Rayakam Ba Ani Tanira Brih Auma Ki?

• Upla ailal ba, yu bani ra diara dauki ba kat luki ba mita, ai rayaka ba ani tanira brih auya sapa ai dara wali bangwras sa.

• Kaina tanira diara aihkakira nani takai ba dukyara, Baibil ba wan maisapahkisa aihwaki kaia, kan upla asla takanka nani Tasba aiskara ba sauhki tikai ba mita. Naha maisapahkanka na yamnika bri, pât wina swaki takaia sa kaka, yawan taim tikras bui diara kum daukaia sa.

• Upla kum kum ba Baibil tanka brisa bara trai kaikisa ai rayaka ra brih wapaia, ban sakuna turbanka nani ba mita yaban ai rayaka ba yabal walak brihwisa.

• Man rayakam anik brih auma ba wal amyapah sma ki? Diara daukaia lukisma pyua ra, kainam tanira dia takbia ba dukyara lukisma ki?

[Wahya 9 bakska ba]

Dia ba man mampara kau kulkanka tara brisa?

Naha nani tila wina, dia ba rayakam ra taura brisma ki? Ani ba ra kau kulkanka tara yabisma ba man laki kaiks.

Naha nani kumi bani ba rayakam ra brisma, ban sakuna tila wina bak saki brisma pyua ra, dia ba pas bak sakisma?

... Lilia saki daukanka nani ba

... Warkki ba

... Wîni yamnika ba

... Lilia kaia ba

... Maî ba

... Aisiki yaptiki ba

... Luhpi nani ba

... Kwala bara utla kum pain

... Diara sut ra kau pain kaia ba

... Gâd dukya daukaia ba

 [Wahya 10, 11 bakska nani ba]

Man diara kum daukaia lukuma pyua ra, daukaia want kapram ba kat takisa ki?

NAHA MAKABI WALANKA NANI BA LUKI KAIKS

LILIA SAKI DAUKANKA NANI BA. Diara kau ris aikaia dukya nani ba daukisna ki? Apia kaka sibrin pulanka laka nani siknis ai sakaia sip ba bara skahwa ai swiaia sip nani ba daukisna? Yang lukanki sa ki, wiria “lilia si”, ningkara pyu ailal ra ini kaia? Saura kulkras dukya dauki kamna sin, pulaia dukyara pyu uba yabi si, diara kulkanka kau tara bri ba tnayara lakisna ki?

WARKKI BA. Iwanka tnatka kum baku brisna, apia kaka alba ai brisa? Warkka daukisna ba, upla nani uba nit ba mita siknis takaia kat wark takisna ki? Maî bara luhpi nani lamara kaia watlikara, kau pura lui wark takisna ki? Wark kum aikan kupi ra turban ai munisa, apia kaka spirit laka mapara sa kaka, warkka ba lus tiwaia apia dukyara ban daukisna ki?

WÎNI YAMNIKA BA. Siknis takaia apia dukyara wîni ba main kaikisna, apia kaka main kaikras sna ki? Sturi aisisna pyua ra aima bani siknis takaia apia dukyara baman aisisna ki? Wîni tara ba main kaikisna ki, pamaliki ra pain main kaikaia dukyara?

LILIA KAIA BA. Yang maipara lilia kaia ba kau tara sa ki? Yang liliaki ba kau taura mangkisna ki, maî bara pamaliki liliaka nani ba wal? Rait aihwa Gâdka napakanka baku, yamni kaiki liliaka laka ba plikisna ki?

MAÎ BA. Yang want sna pyua kat maî baku kulkisna? Yang maî ra rispik munisna ki, witin ra rispik munaia pitka ba kat? Yang Gâd ra kasak lukisna ba, maî ra nahki kaikisna ba ra marikisna ki?

AISIKI YAPTIKI BA. Kau tuktan sna kaka, aisiki nani bila wali baku daukisna ki? Mapara brukwi aisaras, utla ra wark daukaia aiki nani ba dauki, anira ai blikan ba wina pyua kat bali, bara pâna saura aikuki prawras sna? Pat almuk sna kaka, witin nani diara nit pyua ra, rispik kat witin nani ra wali help munisna ki? Yang nahki witin nani ra kaikisna? Kupi laka ba kat, apia kaka Gâd Bila ra smalki ba baku?

LUHPI NANI BA. Luhpi nani ra lâ kat iwaia tanka ba smalkisna ki, apia kaka kul ra wih lan takbia sapa bila kaikisna? Witin aikuki pyu luisna ki, apia kaka pulaia dukya nani, tilivisan, computadora nani mita witin nani ra lilia saki bri kabia want sna? Gâd lâka nani alki briras pyua ra pâli lawi munisna ki, apia kaka kupi baikisna pyua kat?

