“Traika Kaikan Ra Kauhma Ra Sia”

“Aihwaki puram suni bas, traika kaikan ra kauhma ra sia.” (MATYU 26:41.)

 JISAS KRAIST, Gâd luhpia ba, pruaia baila kan pyua ra, taibanka tara munuhtara kan. Witin nu kan isti witin ra alki, pâtkira baku kulki, dus kum ra sabi panis muni ikaia kan ba. Pain ai tanka brikan, witin dia daukbia ba wina, ai Aisika nina ra kulkanka pain apia kaka kulkanka saura yabaia kan ba. Baha purkara, witin pain ai dara wali kan Tasba uplika nani kaina tani dukya ba ai mihta ra kan. Witin dia daukan naha taibanka nani na pura luaia dukyara?

² Ai disaipelka aikuki Getsemani gadinka ra wih bangwan, kan witin baha pliska ba lihki kan. Baha ra wan ningkara, witin ai disaipelka tila wina laiura taki, ai kupia aiska kwaki ai Aisa ra pura suni karnika makaban. Bara aima kumi baman makabras kan, ban sakuna aima yuhmpa ra daukan. Witin ba kasakkira kan, sakuna lukras kan baha taibanka ba yakan pura lubia (Matyu 26:​36-44).

³ Yawan sin naiwa pyua ra taibanka nani munuhtara iwisa. Bara tnata yua nani ra iwi ba dukyara, naha wauhkataya ra pat tanka nani laki kaikan. Tasba ra traika kaikanka nani bara taibanka nani ba kau karna takisa. Ya nani Gâd kupia laka daukisa wi, daukanka nani ba bara dia daukbia nani ba sin, sip sa Gâd nina ra kulkanka pain apia kaka kulkanka saura brih balaia bara Tasba raya ra iwaia bila kaikanka bri ba ra sin diara takaia. Yawan Jehova ra latwan kaikisa, bara wan rayaka tnata kat apia kaka ‘tnata yua kat’ bapi buaia want sa, ani ba pas takbia ba dukyara wan kupia lukras kaia (Matyu 24:13). Ban sakuna, tnata yua nani ra iwi ba dukyara, nahki yawan aihwaki kaia sip sa ki?

⁴ Jisas nu kan​​—baha pyua ra baku, naiwa pyua ra sin​—ai disaipelka nani ra taibanka munuhtara dingkan kabia ba dukyara; baha mita witin naku win: “Aihwaki puram suni bas, traika kaikan ra kauhma ra sia” (Matyu 26:41). Naha aisanka ba yawan mapara dia tanka brisa ¿Yawan dia traika kaikanka nani mapara buisa ki? Bara nahki yawan ‘aihwaki kaia sa’?

Yawan dia traika kaikanka nani mapara buisa ki?

⁵ Yawan sut ba yu bani ra “Debil kiwka” ra kahwaia traika kaikanka ra dimisa (2 Timoti 2:​26 DBLRW 1986). Baibil ba wan maisapahkisa Setan mita Jehova napakanka nani ra, taura mangki bri ba saura munaia dukyara (1 Pita 5:8; Param marikan 12:​12, 17). Witin dia lukanka wal daukisa? Wan ikaia dukyara lika apia. Bara yawan Gâd ra kasak luki prubia ba, Setan mapara pura luanka kum apia kabia, kan witin pain nu sa Jehova mita​​—pyua kat​—​kli baha uplika ra bukbia ba (Luk 20:​37, 38).

⁶ Debil ba wan rayaka purkara diara kum kau mana ba mihta dakbaia trai kaikisa: wan kupia aiska wal kasak wapni kat Gâd ra mayuni ba. Setan ba isti munisa Jehova wina tnayara wan lakaia dukyara. Baha mita, witin wan maisakapisa yawan kasak apia kabia​​—smalki tauki bangwbia apia, apia kaka Gâd laka nani ba lulkbia dukyara​—, yawan baku daukbia sa kaka, wan pura luan kabia (Epesus 6:​11-13). Baha mita ‘Traika kakaira ba’ wan mina blakanka nani mangkisa (Matyu 4:3).

