas bui “Gâd King aimaki ba laka sturka ba” wal maisanihkan (Luk 4:​16-21, 43).

¹⁸ Naiwa yua ra upla ailal ra sin spirit laka mapara kunin muni main kaiki bangwras sa, baha mita witin nani ba bila kaikanka luha bangwisa. Yawan Jisas baku, pain wan dara walbia sa kaka latwan laka bara umpira kaikan laka ba mita wan tukbia upla kau rait aihwa Gâdka ra kakaira takras bara spirit brinka bri nani ra, Gâd Kingka laka sturka yamni ba smalkaia (Matyu 6:​9, 10; 24:14). Uba pyu kunhku ba mita, naiwa pyua ra smalki taukaia nit ba baku pyu wala ra nit apia kan (1 Timoti 4:​16).

“Diara nani sut tnata yua ba pat baila sa”

¹⁹ Wan kupia krauki kaia sa pana pana latwan kaiki kabia kau wan wiras kainara, Pita naku aisan: “Diara nani sut tnata yua ba pat baila sa” (1 Pita 4:7). Pyu kunhku bilara, Tasba saurakira na watlikara, Tasba kasakkira Gâd daukbia ba mangkbia (2 Pita 3:​13). Baku bamna, tawa dukya daukaia pyua apia sa. Jisas mita sin naku maisapahkan: “Bamna aman kaiki bas, Tasba brinka nani ba mita, bla laka nani mita bara naha Tasba trabilka nani mita sin yarka kupiam nani ba karna takbiara, baha yua kra damra walras kaprika mai alkbiara sia” (Luk 21:​34, 35).

²⁰ Baku ba mita, yawan dia sip ba dauki kap ‘aihwaki kaia ba dukyara’ bara dia pyua nani ra iwi ba dukyara wan auya sin tikaia apia (Matyu 24:42). Aihwaki bangwi kap Setan traika kaikanka nani sat sat bribalka, wan kupia ba diara wala nani ra mangki briaia apia dukyara. Naha Tasba ra latwan laka apu ba mita wan munka upla wala nani ra latwan kaiki ba swiaia apia. Diara sut purkara, Jehova rait aihwa Gâdka kau lamara wi bangwi kap, kan ai Kingka laka Kraist mihta ra mangkan ba bui, pat pali naha Tasba dukyara ai lukanka kasak daukan kabia (Param marikan 21:​4, 5).

[Wahia mina ulbanka]

STADI TAKAN BA MAKABI WALANKA NANI

• Jisas ai disaipelka nani tila wina mahka waia kan pyua ra, witin nani ra dia smalkan, bara yawan nahki nu sa Pita ba baha tanka pain brin ba? (Baiki sakanka nani 1,​2)

• ‘Latwan kaiki kaia’ ba dia tanka sa ki? (Baiki sakanka 3-5)

• Dia muni pana pana yawan latwan kaiki bangwi kaia sa? (Baiki sakanka nani 6-8)

• Nahki wan latwanka laka ba wala nani ra marikisa? (Baiki sakanka nani 9-18)

• Dia muni tawa dukya daukaia pyua apia sa, bara yawan dia daukaia luki bangwaia sa ki? (Baiki sakanka nani 19,​20)

[Wahia 29 lilkika ba]

Pamali kum asla ba kau pain ridi sa tnata pyua traika kaikanka nani mapara bapi buaia dukyara

[Wahia 30 lilkika ba]

Latwan laka ba mita wan tukbisa nit uplika nani ra help munaia

[Wahia 31 lilkika ba]

Gâd Kingka laka sturka yamni smalkaia ba, latwan laka marikanka kum sa