“Lâ Daukaia Awarka Ba” Balan Sa

BAIBIL bukka las Param marikan (Reveleshan) ba, insal kum heven lilapas ra pâli ba dukyara “naha lika ban kaiara smalkanka kum bri kan” bara witin ai bila baikra tara ni aisi kan: “Man nani Gâd ra sibrin luks bara mayunra sin yas, witin ba lâ daukaia awarka ba pât aimakan sa bamna” (Param marikan 14:​6, 7). “Lâ daukaia awarka” ra, Gâd lâ aisi daukbia ba, pyu kum kunhku pali kabia. Baha awarka tanka ba sika, yawan “tnata yua nani ra” iwi ba dukyara aisisa (2 Timoti 3:1).

“Lâ daukaia awarka” balbia ba, ya nani kasak laka ra latwan kaiki ba mapara sturi yamni kum kabia. Baha pyua ra, Gâd bui latwan laka luhakira nani bara rau mamunra nani ba mihta wina ai albika nani ra swaki sakbia.

Nanara, kau naha Tasba iwanka tnatka saurakira nani na sauhki tikras kainara “lâ daukaia awarka ba” ra, naku wan maisapahkisa: “Gâd ra sibrin luks bara mayunra sin yas”. Man baku daukisma ki? “Gâd ra kasak lukisna” wiaia baman apia sa (Matyu 7:​21-23; Jems 2:​19, 20). Gâd ra sibrin briaia lukanka laka ba mita, sip wan daukisa mayunra laka witin ra yabaia bara baha mita sin wankan diara saura nani ba wina laiura bangwi kaia (Sins laka 8:​13). Naha na wan kupia bukaia sa diara pain ra latwan kaikaia bara diara saura ra misbara kaikaia (Emus 5:​14, 15). Yawan Gâd ra kulkanka yabisa kaka, witin ra rispik tara wal walbia, baha mita diara kumi sin alki wan takaskaia apu kabia pyu bani ra Baibil ba aisi kaikaia. Yawan pyu bani witin ra wan kupia aiska wal kasak luki kabia (Lawana 62:8; Sins laka 3:​5, 6). Ya nani witin ra rait pali kulkanka yabi ba ai tanka brih bangwisa, witin ba heven bara Tasba na Papaskra sa, baha mita witin ai karnika paskanka aiskara mangki bri ba munuhtara latwan laka wal bauikira dimisa. Yawan naha dukya nani ra kau kulkanka yabaia sa kaka, takaskraskira dauki kap.

Lâ daukaia yua dukyara insal bui aisan ba, “Jehova yua” baku sin nina makisa. Patitara Jerusalemka ra naha “yua” ba baku takan kaikan kata, 607 Y.P.N. (Yawan Pyua Nina) manka ra, kan taun uplika nani ba Jehova mita ai prapitka nanikku maisapahkanka blikan ba wali bangwras kan; witin nani baha yua ba kau wihka kan lukan, sakuna ai rayaka nani ba pât ra dinki bangwan. Sakuna Jehova mita kupia krauki kan: “Pat baila sa [ . . . ] isti pali aula!” (Sepanaia 1:​14.) Patitara Babilunka ba sin “Jehova yua” ba kaiki bangwan, 539 Y.P.N. manka ra (Aiseya 13:​1, 6). Witin ai gâdka nani ra bara ai taunka walpa ni kutbankan nani ra uba kasak luki kan ba mita, Gâd prapitka nani bui maisapahki kan ba ra walras kan. Ban sakuna, wihka takaskras, tihmia kumira baha taunka karnakira na ra Midia bara Pirsia uplika nani mita batakan.