⁷ Setan ba “kunin” sat sat yus munisa (Epesus 6:​11). Tasba dukya ailal briaia brinka, sibrin laka, namhpa namhpa lukanka bara wan wîna brinka nani plikaia ba sin. Tnatka kum kau pain yus muni ba sika, diara daukaia brinka  apu wan saki ba. Witin auya makira ba mita, nu sa diara daukaia brinka apu kaia ba swapni wan saki sauhkan laka ra wan brihwi ba (Sins laka 24:10). Baha mita yawan “swapan” wan dara wali pyua ba yus munisa wan traika kaiki wan pura luaia dukyara (Lawana 38:8).

⁸ Tnata yua ba kau lamara bali pyua ra, diara daukaia brinka apu wan saki dukya nani ba kau ailal takisa, bara yawan baha nani wina sip tnayara tawras (“Diara daukaia brinka apu wan saki nani ba”, bakska mayara ulban ba laki kaiks). Dukya nani na ani tani wina balbia sin, diara daukaia brinka apu kaia ba, wan karnika ra mayara lahbisa. Upla kum ai wîna tara bara ai sinska ra swapan bara ai spiritka ra kriwan sa kaka, witin mapara karna kabia pyu bri ba pain yus muni Baibil stadi takaia, asla aidrubanka ra waia bara smalki taukaia (Epesus 5:​15, 16). Wan kupia krauki kap Traika Kakaira ba wan pura luaia want sa. Sakuna tnata yua nani ra iwi ba luki si swapan takaia pyua apia sa! (Luk 21:​34-36.) Baku sa kaka, yawan nahki traika kaikanka nani mapara bui aihwaki bangwi kaia sa ki? Kaisa tnatka walhwal yawan ra help wan munaia sip ba kaikaia.

‘Wan pura suni kap’

⁹ Wan pura sunra bakku Jehova ra tniwi kap. Jisas Getsemani gadinka ra taibanka tara munuhtara kan pyua ra, dia daukan? Witin ai pura sunrakku Jehova ra help makaban, ai ta baiki ai pura sunikan ba mita “ai laptika ba tala tahwan tara baku Tasba ra tahwi kata” (Luk 22:44). Kaisa naha ra luki kaikaia: Jisas ba Setan ra kakaira pali kan, Setan mita traika kaikanka nani sat sat yus muni, Gâd albika nani ra mina blaki batakaia dauki kan nani ba sut Jisas heven wina kaiki kan. Ban sakuna, witin baha traika kaikanka nani ba mapara bapi bui, isi pali pura lubia lukras kan. Gâd luhpia kasakkira ba ai pura sunrakku Gâd helpka bara karnika makabaia ba aitani kaikan sa kaka, yawan sika naku kau dauki kaia sa! (1 Pita 2:​21.)

¹⁰ Baha purkara Jisas mita ai disaipelka nani ra “puram suni bas” wisi kli aisan: “Spiritkam ba wilin sa, sakuna wînam ba swapni sa” (Matyu 26:41). Dia wîna dukyara aisi kan? Witin ai wîna dukyara aisaras kan, kan Jisas wîna tara kasakka ra swapni takaia dukya apu kan (1 Pita 2:​22). Sakuna disaipel nani wîna tara ba sat wala kan. Bamna kasakkira apia bangwi kan ba mita bara saurka laka ba mita, help manas nit bangwi kan traika kaikanka nani ba pura luaia dukyara (Rom 7:​21-24). Baha mita ai disaipelka nani​​—bara ya nani kaina tani ra kristian smalkanka kasak ba alki bribia nani ra sin​—​ai pura suni bangwi kabia win, traika kaikanka nani mapara buaia dukyara (Matyu 6:​13). Dia tnatka ra Jehova naha pura sunra nani ba ansika yabisa? (Lawana 65:2.) Tnatka wal ra pan.

