Sturka 114

Saurka Laka Sut Tnata Ba

MAN naha lilkika ra dia kaikisma ki? Upla kwara tara kum aras pihni ra uli aula sa. Sakuna ani wina witin nani aula ba kais. Heven pura wina kasbrika nani tilakku aras nani ba aula! Ban sakuna heven purara aras bara sa ki?

Apia, naha nani na rait aihwa araska apia sa. Kan aras nani ba kasbrika purara sip plapras, rait apia? Sakuna Baibil ba, aras nani heven ra ba dukyara aisisa. Nu sma dia muni?

Kan pyu luan ra aras nani ba yus muni kan war aiklabaia dukyara. Bara Gâd mita tasba uplika nani mapara war kum bri ba wan marikaia dukyara, Baibil ra upla nani aras ra uli heven wina iwi aula sa dukyara wan aisisa. Sakuna warka ba ani ra aiklabia ki? Harmagedon ra kabia bara naha warka ra sika tasba saurka sut ba sauhki tikbia.

Harmagedon ra Jisas ba naha aiklabanka ta bribia. Amya tikpara Jehova mita Jisas ra ai gabamintka kingka aimakaia dukyara brin ba. Baha mita Jisas kraun ba ai lal purara mangki brisa. Bara sord bri ba, Gâd waihla nani sut ra ikbia ba tanka marikisa. Yawan sirang iwaia sa ki, Gâd mita upla saura nani sut ra sauhki tikbia ba dukyara?

Sturi 10 ba kli laki kais. Lilkika ba ra dia kaikisma ki? Lisamra tara kum mita upla saura nani ra sauhki tikan ba. Sakuna lisamrika tara ba ya mita daukan? Jehova Gâd mita. Nanara sturi 15 ba laki kais. Dia kaikisma ki? Jehova mita Sadam bara Gomora wal ra pauta klauhwan wal sauki tikisa.

Nanara sturi 33 ba laki kais. Kaiki kais Idsipt war aiklabaia waginka nani bara araska nani ra dia taki ba. Ya mita yaban witin nani purara li ba kauhwan? Jehova mita daukan ai uplika nani kaina kahbaia dukyara. Nanara sturi 76 ba kais. Baha ra man kaikma, Jehova bui ai uplika nani saura kan ba mita sauhki tikbia yaban.

Baha mita, yawan sirang iwi bangwaia apia sa Jehova heven wina ai insalka nani ra blikka tasba ra saurka laka nani ba tnata mangkaia pyua ra. Sakuna baha ningkara dia takbia ki? Wahya wala ra laks dia taki ba kaikaia.

Param marikan [Reveleshan] 16:16; 19:11-16.