Yawan naiwa pyua ra dia takbia bila kaikisa? “Jehova yua” wala Tasba aiskara takai ba takbia bila kaikisa (2 Pita 3:​11-14). “Babilun Tara ba” dukyara sin pat lâka aisi daukan sa. Param marikan (Reveleshan) 14:8 ra, insal kum ba naku aisisa: “Pat kauhwan! Babilun Tara ba pat kauhwan sa”. Bara baha ba pat takan sa, baha mita witin naiwa pyua ra Jehova napakanka nani ra sip alki takaskras sa. Babilun watauanka bara war nani tilara dimanka ba param pali sakan sa, bara witin tnata yua ba baila pali sa. Baha taka mita, Baibil ba upla sut ra maisapahkisa: “[Babilun Tara] ba wina bal taks. Baku lika ai saurka nani ba aikuki brima apia bara ai pâtka tara nani ba sin mai alkbia apia. Kan ai saurka nani ba aipaswi taki kasbrika purara ba kat alkan sa, bara ai watauanka nani ba Gâd ai kupia ra bri kan” (Param marikan 18:​4, 5).

Babilun Tara ba dia sa ki? Baha sika rilidian iwanka tnatka Tasba aiskara bara ba tanka sa, bara patitara Babilunka markka ba brih bangwisa (Param marikan sapta nani 17, 18). Kaisa diara nani kum kum ra wal ai talika bri ba pliki kaikaia:

• Patitara Babilunka prîstka daknika ba kuntri pulitikka ra dimi karna pali wark taki  bangwi kan. Naiwa yua, rilidian ailal ra baku daukisa.

• Patitara Babilunka ra, prîst daknika nani ba pat pat war dauki bangwi kan. Naiwa yua ra, rilidian napakanka nani ba war aiklabi uplika nani ra blisin munaia dukyara taura bangwisa.

• Patitara Babilunka ba, ai smalkanka bara ai daukanka nani ba mita, nisan watauikira pali takan. Naiwa yua ra rilidian ta bri nani ba Baibil lâka nani ba purak lui bangwisa; baha taka ba mita, watauan laka ba ailal pali daukan kaikisa pasin bara serts uplika nani tilara. Baha purkara Babilun Tara ra, yabal mairka baku baibil ra kulki ba param marikaia aitani sa, kan Tasba dukya nani bara pulitik nani tilara dimi rug taki ba mita.

• Baibil ulbanka nani ba marikisa Babilun Tara ba “diara ailal brih swira luha laka ra iwi ba”. Patitara Babilunka ra, tempel nani ba Tasba bila yahpa brikan, bara prîst nani ba bisnis nani ailal brikan. Naiwa yua ra Babilun Tara ba, mayunaia pliska nani bri ba purkara, bisnis tara kum dawanka sa. Ai smalkanka nani bara lilia pulanka dauki nani ba mita, witin ra bara bisnis dauki uplika nani ra lalah ailal yabisa.

• Patitara Babilunka ra, aidul lilka nani bara sukia laka ba ailal pali bara kan; naiwa yua ra sin ailal pali bara sa. Prura ba rayaka wala ra luanka kum baku kulki bangwi kan. Babilun uplika nani ba, ai gâdka nani ra mayunaia dukyara tempel bara prias watla sirpi nani ailal paski brikan, sakuna Jehova ra mayuni uplika nani ra misbara kaiki kan. Naiwa yua ra, sîm naha daukanka bara lukanka nani ba, Babilun Tara ra daukan kaikisa.

Patitara pyua ra, Jehova mita pulitik bara war aiklabaia daknika nani karnika ba yus muni kan, ya nani ai kupia laka daukaia want apia kan ba mapara. Baku, Asiria uplika nani mita Sameria ra sauhki tikan 740 Y.P.N. manka ra; bara Babilun uplika nani mita Jerusalem ra sauhki tikan 607 Y.P.N.  manka ra. Ningkara Roman uplika nani mita kli Jerusalem ra sauhkan 70 Y.P. (Yawan Pyua) manka ra; bara Midia bara Pirsia uplika nani mita 539 Y.P.N. manka ra Babilun ra dakbi brin. Baibil ba kaina manas aisisa gabamint nani ba daiwan wailkira kum baku taki, “mairin rugkira” ba mapara bui, purara kauhwi, rau muni bara kwala luha swibia ​—wibia sa kaka, witin rait pali dia ba param ra sakbia​— bara witin ra aiska pali sauhki tikan kabia sin (Param marikan 17:16).