 ¹¹ Pas ba. Setan traika kaikanka nani, mina blakanka baku yabal kum ra yukukan sip kaikras ba Gâd mita yawan kaikbia help wan munisa. Yawan baha nani kaikras sa kaka kauhwaia sip sa. Baibil bara witin wina ulbanka nani saki bakku, Jehova mita Setan mina blakanka nani ba param ra sakisa, baku tnatka ra baha ra kauhbia apia dukyara tnayara wan lakisa. Mani ailal bilara, Baibil wina ulbanka saki nani ba bara asla aidrubanka tara dauki nani ba kli kli wan kupia krauki bangwisa upla ra si briaia, rug laka, Tasba dukya ailal briaia brinka, baku sin traika kaikanka wala nani Setan mita dauki ba dukyara aihwaki kaia (Sins laka 29:25; 1 Korint 10:​8-11; 1 Timoti 6:​9, 10). Nahmpa nahmpa lukras, Debil mina blakanka nani mangki ba wina Jehova wan maisapahki ba dukyara tingkika yabaia sa (2 Korint 2:​11). Traika kaikanka nani pura luaia helpka dukyara wan pura sunra ra makabi ba ra naha maisapahkanka nani na ansika kum sa.

¹² Walka ba. Jehova wan pura sunra nani ansika wankisa, traika kaikan nani mapara bubia dukyara karnika wanki ba wal. Ai bila ba naku wisa: “Traika kaikanka bri bangwma bara, Gâd mita baha ba wina swak takaia karnika sin maikbia, bara baku sip kama baha ba twilkaia” (1 Korint 10:13). Yawan Gâd ra tniwi kabia sa kaka witin swibia apia, traika kaikanka kum yarka uba karna taki, wan spiritka laka ba swapni taki baha mita wan pura lubia. Sakuna nahki baha wina “swak takaia karnika” ba wankisa? Ya nani “Spirit hulikira” makabi ba ra yabi wal (Luk 11:13). Baha spiritka ba wan kupia kraukisa, yawan diara yamni nani daukaia luki ba bara baibil lâka nani ba pain daukbia dukyara (Jan 14:26; Jems 1:​5, 6). Baku sin help wan munisa, diara saura nani daukaia brinka bri ba pura lui daukanka pain nani ba daukaia (Galesha 5:​22, 23). Gâd spiritka ba sip sa, wan panika kristian wala ra, wan “maisanihkra tara” kum baku daukaia (Kolosi 4:​11). Jehova wan pura sunra ansika latwan laka wal wanki ba dukyara, yawan tingkika yabisa ki?

Pât nani tilara bila kaiki kap

¹³ Yawan aihwaki kaia ba dukyara, pât nani tilara bila kaikanka bri kaia sa. Wan rayaka ra pât nani taibanka bali ba mita, pyu kum kum ra yawan sut ba saura wan dara walisa, sakuna aima kumira sin Gâd mita, wan rayaka ra trabil apu Tasba saura ra iwbia dukyara pramis wan munras kan ba wan kupia kraukaia sa. Blasi pyua ra, Gâd albika nani ba sin trabil nani mapara buan, nina bliki saura munanka, umpira laka, saura ai dara walanka nani bara siknis nani sat sat mapara (Wark nani 8:1; 2 Korint 8:​1, 2; 1 Tesalonaika 5:​14; 1 Timoti 5:​23).

¹⁴ Yawan sin naiwa pyua ra trabil nani wina pri apia sa: wan nina bliki saura wan munisa, lalah trabilka brisa, pyu kum kum ra saura wan dara walisa, siknis takisa bara pât wala nani paniska sin wauhwisa. Kan Jehova mita wan kaina kahbanka wankbia sa kaka, Setan sip sa Jehova mapara latubi aisaia (Sins laka 27:11). Rait pali ba, Jehova mita pât nani ba swin takisa ai napakanka nani ba traika kaikanka nani bara pât nani ba mapara bubia dukyara, bara napakanka kum kum ba, mapara bui uplika nani mihta ra raya pali prui bangwisa (Jan 16:2).

