Naiwa Yua Ra Diara Taki Nani Ba Dia Tanka Brisa?

JISAS KRAIST win “tnata [yua] sainka” nani baku war, plun wauhwanka, siknis bara Tasba nikbanka nani bara kabia (Matyu 24:​1-8; Luk 21:​10, 11).

1914 ba wina, nisan nani tilara bara upla kyamka sirpi nani tilara sin, war nani takan ba mita, upla nani sturka ba sauhkisa. Naha aiklabanka nani ba serts lalka nani pulitik ra pat pat dimi ba mita takisa, bara kau bisi pali ra, sibrin dingki rau muni uplika nani Tasba aiskara takan ba mita sin.

Sins laka nani pawan, sakuna mani bani ra plun wauhwanka nani ba upla milian ra ikisa, bara Tasba aiskara upla handat milian nani pura, plun wauhwanka pâtka brisa.

Siknis saura nani taki ba, Jisas mita tnata pyua sainka wala kum baku yaban. Pas war tara Tasba aiskara aiklaban pyua ra siahka sikniska kum takan ba mita upla 21 milian nani pura iki tikan. Blasi pyua ra siknis saura plis kum kat alki kan ba baku apia kan, sakuna naha sikniska na nisan ailal ra bara kî nani wihka ra kan bara sin prukan. Naiwa pyua ra, impiara tara kum twi ami lui auya ba baku sida ba Tasba aiskara isti pali ilihwi auya, bara siknis wala nani sin, pusa sikniska, rihka sikniska, bara Chagas sikniska ba kuntri ailal nani ra trabil munisa.

Mani bani Tasba nikbanka nani ailal takisa. Naha nani kaikaia dukyara, diara paskanka raya nani sat sat brisa upla nani ra kaina manas maisapahkaia dukyara, ban sakuna Tasba nikbanka nani ba mita upla ailal iwi pliska nani ra kau ban sauhkisa bara naha sturka ba upla sut kakaira sa.

Baibil ba sin kaina manas win: “Man nani tanka bri kaia sma, tnata yua nani ra pyua karna nani balbia. Upla nani ba klauna ai dukyara baman luki kabia lalah ra latwan kaikbia, kakalwra kabia bara sin diara lalihkra kabia, Gâd mapara aisi kabia, ai aisika bila walras kabia, tingkikas kabia bara serts ra rispik apu kabia. Ai uplika nani ra latwan bara umpira sin kaikbia apia, upla nina aisasara nani kabia, ai wîna brinka nani sip alki takaskras kabia, kupias nani bara diara pain nani waihla kabia. Upla nani ra kunin muni pât ra dingki kabia, ai kupia lukras diara dauki kabia, prautkira nani kabia; Gâd ra plikaia ba watlikara, ai wîna brinka nani pliki kabia. Gâd ra lukaia laka ba pain talia kulki nani kabia, sakuna ai daukanka ni lika apia, kristian laka kasak karnika ba daukbia apia. Bahamuna uplika wal man diara apu bas” (2 Timoti 3:​1-5).

Yawan baha “pyua karna nani” ra iwisa baku damra walras sma ki?

Man kaikisma upla nani ba ai dukyara baman luki ba, diara lalihkra nani bara tara papulra nani baman bangwi ba?

Ya sip sa kunin wiaia, Tasba na upla taibi mamunra, tingkikas, kasak apia bara aisi wapni daukaia lukanka apu nani ba wal bangkisa?

 Man kaikisma ki, aisa bila walras nani ba bara latwan laka luha ba Tasba aiskara ailal pali pawan ba?

Man param kaikisma kaia sa, Tasba na ra upla nani ba latwan laka luha bara diara yamni laka luha ra iwi, ai wîna brinka nani baman pliki ba dukyara. Baibil baku ulbi tanka marikisa “tnata yua nani ra” upla nani daukanka ba dukyara.

Naha pyua nani ra iwi na dukyara, yawan kau sain nani kaikaia nit sa ki? Jisas sin kaina manas win naha pyua ra Gâd Kingka laka sturka yamni ba, Tasba aiskara smalkan kabia (Matyu 24:14). Witin baha aisan ba dukyara naiwa baku takisa ki?

La Atalaya, ulbi sakanka kum Baibil wina bri ba, Jehova Kingka laka sturka yamni ba smalkaia lukanka wal saki ba, Tasba aiskara kau bila aisanka ailal nani ra pat pat ulbi sakisa wauhkataya sa.

Jehova Witniska nani ba mani bani, awar tausin milian nani purkara, upla  wala nani ra Gâd Kingka laka sturka ba smalki tauki bangwisa.

Baku sin, Baibil wina ulbi sakanka dauki nani ba bila aisanka 400 ra sakisa, bara naha bila aisanka kum kum ba, upla daknika sirpi bara plis wihka ra iwi nani ba baman aisisa. Jehova witniska nani ba Gâd sturka yamni ba kuntri nani ailal ra smalkan sa, kî bara Tasba piska sirpi pulitik laka ra kulkanka uba yabras nani ra kat sin, wih smalki bangwan sa. Kuntri aihkika nani ra witin nani pat pat baibil smalkanka dauki bangwisa.

