Ulbanka Daknika 5

Babilun ra priski brihwan ba wina Jerusalem tnaya kutbanka nani kli paskan ba kat

Israel uplika nani ba Babilun ra alba baku iwi kan pyua ra, ai kasakka laka trai kaikan ailal ra dingkan kan. Sadrak, Misak bara Abid–Negu ra pauta klauhwan lakni kubuska kum ra dingkan, sakuna Gâd mita witin nani ra swaki sakan. Ningkara, Midia Pirsia wal mita Babilun ra pura luan taim, Danyal ra layan nani untika kum ra lulkan, sakuna Gâd mita sin layanka nani bila praki witin ra kan kahban.

Tnata kat, Sairus Pirsia kingka ba mita Israel uplika nani ra prî sakan. Witin nani ra alba baku Babilun ra brihwan ba wina, 70 mani alkan bara kli ai kuntrika ra brihwan. Witin nani Jerusalem ra wan taim diara pas dauki bangwan ba, Jehova tempelka ba kli paskaia. Sakuna witin nani wark dauki bangwi kan ba pat pali waihla nani mita alki takaskan. Baha taka mita, witin nani Jerusalem ra wih bangwan wina, 22 mani luan ningkara tempel ba paski dan dauki bangwan.

Baha ningkara, yawan Isra tempel ba painkira daukaia wisi, wihka impakan ba dukyara lan taki bangwbia. Naha ba tempel paski dan takan ningkara, 47 mani bri kan pyua ra takan. Bara Isra impakanka ba wina 13 mani bri kan pyua ra, Nihimaya mita Jerusalem tnaya kutbanka nani kahwan kan ba paski help munan. Ulbanka Daknika MATSIP na 152 mani sturka dukyara aisisa baha pyua ra takan ba kat.