Sip kabia ki, Tasba ra gabamint nani ba baku daukaia? Baibil ba marikisa, Gâd bui “witin nani kupia ra” baha daukaia lukanka ba mangkbia (Param marikan 17:17). Tawa tawa dauki bangwbia apia, ban sakuna ban wina ai dara walras bara sibrin laka tara wal witin ra sauhki tikan kabia.

Man dia daukaia sma ki? Mamkabi wals: “Yang kau rilidian daknika kum smalkanka bara daukanka taski nani bri, Babilun Tara wal praki ba tilara sna ki?”. Bankra baku apia kabia sin, naha nani ra luki kaiks: “Witin lukanka ba nina blikisna ki?”. Ani ba Babilun Tara lukanka sa ki? Lâ kat iwaia apia tanka ba purara mangki brisa, bara Tasba painka dukya nani ra, lilia brinka nani ra kau latwan kaiki bangwisa Gâd ra latwan kaikaia watlikara, bara kupia lukras Gâd Bila ba bahki kulki bangwisa (diara tanka sirpi nani ra kat sin). Kau ansikam yabras kainara pain luki kaiks.

Jehova yamni kaikanka laka ba briaia sa kaka, aitani sa wan brinka nani, baku sin wan daukanka nani ba param marikaia yawan Babilun Tara ba tilara apia ba. Kau wihka takaskaia dukya apia sa, kan ban wina sauhki tikanka aula ba dukyara Baibil ba naku wan maisapahkisa: “Babilun, taun tara ba, sin naha walpaia  naku mai batakan kabia, bara upla kumi sin kli mai kaikbia apia” (Param marikan 18:21).

Sakuna kau diara nani takaia bara kabia. “Lâ daukaia awarka” ra, Jehova Gâd mita Tasba aiskara pulitik iwanka tnatka nani ra, gabamint nani ra bara ya nani heven Kingka laka Jisas Kraist mihta ra mangkan ba bila walras nani ra sut sin ai daukanka nani ba kat mana aibapaisa (Param marikan 13:​1, 2; 19:​19-21). Danyal 2:​20-45 ra, Babilun yua wina naiwa pyua kat pulitik karnika nani ra, lilka tara kum gul, silva, kapar, ayan bara slaubla wal paskan bakku tanka marikisa. Yawan pyua dukyara Baibil ba kaina manas naku win: “Kasbrika purara Gâdka ba king lâka kum bukbia ban kaiara sauhki tikan kabia apia”. Bara wan marikisa baha Kingka laka mita dia kau daukbia Jehova “lâ daukaia awarka” pyua ra: “King laka wala nani sut ra pura lubia, bara ban kabia ban kaiara” (Danyal 2:​44).

Baibil ba, ya rait aihwa Gâdka ra mayuni nani ra maisapahkisa “Tasba dukya nani ra” latwan kaiki bangwbia apia, wibia sa kaka, naha Tasba iwanka tnatka nani, rait aihwa Gâdka wina laiura kan dauki nani ba (1 Jan 2:​15-17). Daukankam bara daukaia lukisma nani ba man takaskraskira Gâd Kingka laka ra ta baikisma sapa marikisa ki? Baha Kingka laka ba rayakam ra taura brisma ki? (Matyu 6:​33; Jan 17:​16, 17.)

[Wahya 14 pas bakska ba]

Ahkia tnata yua ba balbia?

“Bila kaikras kaprika Upla Luhpia Waitna ba balbia.” (Matyu 24:44.)

“Aihwaki bas, [ . . . ] yua bara awarka ba sin kaikras sma bamna.” (Matyu 25:13.)

“Pyua pali bal aimakaia sa.” (Abakuk 2:3.)

[Wahya 14 sekan bakska ba]

Tnata yua ahkia aula ba nu sma kaka, rayakam ba sat wala kabia ki?

Gâd lâ daukaia yua ba, kau wihka takaskaisa nu sma kaka, man iwankam tnatka ba sat wala ra lakma ki? Man bila kaiki kapram ba wina, tnata pyua ba kau wihka ra takaisa kaikisma ba mita, man Jehova dukya daukisma ba wina minam swapan sa ki? (Hibru nani 10:​36-38.)

