Utla Tnayara Ulbanka Takan Ba
Sturka 78
Utla Tnayara Ulbanka Takan Ba
NAHA ra dia takan kaikisa? Uplika nani ba lilia tara kum brisa. Babilun kingka mita upla kulkanka tara bri tausin nani ra paiwan. Witin nani Jehova tempelka wina gul, silba bara kap tara satka wala nani sakan kan ba yus muni bangwi kan. Bara ban wina upla kum mihta pasa ra taki, utla tnaya ba ra ulban. Bara upla nani sut sirang iwan.
Baha pyua ra Bilsasar, Nibyukadnisar mulika ba king aimaki kan. Witin ai uplika nani ra win, sinskira nani ba brihwabia. Bara witin bila: ‘Ya naha ulbanka na aisikaiki tanka ai wibia sa kaka, witin ra prisantka manas yabamna bara witin ba yang wina upla yuhmpika kulkanka kau tara bri kabia.’ Sakuna sinskirka nani kumi sin, ulbanka ba aisikaiki tanka wiaia sip apia kan.
King yaptika ba bin nani taki kan wali, plun pi kan ba ra dimi aisan: ‘Dupali si bripara, kingkam ra waitna kum na ra sa Gâd hulikira nani ra kakaira sa. Man damikam Nibyukadnisar king aimaki kan pyua ra, witin ra sinskira nani sut lalka mangkan kan. Nina Danyal makisa. Witin ra paiws bara witin mai wibia dia tanka bri ba dukyara.’
Bara minitka ra Danyal ra brihwan. Danyal ba king mita prisantka nani yabaisa win ba want apia win ningkara, witin aisan dia muni yu kum Jehova mita Bilsasar damika ra, king laka wina sakan ba, bara win: ‘Witin uba tara puli kan baha mita Jehova panis munan.’
Bara Danyal Bilsasar ra win: ‘Man witin ra takan ba sut nu sma, bara ban wînam ra tara pulisma Nibyukadnisar baku. Jehova tempelka wina kap nani brih balram ba ra diara laiki disma. Man dus bara walpa wal paskan gâdka nani ra mayunisma, bara wan Papaskra Painkira ra mayunras sma. Baha mita Gâd naha mihta blikan, bila nani na ulbia dukyara.’
Bara Danyal win: ‘Ulban ba naku wisa: MINI, MINI, TEKEL bara PARSIN.’
‘MINI tanka ba Gâd bui man kingkam laka yua nani ba kulki kaikan tnata ba alkan sa. TEKEL tanka ba paun mai mankan bara mayara pali mai kulkan sa. Bara PARSIN tanka ba man kingkam laka ba baiki sakan sa, Midia bara Pirsia uplika nani mihta ra mangkan sa.’
Danyal kau aisi kan pyua ra, Babilun mapara Midia bara Pirsia uplika nani ba aiklabi ta krikan. Taun ba dakbi brih, Bilsasar ra ikan. Utla tnayara ulban kan ba, baha sim tihmika takan! Sakuna Israel uplika nani ra dia takan ki? Kau kaina ra kaikbia, sakuna pas kaikaia Danyal ra dia takan sapa.