KWALA BARA UTLA KUM PAIN. Dia praiska kat yang wîni daukra ra bara duki nani ra kulkanka yabisna ki? Baha dukya nani brisna ba mita nahki laima uplika nani ba ai kaikbia want sna? Pamaliki painka dukyara kau lukisna ki? Dia lukisna Gâd albika sna ba dukyara?

DIARA SUT RA KAU PAIN KAIA BA. Diara pain daukaia ba ra kau kulkanka yabisna ki? Yang trai kaikisna diara daukisna sut bara kau pain kaia? Kupi sauhkisna ki, upla wala kum kau diara pain dauki pyua ra?

GÂD DUKYA DAUKAIA BA. Yang diaura kau kulkanka tara yabisna? Gâd yamni ai kaikbia ba, apia kaka maî, luhpi nani, aisiki nani apia kaka kiaptinki yamni ai kaikbia ba? Yang pain iwaia dukyara wilin sna ki, Gâd dukya daukisna ba kau mayara lahbaia?

 BAIBIL SMALKANKA NANI NA TANKIRA LAKI KAIKS

Dia pliska ra Gâd ba rayakam ra mangki brisma?

Smasmalkra 12:13: “Gâd ra kulks bara ai lâka nani ba dauks, kan baha ba upla sut daukaia sa”.

MAMKABI WALS: “Yang naha ra aisi ba baku daukisna ki? Yang nahki tnatka ra pamaliki main kaikisna ba, warkki ba bara stadiki ba, Gâd lâka ra dia wi ba kat daukisna ki? Rayaki ra turban laka brisna ba mita apia kaka wihrika twilkanka nani ba mita Gâd dukya daukaia pyua sakras sna ki?”.

Gâd wal asla ra iwankam laka ba nahki sa ki?

Sins laka 3:​5, 6: “Dawan ra kupiam aiska ni kasak luki bas, bara man sinskam laka ba kat tniwi kapara. Diara daukisma nani sut ra, Dawan ba tamra bri bas, bara witin mai brih wabia, yabal wapni bak”.

Matyu 4:​10: “Man Dawan Gâdkam ra lulam kriki puram suni mayunma, bara witin dukya baman sin daukma”.

MAMKABI WALS: “Yang Gâd wal asla iwanki laka ba naku sa ki? Yang pât nani mapara buisna pyua ra bara yu bani ra diara daukisna ba ra marikisna ki, witin ra kasak lukisna ba?”.

Baibil aisi kaiki bara stadika takaia ba nahki praiska kat kulkanka yabisma ki?

Jan 17:3: “Bamna raya ban kaia laka ba lika, mai kakaira takaia, Gâd kumi baman kasakkira sma ba, bara Jisas Kraist ra sin kakaira takaia, witinka man mita blikram ba”.

MAMKABI WALS: “Yang Gâd Bila ba stadi taki luki kaikisna pyua ra, iwanki wal param marikisna ki, naha bila nani ra lukisna ba?”.

Kristian asla aidrubanka nani ra kulkanka aitani yabisma ki?

Hibru nani 10:​24, 25: “Bara yawan pana, pana wan walka nani ra help munaia trai kaikaia sa, latwan laka bri kaia bara diara yamni nani sin dauki kaia. Yawan asla aidrubi laka dauki ba swiaia apia sa, [ . . .] bara kau pali nanara Dawan yua ba pat baila kan kaiki ba”.

Lawana 122:1: “Nahki lilia takri witin nani ai win: ‘Kaisa yawan Dawan watla ra waia!’ ”.

MAMKABI WALS: “Yang nahki ra iwisna laka ba, marikisa ki, Gâd Bila ra wi ba kulkanka yabisna sapa? Diara wala nani ra kau kulkanka yabri ba mita, kati luan ba yang asla aidrubanka kum kum lus tiwri ki?”.

Man Gâd lukanka nani ba upla wala ra smalkisma pyua ra, liliakira taukisma ki?

Matyu 24:14: “Bara naha king laka sturka yamni na Tasba aiskara smalkan kabia, [ . . .] bara lika tnata ba aimakbia”.

Matyu 28:​19, 20: “Bamna man nani nisan sut uplika nani ra was, bara yang disaipelki nani dauki bangws [ . . .] bara smalki bangws dia, dia man nani ra adar maikri ba bila wali kaia”.

Lawana 96:​2: “Dawan ra aiwans, witin ai nina ra yamni sa wis, witin swaki sakan laka ba yu bani ra aisi bas”.

MAMKABI WALS: “Yang naha warkka ra kulkanka tara bri ba kat yabisna ki? Naha smalki taukisna pyua ra, kupi ra param brisna ki, yawan pulaia pyua ra iwras ba dukyara?”.