Murdikai, Ester Wal
Sturka 82
Murdikai, Ester Wal
KAISA kau Isra Jerusalem ra waras kan pyua nani ra wan kupia kraukaia. Murdikai Ester wal ba Israel uplika nani Persia kingka ra kau kulkanka tara bri kan uplika kan. Ester ba kwin kan bara ai antika luhpia waitna Murdikai ba king wina waitna wala kau kulkanka tara bri ba kan. Kaisa naha ba nahki takan sapa kaikaia.
Ester ba kau sirpi kan aisika nani pruan, baha mita Murdikai witin ra pakan. Ahasuirus, Pirsia kingka ba king watla kum Susa taunka ra bri kan, bara baha ra Murdikai ba witin albika nani kum kan. Yu kum Basti, kingka maîa ba king bila walras kan, bara king ai maîa mairin wala kum brin. Nu sma witin yaura pliki brin ba? Tyara painkira Ester ra brin.
Upla nani waitna tara papulra kum ba mawanra baui ba, nu sma ya waitnika sa? Witin Haman kan. Witin Pirsia taunka ra kulkanka tara bri kan. Witin brinka kan Murdikai iwi ba sin ai mawanra baubia. Sakuna Murdikai ba bauras kan. Kan witin upla saura kum mawanra bauaia ba yamni kaikras. Baha mita, Haman ba ai kupia sauhkan. Bara witin dia daukan sapa kaisa kaikaia.
Haman ba Israel uplika nani dukyara kunin baman aisi, king ra win: ‘Witin nani ba upla saura bara lâmka nani ba sin alki briras sa. Baha mita witin nani ra ikaia sa.’ Ahasuirus ba nu apu kan ai maîa mairin ba Israel uplika kan ba. Baku bara, witin Haman win ba wali, lâ kum mangkan Israel uplika nani sut ra yu kum ra ikaia dukyara.
Murdikai baha lâka ba mangkan walan pyua ra, uba wari taki, Ester ra ai bila blikan: ‘King ra aisas swaki wan sakbia dukyara.’ King ba mita upla kum ra witin ra kaikaia wabia paiwras kan kaka, Pirsia lâka mapara kan. Ban sakuna Ester ba paiwras kan wan. Witin wan pyua ra, king ba mita ai gulka dusa ba witin ra sakban, baha tanka ba witin ra ikaia apia kan. Ester mita king bara Haman wal sut ra plun tara pinka kum ra paiwan. Bara king ba mita Ester ra makabi walan, witin dia want kan sapa. Sakuna Ester yu wala plun tara wala daukbia bara witin bara Haman wabia sa kaka wibia win.
Bara baha daukan tihmika, Ester mita king ra win: ‘Yang bara taunki uplika nani sut ra ikaisa.’ Bara king ba uba ai kupia sauhki makabi walan: ‘Ya ba baku daukaisa ki?’
Bara Ester bila: ‘Baha waitnika saura ba Haman sa!’
Bara nanara lika king ba uba ai kupia sauhki, blikan Haman ba ikbia. Baha wina, king mita Murdikai ra witin ningkara upla wala kau kulkanka tara bri kan pliska ba yaban. Bara Murdikai mita daukan Israel uplika nani ra ikaia pyua aimakbia taim, witin nani aiklabi bangwaia, ai rayaka ba swaki sakaia dukyara. Murdikai ba kulkanka tara bri kan, baha mita upla wala ailal bui, Israel uplika nani ra help munan, witin nani ba ai waihla nani mihta wina swakwi takaia dukyara.
Baibil bukka Ester 1–10.
