Sturka 80

Israel Uplika Nani Babilun Wina Takan

MIDIA bara Pirsia nani mita Babilun ra alkan ba wina mani wal baku luan kan. Bara nanara dia taki ba kais! Israel uplika nani Babilun wina taki bangwisa. Nahki pri taki bangwan? Ya mita swin auya?

Sairus, Pirsia kingka ba mita swin auya. Mani ailal kau Sairus aisubi takras kan kaina ra, witin dukyara Jehova mita ai prapitka Aiseya ra yaban naku ulban: ‘Yang dia want sna ba daukma. Dur nani ba param swin kabia taun ba dakbi brima dukyara.’ Bara rait Sairus mita Babilun dakbi briaia ba ta brin. Dur param swin kan bakku Midia Pirsia wal taun ra tihmia dimi bangwan.

Sakuna prapit Aiseya, kaina manas sin win kan Sairus mita Jerusalem bara tempel ba kli paskaia adarka yabia ba dukyara. King Sairus mita baku daukaia adarka yaban ki? Au. Witin Israel ulplika nani ra win: ‘Jerusalem ra wih, Gâdkam Jehova tempelka ba paski bangws.’ Bara Israel uplika nani ba baku daukaia dukyara impakan.

Sakuna Israel uplika nani Babilun ra kan ba sut Jerusalem ra impakaia sip apia kan. Uba wihka kan, 800 kilamitra nani baku bri kan, bara Israel uplika ailal ba siknis bara uba almuk bangwi kan. Baku sin pât wala nani ba ra kan. Sakuna ya waia sip apia kan nani ra Sairus mita win: ‘Jerusalem ra tempel paskaia dukyara wai nani ra, silba, gul bara prisantka wala nani yabi bangws.’

Baha mita, Israel uplika Jerusalem ra kli taui auya kan nani ba ra prisantka ailal yaban. Baku sin Jerusalem ra sauhkan pyua ra, king Nibyukadnisar mita Jehova tempelka wina kap tara bara sirpi nani brin kan ba Sairus mita kli yaban. Taun uplika ba diara ailal wal impakan.

Witin nani kati walhwal impakan ningkara, Israel uplika nani ba pyua kat Jerusalem ra wan. Taunka ba sauhkan bara upla apu takaskan ba wina 70 mani lubia win ba bri kan. Witin nani kli ai kuntrika ra wan kan, ban sakuna pât nani wauhwaia bri kan, yawan kaina ra kaikbia ba baku.

Aiseya 44:28; 45:1-4; Isra 1:1-11.