Baku bamna, Gâd Kingka laka sturka yamni ba Tasba aiskara smalki bangwisa, Tasba aiska uplika ra lakaia dukyara lika apia, ban sakuna kupia kraukanka kum baku. Plis sut ra upla nani ra sans yabisa, ya ba heven bara Tasba Papaskrika sapa nu takbia, bara ai lâka nani ra rispik muni bara ai walka nani ra latwan kaikaia lukanka brisa sapa (Luk 10:​25-​27; Param marikan [Reveleshan] 4:​11).

Pyu kunhku bilara, Gâd Kingka laka ba mita saurka laka Tasba ra ba klin muni, paradais kum daukbia (Luk 23:43).

Upla nani tnata yua dukyara aisaras, kan Baibil wi ba baku, ya Gâd kupia laka dauki nani ba, ban kaiara iwi bangwan kabia (Jan 3:​16, 36; 1 Jan 2:​17).

Tasba tnata yua nani dukyara sin aisaras, kan Gâd Bila ra pramis munisa ban kaiara Tasba purara upla iwi kabia (Lawana 37:29; 104:5; Aiseya 45:18).

Naha tnata yua nani tanka ba sika, rau munan laka ailal pawan ba, latwan laka luha ba bara ya naha yua saura nani ra latwan kaiki nani ba tnata mangkaia dukyara aisisa (Sins laka 2:​21, 22).

[Wahya 6 bakska ba]

Dia tnata yua nani dukyara aisisa?

Upla nani tnata yua dukyara aisaras, kan Baibil wi ba baku, ya Gâd kupia laka dauki nani ba, ban kaiara iwi bangwan kabia (Jan 3:16, 36; 1 Jan 2:17).

Tasba tnata yua nani dukyara sin aisaras, kan Gâd Bila ra pramis munisa ban kaiara Tasba purara upla iwi kabia (Lawana 37:29; 104:5; Aiseya 45:18).

Naha tnata yua nani tanka ba sika, rau munan laka ailal pawan ba, latwan laka luha ba bara ya naha yua saura nani ra latwan kaiki nani ba tnata mangkaia dukyara aisisa (Sins laka 2:21, 22).

[Wahya 7 bakska ba]

Rait pali Baibil ba Gâd Bila sa ki?

Baibil prapitka nani ba kli kli ulbi bangwi kan: “Dawan, Israel Gâdka Hulikira ba [ . . . ] aisisa” (Aiseya 43:14; Jirimaia 2:2). Jisas Kraist, Gâd Luhpia ba kat sin, param win ‘witin yakan aisaras kan ba’ (Jan 14:10). Baibil pali kat sin param aisisa: “Ulbanka aiska ba Gâd wînka puhbra mita sika” (2 Timoti 3:​16).

Baibil ba baku, buk wala kumi sin bila aisanka ailal ra ulbi sakras sa (Sociedades Biblicas Unidas wi ba baku, bila aisanka nani 2,200 purkara ulbi sakan sa) bara Baibil ba baku buk kumi sin yakabi lakras sa (4 tausin milian nani pura Tasba aiskara). Gâd naha sut daukan ba wina, yawan kau diara tara daukbia bila kaikaia sa ki?

Baibil ba rait pali Gâd wina balan ba dukyara kau tanka briaia brinkam sa kaka, Jehova Witniska nani ulbi sakan, La Biblia. . . ¿la Palabra de Dios, o palabra del hombre? bukka ba aisi kaiks.

Baibil ba, rait pali Gâd Bila sa luki aisi kaikma sa kaka rayakam ra yamnika tara brima.

[Wahya 8 bakska ba]

Gâd Kingka laka ba dia sa ki?

Jehova, rait aihwa Gâdka, heven bara Tasba Papaskrika ba mita, gabamint kum heven ra mangkan sa (Jirimaia 10:​10, 12).

Baibil ba, Gâd bui Jisas Kraist ra wihta aimakaia dukyara karnika yaban ba marikisa (Param marikan 11:15). Jisas Tasba ra kan pyua ra, karnika tara brikan ba marikan, Tasba karnika nani ba alki takaski, siknis nani sat sat raki bara upla nani pruan ba raiti wina buki kan ba wal sin (Matyu 9:​2-8; Mark 4:​37-​41; Jan 11:​11-44). Baibil aisanka kum win, Gâd bui Jisas ra yabia “karnika, prana ba bara king laka ba sin, bara upla satka bani ba sut, bila sat sat aisi ba sut ra sin yan dukya dauki kan” (Danyal 7:​13, 14). Baha gabamintka ba heven Kingka laka nina makisa, bara naiwa yua ra Jisas Kraist ba heven wina naha gabamintka wihta aimakan sa.

[Wahia 7 lilkika ba]

Sturi yamni nani ba Tasba aiskara smalki bangwisa