Jerusalem Tnaya Kutbanka Nani Ba
Sturka 83
Jerusalem Tnaya Kutbanka Nani Ba
KAIS nahki wark karna taki bangwi ba! Israel uplika nani Jerusalem tnaya kutbanka nani ba paskisa. Nibyukadnisar Jerusalem ra sauhkan ba wina 152 mani luan kan, baha pyua ra tnaya kutbanka nani ba sauhkan bara durka nani ba angki bangwan. Israel uplika nani Babilun wina kli taui wan pyua ra, taun tnaya kutbanka nani paskras kan.
Baha pyua nani ra, tnaya kutbanka apu iwi kan ba, nahki ai dara wali kan lukisma? Saura ai dara wali bangwi kan. Kan waihla nani ba isi pali witin nani mapara dimi aiklabaia sip kan. Sakuna las kat Nihimaya, lilka ra kaikisma na mita, upla nani ra help munan taun tnaya kutbanka nani ba kli paski bukaia. Man nu sma Nihimaya ba ya kan?
Nihimaya ba Israel wina kan, witin Susa taunka Mardukai Ester wal iwi kan ba wina sin. Witin king watla ra wark taki kan, baha mita sip kan Mardukai Ester wal panika pain kaia. Sakuna Baibil ba wiras sa Nihimaya ba, Ester maîa king Ahasuirus warkka taki kan sapa. Witin king Artaserksis warkka taki kan.
Kupiam krauks, Artaserksis ba king pain kum kan ba, witin mita sika Isra ra lalah yaban kan Jehova tempelka paskaia dukyara. Sakuna, Isra taun tnaya kutbanka nani kauhwan kan ba paski bukras kan. Baha mita, kaisa kaikaia Nihimaya naha ba nahki daukan sapa.
Artaserksis mita Isra ra, tempel paskaia wisi lalah yaban kan ba wina pat 13 mani luan bri kan. Bara Nihimaya ba king kapka kakahbra nani lalka kan. Witin king wainka kapka ba kahbi kan bara laki kaiki kan puisin apu kabia dukyara. Baha ba kulkanka tara warkka kum kan.
Yu kum Nihimaya muihnika Hanani bara upla wala nani Israel wina Nihimaya ra kaikaia wan. Witin nani mita Nihimaya ra win Israel uplika nani nahki pât wauhwi kan ba bara kau Jerusalem tnaya kutbanka nani kauhwan kan ba dukyara. Nihimaya ba uba sari takan, bara Jehova ra ai pura sunan naha sut dukyara.
Nihimaya sari kan ba, yu kum king latan kaiki win: ‘Dia muni sari sma?’ Nihimaya mita win Jerusalem uplika bara tnaya kutbanka nani ba saura pali ba mita. Bara king mita makabi walan: ‘Dia want sma?’
Bara Nihimaya mita king ra win: ‘Ai swis Jerusalem tnaya kutbanka nani ba paskaia waia.’ King Artaserksis ba uba kupia pain kan ba mita, Nihimaya ra swin wan. Bara tat nani sin yaban paskaia dukyara. Nihimaya ba Jerusalem ra wan pyu kunhku bri kan bara, witin dia daukaia luki kan ba taun uplika ra win. Bara taun uplika ba, pain kaiki, naku aisan: ‘Kaisa paski ta krikaia.’
Bara Israel waihla nani ba kaikan tnaya kutbanka ba kau purara uli auya kan taim, naku aisan: ‘Kaisa yawan uli sut ra iki, warkka ba alki takaski bangwaia.’ Sakuna Nihimaya naha walan taim, wark tatakra nani ra sord bara langsa nani yabi win: ‘Sia yabi bangwpara. Aiklabi bangws muihkam, luhpiam, maîam mairin bara wamtla nani dukyara sin.’
Taun uplika nani ba uba kupia karna kan. Bara witin nani ai sordka ba tihmia bara kakna ra ridi brih bangwi kan bara taun tnaya kutbanka nani ba takaskras paski bangwi kan. Baha mita 52 dis bilara paski dan dauki bangwan. Bara nanara taun bilara pain ai dara wali bangwi kan. Nihimaya Isra wal mita taun uplika nani ra Gâd lâka ba smalkan, bara upla nani ba lilia bangwi kan.
Sakuna baha pyua kat sin, Israel uplika ba kau Babilun ra brihwaras kan pyua ra iwi bangwi kan ba baku apia kan. Pirsia kingka ba king aimaki kan ba mita, taun uplika nani ba ban king dukya dauki kaia kan. Sakuna Jehova mita witin nani ra pramis munan king wala kum yabaia, taun uplika nani ra kupia kumi laka bri balbia dukyara. Ban sakuna, naha ba ya kaia kan? Bara witin nahki tnatka ra kupia kumi laka tasba ra bribalaia sip kan? Naha kingka ba ya kabia sapa tanka briaia dukyara 450 mani baku luan. Baha ningkara bibi painkira kum aisubi takan. Sakuna baha ba sturi wala kum sa.