¹⁵ Baku sa kaka, Gâd dia pramiska munan? Kainara marikan ba baku, yawan witin ra wan kupia aiska ni kasak lukisa kaka, traika kaikanka nani mapara bapi buaia dukyara karnika nani wankbia (Sins laka 3:​5, 6). Witin ai Bila, ai spiritka bara ai uplika bakku, spirit lainka ra wan kan kahbisa bara witin wal asla iwi ba ra sin ta baikisa. Yawan baha asla iwanka ba pain main kaiki bribia sa kaka, wan rayaka tiwbia kat sin sip sa pura lui bangwaia. Gâd mita ai albika kasakkira nani ra mana aibapaia luki bara, diara kumi mita alki takaskaia apu sa, prura ba mita sin apia (Hibru nani 11:6). Bara Tasba raya pat takaia baila bara, diara wala pramis  munan nani ba sut tnata aimakbia, ya witin ra latwan kaiki nani ra sin blisin munbia (Lawana 145:16).

Blahwanka nani takan ba dukyara wan kupia krauki kap

¹⁶ Yawan tnata kat bapi buaia sa kaka, aitani sa wan kupia kraukaia blahwanka nani ba Gâd mita dia muni swin pât wauhwanka nani takan ba dukyara. Wan trabilka nani ba mapara pura luaia sip apia baku kaikisa kaka bara uba swapan baku wan dara walisa kaka, wan kupia krauki kap Setan mita Jehova king aimakaia raitka bri ba bara ai napakanka kasakka laka ba, namhpa namhpa lukanka ra dingkan (Job 1:​8-11; 2:​3, 4). Jehova mita sika nahki blahwanka na wapni mangkbia sapa, kau kanra tara sa wan rayaka ba wal. Dia muni ki?

¹⁷ Gâd bui swin pât nani ba kau taki auya ba mita sika, upla kau ailal Gâd kasakka tanka brih bangwan ba. Kaisa naha ra luki kaikaia: Jisas ba pât ailal wauhwan swaki wan sakaia dukyara (Jan 3:​16). Rait apia baha daukan ba dukyara yawan tingki lukisa? Baha mita kaisa wan makabi walaia: “Yawan wilin bangwisa ki, pât nani ba kau pyu wiria wauhwaia, upla wala nani swakwi takbia dukyara?”. Yawan tnata kat ban bapi buaia sa kaka, nu takaia sa Jehova sinska laka kau tara sa yawan sinska laka ba wal (Aiseya 55:9). Gâd mita, saurka nani tnata mangkaia dukyara pyu sakan ba aitani kabia, upla nani yamnika daukai ba kasakka dukyara bara pât nani bara ba wapnika mangkaia dukyara. Rait apia, Gâd kasakkira kum ba wina diara yamni baman bila kaikaia sa? (Rom 9:​14-24.)

‘Yawan Gâd lamara wap’

¹⁸ Tnata yua nani ra iwi ba luki si bara, aitani sa yawan Jehova lamara kaia. Wan auya tikbiara Setan ba tnatka ailal ra yawan Gâd wal pain asla iwi ba sauhki tikaia want ba. Witin want sa yawan tnata yua ba aimakbia apia lukbia, smalki tauki ba bara Baibil laka nani alki briaia ba sin nit apia sa lukbia want sa. Sakuna witin ba “kuninkira pali sa bara sin kunin aisika sa” (Jan 8:​44). Yawan ‘Debil mapara dutki buaia’ sa bara Jehova wal asla laka ra iwi ba main kaikaia sa. Baibil ba wan kupia kraukisa: “Man nani Gâd lamara was, bara witin man nani lamamra wabia” (Jems 4:​7, 8). Sakuna, nahki yawan Jehova lamara waia sip sa?