Yawan tnata pyua ahkia aula nu apu kaia ba, sans wankisa Gâd dukya dauki ba wan kupia aiska ni dauki ba marikaia. Ya ya Jehova ra kakaira bangwi ba, nu sa las yua kat Gâd ra kasak luki baku pulaia ba witin aihka painkira kaikbia apia, kan witin upla bani kupia ba kaikisa (Jirimaia 17:10; Hibru nani 4:​13).

Ya nani rait pali Jehova ra latwan kaiki bangwi ba, pyu bani ra witin ra pas taura mangkisa. Kristian nani ba upla wala nani baku wark taki bangwisa, sakuna yuikira takaia dukyara lika apia, ban sakuna ai nitka nani dukyara bara wala nani nit kaka hilp munaia dukyara lika (Epesus 4:​28; 1 Timoti 6:​7-12). Bara witin nani pulanka sunu nani ba sin dauki bangwisa lilia kaia dukyara, sakuna Tasba uplika nani dauki ba tnata luki daukras, ris takaia tnatka kum baku dauki bangwisa (Mark 6:​31; Rom 12:2). Jisas Kraist baku, witin nani Gâd kupia laka dauki ba dukyara lilia bangwisa (Lawana 37:4; 40:8).

Rait aihwa kristianka nani ba, raya iwi ban kaiara Jehova dukya daukaia brinka brih bangwisa. Baha brinka ba daswras sa, blisin wala nani briaia bila kaiki kan kau wihka takaskan kaiki ba mita.

 [Wahya 15 bakska ba]

Ya ba wan purara king aimakaia raitka brisa?

Dia muni Gâd mita pât wauhwanka ba ban wihka swin taki ba nu takaia sa kaka, yawan witin king aimaki ba dukyara blahwanka takan ba tanka briaia sa, wibia sa kaka, witin kau karnika tara pali bri ba dukyara.

Jehova ba Papaskra sa, baha mita, witin ba Tasba ba, bara Tasba ra iwi nani ba purara king aimakaia raitka brisa. Ban sakuna, Baibil ba tanka marikisa, blasi pyua wina upla sturka ta krikan pyua ra, Gâd king aimakaia raitka bri ba mapara namhpa namhpa lukanka mangkan ba dukyara. Setan Debil mita Jehova ra dusa kuhban, wan damika nani ra uba lâ karna mangki Ai lâka nani ba alki briras silp diara dauki bangwbia sa kaka, prui bangwbia win ba, kunin munan wisi. Bara Setan bila upla nani ba Gâd lâka nani ba swisi si silp diara dauki bangwbia sa kaka kau pain iwi bangwbia win (Blasi sturka, sapta nani 2, 3).

Mapara babura nani ba minitka ra sauhki tikan kata, Jehova karnika bri ba marikaia kan, sakuna witin ra dusa kuhban ba ansika param takaia apia kan. Baha mita, witin mapara babura nani ra ikaia watlikara ban swin, baku witin sip daukata paskanka sinskira nani ba, baha takan ba pyua wina dia nani takbia ba kaikbia dukyara. Baha daukanka ba mita pât wauhwanka nani ailal takan, sakuna aisubi takaia sanska sin wankan.

Baha purkara, witin mana kum tara aibapaia kan. Sakuna Jehova latwan laka aiska wal, aitani daukan ya nani ai Luhpia sakripraiska ra kasak luki bangwbia ba, saurka laka wina pri ai dara wali, paradais ra raya ban kaia laka ba bribia dukyara. Jehova prura wina kat sin witin nani ra kli bukaia sip sa.

Naha blahwanka na wapni mangkaia dukyara yaban pyu nani luan ba mita marikisa, Gâd napakanka nani ba trabil nani sat sat tilara, Gâd ra latwan kaiki ban bapi bui kaia sip bangwi ba dukyara. Gâd king aimakaia raitka bri ba bara upla nani ai kupia aiska wal witin ra latwan kaiki ba wapnika mangkaia ba nit pali kan paskanka aiska ba Gâd lâka ra kulkanka yabi kabia dukyara, baku apia sa kaka kupia kumi laka apu kabia. a

[Wahia mina ulbanka]

[Lilkika]

Tasba aiskara pulitik iwanka tnatka ba apu takbia