¹⁹ Wan pura sunaia ba bara Baibil stadi luki kaikaia ba aitani sa. Wan rayaka ra trabil ailal takan kau bapi buaia sip apia baku kaikisa kaka, Jehova ra wan kupia kwakaia sa. Yawan latan ba kat makabia sa kaka makabanka ansika ba kau param ra takbia. Bankra ansika ba man dia bila kaiki kapram ba apia kabia, sakuna yawan Gâd ra mayuni witin ra kasak kaia sa kaka bapi buaia dukyara help nit ba wankbia (1 Jan 5:​14). Witin wan rayaka ta bri ba wan dara wali pyua ra kau witin lamara wan dara walbia. Aitani sa Baibil aisi kaiki Jehova daukanka bara yabalka nani Baibil ra mariki bara sin luki kaikaia. Baha ra luki kaikaia ba sip daukisa kau witin ra kakaira takaia, nikbi wan munisa witin ra latwan kaikaia (Lawana 19:14). Bara diara sut purkara baha latwanka ba wan ta baikisa traika kaikanka nani mapara bapi bui aihwaki bangwi kaia (1 Jan 5:3).

²⁰ Jehova lamara kaia sa kaka, aitani sa wan muhni kasak luki nani ba wina laiura apia kaia. Naha wauhkataya ulbanka las ba ra baha dukyara laki kaikbia.

STADI TAKAN BA MAKABI WALANKA NANI

• Jisas dia daukan ai rayaka ba dan takaia baila kan taibanka tara munuhtara diman pyua ra, bara ai disaipelka nani ra dia daukbia win? (Baiki sakanka nani 1-4)

• Dia muni Setan ba Jehova napakanka nani mapara aiklabisa, bara dia tnatka ra wan traika kaikisa? (Baiki sakanka nani 5-8)

• Traika kaikanka nani mapara bapi buaia sa kaka, dia muni takaskras wan pura suni kaia sa (baiki sakanka nani 9-12), dia muni bila kaikaia sakuna pât tilara ba wan dara wali kaia sa (baiki sakanka nani 13-15), dia muni blahwanka nani takan ba dukyara wan kupia krauki kaia sa (baiki sakanka nani 16,​17) bara dia muni ‘Gâd lamara waia’ sa (baiki sakanka nani 18-20)?

[Wahya 25 bakska ba]

Diara daukaia brinka apu wan saki nani ba

Siknis apia kaka almuk takanka ba. Siknis kum sip rawras ba mita apia kaka almuk taki ba mita, Gâd dukya ailal daukaia sip apia wan munisa kaka, bankra sari wan daukbia (Hibru nani 6:​10).

Saura wan dara walanka. Bankra saura wan dara walbia Gâd Bila karna pali smalki bara, mâ ailal sakras (Sins laka 13:12).

Wan wîna ra kulkanka mayara yabaia. Sip sa upla kum mani ailal ra saura munan pâtka wauhwan kaka, upla kumi sin, Jehova kat sin witin ra want apia sa lukaia (1 Jan 3:​19, 20).

Kupia lukanka ra insauhkan nani ba. Upla kum, wal kumi Gâd ra mayuni uplika wala mita ai swira daukan ai dara wali pyua ra, ai kupia ra uba turban laka brih, kristian asla aidrubanka nani ra waia apia bara smalki taukaia sin swiaia lukisa (Luk 17:1).

Bliki saura munaia laka. Sip sa wan kasakka lukan laka ra pain kaiki bangwras uplika nani ba wina wan lawaska kikanka, wan mapara buanka bara wan nina blikanka pâtka nani ba balka wauhwaia (2 Timoti 3:​12; 2 Pita 3:​3, 4).

[Wahya 27 bakska ba]

Jisas wan kupia kraukan traika kaikanka nani mapara aiklabaia dukyara wan pura suni kaia